No Kasanonaka a Mas Matulongan ti Biblia

Napadasmo kadin nga idi rugiam ti maysa a dakkel a proyekto, nariknam a kasla saanmo a kaya? Isu a tapno saanka a marigatan, baka inin-inutmo nga inaramid. Kasta met laeng ti panagbasa iti Biblia. Mabalin a maisaludsodmo, ‘Kasanok a mairugi daytoy a dakkel a proyekto?’ Iti daytoy a leksion, pagsaritaanta ti dadduma a simple a pamay-an a makatulong tapno ma-enjoy-mo a basaen ken adalen ti Biblia.

1. Apay a masapul a regular a basaentayo ti Biblia?

No regular a basaentayo ti Biblia, wenno “ti linteg ni Jehova,” agbalintayo a naragsak ken naballigi. (Basaen ti Salmo 1:1-3.) Kas panangrugi, padasem ti agbasa uray sumagmamano laeng a minuto kada aldaw. Bayat nga umad-adu ti maam-ammuam iti Sao ti Dios, mas ma-enjoy-mo ti agbasa iti Biblia.

2. Ania ti makatulong kenka tapno makasursuroka iti panagbasam iti Biblia?

Tapno mas makasursurotayo iti panagbasatayo iti Biblia, masapul nga agsardengtayo ket panunotentayo ti basbasaentayo. Masapul a basaen ken ‘panunotentayo dayta a naimbag.’ (Josue 1:8, footnote) Bayat nga agbasbasaka, mabalinmo nga isaludsod dagitoy iti bagim: ‘Ania ti isuro daytoy kaniak maipapan ken Jehova a Dios? Kasanok a mayaplikar daytoy iti biagko? Kasanok a mausar dagitoy a teksto tapno matulongak ti dadduma?’

3. Kasanom a maikkan iti oras ti panagbasam iti Biblia?

Kasla kadi awan orasmo nga agbasa iti Biblia? Adu kadatayo ti kasta ti marikriknana. Ikagumaam nga ‘usaren ti tiempom iti kasayaatan a pamay-an.’ (Efeso 5:16) Maaramidmo dayta no mangyeskediulka iti espesipiko nga oras iti kada aldaw nga agbasa iti Biblia. Kayat ti dadduma a basaen ti Biblia iti bigbigat. Sabali met nga oras ti kayat ti dadduma, mabalin a bayat ti lunch break-da. Dadduma met, agbasada iti Biblia iti rabii sakbay a maturogda. Sika met ngay, ania ti kasayaatan nga oras para kenka?

AMMUEM TI AD-ADU PAY

4. Sursuruem nga i-enjoy ti panagbasam iti Biblia

Mabalin a saan a nalaka nga irugi ti panagbasa iti Biblia. Ngem no kasano a masursurotayo a magustuan ti makan a ditay pay pulos naramanan, mabalin met a maaddaantayo iti ‘tarigagay’ nga agbasa iti Biblia. Basaen ti 1 Pedro 2:2, sa pagsaritaan daytoy a saludsod:

• Panagkunam, mas ganadoka ngata ken ma-enjoy-mo ti agbasa no inaldaw a basaem ti Biblia?

I-play ti VIDEO tapno makitam no kasano a na-enjoy ti dadduma a basaen ti Biblia, sa pagsaritaan dagiti sumaruno a saludsod.

VIDEO: Dagiti Agtutubo a Nakasursuro a Mangipateg iti Sao ti Dios (5:33)

• Iti video, apay a marigatan dagiti agtutubo nga agbasa iti Biblia?

• Ania ti nakatulong kadakuada tapno regular a mabasada ti Biblia?

• Ania ti inaramidda tapno agbalin a mas makapainteres ti panagbasada iti Biblia?

Dagiti suhestion a makatulong kenka:

• Mangpilika iti umiso, nalaka a maawatan a patarus. Padasem ti Baro a Lubong a Patarus no available iti lengguahem.

• Iyun-unam a basaen dagiti paset ti Biblia a paginteresam unay. Tapno adda ideyam, kitaem ti tsart a “Basaem ti Biblia.”

• Markaam dagiti nabasamon. Usarem ti tsart nga “Imonitormo ti Panagbasam iti Biblia” iti daytoy a publikasion.

