PANANGPUSOT
Ti pamay-an a panangsanay iti agsussuso nga ubing nga agbaliw ti pannakapakanna. Kadagidi nagkauna a tiempo, gagangay a ti ina pasusuenna ti anakna iti sumagmamano a tiempo. Ngem no tumaud dagiti kasasaad a kas ti awan umdas a gatas ti ina wenno ti nasapa nga ipapatayna, ngarud kalikagumanna ti panangala iti maysa a babai a mangtagibi iti ubing. (Ex 2:5-10) Maysa a napateg a pasamak iti biag ti ubing ti tiempo a pannakaisardeng ti panagsusona. (Isa 11:8; 28:9) Daytoy naragsak a pasamak ket mabalin a maaramid ti maysa a padaya a kas iti daydiay inangay ni Abraham idi napusot ni Isaac.—Ge 21:8.
Kadagidi a tiempo, napapaut ti panangpasuso dagiti babbai iti annakda ngem ti maar-aramid ita iti kaaduan a paset ti daga. Apaman a napusot ni Samuel, kalkalainganna ti edadna tapno maited iti aywan ni Eli a nangato a padi ken tapno agserbi iti tabernakulo. (1Sm 1:24-28) Mabalin nga agtawen idin iti di nakurkurang ngem tallo, ta iti dayta nga edad a mangrugi ti pannakaiparehistro dagiti lallaki a Levita. (2Cr 31:16) Iti librona a Family, Love and the Bible (London, 1960, p. 175), kuna ni Raphael Patai maipapan kadagiti Arabo nga ubbing: “Adda dagiti pagaammo a pasamak a mapasuso ti maysa nga ubing agingga iti maikasangapulo a tawenna.” Ipakita ti pammaneknek a napusot ni Isaac idi agarup lima ti tawenna.—Kitaenyo ti ISAAC.
Nupay ti napusot nga ubing saannan a sapsapulen ti gatas manipud iti inana, il-iliwenna latta ti kinatalged ken pannakapnek iti panangubba ni inana. Iti umasping a pamay-an, arigna inep-ep ken pinagulimek ni David ti kararuana “kas iti maysa a kapuspusot iti inana,” ket ti kararuana ‘kas iti maysa a kapuspusot kenkuana.’ Nalawag a naep-ep, napagulimek, ken napennek ti kararua ni David agsipud ta saanna a tinarigagayan ti agbalin a natan-ok, imparangarangna ti kinapakumbaba, liniklikanna ti kinatangsit, ken inidianna ti pannagna iti bambanag a naindaklan unay maipaay kenkuana. Indagadagna a kasta met laeng ti aramiden ti Israel, a sipapakumbaba nga ‘agurayda ken Jehova agingga iti tiempo a di nakedngan.’—Sal 131:1-3.