Saan a Laisen ni Jehova ti Nadudog a Puso
“Dagiti sakripisio a maipaay iti Dios isu ti espiritu a nadudog; ti nadudog ken sibababawi a puso, O Dios, saanmonto a laisen.”—SALMO 51:17.
1. Kasanot’ panangmatmat ni Jehova kadagiti managdaydayawna a nagbasol iti nadagsen ngem agbabbabawi?
MABALIN nga ‘abbongan [ni Jehova] ti bagina iti ulep, iti kasta awan ti makalasat a kararag.’ (Un-unnoy 3:44) Ngem kayatna nga umadani kenkuana dagiti tattaona. Uray no nagbasol iti nadagsen no la ket ta agbabbabawi ti maysa kadagiti managdaydayawna, laglagipen ti nailangitan nga Amatayo ti naimbag a naaramidan dayta a tao. Gapuna, naikuna ni apostol Pablo kadagiti padana a Kristiano: “Saan a nakillo ti Dios, tapno lipatenna ti aramidyo ken ti ayat nga impakitayo iti naganna.”—Hebreo 6:10.
2, 3. Ania koma ti ikuenta dagiti Kristiano a panglakayen iti pannakilangenda kadagiti nagbasol a kapammatianda?
2 Ikuenta met koma dagiti Kristiano a panglakayen ti naunday a matalek a panagserbi dagiti kapammatianda iti Dios. Ramanen daytoy ti sagrado a serbisio a naipaay dagiti managbabawi a nagbiddut wenno nagbasol iti nadagsen. Ti naespirituan a pagimbagan ti amin nga adda iti arban ti Dios ti pakaseknan dagiti Kristiano a papastor.—Galacia 6:1, 2.
3 Kasapulan ti managbabawi a nakabasol ti asi ni Jehova. Ngem saan la a dayta ti kasapulan. Nalawag daytoy kadagiti sao ni David idiay Salmo 51:10-19.
Kasapulan ti Nadalus a Puso
4. Apay nga inkararag ni David ti nadalus a puso ken ti baro nga espiritu?
4 No adda ti maysa a dedikado a Kristiano iti dakes a naespirituan a kasasaad gapu iti basol, aniat’ mabalin a kasapulanna malaksid ti asi ken pammakawan ni Jehova? Bueno, impakpakaasi ni David: “Parsuaem kaniak ti nadalus a puso, O Dios, ket ikabilmo iti unegko ti maysa a baro nga espiritu, daydiay natibker.” (Salmo 51:10) Nalawag a kiniddaw ni David daytoy agsipud ta mabigbigna nga adda pay laeng iti pusona ti pagannayasan nga agaramid iti dakes. Mabalin a saantay a nakaaramid kadagiti kita ti basol a nangsilo ken David mainaig ken ni Bat-seba ken Uria, ngem masapultayo ti tulong ni Jehova tapno saantay a masulisog nga agaramid iti dakes. Maysa pay, mabalin a kasapulantayo ti tulong ti Dios a mangiwaksi iti pusotayo kadagiti dakes a kababalin a kas ti kinaagum ken gura—basbasol a kas kadagsen ti panagtakaw ken pammapatay.—Colosas 3:5, 6; 1 Juan 3:15.
5. (a) Aniat’ kaipapanan ti maaddaan iti nadalus a puso? (b) Aniat’ tinarigagayan ni David idi dinawatna ti baro nga espiritu?
5 Kalikaguman ni Jehova kadagiti adipenna ti “nadalus a puso,” kayatna a sawen, nadalus a motibo wenno panagem. Iti pannakaamirisna a natulawan ti pusona, inkararag ni David a dalusan ti Dios ti pusona ken itunosna kadagiti nasantuan a pagalagadan. Tarigagayan met ti salmista ti baro, nalinteg nga espiritu, wenno mental a pagannayasan. Kasapulanna ti espiritu a tumulong kenkuana a mangsaranget iti sulisog ken mangsalimetmet kadagiti linteg ken prinsipio ni Jehova.
