HILKIAS

[Ni Jehova ti Bingayko (Binglayko)].

1. Maysa a Levita iti pamilia ni Merari; anak ni Amzi ken inapo ti Etan a dinutokan ni David nga agserbi a kumakanta iti santuario.​—1Cr 6:31, 32, 44-46.

2. Maysa a Levita nga agay-aywan iti ruangan a kameng iti pamilia ni Merari a nadutokan iti daytoy nga annong idi tiempo ni David; anak ni Hosa.​—1Cr 26:10-12.

3. Ama ti Eliakim nga opisial iti palasio ni Ari Ezekias.​—2Ar 18:37.

4. Ti nangato a padi idi kaaldawan ni Ari Josias; anak ni Sallum ken ama ni Azarias; nalawag nga inapo ni Esdras a managkopia. (2Ar 22:3, 4; 1Cr 6:13; Esd 7:1, 2, 6) Kas nangato a padi, dakkel ti naaramidan ni Hilkias iti pannakaisubli ti pudno a panagdaydayaw nga insayangkat ni Josias. Idi madama a matartarimaan ti templo, nasarakan ni Hilkias ti mismo a “libro ti linteg ni Jehova babaen ti ima ni Moises.” Naisangsangayan unay dayta a nasarakanna ta mabalin a daytoy a manuskrito ket isu ti orihinal a libro nga insurat ni Moises. Inted dayta ni Hilkias ken Safan a sekretario, a nangipan iti manuskrito iti ari. Apaman a nangngegan ni Ari Josias ti panangbasa ni Safan iti libro, imbaonna ti maysa a pannakabagi a bunggoy nga indauluan ti Nangato a Padi a ni Hilkias tapno mapanda ken Hulda a mammadto a babai ket agimtuodda ken Jehova maigapu iti ari ken kadagiti umili.​—2Ar 22:3-14; 2Cr 34:14.

5. Ama ni Jeremias a mammadto; padi idiay Anatot iti daga ti Benjamin.​—Jer 1:1.

6. Ama ti Gemarias nga imbaon ni Ari Zedekias a kadua ni Elasa a mapan ken Ari Nabucodonosor idiay Babilonia.​—Jer 29:3.

7. Maysa a Levita a padi a nagsubli manipud Babilonia a kadua ni Zorobabel.​—Ne 12:1, 7.

8. Maysa kadagidiay sitatakder iti makannawan ni Esdras idi ibasbasana ti Linteg kadagiti umili.​—Ne 8:2-4.

9. Ti nagan ti maysa a napadian a sangakabbalayan iti dasig ti amma idi kaaldawan ni Nehemias a gobernador.​—Ne 12:12, 21, 26.