ALAD

Dagiti minuyongan ken dagiti kaubasan gagangay a napalikmutan kadagiti alad, naraber nga in-intar ti nasiit a mulmula, tapno masaluadan dayta a disso manipud kadagiti mannanakaw ken kadagiti panagsiba ti an-animal. (Isa 5:5) Ti sasao a ‘mangikabil iti alad’ aramaten ti Kasuratan iti piguratibo a kaipapanan tapno ipasimudaagna ti panangipaay iti salaknib. (Job 1:10) Iti sabali a bangir, ti ‘panangalad’ nausar a mangiladawan iti panangisaad kadagiti tubeng, wenno pangtiped, a mamagbalin iti indibidual wenno uray pay iti maysa a nasion kas awan gawgawayna ken nabaybay-an nga awananen iti ruaran. (Job 3:23; Os 2:6; idiligyo ti Job 19:8; Un 3:7-9.) Mainaig iti moral a kinarinuker a nagraira iti nagtetengngaan dagiti Israelita idi kaaldawanna, insurat ni Mikias a “daydiay kalilintegan kadakuada ket nakarkaro ngem iti alad a siit,” kayatna a sawen, makapuris, makapasakit, ken makadangran.​—Mik 7:4.