NAGBALAY A LINNAAW

Nakasilsilap a puraw a babassit a yelo a mabukel iti rabaw ti bambanag gapu iti direkta a condensation (panagbalay dagiti tedted ti danum) no madanon dagiti temperatura a mangpataud iti yelo. Atitiddog ken kasla dagum ti sukog dagitoy a kristal ti yelo; gagangay a dumketda a sitatakder iti bambanag a pakabuklanda ken naruayda iti pingir dagita a banag. Agparang dagitoy no ti alnaab iti atmospera ket dagus nga agyelo a saanen nga aglasat iti porma a likido, a mabukel dagita iti kaykayo, mulmula, ken dadduma pay a banag, a gagangay a mapasamak iti rabii. Masansan a masarakan dayta kadagiti tawa.

Ni Jehova dinakamatna ken Job ti “nagbalay a linnaaw ti langit,” agsipud ta tumaud dayta iti atmospera babaen iti condensation. (Job 38:29) Kunaen ti salmista maipapan ken Jehova: “Ti nagbalay a linnaaw iwarawarana a kas iti dapdapo.” (Sal 147:16) Nalaka nga ipaay ni Jehova ti nagbalay a linnaaw a kas iti panagiwaris ti maysa a tao iti dapdapo babaen iti imana. Ti nagbalay a linnaaw abbonganna wenno kalupkopanna ti bambanag a kas iti kaykayo, ruruot, ken balbalay, a kasla ket tay adda dapdapo nga inwaris ti di makita nga ima ni Jehova iti rabaw dagita a banag.

Ti manna nga impaay ni Jehova kadagiti Israelita bayat ti 40 a tawen a panagallaallada idiay let-ang ket nailadawan iti kastoy a pamay-an iti Exodo 16:14: “Nagalibungubong ti palunapin ti linnaaw ket adtoy iti rabaw ti let-ang adda napino a sinanniebe a banag, napino a kas iti nagbalay a linnaaw iti rabaw ti daga.”