LEKSION 25
Ania a Klase ti Biag ti Kayat ti Dios Para Kadatayo?
Ibagbaga ti Biblia a ti biag dagiti tattao ket ‘ababa ken napno iti riribuk.’ (Job 14:1) Kasta kadi a talaga ti kayat ti Dios para kadatayo? No saan, ania ngarud? Matungpalto kadi dayta? Kitaem dagiti makaparagsak a sungbat ti Biblia.
1. Ania a klase ti biag ti kayat ni Jehova para kadatayo?
Kayat ni Jehova ti kasayaatan a biag para kadatayo. Idi pinarsuana ti umuna a tattao, pinagyanna ida iti napintas a paraiso, ti hardin ti Eden. Kalpasanna, “binendisionan met ida ti Dios, ket kinunana: ‘Agpaadukayo ken punnuenyo ti daga ken kultibarenyo.’” (Genesis 1:28) Kayat ni Jehova a maaddaanda iti annak, pagbalinenda a paraiso ti intero a daga, ken aywananda dagiti animal. Kayatna a perpekto ti salun-at ti amin a tattao ken agbiagda iti agnanayon.
Uray no saan a kasta ti biagtayo ita,a saan a nagbalbaliw ti kayat ti Dios para kadatayo. (Isaias 46:10, 11) Kayatna latta nga agbiag iti agnanayon dagiti natulnog a tattao iti nakasaysayaat a kasasaad.—Basaen ti Apocalipsis 21:3, 4.
2. Kasanotayo a maaddaan iti naragsak a biag ita?
Naparsuatayo nga agkasapulan iti panangidalan ni Jehova, isu a natural laeng a kayattayo isuna nga am-ammuen ken dayawen. (Basaen ti Mateo 5:3-6.) Kayatna nga agbalintayo a nadekket a gayyemna, ‘magnatayo iti amin a dalanna, ayatentayo,’ ken agserbitayo kenkuana ‘iti amin a pusotayo.’ (Deuteronomio 10:12; Salmo 25:14) No aramidentayo dagita, agbalintayo a pudpudno a naragsak uray adda dagiti problematayo. No agdayawtayo ken Jehova, mariknatayo nga adda direksion ti biagtayo.
AMMUEM TI AD-ADU PAY
Ammuem no kasano nga impakita ni Jehova ti dakkel nga ayatna idi insaganana ti daga para kadatayo. Kitaem met ti isursuro ti Saona maipapan iti klase ti biag a kayatna para kadatayo.
3. Kayat ni Jehova ti nagsayaat a biag para kadagiti tattao
I-play ti VIDEO, sa pagsaritaan ti sumaruno a saludsod.
Apay a pinarsua ti Dios ti napintas a planetatayo?
Basaen ti Eclesiastes 3:11, sa pagsaritaan daytoy a saludsod:
Ania ti isuro dayta kenka maipapan ken Jehova?
4. Saan a nagbaliw ti kayat ni Jehova para kadatayo
Basaen ti Salmo 37:11, 29 ken Isaias 55:11, sa pagsaritaan daytoy a saludsod:
Kasanotayo nga ammo a saan a nagbaliw ti kayat ni Jehova para kadatayo?
Mabalin pay a tarimaanen ti naperdi a balay. Kasta met, ti daga a binaybay-an dagiti tattao ket tarimnento ti Dios para kadagiti mangay-ayat kenkuana
5. No agdayawtayo ken Jehova, maaddaan iti direksion ti biagtayo
Agbalintayo a naragsak no ammotayo no apay nga agbibiagtayo. I-play ti VIDEO, sa pagsaritaan ti sumaruno a saludsod.
Ania ti nagbalin nga epekto ken Terumi idi naammuanna ti kayat ti Dios para kadagiti tattao?
Basaen ti Eclesiastes 12:13, sa pagsaritaan daytoy a saludsod:
Gapu ta nakaad-adu ti inaramid ni Jehova para kadatayo, ania met ti obligasiontayo?
NO ADDA AGSALUDSOD: “Ania ti plano ti Dios para kadagiti tattao?”
Ania ti isungbatmo?
SUMARIO
Kayat ni Jehova nga agbiagtayo iti agnanayon ditoy daga iti nakasaysayaat a kasasaad. No agserbitayo iti Dios iti amin a pusotayo, agbalintayo a naragsak ken maaddaan iti direksion ti biagtayo—uray ita.
Rebiu
Ania a klase ti biag ti kayat idi ni Jehova para kada Adan ken Eva?
Kasanotayo nga ammo a saan a nagbaliw ti kayat ti Dios para kadagiti tattao?
Kasano a maaddaan iti direksion ti biagtayo ken agbalintayo a naragsak?
AGDISKOBREKA PAY
Kitaem ti ebidensia a talaga nga adda idi ti hardin ti Eden.
“Ti Hardin ti Eden—Sarsarita Laeng Aya?” (Ti Pagwanawanan, Enero 1, 2011)
Ammuem no apay a makasiguradotayo nga agtalinaed ti daga iti agnanayon.
Adalem no ania ti ibagbaga ti Biblia a panggep ti biag.
Kitaem no kasano a nabigbig ti maysa a lalaki nga adda kurang iti biagna uray no ti pagarupna ket adda aminen kenkuana.
a Iti sumaruno a leksion, maammuam no apay a saan a kasta ti biagtayo ita.