Dagiti Saludsod Manipud Kadagiti Managbasa
◼ Ania a pamunganayan a balakad ti ipaay ti Proverbio 27:23 kadagiti naespirituan a pastor ken kasta met kadagiti Kristiano iti pangkaaduan?
Mabasa iti bersikulo: “Gagetam nga ammuen ti kasasaad dagiti pangenmo. Isaadmo ti pusom kadagiti arbanmo.” (Proverbio 27:23) Masansan a maus-usar daytoy a teksto a pangparegta kadagiti naespirituan a pastor tapno ipakitada ti interes iti ken tapno agbalinda a pamiliar iti kasasaad ken parparikut dagiti Kristiano iti kongregasion. Ti kasta a pammaregta ket maiyanatup, agsipud ta ipadis ti Biblia dagiti panglakayen kadagiti pastor ken ti kongregasion iti arban ti karnero. (Aramid 20:28, 29; 1 Pedro 5:2-4) Ngem, nupay ti prinsipio iti ngato ket agaplikar, daytoy a bersikulo ket saan a maipapan nangnangruna kadagiti naespirituan a papastor.
Ti libro ti Proverbio naglaon iti adu a bersikulo a makapagtakder nga is-isuda kas napnuan kaipapanan a sasao ti pammalakad, ngem ti Proverbio 27:23 ket paset ti grupo dagiti bersikulo: “Gagetam nga ammuen ti kasasaad ti pangenmo. Isaadmo ti pusom kadagiti arbanmo; ta ti kinabaknang saanda nga agnanayon, wenno ti balangat iti amin a kaputotan. Ti ruot makasakas, ket agparang ti baro a ruot, ket dagiti mula kadagiti bantay maapit. Ti kordero agpaayda iti pagan-anaymo, ket dagiti kalding a lalaki isudat’ pateg ti tay-akmo. Ket addanto umanay a gatas ti kalding agpaay a taraonmo, agpaay a taraon ti pamiliam, ken pagtarakenmo kadagiti babbalasangmo.”—Proverbio 27:23-27.
Daytoy napaltiingan a sasao ipakitana ti maysa nga estilo ti biag a natandaan iti kinasaet, kinagaget, kinasimple, ken panangbigbig ti panagpannuraytay ken Jehova. Ipakitana daytoy a babaen ti panangitampok ti biag ti maysa a pastor nga Israelita, nalabit no idilig iti komplikado a panagbiag a naibatay iti negosio ken kinabaknang a napartak a magun-odan.
“Ti gameng,” wenno kinabaknang a nagun-odan a sipapartak babaen ti panagnegosio, agraman ibungana a kinaprominente (“balangat”), ket nalaka nga agpukaw, kas paneknekan ti adu. Adda adu ngarud a makuna iti simple a panagbiag, kas ti sinurot dagiti pastor idi ugma iti panagtarakenda iti dinguenda. Dayta a wagas ti panagbiag ket saan a simple a kaipapanannat’ panangbaybay-a. Masapul a sisisiput ti pastor kadagiti arbanna, siguraduenna a masalakniban ti karnero. (Salmo 23:4) No, iti panangipaayna ti atension, nakitana ti maysa a masakit wenno nasugatan a karnero, sapsapuanna dayta iti makabang-ar a lana. (Salmo 23:5; Ezequiel 34:4; Zacarias 11:16) Iti kaaduan a kaso ti nagaget a pastor a nangisaad ti pusona iti arbanna makitana a dagiti panangikagumaanna mangpataud kadagiti bungbunga—ti in-inut nga iyaadu ti arbanna.
Ti nagaget ken naannad a pastor naaddaan iti mapagpiaran a gubuayan ti tulong—ni Jehova. Kasano a kasta? Bueno, ipapaay ti Dios dagiti panawen ken siklo a gagangay nga agresulta iti nalabon a ruot a pangpakan iti arban. (Salmo 145:16) No, gapu iti panagbalbaliw ti panawen, ti nalangto a ruot agpukaw iti akimbaba a rehion, mabalin a nawadwad kadagiti nangato a lugar, a sadiay ti naalibtak a pastor mabalin nga ipanna dagiti tarakenna.
Ti Proverbio 27:26, 27 dakamatenna ti maysa a resulta ti kasta a panagtrabaho—ti taraon ken pagan-anay. Ikabiltayon, ti panangiladawan ket saan a maipapan iti aglablabes a taraon wenno espesial a makmakan, wenno mangipaay iti rason iti maysa a trabahador a mangnamnama iti pagan-anay a naaramid iti kabaruanan nga estilo wenno kasayaatan a lupot. Ngem no pagreggetanna, ti pastor ken ti pamiliana mabalin a makaalada manipud iti arban iti gatas (ken keso), kasta met ti dutdot ti karnero a pagabel kadagiti natibker a lupot.
Gapuna ti balakad: “Gagetam nga ammuen ti kasasaad dagiti pangenmo” ket saan a nangnangruna nga agpaay kadagiti naespirituan a manangaywan; daytoy ket agpaay kadagiti amin a Kristiano. Ipaganetget daytoy ti pateg ti panagbalin a kontento iti pagtaraon ken pagkawes a maala manipud agtultuloy, nagaget a trabaho, a sitatalek iti Dios a dinatay baybay-an. (Salmo 37:25; 2 Tesalonica 3:8, 12; Hebreo 13:5) No idilig ti Proverbio 27:23-27 iti balakad sadiay Lucas 12:15-21 ken 1 Timoteo 6:6-11, makitatayo no kasano a maitunos ti balakad ti Dios iti daytoy a banag. Gapuna tunggal maysa kadatayo masapul a basaenna manen ti Proverbio 27:23-27, a saludsodantay ti bagitayo, ‘Ipappapusok kadi daytoy ken iyap-aplikarko iti inaldaw a panagbiagko?’
[Picture Credit Line iti panid 31]
Pictorial Archive (Near Eastern History) Est.