Dagiti Nalinteg Agnanayon nga Idaydayawda ti Dios

“Daydiay nalinteg agpaayto a pakalaglagipan . . . Ti kinalintegna agtalinaed iti agnanayon.”​—Sal. 112:6, 9.

1. (a) Ania ti naragsak a masanguanan dagidiay nalinteg iti imatang ti Dios? (b) Ania ti tumaud a saludsod?

ANIAN a nagsayaat ti masanguanan ti amin a tattao a nalinteg iti imatang ti Dios! Agnanayonto a pagragsakanda nga ammuen ti ad-adu pay maipapan kadagiti agkakaimbag a galad ni Jehova. Aglaplapusananto ti pusoda iti pammadayaw bayat nga umad-adu ti masursuroda maipapan kadagiti pinarsua ti Dios. Ti ‘kinalinteg’ a naipaganetget iti Salmo 112 ti maysa kadagiti kangrunaan a maikalkalikagum kadagiti agsagrap iti kasta a nagsayaat a masanguanan. Ngem kasano a ti nasantuan ken nalinteg a Dios a ni Jehova ibilangna dagiti managbasol a tattao kas nalinteg? Uray no kasano ti panangikagumaantayo nga agaramid iti umiso, agbidduttayo latta ken nakaro pay ketdi dagita no dadduma.​—Roma 3:23; Sant. 3:2.

2. Ania a dua a milagro ti siaayat nga inaramid ni Jehova?

² Siaayat a nangipaay ni Jehova iti perpekto a solusion. Kasano? Umuna, babaen ti namilagruan a panangyakarna iti biag ti dungdungnguenna a nailangitan nga Anakna iti aanakan ti maysa a birhen tapno maipasngay kas perpekto a tao. (Luc. 1:30-35) Sa idi a ni Jesus ket pinapatayen dagiti kabusorna, nagaramid manen ni Jehova iti naisangsangayan a milagro. Pinagungarna ni Jesus kas nadayag nga espiritu a parsua.​—1 Ped. 3:18.

3. Apay a ti Dios siraragsak a ginunggonaanna ti Anakna iti nailangitan a biag?

³ Ni Jehova ginunggonaanna ni Jesus iti banag nga awan iti Anakna sakbay a nagbalin a tao​—ti di madadael a nailangitan a biag. (Heb. 7:15-17, 28) Naragsakan ni Jehova a nangaramid iti dayta agsipud ta nagtalinaed ni Jesus a natarnaw iti laksid dagiti nakaro a suot. Ni Jesus ket nakaipaay ngarud ken Amana iti kasayaatan ken naan-anay a sungbat iti pammardaya ni Satanas nga agserserbi dagiti tattao iti Dios gapu iti inaagum a motibo, saan a gapu iti naimpusuan nga ayat.​—Prov. 27:11.

4. (a) Apaman a nagsubli ni Jesus idiay langit, ania ti inaramidna maipaay kadatayo, ken ania ti reaksion ni Jehova? (b) Ania ti makunam iti inaramid da Jehova ken Jesus para kenka?

⁴ Adda pay inaramid ni Jesus idiay langit. ‘Nagparang iti sanguanan a mismo ti Dios maipaay kadatayo’ buyogen ti pateg ti “bukodna a dara.” Ti naayat a nailangitan nga Amatayo siaasi nga inawatna ti nagpateg a daton ni Jesus kas “pangikappia a sakripisio maipaay kadagiti basoltayo.” Gapuna, buyogen ti ‘nadalusan a konsiensia,’ makaipaaytayo iti “sagrado a panagserbi iti sibibiag a Dios.” Maibagatayo metten ti kas iti panglukat a sasao ti Salmo 112 nga “Idaydayawyo ni Jah”!​—Heb. 9:12-14, 24; 1 Juan 2:2.

5. (a) Ania ti masapul nga aramidentayo tapno makapagtalinaedtayo a nalinteg iti imatang ti Dios? (b) Kasano ti pannakaurnos ti Salmo 111 ken Salmo 112?

