“Nakillo” Kadi ti Wagas a Panangaramid ti Dios Kadagiti Bambanag?
“DEUS ESCREVE CERTO POR LINHAS TORTAS” (“UMISO TI ISURSURAT ti Dios ngem killokillo ti panagsuratna”). Maysa daytoy a pagsasao idiay Brazil. Ipasimudaagna a kanayon nga umiso ti ar-aramiden ti Dios ngem no dadduma iti wagas a kasla nakillo iti panangmatmat ti tao. Kas pagarigan, no matay ti maysa a tao nga agkabannuag, adu ti agkuna, ‘Inayabanen ti Dios idiay langit.’ No agsagaba ti maysa a tao iti an-annayen wenno adda trahedia a sumangbay iti biagna, kuna dagiti dadduma, ‘Pagayatan ti Dios dayta.’ Tangay ipabasolda iti Dios ti ipapatay, dagiti an-annayen, ken daduma pay a pakaigapuan ti ladingit, iparipirip dagiti kasta nga ibagbagada a ‘killokillo ti panagsurat’ ti Dios, a di maawatan ti tao ti wagas a panangaramidna kadagiti bambanag.
Apay nga adu a relihioso a tattao ti mamati a gapuanan ti Dios ti ipapatay ken dagiti pakarigatan? Masansan a naibatay dagitoy a kapanunotan iti di umiso a panangawatda iti dadduma a teksto ti Biblia. Usigentayo iti apagbiit ti sumagmamano kadagitoy.
● “Asino ti mamagumel, wenno mamagtuleng, wenno mamagkita, wenno mamagbulsek iti tao? Saan aya a siak a Jehova?”—Exodo 4:11.
Kayat kadi a sawen daytoy a ti Dios ti mapabasol kadagiti amin nga agsagsagaba iti nagduduma nga an-annayen? Saan. Saan a maitunos dayta iti personalidad ti Dios. Kuna ti Biblia kadatayo: “Tunggal parsua ti Dios nasayaat.” (1 Timoteo 4:4) Saan nga isu ti mapabasol no mayanak a bulsek, umel, wenno tuleng ti maysa a tao. Ti laeng pagimbagan dagiti parsuana ti tarigagayanna, ta isu ti Gubuayan ti “tunggal naimbag a sagut ken tunggal naan-anay a rangkap.”—Santiago 1:17.
Sipapakinakem nga immalsa iti Dios dagiti immuna a nagannak kadatayo, da Adan ken Eva. Saanda idin a perpekto, isut’ gapuna a saandan a makapataud kadagiti perpekto nga annak. (Genesis 3:1-6, 16,19; Job 14:4) Bayat a nagaassawa ken naganak dagiti kaputotanda, immadu nga immadu dagiti an-annayen, a pakairamanan dagiti pisikal a depekto, a sagsagabaen dagiti tattao. Nupay saan a ni Jehova a Dios ti nangpataud kadagitoy, impalubosna a mapasamak dayta. Gapuna, naikunana nga isu ti ‘mamagumel, mamagtuleng, ken mamagbulsek.’
● “Ti killo saan a mapalinteg.”—Eclesiastes 1:15.
Ti Dios aya ti nangkillo kadagiti bambanag? Nabatad a saan. Kuna ti Eclesiastes 7:29: “Ti Dios inaramidna dagiti tattao a nalinteg; ngem isuda nasarakanda dagiti adu a palpaltuad.” Kastoy ti panangipaulog ti Contemporary English Version iti daytoy a bersikulo: “Naan-anay a nalintegtayo idi pinarsuanatayo ti Dios, ngem tiniritirtayo ti pampanunottayo.” Imbes nga agbiagda a mayannurot kadagiti nalinteg a pagalagadan ti Dios, sipapakinakem a pinili ti kaaduan a tattao a suroten dagiti bukodda a plano, gannuat, pamuspusan, wenno wagas—nga agpaay iti pagdaksanda.—1 Timoteo 2:14.
Maysa pay, kas kuna ni apostol Pablo, gapu iti basol ti sangatauan, “ti sangaparsuaan naipasakop iti kinabarengbareng.” (Roma 8:20) Ket “saan a mapalinteg” daytoy a kasasaad babaen ti natauan a panangikagumaan. Babaen laeng ti ibaballaet ti Dios a maikkatto ti amin a kinakillo ken kinabarengbareng a mapaspasamak ditoy daga.