Nasken ti Nasantuan nga Espiritu
6. Apay nga impakpakaasi ni David a saan nga ikkaten ni Jehova ti nasantuan nga espiritu kenkuana?
6 No maladingitantayo gapu kadagiti biddut wenno basoltayo, mabalin a mariknatayo a pagtalawennatayo ti Dios ken ikkatenna kadatayo ti nasantuan nga espirituna, wenno aktibo a puersa. Kasta ti narikna ni David, ta impakpakaasina ken Jehova: “Dinak pagtalawen dita saklangmo; ket dika ikkaten kaniak ti nasantuan nga espiritum.” (Salmo 51:11) Narikna ni managbabawi ken napakumbaba a David a gapu iti basolna saanen a maikari nga agserbi ken Jehova. Ti pannakapagtalaw iti saklang ti Dios kaipapananna ti pannakapukaw ti pabor, liwliwa, ken bendisionna. Tapno maalangon ni David iti naespirituan, kasapulanna ti nasantuan nga espiritu ni Jehova. No adda kenkuana ti espiritu, mabalin nga ikararag ti ari ti nasantuan a panangidalan tapno maay-ayona ni Jehova, maliklikanna ti basol, ken makapagturay iti kinasirib. Silalagip ni David kadagiti basolna iti Manangited ti nasantuan nga espiritu, isu nga impakpakaasina ken Jehova a saanna nga ipanaw dayta kenkuana.
7. Apay a rumbeng nga ikararagtay ti nasantuan nga espiritu ken di pagleddaangen dayta?
7 Datayo met ngay? Rumbeng nga ikararagtayo ti nasantuan nga espiritu ken masapul nga agannadtayo tapno ditay pagleddaangen babaen ti di panagpaidalan iti dayta. (Lucas 11:13; Efeso 4:30) Ta no saan, mabalin a pumanaw ti espiritu kadatayo ket ditay maiparangarang ti inted-Dios a bungbungana nga ayat, rag-o, talna, mabayag a panagitured, kinaanus, kinaimbag, pammati, kinaemma, ken panagteppel. Nangnangruna nga ikkaten ni Jehova a Dios ti nasantuan nga espirituna kadatayo no itultuloytayo ti agbasol a maibusor kenkuana.
Rag-o ti Pannakaisalakan
8. No nagbasoltayo ngem kayattay a maaddaan iti rag-o ti pannakaisalakan, aniat’ masapul nga aramidentayo?
8 Ti managbabawi a nakabasol a nakaungar iti naespirituan mabalinna ti agrag-o manen iti panangisalakan ni Jehova. Iti panagtarigagayna iti daytoy, dinawat ni David iti Dios: “Isublim kaniak ti rag-o ti panangisalakanmo, ket sarapaennak iti naayat nga espiritu.” (Salmo 51:12) Nakaay-ayat la ketdi ti agrag-o iti natalged nga inanama iti panangisalakan ni Jehova a Dios! (Salmo 3:8) Kalpasan a nagbasol iti Dios, dinawat ni David ti pannakaisubli ti rag-o ti panangisalakan [ni Jehova]. Iti naud-udi a panawen, inyurnos ni Jehova ti pakaisalakanan babaen ti daton a subbot ti Anakna, ni Jesu-Kristo. No, kas dedikado nga ad-adipen ti Dios, nagbasoltayo iti nadagsen ngem tarigagayantayo ti pannakaisubli kadatayo ti rag-o ti pannakaisalakan, masapul nga agbabawitayo ken isardengtayon ti dakes nga aramidtayo tapno maliklikantayo ti agbasol maibusor iti nasantuan nga espiritu.—Mateo 12:31, 32; Hebreo 6:4-6.
9. Aniat’ kidkiddawen ni David idi dinawatna iti Dios a sarapaenna “iti naayat nga espiritu”?
9 Dinawat ni David ken Jehova a sarapaenna “iti naayat nga espiritu.” Agparang a saan a ti sibubulos a panangtulong ti Dios wenno ti nasantuan nga espirituna ti tuktukoyen daytoy, no di ket ti agtigtignay a mental a pagannayasan ni David. Tarigagayan ni David nga isut’ saranayen ti Dios babaen ti panangipaayna kenkuana iti natulnog nga espiritu a mangaramid iti nalinteg, iti kasta saan a matnag manen iti basol. Saranayen ni Jehova a Dios dagiti adipenna ken bangonenna dagidiay matuang gapu iti nagduduma a pakasuotan. (Salmo 145:14) Anian a makaliwliwa a panunoten daytoy, aglalo no nagbasoltayo ngem agbabbabawi ken tarigagayantayo ti agserbi a simamatalek ken Jehova iti agnanayon!
