Ti Kinapudno Balbaliwanna ti Biag

NAKALKALDAANG ngem pudno a ti biag ti nagadu a tattao ita ket narikut, nakaay-ay-ay pay ketdi. Posible kadi para iti kakasta a tattao a makasarak iti ragsak? Sumagmamano ti kriminal ken biktimaenda dagiti padada a tao. Makapagbalinda pay ngata a mapagpiaran a kameng ti kagimongan? Wen ti sungbat kadagitoy dua a saludsod. Makapagbalbaliw dagiti tao. Mabalbaliwan ti biag. Impakita ni apostol Pablo no kasano idi insuratna: “Mapagbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken perpekto a pagayatan ti Dios.”​—Roma 12:2.

Ti pannakadakamat ti “perpekto a pagayatan ti Dios” mabalin nga ipalagipna ti kinuna ni Jesus kadagiti adalanna nasurok a 20 a tawen sakbay nga insurat ni Pablo ti nadakamat a sasao. Kinuna ni Jesus: “Maammuanyonto ti kinapudno, ket ti kinapudno wayawayaannakayto.” (Juan 8:32) “Ti kinapudno” a tuktukoyen ni Jesus ket isu ti impormasion nga impaltiing ti Dios​—nangnangruna ti impormasion maipanggep iti pagayatan ti Dios​—a naitalimeng agpaay kadatayo iti Biblia. (Juan 17:17) Talaga kadi a ti kinapudno iti Biblia wayawayaanna dagiti tao? Talaga kadi a ti panagbiag maitunos iti pagayatan ti Dios balbaliwanna ti biag? Pudno a kasta. Usigentayo ti sumagmamano a pagarigan.

Panggep iti Biag

Iti di pay nabayag, ni Moisés, idiay Gibraltar, ket malmalday unay a tao. Kunana: “Mammartekak idi ken matmaturogak iti lansangan. Desperadoak. Rinabii nga indawatko iti Dios a kaasiannak ken dinak pagibturen iti maysa pay nga aldaw. Nagsangsangitak bayat nga insaludsodko iti Dios no apay nga addaak ditoy a lubong no kasta nga awan met la ti serserbik, awanan panggedan, awanan pamilia, ken awan asinoman a tumulong kaniak. Apay koma nga agtultuloyak pay nga agbiag?” Idi kuan, adda napasamak.

Ituloy ni Moisés: “Ammok a dinengngeg ti Dios ti kararagko idi naam-ammok ni Roberto, maysa kadagiti Saksi ni Jehova. Inikkannak ni Roberto iti Biblia ken maysa a kopia ti katulongan iti panagadal iti Biblia nga Ania ti Kalikaguman ti Dios Kadatayo?a Inaldaw a pagadalanmi a dua ti Biblia iti bangko a pagturturogak iti rabii. Kalpasan ti makabulan intugotnak ni Roberto iti gimong iti Kingdom Hall dagiti Saksi ni Jehova iti lugarmi. Di nagbayag, naan-anay a binalbaliwan ti kinapudno iti Biblia ti kapanunotak. Saanakon a natnaturog iti ruar; diak metten immin-inum wenno nagsigarilio. Nagbalbaliwen ti biagko, ket naragsakanak. Namnamaek a mabautisaranak iti din agbayag ket agserbi ken Jehova kas maysa kadagiti Saksina.”

Anian a panagbalbaliw! No awan namnama dagiti tao, masansan a ti makagapu ket kinaawan pannakaammo. Dida ammo ti maipapan iti Dios wenno dagiti nakaskasdaaw a panggepna. Iti kaso ni Moisés, idi nagun-odna dayta a pannakaammo, daytoy ti nangted kenkuana iti bileg ken tured a mangbalbaliw iti biagna. Nasungbatan ti kararag ti salmista iti Dios iti kaso ni Moisés: “Ibaonmo ti silawmo ken kinapudnom; isuda kadi ti mangiturong kaniak: iturongdak kadi ita nasantuan a turodmo, ken kadagiti tabernakulom.”​—Salmo 43:3.

Idiay Belize, adda umasping a kapadasan ni Daniel. Saan a matmaturog ni Daniel kadagiti lansangan​—addaan natan-ok a trabaho. Ngem iti 20 a tawen nakidangadang iti droga ken pannakaadikto iti alkohol ken imoral ti panagbiagna. Nupay napadakkel a Katoliko, awan makita ni Daniel a pateg ti biag, ken nagduaduaanna ti kaadda ti Dios. Napan iti nadumaduma a simbaan nga agsapsapul iti tulong ngem nasarakanna nga adu kadagiti mannakimisa a gagayyemna ken uray ti sumagmamano kadagiti klero a gagayyemna ti agab-abuso iti droga wenno alkohol. Kabayatanna, dandani idiborsion ni baketna.