● “Utobem ti aramid ti Dios: ta asino ti makapalinteg iti kinillo ti Dios?”—Eclesiastes 7:13.
Iti sabali a pannao, isalsaludsod ni Ari Solomon: ‘Siasino iti sangatauan ti makailinteg kadagiti depekto ken iti kinaimperpekto nga impalubos ti Dios?’ Awan uray maysa, ta adda rason no apay nga impalubos ni Jehova a Dios a mapasamak dagitoy a bambanag.
Gapuna, insingasing ni Solomon: “Iti aldaw ti kinarang-ay, agrag-oka, ket iti aldaw ti rigat utobem; wen, ti Dios inaramidna nga agdenna ti maysa ken maysa, iti panggep a ti tao dina maawatan ti aniaman nga addanto iti kalpasanna.” (Eclesiastes 7:14) Ipateg koma ti maysa a tao ti aldaw no nasayaat ti kasasaad ket ipakitana ti panangipategna babaen ti panagaramidna iti naimbag. Ibilangna koma a sagut ti Dios ti naimbag nga aldaw. Ngem kasanon no didigra ti iyeg ti aldaw? Nasayaat no ‘utobenna,’ kayatna a sawen, bigbigenna nga impalubos ti Dios a mapasamak ti didigra. Apay nga impalubosna? Kuna ni Solomon: “Iti panggep a ti tao dina maawatan ti aniaman nga addanto iti kalpasanna.” Ania ti kayat a sawen daytoy?
Ti banag nga ipalubos ti Dios a mapasarantayo agpadpada ti rag-o ken riribuk ipalagipna kadatayo a ditay maibaga no ania ti mapasamak iti masanguanan. Mabalin a dumteng ti didigra agpadpada kadagiti nalinteg ken nadangkes. Awan ti makalisi. Ipabigbig koma daytoy kadatayo ti kinapateg ti panagpannuray, saan nga iti bagbagitayo, no di ket iti Dios, a laglagipentayo a “ti Dios ket ayat.” (1 Juan 4:8) Nupay adda dagiti banag a mabalin a ditay maawatan ita, masiguradotayo a kalpasan a mapasamak a naan-anay dagiti bambanag, agpaay iti pagimbagan ti amin a maseknan ti aniaman nga impalubos ti Dios.
Pulos a saan nga agpaay iti agnanayon a pagdaksan dagiti nalinteg a tattao ti aniaman nga ipalubosna. Imbatad daytoy ni apostol Pedro idi dinakamatna ti maipapan iti rigat a dumteng kadagiti padana a manamati idi kaaldawanna: “Kalpasan ti panagsagabayo iti apagbiit, ti Dios ti isuamin a di kaikarian a kinamanangaasi, a nangayab kadakayo iti agnanayon a kinadayagna a maikaykaysa ken Kristo, turposennanto a mismo ti panagsanayyo, patibkerennakayto, papigsaennakayto.”—1 Pedro 5:10.
Panawen a Panangilinteg Kadagiti Bambanag
Ipapaayannatayo ni Jehova iti bileg a mangibtur kadagiti agdama a pakasuotan a pakaipasanguantayo. Inkarina met a pagbalinennanto a “baro ti isuamin a bambanag.” (Apocalipsis 21:5) Wen, panggepna nga iti saanen a mabayag, isublinto ti nailangitan a Pagarianna ti salun-at dagidiay addaan an-annayen ken imatonannanto ti panagungar dagiti natay. Pukawento met dayta a gobierno daydiay a nakillo dagiti aramidna—ni Satanas a Diablo. (Juan 5:28, 29; Roma 16:20; 1 Corinto 15:26; 2 Pedro 3:13) Anian a bendisionto dayta kadagiti managbuteng-Dios a tattao iti intero a daga inton dumteng ti panawen a panangilinteg ti Dios kadagiti bambanag!
[Picture Credit Line iti panid 28]
Job Hearing of His Ruin/The Doré Bible Illustrations/Dover Publications