ALAMO
[Heb., ʽara·vimʹ (pangadu a porma)].
Ti Hebreo a nagan maipaay iti daytoy a kayo katupagna ti Arabiko a gharab, nga agtultuloy a maar-aramat maipaay iti alamo ti Eufrates. Gapuna, nupay ti alamo ken sause ket kameng ti isu met laeng a pamilia dagiti kayo, ken agpadada a gagangay idiay Makintengnga a Daya, dagiti agdama a leksikograpo anamonganda ti kayo nga alamo (Populus euphratica) iti patarus.—Kitaenyo ti Lexicon in Veteris Testamenti Libros da Koehler ken Baumgartner, Leiden, 1958, p. 733; ti Hebrew and English Lexicon of the Old Testament da Brown, Driver, ken Briggs, 1980, p. 788; The New Westminster Dictionary of the Bible, inurnos ni H. Gehman, 1970, p. 998.
Gagangay unay ti kayo nga alamo kadagiti igid ti Eufrates (idinto ta ti sause nataktakkon sadiay) ket ngarud tumutop unay iti pannakatukoy iti Salmo 137:1, 2, a mangdesdeskribir kadagiti agsangsangit a destiero a Judio a mangisabsab-it kadagiti arpada kadagiti kayo nga alamo. Ti babassit, sumarangsang, sukog-puso a bulbulong ti alamo ti Eufrates (maawagan met iti aspen) ket maaw-awit kadagiti nalugpap a sanga a nakairig nga agbibitin manipud iti kangrunaan nga ungkay, ket agbanag daytoy iti panagpallayogda iti uray sangkabassit laeng a panagpul-oy, panaggunay a mabalin a mangipasimudaag iti pannakadayyeg ti emosion dagiti tattao nga agsangsangit gapu iti ladingit.
Masarakan met dagiti alamo ti Eufrates kadagiti igid ti karkarayan ken barbaresbes idiay Siria ken Palestina, ken nangnangruna iti ginget ti Karayan Jordan. Sadiay, agraman dagiti kayo a tamarisko, masansan a buklenda dagiti napuskol a kasamekan, idinto ta iti dadduma a lugar mabalin a dumakkelda iti katayag a manipud 9 agingga iti 14 m (30 agingga iti 45 pie). Kadagiti amin a pannakatukoyda iti Kasuratan, dagitoy a kayo nga alamo nainaigda kadagiti pagay-ayusan ti danum wenno “naapres a ginget.” Nairamanda kadagiti kayo a ti kangrunaan a sangsangada naaramat iti Piesta dagiti Abong-abong (Le 23:40); nangipaayda iti pagsalinongan ti nabileg a “Behemot” (hipopotamo) iti igid ti karayan (Job 40:15, 22); ket ti kinalakada nga agtubo iti igid dagiti nasayaat-pannakapadanumna a disso nausar iti Isaias 44:3, 4 a mangiladawan iti napartak nga irarang-ay ken iyaadu nga ibunga dagiti naiparukpok a bendision ken espiritu ni Jehova.