Gapu ta desperado, simrek ni Daniel iti rehabilitation center. Kaskasdi, ammona a kalpasan a makaruar, di agbayag agsublinto manen iti panagdroga no awan magun-odna a tulong. Ngem ania a kita ti tulong? Idi Mayo 1996, dua nga aldaw kalpasan a rimmuar iti rehabilitasion, inasitgan ni Daniel ti maysa kadagiti Saksi ni Jehova ket kellaat laengen a kiniddawna kenkuana, “Pangaasim ta iyadalannak iti Biblia.” Inyurnos ti Saksi nga iyadalan ni Daniel iti Biblia mamindua iti makalawas, ket di nagbayag rinugianen ni Daniel nga itunos ti biagna iti pagayatan ti Dios ken suktan dagiti dati a gagayyemna kadagiti Kristiano a gagayyem a saan nga agab-abuso iti droga wenno alkohol ken manglikliklik iti imoralidad. Iti kasta napaneknekan ni Daniel a pudno ti ibagbaga ti Biblia: “Makikuyogka kadagiti masirib a tattao, ket masiribkanto; ngem ti makikuyog kadagiti maag pagsikorannanto.” (Proverbio 13:20) Di nagbayag, kinunana: “Daytoy ti damo a gundaway iti biagko a naammuak no ania ti makunkuna a pannakaadda iti nadalus a konsiensia.” Nabalbaliwan met ti biag ni Daniel.

Idiay Puerto Rico, maysa pay a lalaki ti nakapasar iti naisangsangayan a panagbalbaliw. Adda idi iti pagbaludan ken kabutbuteng unay dagiti tao, ta adun ti napatayna. Ti kadi kinapudno iti Biblia ti mamagbalbaliw kenkuana? Wen. Maysa kadagiti Saksi ni Jehova ti nangted kenkuana iti sumagmamano a kopia dagiti magasin a Pagwanawanan ken Agriingkayo!, ket sidadaras a nagkiddaw iti ad-adu pay. Nairugi ti panagadal iti Biblia kenkuana, ket bayat a simmagepsep ti kinapudno iti Biblia iti pusona, makitan ti amin dagiti panagbalbaliw nga inaramidna. Ti maysa kadagiti immuna a pakakitaan ti panagbalbaliwna ket idi pinapukisanna ti atiddog a buokna ken linabahasna ti naraber a barbasna.

Kuna ti Biblia a pakawanen ti Dios dagiti managbasol a sipupudno nga agbabawi ken mangbalbaliw iti estilo ti panagbiagda. Insurat ni Pablo: “Dikay aya ammo a dagiti nakillo a tattao didanto tawiden ti pagarian ti Dios? . . . Ket kaskasdi a kasta idi ti sumagmamano kadakayo. Ngem naugasankayon a nadalus.” (1 Corinto 6:9, 11) Di pagduaduaan, dagitoy a sasao ti nangliwliwa iti daytoy a lalaki, a kas met laeng ti sasao iti Aramid 24:15: “Addanto panagungar agpadpada dagiti nalinteg ken dagiti nakillo.” Kinunana: “Kayatko nga addaakto sadiay inton mapagungar dagiti natay tapno makapagpakawanak kadagidiay inuloyak.”

Baro a Pamilia

Maysa nga aldaw ni Luis, amin-tiempo nga ebanghelisador dagiti Saksi ni Jehova idiay Argentina, ket nayam-ammo iti maysa a lalaki nga addaan nakalkaldaang a pakasaritaan. Tangay binaybay-an dagiti dadakkelna sipud pay pannakayanakna, napadakkel iti nadumaduma nga institusion. Idi ag-20 ti tawenna, naammuanna ti ayan ni nanangna ket inkeddengna ti agnaed iti asidegna. Inggaedna ti nagtrabaho, nagurnong iti adu a kuarta, sa napan iti siudad nga ayan ni nanangna. Pinalubosan ni nanangna a makipagnaed kenkuana agingga a naibus ti kuartana ket kalpasanna pinapanawna. Daytoy a pannakailaksid ti namagleddaang unay kenkuana.

Nupay kasta, nairanud ni Luis ti kinapudno iti Biblia iti daytoy nga agtutubo. Dayta a kinapudno ramanenna ti pammatalged a: “No da ama ken ina baybay-andak, ni ngad Jehova pidutennakto.” (Salmo 27:10) Nasarakan ti agtutubo nga isu ket addaan nailangitan nga Ama a di pulos mangbaybay-a kenkuana. Naragsak itan nga agbalin a paset ti baro a pamilia, ti pamilia ni Jehova.