Isuro Kadagiti Managlabsing ti Ania?
10, 11. (a) Aniat’ mabalin nga isuro ni David kadagiti managlabsing nga Israelitas? (b) Maisuro laeng ni David dagiti managbasol kalpasan ti panangaramidna a mismo iti ania?
10 No ipalubos ti Dios, tarigagayan ni David ti agaramid iti banag a mangipakita iti panangapresiarna iti asi ni Jehova ken makatulong kadagiti sabsabali. Iti panagkararagna ken Jehova, intuloy a kinuna ti managbabawi nga ari: “Isurokto kadagiti managlabsing dagiti dalanmo, ket dagiti managbasol agsublidanto kenka.” (Salmo 51:13) Kasano a maisuro ni managbasol a David ti Linteg ti Dios kadagiti managlabsing? Aniat’ mabalinna nga ibaga kadakuada? Ket ania ti pagsayaatan nga ipaay daytoy?
11 Iti panangipakitana kadagiti managlabsing nga Israelitas kadagiti dalan ni Jehova bareng tallikudanda ti dana ti kinadakes, mabalin nga ipakita ni David no kasano kakas-ang ti basol, no aniat’ kayat a sawen ti panagbabawi, ken no kasano a magun-od ti asi ti Dios. Gapu ta nariknana ti saem ti pannakapukaw ti anamong ni Jehova ken ti nariribuk a konsiensia, awan duadua a ni David ket maysa a mannakipagrikna a mannursuro kadagiti managbabawi, nadudog ti pusoda a managbasol. Siempre, kalpasan laeng ti panangawatna a mismo kadagiti pagalagadan ni Jehova ken pannakagun-od iti pammakawanna a mabalinna nga usaren ti ulidanna a mangisuro kadagiti sabsabali, ta dagidiay madi nga agpasakop kadagiti nadiosan a pagannurotan awan karbenganda a ‘mangiparangarang kadagiti pagalagadan ti Dios.’—Salmo 50:16, 17.
12. Kasano a nagunggonaan ni David iti pannakaammona nga isut’ inispal ti Dios iti pannakabasol ti panangpapatay?
12 Iti panangiyunay-unayna iti panggepna iti sabali pay a wagas, kinuna ni David: “Ispalennak iti pannakabasol ti panangpapatay, O Dios, sika a Dios ti pannakaisalakanko, ket ti dilak ikantananto a napigsa ti kinalintegmo.” (Salmo 51:14) Patay ti supapak ti panangpapatay. (Genesis 9:5, 6) Isu a ti pannakaammona nga isut’ inispal ti Dios ti pannakaisalakanna iti pannakabasol ti panangpapatay mainaig ken ni Uria ti namaglinak iti puso ken panunot ni David. Iti kasta maikanta a sirarag-o ti dilana ti kinalinteg ti Dios, a saan ket a ti kinalintegna. (Eclesiastes 7:20; Roma 3:10) Saan a maibabawi ni David ti naaramidna nga imoralidad wenno mapagungar ni Uria manipud iti tanem, no kasano a saan a maisubli ti asinoman a tao ita ti dayaw ti sinulbogna wenno mapagungar ti tao a pinatayna. Saan aya a rumbeng a panunotentayo dayta no masulisogtayo? Ket anian a panangapresiartayo iti asi ni Jehova nga impakitana kadatayo iti kinalinteg! Kinapudnona, ti panangapresiar ti rumbeng a mangtignay kadatayo a mangiturong kadagiti sabsabali iti daytoy nga Ubbog ti kinalinteg ken pammakawan.
