‘Napapateg Kadi a Basehas’ Dagiti Bibigmo?

● “Adda balitok, kasta met ti naruay a korales; ngem dagiti bibig ti pannakaammo napapategda a basehas,” insurat idi ni Ari Solomon. (Proverbio 20:15) Kanayon a nabalor ti balitok, ket idi tiempo ni Solomon, uray dagiti korales. Ngem mabalin a napatpateg pay ti bibigtayo ngem kadagita. Kasano? Saan a gapu iti langada, no di ket gapu kadagiti kapanunotan nga iyesngawda.

Dagiti napateg a bibig mangyebkas iti kinaimbag, asi, ken ayat. Ken kas iti “bibig ti pannakaammo,” sawenda ti kinapudno maipapan iti Dios kas nailanad iti Biblia. Wen, daytoy nagkauna a libro ket napno iti sirib ken kinapudno maipapan iti Namarsua kadatayo, agraman kasayaatan a balakad iti panagbiag.—Juan 17:17.

Nakalkaldaang ta di umiso ti panangaramat ti adu a tattao iti bibigda babaen kadagiti kinaulbod nga ibagbagada maipapan iti Dios. Kas pagarigan, ti Dios ti pabasolenda iti kinaawan hustisia ken panagsagaba iti lubong, a ti kaaduan kadagita ket aramid a mismo ti tattao. Maipapan iti dayta, kuna ti Proverbio 19:3: “Adda tattao a mangdadael kadagiti bagbagida babaen kadagiti minamaag nga aramidda sada pabasolen ti Apo.”—Ti Baro a Naimbag a Damag Biblia.

Pagbalinen ti dadduma nga awan patpateg ti bibigda babaen iti di naimpusuan a panagsasao, makapasakit a tsismis, wenno pammadakes. Nakabatbatad ti panangiladawan ti Proverbio 26:23: “Dagiti nasged a bibig a nabuyogan iti dakes a puso ket kas iti pangpasilap a pirak a naikalupkop iti rabaw ti ribak ti damili.” Kas iti “pangpasilap a pirak” a naikalupkop iti damili, “dagiti nasged a bibig,” a mangyebkas iti kasla napudno a rikna, ngem iti kinapudnona mabalin a mangilemmeng iti “dakes a puso.”—Proverbio 26:24-26.

Siempre, ti kasta a kinadakes ket saan a mailemmeng iti Dios. Makitkitana ti pudno a kinataotayo! Maitunos iti dayta, kinuna ni Jesu-Kristo: “Dalusam nga umuna ti uneg ti kopa ken ti pinggan, tapno ti ruarna agbalin met a nadalus.” (Mateo 23:26) Pudno dayta! No nadalus wenno nasin-aw ti pusotayo ken napno iti kinapudno ti Sao ti Dios, agminar dayta iti sasaotayo. Ti resultana? Agbalin ti bibigtayo a ‘napapateg a basehas,’ nangruna iti imatang ti Dios.

[Ladawan iti panid 19]

Ti bibig dagiti masirib ket ‘napapateg a basehas’