Aramid 1:8—“Umawatcayto ti Pannacabalin”

“Umawatkayto iti pannakabalin inton umay kadakayo ti nasantuan nga espiritu, ket dakayonto dagiti saksik idiay Jerusalem, iti intero a Judea ken Samaria, ken agingga iti kaadaywan a paset ti daga.”—Aramid 1:8, Baro a Lubong a Patarus.

“Umawatcayto ti pannacabalin, inton umay cadacayo ti Espiritu Santo; ket dacayto ti sacsic sadi Jerusalem, ken iti isuamin a Judea, ken Samaria, ken agingga iti ungto ti daga.”‏—Aramid 1:8, Ti Biblia.

Kaipapanan ti Aramid 1:8

Ikarkari ni Jesus kadagiti pasurotna a pabilgenna ida babaen ti nasantuan nga espiritu ti Dios tapno maaramidda ti ministerioda agingga iti kaadaywan a paset ti lubong.

“Umawatkayto iti pannakabalin inton umay kadakayo ti nasantuan nga espiritu.” Inulit ni Jesus ti inkarina kadagiti adalanna nga umawatda iti tulong babaen ti espiritu ti Diosa kalpasan ti panagsublina idiay langit. (Juan 14:16, 26) Sangapulo nga aldaw kalpasan a nagpalangit ni Jesus idi tawen 33 C.E., naawat dagiti pasurotna ti inkarina a nasantuan nga espiritu. (Aramid 2:1-4) Iti tulong ti nasantuan nga espiritu ti Dios, saanda laeng a nakapagsao iti nagduduma a lengguahe ken nakaaramid kadagiti milagro, naikasabada pay a situtured ti maipapan iti pammatida ken Jesus.—Aramid 3:1-8; 4:33; 6:8-10; 14:3, 8-10.

“Dakayonto dagiti saksik.” Ti sao a naipatarus a “saksi” kaipapananna ti maysa a “mangtestigo” wenno “mangpaneknek iti banag” a nakita wenno napadasanna a mismo. Gapu ta nasaksian dagiti apostol ti panagbiag ni Jesus, mapaneknekanda dagiti pasamak bayat ti ministerio, ipapatay, ken panagungarna. (Aramid 2:32; 3:15; 5:32; 10:39) Ti natibker a testimoniada ti nangkombinsir iti adu a ni Jesus ti Kristo, ti naikari a Mesias. (Aramid 2:32-36, 41) Nagbalin a saksi ni Jesus dagiti namati kadagiti apostol, ket inkasabada met ti kaipapanan ti biag, ipapatay, ken panagungarna.—Aramid 17:2, 3; 18:5.

“Agingga iti kaadaywan a paset ti daga.” Dagitoy a sasao ket mabalin met a maipatarus kas “agingga iti ungto ti daga” wenno “agingga iti amin a suli ti daga.” Ipakita dagiti sasao ni Jesus no kasano kaadayo ti madanon dagiti pasurotna tapno saksianda. Saan la nga iti Judea ken Samaria ti pangipakaammuanda kadagiti patpatienda. Ad-adayo pay a lugar ti papananda ken ad-adu a tao ti kasabaanda ngem kadagiti kinasabaan ni Jesus. (Mateo 28:19; Juan 14:12) Awan pay 30 a tawen kalpasan nga imbaga dagitoy ni Jesus, insurat ni apostol Pablo a ti naimbag a damag maipapan ken Jesus ket “naikaskasaba iti amin a parsua iti baba ti langit,” uray kadagiti adayo a lugar kas iti Roma, Partia (abagatan a daya ti Baybay Caspiano), ken Amianan nga Africa.—Colosas 1:23; Aramid 2:5, 9-11.

Konteksto ti Aramid 1:8

Mangrugi ti libro nga Aramid kadagiti pasamak iti maudi a paset ti Ebanghelio ni Lucas. (Lucas 24:44-49; Aramid 1:4, 5) Ti adalan a ni Lucas, a nangisurat iti dayta a libro, rinugianna ti salaysayna babaen ti panangdeskribirna no kasano a nagparang ni Jesus kadagiti pasurotna idi napagungar. (Aramid 1:1-3) Idi agangay, insalaysayna no kasano a nangrugi ti kongregasion Kristiano ken no kasano a rimmang-ay dayta manipud 33 C.E. agingga idi agarup 61 C.E.—Aramid 11:26.

Ipakita ti konteksto ti Aramid 1:8 a pampanunoten idi dagiti pasurot ni Jesus no mangrugi iti panawenda ti panagturayna kas Ari iti Pagarian ti Dios. (Aramid 1:6) Kas sungbat, imbaga ni Jesus kadakuada a saanda a pakaseknan unay no kaano a maipasdek ti Pagarian. (Aramid 1:7) Imbes ketdi, masapul nga agpokus dagiti pasurotna iti panangsaksi maipapan kenkuana agingga iti “kaadaywan a paset ti daga.” (Aramid 1:8) Tultuladen met dayta dagiti Kristiano ita babaen ti sireregta a panangikasabada iti naimbag a damag maipapan iti Pagarian ti Dios.—Mateo 24:14.

Buyaem daytoy ababa a video tapno maammuam ti maipapan iti libro nga Aramid.