Daga—Agnanayon a Tawid dagiti Naemma
“Dagiti langlangit isu ti tronok,” kuna ni Jehova, “ket ti daga isu ti pagbatayan dagiti saksakak.” Maipapan iti pagbatayan dagiti saksakana, inkari ni Jehova: “Aramidekto ti disso dagiti saksakak a naglorian.” (Isaias 66:1; 60:13, Rotherham) Daytoy aramidenna a maipaay kadagiti naemma a mangtawidto iti dayta. Iti sidong ti addaan ti panangapresiar a panangaywanda, agbalinto ti daga a maysa a lugar iti naparaisuan a kinapintas ken maysa a dayag ken Jehova a Namarsuana.
Ngem dadduma ti mangirason: ‘Dagiti naemma ti mangtawidto iti daga. Dagiti naemma a tattao ket nakapuy a tattao! Kasano ti panagbalindanto a napigsa a mangituray iti intero a daga?’ Ti sao a “naemma” iti Kasuratan tuktukoyenna dagidiay a naanus, naasi, napakumbaba ngem nabileg a kas maysa nga asero. Daytat’ maysa a sao a nausar iti maysa nga atap nga animal a napaamo ngem kaskasdi a nabileg.
Ti diksionario ni Vine kadagiti Griego a sasao depinarenna ti naemma: “Daytat’ nailaga a dayaw ti kararua; ket ti panangiparangarang iti dayta ket umuna ken nangnangruna iti Dios. Dayta ti kababalin ti espiritu nga awatentayo ti pannakilangenna kadatayo a kas naimbag, ket ngarud ditay supsuppiaten wenno agkedked.” Dagiti naemma saanda a nayonan, kissayan, pakapuyen, wenno tiritiren ti Sao ti Dios—kas ti aramiden dagiti dadduma itatta tapno mailugaranda dagiti imoralidadda.—Deuteronomio 4:2; 2 Pedro 3:16; Apocalipsis 22:18, 19.
“Ni Moises isu idi ti napakumbaba unay kadagiti isuamin a lallaki nga adda iti rabaw ti daga.” (Numeros 12:3) Ngem isu kadit’ nakapuy? Isut’ nagparang iti sanguanan ti natan-ok a Faraon iti Egipto ket kinalikagumanna a palubosanna dagiti naadipen a Hebreo. Natibker ni Faraon, iti sungbatna a saan! Ngem ni Moises, a saan a mabutbuteng, nagsubli-subli, a nangiyanunsio kadagiti saplit a dumteng kadagiti Egipcio. (Exodo, kapitulo 7–11) Naemma, wen; ngem nakapuy? Saan!
Ni Kristo Jesus ket naemma, ngem nagtakder a sititibker kadagiti relihiuso a kinapanatiko idi kaaldawanna, uray ammona a dagitoy ti mangtutuok ken mangpapatay pay kenkuana. “Adtoy,” kinuna ni Jesus kadagiti adalanna, “sumang-attayo idiay Jerusalem, ket toy Anak ti tao maiyawatto kadagiti turayen dagiti papadi ken kadagiti eskriba, ket isu dusaendanto iti ipapatay, ket iyawatdanto kadagiti Gentil, ket rabrabngisendanto ket tupraandanto, ket saplitendanto ket papatayendanto.” (Marcos 10:33, 34) Amin daytoy ket inaramidda kenkuana, ngem pulos a saan a nagbaliw ti kinatarnawna iti Dios. Naemma, wen; ngem nakapuy? Saan!
Gapuna kadagiti Nainkasuratan a naemma a tattao nga itedto ni Jehova a Dios ti daga. Ket maisuppadi kadagiti teoria dagiti sientista ken ti pannursuro iti ulbod a relihion, ti daga agtalinaedto “iti awan inggana, wenno iti agnanayon.” (Salmo 104:5) Ni Jehova ‘dinu pinarsua dayta nga ongaong.’ Isu “binukelna tapno isu ti pagyanan.” (Isaias 45:18) Ket anian a nagtan-okto ti biag! Ti Dios “punasennanto ti amin a lulua kadagiti matada, ket awanton ni patay, awanton ti sasaibbek wenno sangsangit wenno rigrigat. Dagiti immuna a bambanag napalabasdan.”—Apocalipsis 21:4.
Awanton dagiti manangrugit a namagbalin iti daga nga agsakit! Kalpasanna, “ti naemma tawidennanton ti daga, ket pudno a maay-ayatandanto iti kinaruay ti talna.” (Proverbio 2:21, 22; Salmo 37:11) Dakayo met tagiragsakenyonto ti biag nga agnanayon iti dayta a Paraiso a daga no nabilegkayo a makakualipikar kas maysa kadagidiay a Nainkasuratan a naemma.