“Panaglayag No Agbagbagyo”

SAANYO aya a matmatan ti kasta a panagbiahe kas di naintiempuan, minamaag, ken delikado? Ngem adda dagidiay mangirubo iti bagida, iti simboliko a wagas, iti kasta a situasion. Kasano a kasta? Kinuna ni Thomas Fuller nga Ingles nga autor idi maika-17 a siglo: “Dika agdardarasudos no makapungpungtotka. Umasping dayta iti panaglayag no agbagbagyo.”

Delikado ti ibunga ti panagdarasudos bayat nga agpungpungtot ti maysa. Pasingkedan daytoy ti maysa a pasamak a nailanad iti Biblia. Da Simeon ken Levi nga annak ti nagkauna a patriarka a ni Jacob, sirurungsot nga imbalesda ti pannakarames ni Dina nga adingda. Nagresulta daytoy iti nakaro a pammapatay ken panagsamsam. Di pagsiddaawan a kinondenar ni Jacob ti nadangkes nga aramidda, a kunkunana: “Dakayo pinagal-aligagetdak, ta binalindak a makarurod kadagiti agnaed ditoy a daga.”​—Genesis 34:25-30.

Nainsiriban ta maisupadi ti irekomenda ti Biblia a Sao ti Dios. Kunana: “Sardayam ti pungtot, ket lipatem ti gura: dika agalimuteng, daytoy agduyos laeng iti panagaramid iti dakes.” (Salmo 37:8) Maliklikanyo dagiti nadagsen a basol no surotenyo dayta a pammagbaga.​—Eclesiastes 10:4; kitaenyo met ti Proverbio 22:24,25.