⁵ Tapno makapagtalinaedtayo a nalinteg iti imatang ti Dios, masapul nga itultuloytayo a paneknekan nga adda pammatitayo iti dara nga imparukpok ni Jesus. Rumbeng nga inaldaw nga agyamantayo iti kasta unay a panagayat ni Jehova kadatayo. (Juan 3:16) Nasken met a kanayontayo nga adalen ti Sao ti Dios ken ikagumaantayo ti agbiag a maitunos iti mensahena. Naglaon ti Salmo 112 iti agkakaimbag a balakad kadagiti amin nga agtarigagay a mangtaginayon iti nadalus a konsiensiada iti imatang ti Dios. Nainaig daytoy a salmo iti Salmo 111. Agpada a mangrugida iti “Idaydayawyo ni Jah!” wenno “Aleluya!” ken sarunuen ti 22 a linia, a kada linia ket mangrugi iti maysa kadagiti 22 a letra ti Hebreo nga alpabeto.a

Pakaibatayan ti Kinaragsak

6. Iti Salmo 112, kasano a mabendisionan ti “tao” a managbuteng iti Dios?

⁶ “Naragsak ti tao nga agbuteng ken Jehova, a kadagiti bilinna naragsakan iti kasta unay. Mannakabalin iti daga ti pagbalinanto ti putotna. No maipapan iti kaputotan dagidiay napalungdo, mabendisionanto.” (Sal. 112:1, 2) Imutektekam ta maysa a “tao” ti immuna a dinakamat ti salmista sa nagusar iti pang-adu a termino a “dagidiay napalungdo” iti maudi a paset ti bersikulo 2. Ipasimudaag dayta a ti Salmo 112 ket tumukoy iti maysa a grupo a buklen ti adu a tao. Makapainteres ta napaltiingan ni apostol Pablo a mangyaplikar iti Salmo 112:9 kadagiti Kristiano idi umuna a siglo. (Basaen ti 2 Corinto 9:8, 9.) Anian a nagsayaat ti panangiladawan daytoy a salmo no kasano nga agbalin a naragsak dagiti pasurot ni Kristo ita ditoy daga!

7. Apay a dagiti agserserbi iti Dios masapul nga addaanda iti umno a panagbuteng kenkuana, ken kasano koma ti panangmatmatmo kadagiti bilin ti Dios?

⁷ Kas nadakamat iti Salmo 112:1, nakaragragsak dagitoy a pudno a Kristiano bayat a magmagnada “nga agbuteng ken Jehova.” Makatulong kadakuada ti umno a panagbuteng a mapagura ti Dios tapno masarangetda ti espiritu ti lubong ni Satanas. ‘Pagragsakanda iti kasta unay’ ti panagadal iti Sao ti Dios ken panagtulnog kadagiti bilinna. Karaman iti dayta a bilin ti panangikasaba iti naimbag a damag ti Pagarian iti intero a daga. Ikagkagumaanda ti agaramid iti adalan kadagiti tattao iti amin a nasion bayat nga ipakpakdaarda kadagiti nadangkes ti umas-asidegen nga aldaw ti panangukom ti Dios.​—Ezeq. 3:17, 18; Mat. 28:19, 20.

8. (a) Kasano a nagunggonaan ti nasungdo nga ili ti Dios ita gapu iti kinaregtada? (b) Aniada a bendision ti masagrapto dagidiay addaan iti naindagaan a namnama?

⁸ Gapu iti panagtulnogda kadagita a bilin, dagiti agserserbi iti Dios ditoy daga ket agdagup itan iti nasurok a pito a milion. Siasino ti di umannugot a ti ilina ket nagbalinen a “mannakabalin iti daga”? (Juan 10:16; Apoc. 7:9, 14) Ken anian a ‘pannakabendisionda’ pay inton itungpal ti Dios ti panggepna! Kas maysa a grupo, dagiti addaan iti naindagaan a namnama ket makalasatto iti umas-asidegen a “dakkel a rigat” tapno buklenda ti “baro a daga” ken kadakuada nga “agtaeng ti kinalinteg.” Inton agangay, ad-addanto pay a ‘mabendisionan’ dagiti makalasat iti Armagedon. Isudanto ti sumabat iti riniwriw a mapagungar. Anian a makapagagar a namnama! Kamaudiananna, dagidiay ‘maragragsakan unay’ iti bilbilin ti Dios agbalinda a perpekto a tattao ken agnanayon a tagiragsakenda ti “nadayag a wayawaya ti annak ti Dios.”​—2 Ped. 3:13; Roma 8:21.

