Natungpal ti Tarigagay ti Pusona

TARIGAGAY kadi ti pusoyo a makita ti naan-anay a panagturay ti Mesianiko a Pagarian iti intero a daga? No kasta, il-iliwen ken ikarkararagyo dagiti naikari a naindagaan a bendision iti sidong dayta nailangitan a Pagarian. Agan-anuskay ngarud, ta “no umapay ti kalikagum, isu ti maysa a kayo ti biag.”​—Proverbio 13:12; Santiago 5:7, 8.

Agarup 2,000 a tawenen ti napalabas, nagnaed idiay Jerusalem ti “nalinteg ken managdayaw” a lalaki a ni Simeon. Adda pammatina kadagiti padto maipapan iti Mesias ken siaanus idi “nga agur-uray iti pannakaliwliwa ti Israel.”​—Lucas 2:25.

Mangted Namnama Dagiti Mesianiko a Padto

Ni Jehova ti nangisawang iti umuna a Mesianiko a padto​—a nangted ti namnama iti managbasol ken matmatay a sangatauan. Impakauna ti Dios ti yaay ti Bin-i ti “babai[na],” wenno ti sapasap nga organisasionna.​—Genesis 3:15.

Dayta a Bin-i naipabigbig a kas bin-i ni Abraham, ket impadto ni Jacob ti yaayna. (Genesis 22:17, 18; 49:10) Dagiti dayag ti Mesianiko a Pagarian ket naidaydayaw kadagiti salmo. (Salmo 72:1-20) Impakauna ni Isaias a ti Bin-i mayanakto iti birhen, ken impadto ni Mikias a mayanakto idiay Bethlehem. (Isaias 7:14; Mikias 5:2) Sumagmamano laeng dagitoy kadagiti adu a Mesianiko a padto.

Awan Pay ti Mesias!

Utobenyo ti napalabas, ken panunotenyo nga umasidegen ti umuna a siglo K. P. Ti damo a Mesianiko a padto ti Dios ket 4,000 a tawenen ti kabayagna. Napasaranen dagiti Judio ti pannakadadael ti templo ni Jehova, ti pannakalangalang ti dagada, ti 70 a tawen a pannakakayawda idiay Babilonia, ken ti 500 a tawen pay a pannakaipasidongda kadagiti agturay a Gentil. Awan pay laeng ti Mesias!

Anian a panangil-iliw dagiti managbuteng-Dios a Judio iti yaay ti Mesias! Manipud kenkuana, agayus dagiti bendision kadakuada ken kadagiti amin a nasion.

Managdayaw a Tao

Maysa kadagiti managdayaw a Judio a mangil-iliw ken mangikarkararag iti yaay ti Mesias isu ni Simeon, maysa a matalek a lakay nga adipen ni Jehova nga agnanaed idiay kabesera a siudad ti Judea. Adda naisangsangayan a napasamak ken ni Simeon.

Inkabil ti Dios ti espirituna ken ni Simeon ken ginunggonaanna iti maysa a paltiing. Saanto a matay ni Simeon agingga a makitana Daydiay agbalinto a Mesias. Ngem aglablabas dagiti aldaw ken bulan. Lumaklakay ni Simeon ket dina namnamaen nga agpaut pay ti biagna. Matungpalto aya ti kari ti Dios kenkuana?

Maysa nga aldaw (idi 2 K.K.P.), adda agkabannuag nga agassawa nga addaan maladaga nga immay iti templo. Naggapuda idiay Bethlehem. Impalgak ti nasantuan nga espiritu ken ni Simeon nga isu daytoy ti aldaw a nabayagen nga ur-urayenna. Napan idiay templo, a sadiay ti pakakitaanna iti Daydiay impadto dagiti propeta. Nagdardaras agingga ti kabaelan ti lakayen a pammagina, nakitana ni Jose, Maria, ken ti ubing.

Kasta unay ti ragsak ni Simeon a nangubba iti ubing a ni Jesus! Isu daytoy ti naikari nga agbalinto a Mesias​—“ti Kristo ni Jehova.” Iti dayta a kalakayna, saan a namnamaen ni Simeon a maurayna pay ti panangtungpal ni Jesus iti naindagaan a misionna. Nupay kasta, naisangsangayan a makitana a kas maladaga. Mangrugin a matungpal dagiti Mesianiko a padto. Anian a ragsak ni Simeon! Itan mapneken a mapan aginana ken patay agingga a mapagungar.​—Lucas 2:25-28.

Dagiti Propetiko a Sasao ni Simeon

Bayat nga iyebkas ni Simeon ti panagdayawna ken Jehova, mangngegtay a kunkunana: “Ita, Soberano nga Apo, palpalubosamon ti adipenmo a mapan a siwayawaya a sitatalna sigun iti deklarasionmo; agsipud ta dagiti matak nakitadan ti wagas a panangisalakanmo nga insaganam iti imatang dagiti amin a tattao, maysa a silaw a pangikkat iti abbong manipud kadagiti nasion ken maysa a dayag iti ilim nga Israel.” Nasdaaw kadagitoy a sasao da Jose nga agsiuman ken Jesus, ken ni inana a Maria.​—Lucas 2:29-33.