13. Kadagiti laeng ania a kasasaad a maluktan ti managbasol dagiti bibigna a mangidaydayaw ken Jehova?
13 Saan a mailukat ti managbasol dagiti bibigna a mangidaydayaw ken Jehova malaksid no sikakaasi a luktan ida ti Dios, no ar-arigen, tapno makapagsao iti kinapudno [ti Dios]. Isu nga inkanta ni David: “O Jehova, luktam dagiti bibigko, ket ti ngiwatko iparangarangnanto ti pannakaidaydayawmo.” (Salmo 51:15) Ita ta nabang-aranen ti konsiensiana gapu ta pinakawan ti Dios, natignay ni David a mangisuro kadagiti dalan ni Jehova kadagiti managlabsing, ken siwayawaya a mangidaydayaw Kenkuana. Kas ken David, rumbeng nga apresiaren dagiti amin a napakawan ti basbasolda ti di kaikarian a kinamanangaasi ni Jehova nga impakitana kadakuada, ken rumbeng nga aprobetsarenda ti tunggal gundaway a mangisarita iti kinapudno ti Dios ken ‘mangiparangarang ti pannakaidaydayawna.’—Salmo 43:3.
Dagiti Sakripisio nga Awaten ti Dios
14. (a) Aniada a sakripisio ti kinalikaguman ti Linteg ti tulag? (b) Apay a di umiso a panunoten a masulnitantayo ti basoltayo babaen ti panangaramid iti naimbag nga awanan panagbabawi?
14 Immuneg ti pannakaawat ni David, isu a naikunana: “Ta saanka [ni Jehova] a maay-ayo iti sakripisio—ta no saan a kasta itdek koma; saanmo a pagay-ayatan ti sibubukel a daton a mapuoran.” (Salmo 51:16) Impaannurot ti Linteg ti tulag ti panangidaton kadagiti animal a kas sakripisio iti Dios. Ngem di maabbongan ti kakasta a sakripisio dagiti basol ni David a pannakikamalala ken pammapatay, a mapatawan iti dusa nga ipapatay. Ta no saan a kasta, nagdaton koma kadagiti animal a kas sakripisio ken Jehova. No awan ti naimpusuan a panagbabawi, awan a pulos ti pateg dagiti sakripisio. Saan ngarud nga umiso a panunoten a masulnitantayo ti basoltayo babaen ti panangaramid iti naimbag nga awanan panagbabawi.
15. Aniat’ kababalin ti dedikado a tao a nadudog ti espirituna?
15 Innayon ni David: “Dagiti sakripisio a maipaay iti Dios isu ti espiritu a nadudog; ti nadudog ken sibababawi a puso, O Dios, saanmonto a laisen.” (Salmo 51:17) Iti managbabawi a managbasol, ‘dagiti sakripisio [nga awaten] ti Dios isu ti espiritu a nadudog.’ Saan a natangsit ti kasta a tao. Napalalo ti panagladingit ti puso ti dedikado a tao a nadudog ti espirituna gapu iti basolna, nga agpakumbaba gapu iti pannakariknana iti di pananganamong ti Dios, ken sitatallugod a mangaramid iti amin tapno magun-odna manen ti pabor ti Dios. Awan pateg iti Dios ti aniaman nga idatontayo kenkuana agingga a ditay pagbabawian dagiti basoltayo ken ipaay ti pusotayo iti naipamaysa a debosion.—Nahum 1:2.
16. Kasanot’ panangmatmat ti Dios iti tao a nadudog ti pusona gapu iti basolna?
16 Saan a laksiden ti Dios ti sakripisio a kas ti nadudog ken sibababawi a puso. Gapuna, iti laksid ti aniaman a pakarigatan a maipasango kadatayo kas tattaona, ditay koma maawanan iti namnama. No naikulbotayo iti dana ti biag a pakaigapuan ti panagdawat ti pusotayo iti asi ti Dios, adda pay namnama. Uray no nadagsen ti basoltayo ngem agbabbabawitayo, saan a laisen ni Jehova ti nadudog a pusotayo. Pakawanennatayo gapu iti daton a subbot ni Kristo ket anamongannatay manen. (Isaias 57:15; Hebreo 4:16; 1 Juan 2:1) Kas ken David, nupay kasta, rumbeng nga ikararagtayo ti pannakaisubli ti pabor ti Dios a saan ket a ti pannakailisi iti kasapulan a pannubngar wenno panangilinteg. Pinakawan ti Dios ni David, ngem dinisiplinana met.—2 Samuel 12:11-14.
