Ania ti Mangparagsak Kadagiti Tattao?
Iti dua a dekada maysa a grupo dagiti managsirarak iti sangalubongan ti nagaramid iti sistematiko a panangadal iti kinaragsak. Ti natakkuatanda? “Ti kinaragsak di agparang nga agpannuray a nangnangruna kadagiti makinruar a kasasaad,” kuna ti magasin a Scientific American.
Daytoy a nasientipikuan a warnakan kinunana pay: “Ti kinabaknang dina met ipamatmat ti kinaragsak. Dagiti tattao saanda a naragragsak no narangrang-ay ti kulturada. . . . Iti kaaduan a nasion bassit laeng ti pagnaigan ti birok ken ti kinaragsak.”
Ipamatmat dagiti panagadal ti uppat a kababalin a mangilasin kadagiti naragsak a tattao: Kayatda ti bagida ken panagraemda unay ti bagida, mariknada a makontrolda ti personal a panagbiagda, manginanamada, ken saanda nga ipangpangruna ti bagbagida. Kasta met, ti nasayaat a panagasawa ken ti nasinged a personal a relasion mangipaayda iti naragsak a panagbiag, ket dagitoy pasalun-aten ken pagpautenda ti panagbiag.
Makapainteres ta inreport ti Scientific American: “Dagiti tattao nga aktibo iti relihion ireportda met ti ad-adda a kinaragsak. Maysa a surbey ti Gallup natakkuatanna a mamindua a daras nga ad-adu dagiti relihioso unay a tattao ngem dagidiay di unay makiramraman iti naespirituan a mangibaga a nakaragragsakda. Dadduma a surbey, agraman ti 16-nasion a tumultulong iti panangadal kadagiti 166,000 a tattao kadagiti 14 a nasion, natakkuatanda a ti naipadamag a kinaragsak ken pannakapnek iti biag tumaud iti ad-adda a relihioso a pannakikadua ken masansan nga itatabuno kadagiti serbisio ti panagdayaw.”
Nabayagen nga impalgak ni salmista David a ti personal a kinaragsak mainaig a naimbag iti agkaykaysa a panagdayaw ken Jehova a Dios, ta insuratna: “Naragsakanak idi kinunada kaniak: ‘Intayon idiay balay ni Jehova.’”—Salmo 122:1.
Awan duadua a pinaregta ni apostol Pablo dagiti padana a Kristiano: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa”! (Hebreo 10:24, 25) Kinapudnona, ti panagtataripnong iti panagdayaw iti Dios a kadua dagidiay addaan iti kasta a napateg a pammati ket maysa a naragsak nga okasion para kadagiti agayat iti kinapudno ti Biblia. Minilion a Saksi ni Jehova ti nakatakkuat a pudno daytoy ket awisendakayo a mangpadas itoy a mismo babaen ti pannakitimpuyogyo kadakuada iti panagdayaw idiay Kingdom Hall nga asideg kadakayo.