Nainsiriban a Panangusar iti Kinabaknang

9, 10. Kasano nga us-usaren dagiti pudno a Kristiano ti naespirituan a kinabaknangda, ken kasano nga agtalinaed iti agnanayon ti kinalintegda?

⁹ “Ti napapateg a bambanag ken kinabaknang addada iti balayna; ket ti kinalintegna agtalinaed iti agnanayon. Isu nagsilnag iti sipnget kas maysa a silaw kadagidiay napalungdo. Isu managparabur ken naasi ken nalinteg.” (Sal. 112:3, 4) Idi panawen ti Biblia, ti dadduma nga agserserbi iti Dios ket pagaammo gapu iti material a kinabaknangda. Iti sabali pay nga anagna, dagiti anamongan ti Dios ket pudno a bumaknang, nupay saan nga iti material a banag. Kinapudnona, kaaduan kadagidiay sipapakumbaba nga agserserbi iti Dios ket nalabit nakurapay ken matagtagibassit, a kas met la idi adda ni Jesus ditoy daga. (Luc. 4:18; 7:22; Juan 7:49) Ngem adu man wenno bassit ti material a sanikua ti maysa, posible latta nga agbalin a nabaknang iti naespirituan.​—Mat. 6:20; 1 Tim. 6:18, 19; basaen ti Santiago 2:5.

¹⁰ Dagiti napulotan a Kristiano ken ti kakaduada dida bukbukodan ti naespirituan a kinabaknangda. Imbes ketdi, ‘agsilsilnagda’ iti nasipnget a lubong ni Satanas “kas maysa a silaw kadagidiay napalungdo.” Ar-aramidenda dayta babaen ti panangtulongda iti sabsabali a magunggonaan iti nagpateg a sirib ken pannakaammo manipud iti Dios. Ikagkagumaan dagiti bumusbusor a pasardengen ti trabaho a panangasaba maipapan iti Pagarian, ngem mapaayda laeng. Imbes ketdi, “agtalinaed iti agnanayon” ti bunga daytoy a nalinteg a trabaho. Babaen ti panagtalinaedda a nalinteg iti laksid dagiti suot, makapagtalek dagiti agserserbi iti Dios nga agbiagdanto nga awan inggana wenno ‘agtalinaedda iti agnanayon.’

11, 12. Ania ti dadduma a pangus-usaran ti ili ti Dios kadagiti material a sanikuada?

¹¹ No maipapan iti material a bambanag, pudno a naparabur ti ili ti Dios, agpadpada ti napulotan a klase adipen ken dagiti mangbukel iti “dakkel a bunggoy.” Kuna ti Salmo 112:9: “Nagibunong a sisasaknap; nangted kadagidiay napanglaw.” Masansan a mangted dagiti pudno a Kristiano ita iti material a kontribusion agpaay kadagiti sabsabali nga agkasapulan, kapammatianda man wenno saan. Us-usarenda met dagiti material a sanikuada a mangsuportar kadagiti urnos a panangsaranay no adda didigra. Kas dinakamat ni Jesus, gubuayan met dayta ti kinaragsak.​—Basaen ti Aramid 20:35; 2 Corinto 9:7.

¹² Kanayonanna, panunotenyo ti magasgastos iti panangipablaak iti daytoy a magasin iti 172 a lenguahe, a kaaduan kadagita ket pagsasao dagiti nakurapay. Panunotenyo met a magun-odanen daytoy a magasin iti nadumaduma a sign language nga us-usaren dagiti tuleng, ken iti Braille a para kadagiti bulsek.

