“Umadanikayo iti Dios, ket Isu Umadaninto Kadakayo”
Sakbay ken Kalpasanna—Naan-anay a Nagbalbaliw ti Biagna
ANIAN a nagkas-ang ken awan mamaayna ti biag ni Matsepang! Isu ket balasitang idiay Lesotho, maysa a pagilian iti sentro ti South Africa. Napadakkel ni Matsepang kas maysa a Katoliko. Ngem imbes a natulongan nga umadani iti Dios, adu a tawen nga inabuso dagiti madre, a nangpasuksok kenkuana tapno agaramid iti imoral.
Kas resultana, kinagura ni Matsepang ti relihion ken saan a namati nga adda ti naayat a Namarsua a pudno a mangipateg kadagiti pinarsuana a tattao. Gapu iti panangbaybay-a ken panangabuso a sinagabana, nalapunos ni Matsepang iti saem ken nariknana nga awan pulos serserbina. Dimmakkel a nakarangranggas ken narungsot. Daytoy ti nangituggod kenkuana nga agbalin a kriminal.
Nagangayanna, naibarkada ni Matsepang iti grupo a mangrabrabsut iti sanikua dagiti pasahero kadagiti tren. Naaresto ken nasentensiaan a maibalud idiay South Africa. Idi agangay, naisubli iti ilina, idiay Lesotho, a sadiay intultuloyna ti panagbiagna kas mammartek, kriminal, naranggas, ken imoral.
Idi naminsan a nakaro ti leddaangna, nagpakpakaasi nga inkararag ni Matsepang ti tulong ti Dios. Inkarina, “Diosko, no malasatak daytoy, aramidek ti kabaelak nga agserbi kenka.”
Di nagbayag, addada misionero a Saksi ni Jehova nga immasideg ken ni Matsepang. Intukonda ti panangyadalda kenkuana iti Biblia. Iti panagadalna, naammuanna a maseknan ken saan a mangidumduma ti Dios. Kinapudnona, natarusanna a ni Satanas, “ti ama ti kinaulbod,” agus-usar kadagiti kinasikap ken kinamanangallilaw tapno ipariknana iti tao ti kinaawan serserbi ti biag ken guyugoyenna ida a mamati a saandanto pulos a makaay-ayo ken ni Jehova.—Juan 8:44; Efeso 6:11.
Iti kasunganina, anian a makaliwliwa ken ni Matsepang idi maammuanna a mabalintayo ti maaddaan iti nauneg a panagraem iti bagi no pagbabawyantayo dagiti basoltayo, agpakawan iti Dios, ken ikagumaan ti panangay-ayo kenkuana! Natulongan a mangtarus a ti “Dios dakdakkel ngem kadagiti pusotayo” ken matmatannatayo iti pamay-an a nalabit naiduma unay iti panangmatmattayo iti bagitayo.—1 Juan 3:19, 20.
Naragsakan unay ni Matsepang a makabasa iti daytoy a sasao ni salmista a David: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.” (Salmo 34:18) Kas maysa kadagiti “nadunor ti pusoda,” naammuanna a saan a baybay-an ni Jehova dagiti adipenna, uray no ti dadduma kadakuada ket naupay wenno mariknada nga awan pategda. Naragsakan a makaammo a maseknan ti Dios kadagiti amin a karnerona ken saranayenna ida kadagiti pakarigatan. (Salmo 55:22; 1 Pedro 5:6, 7) Nangnangruna a nagutugot iti sasao nga: “Umadanikayo iti Dios, ket isu umadaninto kadakayo.”—Santiago 4:8.
Di nagbayag, ti bileg ti Sao ti Dios, ti Biblia binalbaliwanna ti kabibiag ni Matsepang. Regular a timmabuno kadagiti Nakristianuan a gimong ken insardengnan dagiti di nainkasuratan nga aramidna. Ti resulta? Mariknana nga isu ket maikarin iti ayat ken anamong ti Dios. Sipud nabautisaran kas maysa a Saksi ni Jehova, rinibu nga oras ti binusbosna iti Nakristianuan a ministerio kas maysa nga agibumbunannag iti naimbag a damag ti Pagarian. Iti laksid ti nasaem a napalabasna, addaan ita ni Matsepang iti naragsak ken narang-ay a biag. Anian a nagdakkel a mangipakita iti bileg ti Biblia a mangbalbaliw iti biag!—Hebreo 4:12.
[Blurb iti panid 9]
“Diosko, no malasatak daytoy, aramidek ti kabaelak nga agserbi kenka”
[Kahon iti panid 9]
Dagiti Epektibo a Prinsipio ti Biblia
Dagiti prinsipio ti Biblia a nangliwliwa kadagiti biktima ti panagabuso iramanna dagiti sumaganad:
“Idi a ti mangrirriribuk a pampanunotko immaduda iti unegko, dagiti bukodmo [ti Dios] a pangliwliwa rinugianda a sappuyoten ti kararuak.” (Salmo 94:19) Gubuayan ti dakkel a pammabileg dagiti “pangliwliwa” ni Jehova a masarakan iti Saona. Ti panangusig kadagitoy bayat ti panagmennamenna ken panagkararag pakalmaenna dagiti makariribuk a pampanunot ken mangpabileg iti panagtalek iti Dios kas mannakaawat a Gayyem.
“[Ni Jehova] paimbagenna dagidiay nasnaayan ti pusona, ket bedbedanna dagiti naut-ot a pasetda.” (Salmo 147:3) No apresiarentayo ti kinamanangngaasi ni Jehova ken ti probisionna a mangabbong kadagiti basoltayo babaen ti pangsubbot a daton ni Jesus, sikokompiansa a makaadanitayo iti Dios a saantayo a marikna a kasla nakondenar ti pusotayo. Makaiyeg daytoy iti awan kaaspingna a liwliwa ken talna ti panunot.
“Awan ti tao a makaumay kaniak [ni Jesu-Kristo] malaksid no ti Ama, a nangibaon kaniak, ti mangyasideg kenkuana; ket pagungarekto iti kamaudianan nga aldaw.” (Juan 6:44) Babaen ti nasantuan nga espirituna ken ti trabaho a panangikasaba iti Pagarian, personal nga iyadaninatayo ni Jehova iti Anakna ket itedna kadatayo ti namnama a biag nga agnanayon.