Naimbag a Damag nga Agpaay Kadagiti Naemma
1 Agbibiagtay iti tiempo a paspasungaden ti panangukom. (Ezeq. 9:5, 6) Naganat unay a mapakaammuan dagiti naemma a tattao iti sadinoman tapno makasaganada maipaay iti mapasungad. Iti naayat a kinamanangaasina, binilin ni Jehova dagiti tattaona a “mangikasaba iti naimbag a damag kadagiti naemma.” (Isa. 61:1, 2) Dagiti magasintayo tumulongda a mangiwaragawag iti naimbag a damag a nasaknap.
2 Ti Pagwanawanan liwliwaenna dagiti naemma babaen ti naimbag a damag a ti Pagarian ti Dios ket aramidennan a paraiso daytoy daga. Pabilgen ti Agriingkayo! ti panagtalek iti kari ti Namarsua maipapan iti natalna a baro a lubong. Ti nasaknap a pannakaiwaras dagitoy a pagiwarnak isut’ maysa kadagiti kapardasan a wagas ti panangyeg ti naimbag a damag kadagiti naemma. Ania a mapagsasaritaan a puntos ti mabalin nga itampok kadagiti kaudian a ruar?
3 Mabalinyo nga iparang ti Mayo 1 a “Pagwanawanan” babaen ti panangitudoyo iti artikulo a “Pannakagunggona iti Inaldaw a Panagbasa iti Biblia” sayo isaludsod:
◼ “Ania ti pagarupyo a magunggonatayo iti panagbasa iti Biblia? [Palubosan a sumungbat.] Ti Biblia a mismo, iti Roma 15:4, sungbatanna dayta a saludsod. [Basaen ti Roma 15:4.] Kaaduan a tattao iti komunidadtayo addaanda iti Biblia, ngem manmano ti kanayon a mangbasa. Patienmi a ti kakaisuna a sigurado a namnama a maipaay iti masanguanan ket masarakan iti Biblia, ket magunggonaantayo no basaentay dayta.” Maaramid ti kanayonan a komento, ket kalpasanna maitukon ti suskripsion.
4 Ti Mayo 15 a “Pagwanawanan” naglaon ti artikulo a napauluan iti “Maysa a Baro a Biag Agpaay Kadagiti Inapotayo.” Mabalinyo a tukayen ti interes babaen daytoy nga introduksion:
◼ “Masansan nga adu dagiti mangpampanunot no ania ti langa dagiti inapoda. Idinto ta nataydan, kaaduan a tattao ti agkuna a pulos a ditayton maammuan. Pagarupenyo kadi nga adda posibilidadna a maam-ammotayo dagiti inapotayo?” [Palubosan a sumungbat.] Basaen ti Juan 5:28, 29, sa ilawlawag no kasano nga inkari ti Dios nga ited kadakuada ti baro a biag iti paraiso a daga.
5 Mabalinyo nga itukon ti Mayo 8 nga “Agriingkayo!” babaen ti panangisaludsod:
◼ “Ania ti pagarupyo a kasapulan tapno pudpudno nga adda kaes-eskan ti biag?” [Palubosan a sumungbat.] Iturong iti artikulo nga “Aniat’ Panggep ti Biag?”, panid 26, ken basaen no ania ti naikuna ni Solomon iti Eclesiastes 2:11. Kalpasanna, ipakita ti balakadna iti Kapitulo 12, bersikulo 13. Awisen ti bumalay nga agsuskribe.
6 No ag-magasin work-kayo sakbay ti Mayo 14, siguruenyo ti mangitugot kadagiti kopia ti Kingdom News No. 34 ken itukon ida iti siasinoman a saan pay a nakaawat iti kopia. Kanayontay koma a nakasagana a mangibati iti dadduma a literatura iti kada pagtaengan no mabalin, a sipapanunottayo a mabalin a basaen dagiti dadduma iti pamilia agraman gagayyem a bumisita kadakuada. (1 Tim. 6:18) Ti naimbag a damag nga idanontayo kadagiti naemma mabalin nga ispalenna ti biagda.—1 Tim. 4:16.