Naparabur ken Nainkalintegan

13. Siasino dagiti kasayaatan nga ehemplo ti kinaparabur, ken kasanotay a matulad ida?

¹³ “Naimbag ti tao a managparabur ken agpapautang.” (Sal. 112:5) Nalabit napaliiwyon a saan a kanayon a naparabur dagidiay tumultulong iti sabsabali. Mangted ti dadduma tapno ipakitada a nabakbaknangda ngem iti sabsabali, wenno mapilpilitda a mangted. Saan a makaparagsak ti umawat iti tulong no iparikna ti mangted a nababbabaka, perhuisio wenno dadagsenka. Ngem anian a makapabang-ar nga awaten ti tulong ti managparabur! Ni Jehova ti kasayaatan nga ehemplo ti naparabur ken naragsak a Manangted. (1 Tim. 1:11; Sant. 1:5, 17) Naan-anay nga inyanninaw ni Jesu-Kristo ti nagsayaat nga ulidan ni Amana. (Mar. 1:40-42) Gapuna, tapno nalintegtayo iti imatang ti Dios, siraragsak ken sipaparabur a mangtedtayo, nangruna no mangipapaaytayo iti naespirituan a tulong iti tay-ak ti serbisio.

14. Ania ti sumagmamano a wagas a ‘mataginayontayo dagiti aramidtayo buyogen ti hustisia’?

¹⁴ “Taginayonenna dagiti aramidna buyogen ti hustisia.” (Sal. 112:5) Kas naipadto, ti matalek a klase mayordomo ay-aywananna dagiti sanikua ti Apona maitunos iti hustisia ni Jehova. (Basaen ti Lucas 12:42-44.) Makita daytoy iti Nainkasuratan a panangiwanwan a maipapaay kadagiti panglakayen a mangtamtaming no dadduma kadagiti kaso ti nadagsen a basol iti kongregasion. Ti nainkalintegan a panangtaming iti bambanag ket nabatad met iti naibasar-Biblia nga instruksion nga ipapaay ti klase adipen maipapan iti maiparbeng a panagandar ti amin a kongregasion, pagtaengan dagiti misionero, ken pagtaengan a Bethel. Maikalkalikagum met ti kinahustisia saan laeng a kadagiti panglakayen no di ket iti sabsabali pay a Kristiano iti pannakilangenda iti kapammatian ken dida kapammatian, ken uray iti bambanag mainaig iti negosio.​—Basaen ti Mikias 6:8, 11.

Dagiti Bendision Kadagiti Nalinteg

15, 16. (a) No kadagiti nalinteg, ania ti epekto kadakuada dagiti dakes a damag? (b) Ania ti determinado nga itultuloy nga aramiden dagiti adipen ti Dios?

¹⁵ “Ta uray kaanoman isu saanto a mapagdiwengdiweng. Daydiay nalinteg agpaayto a pakalaglagipan agingga iti tiempo a di nakedngan. Saanto a mabuteng uray iti dakes a damag. Ti pusona natibker, napagkammatalek ken Jehova. Ti pusona di mapagkintayeg; isu saanto a mabuteng, agingga nga isu kumita kadagiti kabusorna.” (Sal. 112:6-8) Iti intero a pakasaritaan ti tao, awan pay pulos idi ti kas iti kaadu ita ti dakes a damdamag, kas iti gubgubat, terorismo, kabbaro ken agsublisubli a saksakit, krimen, kinapanglaw, ken makadadael a polusion. Dagiti ibilang ti Dios a nalinteg dida maliklikan dagiti epekto dagita a dakes a damdamag, ngem dida pagamkan ti masanguanan. Imbes ketdi, “natibker” ken “di mapagkintayeg” ti pusoda bayat a pampanunotenda ti masanguanan buyogen ti panagtalek, ta ammoda nga asidegen ti nalinteg a baro a lubong ti Dios. No adda man mapasamak a didigra, ad-adda a makapagibturda ta agpannurayda iti tulong ni Jehova. Dinanto pulos ipalubos a mabaybay-an a “mapagdiwengdiweng” dagidiay nalinteg ta tulongan ken pabilgenna ida nga agibtur.​—Fil. 4:13.

