Ti Panangmatmat iti Biblia
Kararag iti Panagay-ayam—Umim-imdeng Aya ti Dios?
UMAWENG ti angin iti ragsak bayat a dagiti rinibo simrekda iti estadium, a mangiririaw iti panangsuportarda iti paboritoda a grupo. Kalkalpas pay laeng dagiti managay-ayam ti panagsanayda, ket dandanin mapuyot ti pito a mangirugi iti ay-ayam. Iti maysa a sikigan ti tay-ak, nagdumog dagiti agay-ayam, ket iti tengnga agparintumeng ti kapitan, nga agkararag: “O Dios, pangngaasim ta bendisionam ti grupomi, ipaaymo ti panagballigimi iti kalabanmi, ket isalakannakami manipud iti pannakadangran. Amen.” Agsisinan ti grupo a buyogen iti dakkel nga ikkis, napanen dagiti agay-ayam kadagiti puestoda iti tay-ak, nagunin ti pito, ket mangrugin ti organisado a panangdangran iti football nga Americano.
Ti indibidual ken ingrupo a panagkararag sakbay, bayat, ken kalpasan ti pannakipaset kadagiti nadumaduma a panagay-ayam ket nagbalinen a gagangay a buya. Ngem umim-imdeng aya ti Dios? Wenno kas kunaen dagiti dadduma, daytoy kadi ket laisenna ti panagkararag?
“Dangram ti Padam a Tao”
Iti intero a lubong, dandani tunggal ay-ayam ket mamulitan iti kinaranggas—iti tay-ak ken kadagiti pagtugawan. Maysa a propesional a managay-ayam iti football idiay Estados Unidos nagsurat: “Nalawag a ti panangdangran iti bagi isu ti kangrunaan a punto iti football, kas ti panangpapatay ken panangpawad iti gubat.” Kunana pay: “Ti pannakisalisal, organisado a panangdangran ket paseten iti panagbiagmi, ket ti football isu ti maysa kadagiti nakalawlawag a sarming . . . a mangipakita no kasano a nakaragragsak ken makagunggona ti Mangdangran iti Pada a Tao.”
Dangram ti padam a tao? Kinuna ni Jesus nga ayatem ti padam a tao. (Mateo 22:39) Imposible a panunoten ti naayat a Dios nga adda ken bendisionanna ti maysa kadagiti agay-ayam itatta, nga ipagpaganetgetna ti mangabak aniaman ti mapasamak.—1 Juan 4:16.
Tumabuno Kadi ti Dios kadagiti Ay-ayam?
Ti maysa a mangiparparegta iti panagkararag iti panagay-ayam isu ti relihiuso a sursuro a ti Dios ket adda iti isuamin a lugar, a ti Dios, pudno nga adda kadagiti amin a luglugar ken bambanag. Kas pangarigan, iti libro a God Goes to Football Games, ti klero ken dati a tsaplin iti grupo a managay-ayam a ni L. H. Hollingsworth kunaenna: “Aniaman a patpatienmi maipapan iti Dios ramanenna ti kapanunotan nga Isut’ adda iti amin a lugar; ti kapanunotan, no kayatyo, nga Isut’ pudno nga adda iti sekular nga aramidtayo . . . Kayatna a sawen, ti Dios mapan idiay simbaan, ket ti Dios mapan kadagiti panagay-ayam iti football.”
Nupay kasta, saan nga isuro ti Biblia a ti Dios ket adda iti amin a lugar. Nagsurat ti Kristiano nga apostol Pablo: “Simrek ni Kristo . . . idiay langit met laeng, tapno agparang ita iti sanguanan ti Dios gapu kadatayo.” (Hebreo 9:24) Addada dua a napateg a punto iti daytoy a teksto a tumulong kadatayo a mangapresiar: a ti Dios ket maysa nga espiritu a persona ken addaan iti naipasdek a lugar a pagtaengan, ti langit. (1 Ar-ari 8:49; Juan 4:24) Gapuna isut’ di mabalin nga adda iti isuamin a lugar iti isu met laeng a tiempo.
Denggen ti Dios dagiti Gagayyemna
Bueno, no saan a tumabuno ti Dios kadagiti panagay-ayam, isu kadit’ umim-imdeng kadagiti karkararag? Tapno dagiti karkararag ket makagtengda iti pagdengngeg ti Dios iti langit, isu a nagparangan ni Jesus, ti agkarkararag masapul nga addaan iti pannakaammo, pannakaammo kadagiti pangpanggep ti Dios, ti personalidadna, dagiti kualidadna, dagiti daldalanna, ken ti naganna. (Santiago 4:3) Iti panangipaganetgetna ti pannakasapul a mangammo iti Dios, nagkararag ni Jesus: “Daytoy kaipapananna ti biag nga agnanayon, ti pananggun-odda ti pannakaammo kenka a maymaysa a pudno a Dios.”—Juan 17:3.