• Usarem ti JW Library^® app. Mabasam ken mangngegmo dita ti audio recording ti Biblia iti smartphone-mo wenno iti dadduma pay a gadyet sadinoman ti ayanmo.

• Usarem dagiti apendise iti Baro a Lubong a Patarus. Addaan dagita iti mapa, tsart, ken glosario a makatulong tapno agbalin a mas makapainteres ti panagbasam.

5. Agsaganaka para iti panagadalmo iti Biblia

Basaen ti Salmo 119:34, sa pagsaritaan daytoy a saludsod:

• Apay a nasayaat nga agkararagka sakbay nga agbasaka iti Biblia wenno agsaganaka para iti panagadal?

Kasanoka a mas makasursuro iti tunggal panagadal? Bayat nga agsagsaganaka, padasem dagitoy a pamay-an:

1. Basaem dagiti parapo iti rugi ti leksion.

2. Birokem ken basaem dagiti teksto, ken kitaem ti koneksion dagita iti maad-adal a topiko.

3. Ugedam wenno koloram dagiti sasao a sungbat dagiti saludsod. Makatulong daytoy inton agadalkayo iti mangyad-adal kenka.

Ammom kadi?

Nagusar dagiti Saksi ni Jehova iti agduduma a patarus ti Biblia. Nupay kasta, kaykayatmi nga usaren ti Baro a Lubong a Patarus ti Nasantuan a Kasuratan ta umiso, nalawag, ken inusarna ti nagan ti Dios.​—Kitaen ti artikulo iti website nga “Adda Kadi Bukod a Biblia Dagiti Saksi ni Jehova?”

SUMARIO

Tapno mas matulongannaka ti Biblia, mangyeskediulka iti orasmo nga agbasa, ikararagmo a maawatam koma ti basbasaem, ken agsaganaka sakbay ti tunggal panagadal.

Rebiu

• Ania ti makatulong kenka tapno mas makasursuroka iti Biblia?

• Kaanom a mawayaan ti agbasa ken agadal iti Biblia?

• Apay a nasayaat nga agsaganaka iti tunggal panagadal?

AGDISKOBREKA PAY

Kitaem ti dadduma nga ideya a makatulong kenka tapno mas makasursuroka iti panagbasam iti Biblia.

“Ania ti Aramidem Tapno Makapainteres ti Panagbasam iti Biblia?” (Ti Pagwanawanan No. 1 2017)

Ammuem ti tallo a pamay-an ti panagbasa iti Biblia.

“Kasano a Matulongannak ti Biblia?​—Paset 1: Adalem a Naimbag ti Bibliam” (Artikulo iti website)

Diskobriem no kasanom a ma-enjoy ti panagbasam iti Biblia.

“Kasano a Matulongannak ti Biblia?​—Paset 2: Pagbalinem a Makaparagsak ti Panagbasam iti Biblia” (Artikulo iti website)

Ammuem ti suhestion dagiti nabayagen nga agbasbasa iti Biblia.

Epektibo a Personal a Panagadal (2:06)

4. Itultuloymo ti makikomunikar iti kasayaatan a Gayyemmo

Nakatulong ti panagkararag ken panagadalmo iti Biblia tapno agbalinka a gayyem ni Jehova. Kasano a makatulong dagita tapno agbalinka a nadekdekket kenkuana?

Basaen ti Salmo 62:8, sa pagsaritaan daytoy a saludsod:

• Kasano a mapasayaatmo dagiti kararagmo tapno lumagda ti pannakigayyemmo ken Jehova?

Basaen ti Salmo 1:2 ken footnote, sa pagsaritaan daytoy a saludsod:

• Kasano a mapasayaatmo ti panagbasam iti Biblia tapno lumagda ti pannakigayyemmo ken Jehova?

Ania ti aramidem tapno ad-adu ti masursurom iti personal a panagadalmo iti Biblia? Tapno adda ideyam, i-play ti VIDEO. Kalpasanna, pagsaritaan dagiti sumaruno a saludsod.

VIDEO: Pasayaatem ti Personal a Panagadalmo (5:22)

• Ania kadagiti suhestion iti video ti mabalinmo nga aramiden?

• Ania dagiti topiko a kayatmo nga adalen?