Isaias 26:3—“Aywanamto a Natalna Unay Daydiay a ti Panunotna Agtalinaed Kenca”

“Protektaramto dagidiay naan-anay nga agpannuray kenka; ipaayamto ida iti agtultuloy a talna, ta agtaltalekda kenka.”—Isaias 26:3, Baro a Lubong a Patarus.

“Aywanamto a natalna unay daydiay a ti panunotna agtalinaed kenca; agsipud ta agtalec kenca.”—Isaias 26:3, Ti Biblia.

Kaipapanan ti Isaias 26:3

Babaen kadagitoy makaliwliwa a sasao, impakita ni propeta Isaias a protektaran ti Dios dagidiay naan-anay nga agtalek Kenkuana. Ar-aramidenna dayta babaen ti panangtulongna kadakuada a makarikna iti kinatalged ken talna.

“Protektaramto dagidiay naan-anay nga agpannuray kenka.” Daytoy a paset ti bersikulo deskribirenna dagidiay determinado nga agtalek ken Jehovaa a Dios iti amin a tiempo. Bigbigenda a masapul nga agdependeda kenkuana. Kas pagarigan, saanda nga agpannuray iti bukodda a kapanunotan no agaramidda kadagiti napateg a desision. Imbes ketdi, ikabilanganda ti pampanunot ti Dios iti amin nga aramidenda. (Proverbio 3:5, 6) Ammuenda ti pampanunot ti Dios iti maysa a banag babaen ti panangbasada a naimbag iti Saona, ti Biblia, ken panangpampanunotda iti nabasada. (Salmo 1:2; 119:15) No maipasangoda kadagiti narigat a situasion, sipapasnek nga agkararagda ken Jehova tapno agpatulong. (Salmo 37:5; 55:22) No aramidenda dayta, ipakpakitada ti panagtalekda iti Dios, a mangted kadakuada iti talna.

“Ipaayamto ida iti agtultuloy a talna.” Iti orihinal a Hebreo, mamindua nga agparang ti sao para iti “talna” kas panangipaganetget. Tapno ngarud maipakita dayta a panangipaganetget, daytoy a sao ket mabalin a maipatarus kas “agtultuloy a talna” wenno “naan-anay a talna.” Kayatna a sawen, dagidiay naan-anay nga agtalek ken Jehova addaanda iti talna, kalmado a rikna a saan a nakadepende iti situasionda. (Salmo 112:7; 119:165) Maaddaantayo iti kastoy a talna no addaantayo iti nadekket a relasion ken Jehova ken ikagumaantayo nga aramiden ti umiso iti imatangna.—Proverbio 3:32; Isaias 48:18.

Daytoy nga “agtultuloy a talna” dina kayat a sawen nga ilisi ti Dios dagiti adipenna iti amin a pakarigatan ken pakadanagan. (1 Samuel 1:6, 7; Job 6:1, 2; Salmo 31:9) Imbes ketdi, tulonganna ida a mangsango kadagiti pakarigatanda. (Isaias 41:10, 13) Sungbatanna dagiti kararagda, ket pabilgen, liwliwaen, ken ikkanna ida iti sirib. (Salmo 94:19; Proverbio 2:6; Isaias 40:29) Kas resultana, kalmadoda latta uray kadagiti narigat a situasion.—Filipos 4:6, 7.

Konteksto ti Isaias 26:3

Nagbiag ni propeta Isaias idi maikawalo a siglo B.C.E. Iti dayta a tiempo ken kadagiti simmaruno a tawtawen, adu a taga-Juda ti saan a nagmatalek ken Jehova a Dios. Gapu iti dayta, impalubos ni Jehova a madadael ti kabesera a siudadda, ti Jerusalem, idi 607 B.C.E.

Nupay kasta, nasurok a sangagasut a tawen sakbay ti pannakadadael ti Jerusalem, insurat ni Isaias ti naimpadtuan a kanta ti panangidaydayaw ken Jehova a nairekord iti kapitulo 26. (Isaias 26:1-6) Tukoyen dayta a kanta ti tiempo inton maisubli, wenno maibangon manen, ti maysa a siudad iti Juda, a nalawag a ti Jerusalem.

Naibangon manen ti Jerusalem kadagiti tawen kalpasan ti 537 B.C.E. Idi napasamak dayta, natalgeden ti rikna dagiti matalek a Judio a nagsubli isu nga imbagada: “Natibker ti siudadtayo.” (Isaias 26:1) Ngem saan a dagiti natibker a pader ti siudad ti talaga a mangprotprotektar kadakuada. Imbes ketdi, ti kinatalged ti siudad ket nakadepende iti pamendision ken proteksion ni Jehova.—Isaias 26:2.

Kasta met laeng ita. Dagidiay naan-anay nga agtalek ken Jehova mariknada a natalgedda gapu ta ibilbilangda isuna kas dakkel a “Bato,” wenno kamangda.—Isaias 26:4.

Buyaem ti ababa a video tapno maammuam no ania ti pakabuklan ti libro nga Isaias.