Naragsak ti langa ni Simeon bayat a binendisionanna da Jose ken Maria, nalabit nga indawatna a bendisionan ni Jehova ti inda panangitungpal iti annogenda iti ubing. Idi kuan rimmidem ti rupa ti lakay. Inturongna laeng ken ni Maria dagiti saona, innayonna: “Adtoy! Daytoy a maysa naikabil maipaay iti pannakapasag ken iti ibabangon manen dagiti adu iti Israel ken maipaay a pagilasinan a mapagsusuppiatan (wen, maysa nga atiddug a kampilan ti maisalputto iti kararuam met laeng), tapno maipanayag koma dagiti panagrasrason ti adu a puspuso.”​—Lucas 2:34, 35.

Ti Sao ni Simeon ken Maria

Iladawanyo no ania ti rikna ni Maria. Aniat’ kayat a sawen ni Simeon? Adda sumagmamano nga umawatto iti Kristo a maibangon manipud iti napasag a kasasaadda. Nupay kasta, isu laksidento dagiti dadduma, maitibkolda kenkuana, ket mapasagda. Kas naipakauna, ni Jesus nagbalin a bato a mangitibkol kadagiti adu a Judio. (Isaias 8:14; 28:16) Saan a kayat a sawen dagiti sasao ni Simeon nga umuna a di mamati ti maysa nga Israelita santo maalangon iti pammati babaen ti panangawatna ken Jesus. No di ket, nagduduma ti tignay dagiti tao, a mangilatak kadagiti panagrasrason dagiti adu a puso nga isut’ pangibatayan ti panangukom ti Dios kadakuada maipaay iti naimbag wenno dakes [a pagtungpalanda]. Kadagiti di mamati, agbalinto a kas pagilasinan, wenno puntiria ti pananglais. Babaen ti panamatida kenkuana, maibangon dagiti dadduma manipud iti natay a kasasaadda gapu kadagiti labsing ken basol ken maaddaanda iti nalinteg a takder iti imatang ti Dios. Ipakita ti panangtrato dagiti tao iti Mesias no ania ti linaon ti pusoda.

Ania met ngay ti maipapan kadagiti sasao ni Simeon a: “Maysa nga atiddug a kampilan ti maisalputto iti kararuam met laeng”? Awan ti Nainkasuratan a pammaneknek a ni Maria ket nasalput iti kampilan. Ngem, ti pananglaksid ti kaaduan ken Jesus ti mangparigat kenkuana. Ket anian a nagsaem para ken Maria ti pannakakitana iti pannakailansa ni Jesus iti kayo! Kaasping daytoy ti pannakaduyokna iti maysa a kampilan.

Iyaplikar ni Simeon Dagiti Mesianiko a Padto

Tinignay ti espiritu ti Dios ni Simeon a mangiyaplikar kadagiti Mesianiko a padto ken Jesus. Mabalinen a matay ni Simeon a sitatalna wenno sitatalinaay, ‘agsipud ta dagiti mata[na] nakitadan ti wagas a panangisalakan nga insagana [ti Dios] iti imatang dagiti amin a tattao, maysa a silaw a pangikkat iti abbong manipud kadagiti nasion ken maysa a dayag iti ili[na] nga Israel.’ (Lucas 2:30-32) Anian a nagsayaat ti pannakaiyaplikar daytoy iti naimpadtuan a sasao ni Isaias!

Impakauna dayta a mammadto: “Ti dayag ni Jehova maiparangarangto, ken amin a lasag isu ti makitadanto amin.” “Siak [ni Jehova] itedkanto met [ti Mesias] a silaw kadagiti nasion, tapno makapagbalinka a pangisalakanko agingga iti ungto ti daga.” (Isaias 40:5; 42:6; 49:6; 52:10) Manipud idi, pinaneknekanen ti Kristiano a Griego a Kasuratan ken dagiti pisikal a kinapudno a ti Mesias, ni Jesu-Kristo, isu ti pudno a silaw dagiti nasion, ti mangikkat ti abbong ti naespirituan a kinasipnget ken mangyeg ti pannakaisalakan kadagiti tattao.

Awanen ti dinakamat ti Sao ti Dios maipapan ken ni lakay Simeon. Nalawag a natay sakbay a linuktan ni Kristo ti dalan nga agturong ti nailangitan a biag. Ngarud, di agbayag, mapagungarto iti biag ditoy daga ni Simeon. Anian a ragsak ti mapadasanna​—ken dakayo​—idiay baro a lubong iti sidong ti Mesianiko a Pagarian ti Dios!