¹⁶ Dagiti nalinteg nga adipen ti Dios masapul met nga anusanda ti gura ken pammadpadakes dagiti bumusbusor, ngem dagita dida pulos mapagulimek dagiti pudno a Kristiano. Imbes ketdi, dagiti adipen ti Dios agtultuloyda a natibker ken natured iti trabaho nga inted ni Jehova kadakuada​—ti panangikasaba iti naimbag a damag ti Pagarian ken panangaramid iti adalan iti amin a mangipangag. Awan duadua a dumegdeg ti ibubusor kadagiti nalinteg bayat nga umas-asideg ti panungpalan. Kumaro a kumaro ti kasta a pananggura agingga iti sangalubongan nga iraraut ni Satanas a Diablo kas ni Gog iti Magog. Kamaudiananna, ‘makitatayto dagiti kabusortayo’ bayat ti nakababain a pannakaabakda. Nagsayaatto ketdin a maimatangan ti naan-anay a pannakasantipikar ti nagan ni Jehova!​—Ezeq. 38:18, 22, 23.

“Maitan-okto Buyogen ti Dayag”

17. Kasanonto a dagiti nalinteg ‘maitan-okda buyogen ti dayag’?

¹⁷ Nakaragragsakto la ketdi ti agdayaw ken Jehova a sangsangkamaysa ken awanen ti ibubusor ti Diablo ken ti lubongna! Dinto agsarday ti kasta a kinaragsak dagiti agtalinaed a nalinteg iti imatang ti Dios. Didanto mapadasan ti maibabain ken maabak, ta inkari ni Jehova a dagiti ibilangna a nalinteg ket “maitan-okto buyogen ti dayag.” (Sal. 112:9) Agrag-odanto a sibaballigi inton makitada ti pannakaparmek ti amin a bumusbusor iti kinasoberano ni Jehova.

18. Kasanonto a matungpal ti pangserra a sasao ti Salmo 112?

¹⁸ “Daydiay met laeng nadangkes makitananto ket sigurado nga agluksaw. Ingaretngetnanto dagiti mismo a ngipenna ket pudno nga agrunaw. Ti tarigagay dagidiay nadangkes mapukawto.” (Sal. 112:10) Amin nga agtultuloy a bumusor iti ili ti Dios ket asidegen a ‘marunaw’ iti apal ken gurada. Iti umad-adanin a “dakkel a rigat,” ti tarigagayda a makakita iti panagpatingga ti trabahotayo ket mapukawto a kagiddanda.​—Mat. 24: 21.

19. Iti ania a makapagtalektayo?

¹⁹ Maysakanto kadi kadagiti naragsak a makalasat iti dayta a naindaklan a panagballigi? Wenno no bilang ta maturogka ken patay gapu iti sakit, kinalakay wenno kinabaket sakbay nga agpatingga ti lubong ni Satanas, maysakanto kadi kadagiti “nalinteg” a mariing iti panagungar? (Ara. 24:15) Mabalin a wen ti sungbatmo no itultuloymo a paneknekan nga adda pammatim iti daton a pangsubbot ni Jesus ken no itultuloymo a tuladen ni Jehova, kas iti ar-aramiden dagidiay irepresentar ti nalinteg a “tao” a nadeskribir iti Salmo 112. (Basaen ti Efeso 5:1, 2.) Siguraduen ni Jehova a dinto pulos malipatan dagiti nalinteg nga aramidda wenno ti “pakalaglagipan” kadakuada. Agnanayon a laglagipen ken ay-ayaten ida ni Jehova.​—Sal. 112:3, 6, 9.

[Footnote]

Mamagpanunot a Salsaludsod

• Ania ti sumagmamano a rason a maidir-itayo ti “Aleluya”?

• Aniada a paspasamak ita ti mangparparagsak unay kadagiti pudno a Kristiano?

• Ania a kita ti manangted ti ipatpateg ni Jehova?

[Ladawan iti panid 25]

Tapno makapagtalinaedtayo a nalinteg iti imatang ti Dios, masapul nga itultuloytayo a paneknekan nga adda pammatitayo iti dara nga imparukpok ni Jesus

[Ladawan iti panid 26]

Dagiti maipapaay a naimpusuan a kontribusion ket makatulong iti trabaho a panangsaranay ken panangiwaras kadagiti naibatay-Biblia a publikasion