SINIM, DAGA TI

Maysa a pagilian a naipadto a papanan dagiti naiwarawara nga Israelita inton dumtengen ti tiempo nga agnaedda ken tarimaanenda ti bukodda a daga. (Isa 49:12) Ipasimudaag ti pannakatukoy ti amianan ken laud iti dayta met laeng a bersikulo nga adda ti Sinim iti abagatan wenno daya ti daga ti Israel. Imbes a “Sinim” ti naaramat iti Griego a Septuagint, nausar ti “daga dagiti Persiano,” a mabalin a ramanenna ti Elam, naawagan Si-nim iti Daan nga Akkadiano. (Idiligyo ti Isa 11:11.) Iti sabali a bangir, naaramat ti “[daga] iti abagatan” kadagiti Targum ken iti Latin a Vulgate. Kunaen ti dadduma nga eskolar nga isu dayta ti Siene (Eze 30:6) iti makin-abagatan nga ungto ti Egipto. Ngem saan a masinunuo ti ayan ti Sinim.