Pannakaseknan iti Nadalus a Panagdayaw
17. Malaksid ti panagdawat iti pammakawan ti Dios, aniat’ rumbeng nga aramiden dagiti managbasol?
17 No nakaaramidtayo iti nadagsen a basol, awan duadua a mariribukantay unay, ket ti sibababawi a puso gutugotennatay a dumawat iti pammakawan ti Dios. Nupay kasta, ikararagantay met dagiti sabsabali. Nupay ninamnama ni David a makapagdaydayaw manen iti Dios nga addaan pananganamong, saan nga impuera ti salmona dagiti dadduma. Iramanna daytoy a panagpakaasi ken Jehova: “Ipaayam iti imbag ita naimbag a nakemmo iti Sion; bangonem dagiti bakud ti Jerusalem.”—Salmo 51:18.
18. Apay nga inkararagan ni David ti Sion?
18 Wen, ninamnama ni David ti pananganamong manen ti Dios kenkuana. Nupay kasta, inkararag met ti napakumbaba a salmista nga ‘ipaay ti Dios ti imbag iti naimbag a nakemna iti Sion,’ iti kabisera ti Israel, a Jerusalem, a ninamnama ni David a pakaibangonan ti templo ti Dios. Pinagpeggad dagiti nadagsen a basol ni David ti intero a nasion, ta mabalin a nagsagaba koma dagiti amin nga umili gapu iti dakes nga inaramid ti ari. (Idiligyo ti 2 Samuel, kapitulo 24.) Iti kasta, pinagrakaya dagiti basolna “dagiti bakud ti Jerusalem,” isut’ gapuna a masapul a bangonen manen dagitoy.
19. No nakabasoltayo ngem napakawan, aniat’ maikanatad nga ikararagtayo?
19 No nagbasoltayo iti nadagsen ngem pinakawannatayon ti Dios, maikanatad nga ikararagtayo nga ilintegna ti aniaman a dakes nga imbunga ti aramidtayo. Mabalin nga imbabaintayo ti nasantuan a naganna, mabalin a datayo ti makagapu a kimmapuy ti kongregasion, ken mabalin a pinagladingittayo ti pamiliatayo. Maikkat ti naayat a nailangitan nga Amatayo ti aniaman nga umsi a naidissuor iti naganna, mapabilegna ti kongregasion babaen ti nasantuan nga espirituna, ken maliwliwana ti puso dagiti ingungotentayo nga agay-ayat ken agserserbi kenkuana. Siempre, nakabasoltay man wenno saan, ti pannakasantipikar ti nagan ni Jehova ken ti paglaingan dagiti tattaona ti kanayon koma a pakaseknantayo.—Mateo 6:9.
20. Kadagiti ania a kasasaad a maay-ayo ni Jehova kadagiti sakripisio ken daton ti Israel?
20 No bangonen manen ni Jehova dagiti bakud ti Sion, ania pay ti mapasamak? Inkanta ni David: “Iti kasta maay-ayokanto [ni Jehova] kadagiti sakripisio ti kinalinteg, iti daton a mapuoran ken iti sibubukel a daton; iti kasta agidatondanto kadagiti baka iti rabaw ti altarmo.” (Salmo 51:19) Tarigagayan unay ni David a tagiragsakenna ken ti nasion ti pabor ni Jehova tapno makapagserbida kenkuana nga addaan pananganamong. Iti kasta maay-ayo ti Dios kadagiti daton a mapuoran ken sibubukel a daton. Agpayso a kasta agsipud ta dagitoy ket daton ti kinalinteg nga indatag dagiti dedikado, napasnek, ken managbabawi a tattao a mangtagtagiragsak iti pabor ti Dios. Kas panagyamanda iti asi ni Jehova, nangidatonda kadagiti baka iti altarna—dagiti kasayaatan ken kanginginaan a daton. Itatta, idaydayawtay ni Jehova babaen ti panangiyeg kenkuana iti kasayaatan nga adda kadatayo. Ket dagiti datontayo iramanda “dagiti bumaro a baka dagiti bibig[tayo],” datdaton ti panangidaydayaw iti manangngaasi a Diostayo, ni Jehova.—Oseas 14:2; Hebreo 13:15.
