ALCAPARRA

[Heb., ʼavi·yoh·nahʹ].

Maysa a mula nga agbunga. Ti sumagmamano a patarus ti Eclesiastes 12:5 ipatarusda ti Hebreo a termino nga ʼavi·yoh·nahʹ kas “tarigagay” iti kasta napagbalin a mabasa ti teksto kas “ken mapaay ti tarigagay.” (RS; kitaenyo met ti KJ; Ro.) Nupay kasta, adu a moderno a managipatarus (AT; JB; JP; NW; NC [Espaniol]) ibilangda a ti mannurat ti Eclesiastes, nga iti daytoy a kapitulo desdeskribirenna dagiti kasasaad ti tao iti kinalakayna, nagusar iti maysa a panangiladawan, kas iti kaso iti intero a deskripsion, ket ti ʼavi·yoh·nahʹ tumukoy iti alcaparra (kas manggutugot iti panagtarigagay wenno ganas a mangan). Daytoy naud-udi a panangmatmat patalgedan dagiti patarus iti Griego a Septuagint, iti Latin a Vulgate, iti Syriac a Peshitta, ken Arabiko.

Madanon ti mula nga alcaparra (Capparis spinosa) ti katayag a 1 m (3 pie) ngem gagangay nga agsalumpayak a kasla lanut iti rabaw ti daga. Naruay dayta idiay Israel, a masansan nga agtubo kadagiti lengngan iti batbato wenno agkalatkat iti padpader wenno rebrebba nga umasping unay iti yerda. Dagiti nasiit a sanga agpataudda iti natayengteng a berde a sukog-itlog a bulbulong. Iti Mayo, ti mula agsabong iti dadakkel a puraw a sabsabong, a dagiti purpura a linabag umatiddogda manipud kadagiti tengngada.​—LADAWAN, Tomo 1, p. 543.

Dagiti bunga ti mula saan a maar-aramat a kas iti pannakaaramat dagiti babassit a busel. Maartem dagitoy ken makan kas pangpananam a manggutugot iti ganas a mangan, maysa a kalidad a namaglatak kadakuada nanipud kadagidi kadaanan a tiempo. Gapuna ti mannurat ti Eclesiastes nalawag a kunaenna a, no kumapuyen ti panagraman ti maysa a lakay ken agpukawen ti ganasna a mangan, uray pay ti pananggutugot ti alcaparra saanna a kabaelan nga abbukayen ti panagtarigagayna iti taraon.