Ti panangammo iti maysa sapulenna ti komunikasion. Makisao ti Dios iti tao babaen iti Biblia, ket ti Biblia isu ti pamay-an a pakagun-odantayo iti pannakaammo iti Dios iti langit. Ibaga dayta kadatayo ti naganna, Jehova. (Salmo 83:18) Ibaga met ti Biblia a ti Dios kasta unay ti panagayatna iti lubong ta imbaonna ti Anakna a bugbugtong, ni Jesus, ditoy daga tapno maikkan ti gundaway ti tao a maaddaan iti biag nga agnanayon. (Juan 3:16) Bayat ti panangbasatayo ken panangadaltayo iti Biblia, agbalin a pudpudno ni Jehova kadatayo, ket maiyadanitayo kenkuana babaen ken ni Jesus. (Juan 6:44, 65; Santiago 4:8) Agsipud ta pudpudno ni Jehova, makapataudtayo iti nasinged a personal a relasion kenkuana.
Ti pannakipagayam iti Dios, nupay kasta, ramanenna ti komunikasion ti dua. Daytoy sapulenna ti pannakisao ken Jehova babaen iti kararag. Kunaen ti Biblia nga isut’ “Dumngeg iti kararag” ken “isut’ saan nga adayo iti tunggal maysa kadatayo.” (Salmo 65:2; Aramid 17:27) Nupay kasta, daytoy dina kaipapanan nga imdengan ti Dios dagiti amin a karkararag. (Isaias 1:15-17) Makin-kararag ti kayat a denggen ti Dios?
Kinuna ti salmista: “Ti kinapagayam ni Jehova addanto kadagiti agbuteng kenkuana.” (Salmo 25:14) Iti orihinal a Hebreo, ti ramut iti “kinapagayam” (sohd) kaipapananna “pagbalinen a nairut.” Gapuna, daytoy a bersikulo ipakitana ti kapanunotan a naawat iti makin-uneg nga yan ni Jehova wenno iti pannakitulag iti pannakipagayam kenkuana. Dagidiay laeng managdaydayaw a mangipakita iti umiso a panagraem ti maawat. Gapuna, ti nasinged a pannakipagayam iti Dios ti mamagbalin kadatayo nga agamak a mangpugsat iti dayta a relasion babaen iti panangaramid iti aniaman a di makaay-ayo kenkuana, kas iti panangtrato iti panagkararag a kas anting-anting iti gasat tapno ipasigurado ti panagballigi iti panagay-ayam.
Denggen ni Jehova ti kararag dagiti nasingpet-panagpuspusona a tattao nga agsapsapul iti pannakipagayam kenkuana, ket isut’ awan panangidumdumana. Awan ti pabpaboranna wenno idayawna a nasional a grupo, rasa, wenno uray pay ti grupo iti panagay-ayam, a nangnangruna ngem ti sabali. (Salmo 65:2; Aramid 10:34, 35) No pudno a denggen ti Dios ti kararag dagiti agsasalip iti panagay-ayam ket agpadpada a nagkararag dagiti grupo kenkuana a maipaay iti balligi, siasino koma ti bendisionanna? Wenno no ti maysa a managay-ayam ket nadangran a naimbag bayat ti panagay-ayam, mapabasol koma aya ti Dios?
Ngarud, masapul nga ikararagtayo dagiti umiso a bambanag. Inlawlawag ni apostol Juan dayta iti kastoy: “Aniaman a dawatentayo a mayannurot iti pagayatanna, isu denggennatayo.” (1 Juan 5:14) Denggen ni Jehova dagiti karkararag a maitunos iti pagayatanna. Masapul nga ammuentayo ti pagayatanna ken dagiti panggepna tapno dagiti kararagtayo ket maitunosda kadagitoy.
Ti pagayatan ti Dios ken dagiti panggepna ken ti nadayag a naganna saanda a mainaig kadagiti mannakisalisal ken naranggas a panagay-ayam. Saan a mangidumduma ti Dios. Gapuna, no dagiti kararag maikararagda a maipaay kadagitoy nga okasion, dumdumngeg aya ti Dios? Pudno a saan!