Maysa pay a lalaki iti isu met laeng a pagilian ti nangibaga iti maysa kadagiti Saksi ni Jehova a pagaayatna ti magasin a Pagwanawanan. Apay? Gapu ta dayta ti nangsalbar iti panagasawana. Napasamak nga iti maysa nga aldaw daytoy a lalaki, idi aggapu iti trabaho, nakakita iti pagbasuraan iti maysa a magasin a Pagwanawanan nga addaan tema a “Diborsio” iti dadakkel a letra. Tangay nariribuk ti biagda iti asawana ket rinugiandan nga agassawa nga ipagna ti legal a panagsinada, innalana ti magasin sana rinugian a binasa. Inyawidna sada binasa a dua ken baketna. Pinadas ti agassawa nga iyaplikar ti naibatay-Biblia a balakad iti magasin. (Efeso 5:21–​6:4) Di nagbayag, simmayaat ti relasionda. Saanda nga intuloy ti panagsinada ket ita makipagad-adalda iti Biblia kas nagkaykaysa nga agassawa.

Idiay Uruguay, maysa pay a lalaki nga agnagan Luis ti malmalday. Pannakaadikto iti droga, espiritismo, panagdayaw iti idolo, panagabuso iti alkohol​—dagitoy ti sumagmamano kadagiti banag a namagbalin iti biagna a narikut. Kamaudiananna, ni Luis, a naan-anay a naupay, nagbalin nga ateista. Adda maysa a gayyem a nangted kenkuana iti libro a Life​—How Did It Get Here? By Evolution or by Creation?b Nagresulta daytoy iti apagbiit a pannakisarsarita kadagiti Saksi ni Jehova, ngem di nagbayag sinublian ni Luis ti alkohol ken droga. Idi nga, iti kanito a nakaro ti pannakaburiborna, adda nga agtugtugaw iti ayan ti ginabsuon a basura, nagkararag, nga inturongna ti kararagna iti “ama ni Jesu-Kristo,” tangay dina masigurado no ania ti nagan ti Dios.

Indawatna iti Dios nga ipakitana kenkuana no ania ti panggep ti kaaddana ditoy lubong. “Iti met laeng kabigatanna,” kuna ni Luis, “inikkannak ti maysa a kaam-ammok iti libro a dinan mausar. Ti paulona? Apocalipsis​—Ti Grande a Tampokna Asidegen!”c Nakatulong ti libro kenkuana a mangsungbat iti saludsodna. Nagkararag manen ni Luis maipaay iti tulong iti panangsapul iti relihion a mangipakita kenkuana no kasano ti agserbi iti Dios. Anian a siddaawna! Adda nagtimbre iti ruangan ket sitatakder iti ruar ti dua a Saksi ni Jehova. Dagus a rinugian ni Luis ti makipagadal iti Biblia kadakuada. Napartak ti irarang-ayna ket ita ibilangna a bendision ti panagpabautisarna kas maysa a Saksi. Nadalusen ti kabibiagna ken tultulonganna met dagiti sabsabali a makasarak iti panggep ti biagda. Para kenkuana, agpayso ti sasao iti Salmo 65:2: “O sika a dumngeg iti kararag, kenka ti umayandanto dagiti amin a lasag.”

Iti Pilipinas, dati ni Allan a maysa nga estudiante nga aktibista. Kameng iti organisasion a ti panggepna ket “rippuogen ti gobierno tapno dagiti masanguanan a kaputotan matagiragsakda ti panagpapada.” Nupay kasta, iti maysa nga aldaw, nakasarita dagiti Saksi ni Jehova ket naammuanna manipud Biblia ti panggep ti Dios iti sangatauan. Dayta a panggep ramanenna ti naipaltiing a kari: “Bassit pay a darikmat, ket ti nadangkes maawanton . . . Ngem dagiti naemma tawidendanto ti daga, ket maay-ayatandanto iti kinaruay ti talna.” (Salmo 37:10, 11) Kinuna ni Allan: “Di nagbayag natakuatak a ti ilablaban ti mobimientomi ket idi pay un-unana a naikari iti Biblia. Mapatganto amin dagiti banag a tartarigagayanmi unay iti sidong ti Pagarian ti Dios.” Ita supsuportaranen ni Allan ti Pagarian ti Dios ken tultulonganna dagiti sabsabali a maaddaan pammati iti kinapudno iti Biblia.

Wen, mabalbaliwan ti biag no ipangag dagiti tattao ti kinapudno iti Sao ti Dios, ti Biblia. Kinapudnona, umay ti tiempo inton amin a makalasat a sangatauan itunosda ti biagda iti pagayatan ti Dios. Anian a panagbalbaliwto dayta! Iti kasta, matungpalto ti padto: “Didanto mangranggas wenno mangdadael iti amin a bantayko a nasantuan; ta ti daga mapnonto iti pannakaammo ken ni Jehova, a kas la kadagiti dandanum saknapanda ti baybay.”​—Isaias 11:9.

[Dagiti Footnote]