Ipangag ni Jehova ti Panagpakaasitayo
21, 22. Ania dagiti leksion a linaon ti Salmo 51 a pakagunggonaantayo?
21 Ipakita ti naimpusuan a kararag ni David a nailanad idiay Salmo 51 a rumbeng a pagbabawiantayo ti basoltayo. Naglaon met daytoy a salmo kadagiti nabatad a leksion a pakagunggonaantayo. Kas pangarigan, no nagbasoltayo ngem agbabbabawi, makapagtalektayo iti asi ti Dios. Nupay kasta, ti aniaman nga umsi nga inyegtayo iti nagan ni Jehova ti kangrunaan koma a pakaseknantayo. (Bersikulo 1-4) Kas ken David, mabalintay ti agpakpakaasi iti nailangitan nga Amatayo gapu iti natawid a kinamanagbasoltayo. (Bersikulo 5) Napudnotay koma, ken masapul a dawatentayo ti sirib nga agtaud iti Dios. (Bersikulo 6) No nakabasoltayo, rumbeng a dawatentay ken Jehova ti pannakadalus, ti nadalus a puso, ken natibker nga espiritu.—Bersikulo 7-10.
22 Makitatay met iti Salmo 51 a ditay koma ipalubos a patangkenennatay ti basol. No aramidentayo dayta, ikkaten ni Jehova kadatayo ti nasantuan nga espirituna, wenno aktibo a puersa. Nupay kasta, no adda kadatayo ti espiritu ti Dios, maisurotay a naimbag dagiti dalanna kadagiti sabsabali. (Bersikulo 11-13) No nakabasoltayo ngem agbabbabawi, palubosannatayo ni Jehova a mangidaydayaw kenkuana agsipud ta pulos a dina laisen ti nadudog ken sibababawi a puso. (Bersikulo 14-17) Ipakita pay daytoy a salmo a saan koma a ti bagitayo laeng ti nakaipamaysaan ti kararagtayo. Imbes ketdi, rumbeng nga ikararagtayo ti pannakabendision ken ti naespirituan a paglaingan dagiti amin a mangal-alagad iti nadalus a panagdayaw ken Jehova.—Bersikulo 18, 19.
23. Apay a rumbeng a tignayennatay ti Salmo 51 nga agbalin a natured ken mangnamnama?
23 Tignayennatay koma daytoy makatukay-rikna a salmo ni David nga agbalin a natured ken mangnamnama. Tulongannatayo a makabigbig nga adda pay laeng namnamatayo uray no nagbasoltayo. Apay? Agsipud ta no agbabawitayo, maalangonnatay ti asi ni Jehova iti kinaawan namnama. No managbabawitayo ken naan-anay a dedikado iti naayat a nailangitan nga Amatayo, ipangagna ti panagpakaasitayo. Ket anian a makaliwliwa a maammuan a saan a laisen ni Jehova ti nadudog a puso!
Kasanoyo a Sungbatan?
◻ Apay a kasapulan dagiti Kristiano ti nadalus a puso ken ti nasantuan nga espiritu ti Dios?
◻ Aniat’ mabalin nga isuro ti managbabawi a tao kadagiti managlabsing iti linteg ni Jehova?
◻ Kasanot’ panangmatmat ni Jehova iti nadudog ken sibababawi a puso?
◻ Ania dagiti leksion a masarakan iti Salmo 51?
[Ladawan iti panid 15]
Ikarkararagyo met laeng kadi ken saanyo a pagledleddaangen ti nasantuan nga espiritu?
[Ladawan iti panid 17]
Ipakitayo ti panangapresiar iti di kaikarian a kinamanangaasi ni Jehova babaen ti panangisarita iti kinapudnona