Sirib nga Agpaay iti Dila
‘NO LA koma maibabawik ti naibagak!’ Nakunam kadin ti kasta? Wen, ikagkagumaantayo amin a kontrolen ti dilatayo. Dandani amin nga animal ket mapaamotayo, “ngem ti dila, awan asinoman iti sangatauan ti makapaamo iti dayta,” kuna ti Biblia. (Santiago 3:7, 8) Sumukotayo kadi lattan? Saan! Usigem ti sumagmamano a prinsipio ti Biblia a makatulong kadatayo tapno ad-adda a makontroltayo daytoy bassit ngem nabileg a paset ti bagitayo.
● “Iti kinaruay ti sasao saan a maaw-awan ti salungasing, ngem daydiay mangmedmed kadagiti bibigna agtigtignay a simamasirib.” (Proverbio 10:19) No ad-adu ti masaotayo, dakdakkel ti posibilidad a makaisawangtayo iti minamaag wenno makapasakit pay ketdi. Wen, ti di makontrol a dila ket kasla apuy, yantangay napardas nga agiwaras iti makadangran a tsismis ken pammadakes. (Santiago 3:5, 6) Ngem no ‘medmedantayo ti bibigtayo’ wenno agpanunottayo sakbay nga agsaotayo, maikabilangantayo ti mabalin nga epekto dagiti ibagatayo. Iti kasta, maaddaantayo iti reputasion kas naannad, ken magun-odantayo ti panagraem agraman panagtalek ti sabsabali.
● “Nasiglat[kayo koma] no iti panagdengngeg, nainayad no iti panagsao, nabannayat no iti panagpungtot.” (Santiago 1:19) Apresiaren ti sabsabali no dumngegtayo a naimbag iti ibagbagada ta ipakpakita dayta a ditay la interesado kadakuada no di ket raraementayo pay ida. Ngem kasanon no adda makaibaga kadatayo iti makapasakit wenno makapapungtot? Masapul ngarud nga ikagumaantayo ti agbalin a “nabannayat no iti panagpungtot” babaen ti saan a panagsungbat iti kasta met la a wagas. Nalabit adda pakaburiboranna iti dayta a tiempo ket mabalin nga agpadispensar iti makapasakit a naisawangna. Marigatanka kadi nga agbalin a “nabannayat no iti panagpungtot”? Ikararagmo ngarud iti Dios a makapagteppelka. Patganna dagiti kasta a napasnek a kiddaw.—Lucas 11:13.
● “Ti . . . naalumamay a dila maburakna ti tulang.” (Proverbio 25:15) Maisupadi iti pagarup ti adu, nabileg ti kinaalumamay. Kas pagarigan, ti naalumamay a sungbat mapaluknengna ti ibubusor a kas katangken ken kasikkil ti tulang, nalabit gapu iti pungtot wenno panangidumduma. Talaga a narigat ti agbalin a naalumamay nangruna no nabara ti situasion. Isu a panunotem dagiti pagimbagan ti panangsurot iti ibagbaga ti Biblia ken dagiti posible a resulta ti saan a panangtungpal kadagita.
Pudno a dagiti prinsipio ti Biblia ket “sirib manipud ngato.” (Santiago 3:17) No iyaplikartayo dayta a sirib iti panangusartayo iti dila, ti sasaotayo ket kas “kadagiti mansanas a balitok kadagiti kitikit a pirak”—makaay-ayo, makaparegta, ken nadayaw a nayebkas iti umiso a tiempo.—Proverbio 25:11.