Sipapakumbaba nga Agpasakup Kadagiti Naayat a Pastor
“Agtulnogkayo kadagidiay mangidadaulo kadakayo ket agpasakupkayo.”—HEBREO 13:17.
1, 2. Ania dagiti teksto a mangipakita a naayat a Papastor da Jehova ken Jesus?
NI Jehova a Dios ken ti Anakna a ni Jesu-Kristo naayatda a Papastor. Impadto ni Isaias: “Adtoy! Ti met laeng Soberano nga Apo Jehova umayto a mismo kas maysa a napigsa, ket ti takiagna agturayto maipaay kenkuana. . . . Kas iti maysa a pastor ipastorannanto ti bukodna a pangen. Babaen ti takiagna ummongennanto a sangsangkamaysa dagiti kordero; ket iti barukongna awitennanto ida. Dagidiay agpaspasuso siaannad nga idalannanto ida.”—Isaias 40:10, 11.
2 Dayta a padto ti pannakaisubli ket damo a natungpal idi nagsubli idiay Juda ti maysa a grupo dagiti natda a Judio idi 537 K.K.P. (2 Cronicas 36:22, 23) Natungpal manen dayta idi naispal dagiti napulotan a natda manipud iti “Babilonia a Dakkel” idi 1919 babaen iti Dakdakkel a Ciro, ni Jesu-Kristo. (Apocalipsis 18:2; Isaias 44:28) Isu ti ‘takiag’ nga usaren ni Jehova a mangituray, a mangurnong kadagiti karnero ken sidudungngo a mangipastor kadakuada. Kinuna a mismo ni Jesus: “Siak ti nasayaat a pastor, ket am-ammok dagiti karnerok ket dagiti karnerok am-ammodak.”—Juan 10:14.
3. Kasano nga impakita ni Jehova nga isu ket pudno a maseknan iti wagas ti pannakatrato dagiti karnerona?
3 Ti padto iti Isaias 40:10, 11 ipaganetgetna ti nadungngo a panangipastor ni Jehova iti ilina. (Salmo 23:1-6) Bayat ti ministeriona ditoy daga, impakita met ni Jesus ti nadungngo a pannakaseknanna kadagiti adalanna ken kadagiti tattao. (Mateo 11:28-30; Marcos 6:34) Ni Jehova ken ni Jesus agpada a kinondenarda ti kinaulpit dagiti papastor wenno papanguluen ti Israel, nga awan babainda a nangbaybay-a ken nanggundaway kadagiti pasurotda. (Ezequiel 34:2-10; Mateo 23:3, 4, 15) Inkari ni Jehova: “Isalakankonto dagiti karnerok, ket saandanton nga agbalin a maysa a banag a samsamen; ket mangukomakto iti nagbaetan ti karnero ken karnero. Ket mangibangonakto kadakuada iti maysa a pastor, ket masapul a pakanenna ida, ni adipenko a David a mismo. Isu pakanennanto ida, ket isu agbalinto a pastorda.” (Ezequiel 34:22, 23) Iti daytoy tiempo ti panungpalan, ni Jesu-Kristo, ti Dakdakkel a David, isu ti “maymaysa a pastor” a nangitalkan ni Jehova kadagiti amin nga adipenna ditoy daga, agpadpada dagiti napulotan a Kristiano ken ti “sabsabali a karnero.”―Juan 10:16.
Dagiti Sagut ni Jehova Kadagiti Kongregasion
4, 5. (a) Ania a napateg a sagut ti impaay ni Jehova iti ilina ditoy daga? (b) Ania a sagut ti impaay ni Jesus iti kongregasionna?
4 Babaen ti panangdutokna ken ni Jesu-Kristo kas ti “maymaysa a pastor” a mangaywan kadagiti adipenna ditoy daga, nangipaay ni Jehova iti napateg a sagut iti kongregasion Kristiano. Naipadto iti Isaias 55:4 a mangipaay ni Jehova iti maysa a sagut a Panguluen: “Adtoy! Kas maysa a saksi kadagiti nasional a bunggoy isu intedko, kas maysa a panguluen ken komandante kadagiti nasional a bunggoy.” Dagiti napulotan a Kristiano ken dagiti kameng ti “dakkel a bunggoy” maur-urnongda manipud iti amin a puli, tribu, ili, ken pagsasao. (Apocalipsis 5:9, 10; 7:9) Buklenda ti maysa nga internasional a kongregasion, “maymaysa nga arban,” iti sidong ti panangidaulo ti “maymaysa a pastor,” ni Kristo Jesus.
5 Iti sabali a bangir, inikkan ni Jesus iti maysa a napateg a sagut ti kongregasionna ditoy daga. Nangipaay kadagiti matalek a katulongan a papastor a sidudungngo a mangaywan iti arban kas panangtuladda iti wagas ti panangipastor da Jehova ken Jesus. Iti suratna kadagiti Kristiano a taga-Efeso, dinakamat ni apostol Pablo daytoy a naayat a sagut. Kinunana: “‘Idi isu immuli sadi ngato isu nangipanaw kadagiti kautibo; nangted kadagiti sagut a tattao.’ . . . Intedna ti sumagmamano kas apostol, ti sumagmamano kas mammadto, ti sumagmamano kas managebanghelio, ti sumagmamano kas papastor ken mannursuro, iti panggep a panangatur kadagiti sasanto, maipaay iti trabaho a panagministerio, maipaay iti pannakapabileg ti bagi ti Kristo.”—Efeso 4:8, 11, 12.
6. Kasano a nailadawan iti Apocalipsis 1:16, 20 dagiti napulotan a manangaywan nga agserserbi kas bagi dagiti panglakayen, ken ania met ti makuna maipapan kadagiti nadutokan a panglakayen a kameng ti sabsabali a karnero?
6 Dagitoy a “sagut a tattao” isuda dagiti manangaywan wenno papanglakayen a dinutokan ni Jehova ken ti Anakna, babaen ti nasantuan nga espiritu, tapno sidudungngo nga ipastoranda dagiti karnero. (Aramid 20:28, 29) Idi damo, bin-ig a napulotan a Kristiano dagitoy a manangaywan. Iti Apocalipsis 1:16, 20, dagidi a kameng ti bagi dagiti panglakayen iti napulotan a kongregasion nailadawanda kas “bituen” wenno “anghel” iti makannawan nga ima ni Kristo, kayatna a sawen, addada iti panangiwanwanna. Ngem iti daytoy tiempo ti panungpalan, bayat a bumasbassit ti bilang dagiti napulotan a mangaywan ditoy daga, kaaduanen a panglakayen kadagiti kongregasion ket kameng ti sabsabali a karnero. Yantangay dinutokan ida dagiti representante ti Bagi a Manarawidwid iti sidong ti panangiwanwan ti nasantuan nga espiritu, makuna nga addada met iti makannawan nga ima (wenno, iti panangiwanwan) ti Nasayaat a Pastor, ni Jesu-Kristo. (Isaias 61:5, 6) Gapu ta dagiti panglakayen kadagiti kongregasion agpaspasakupda ken ni Kristo kas Ulo ti kongregasion, maikarida iti naan-anay a pannakitunostayo.―Colosas 1:18.
Panagtulnog ken Panagpasakup
7. Ania ti balakad ni apostol Pablo mainaig iti kababalintayo kadagiti Kristiano a manangaywan?
7 Dagiti nailangitan a Papastortayo, ni Jehova a Dios ken ni Jesu-Kristo, namnamaenda nga agtulnog ken agpasakuptayo kadagiti katulongan a papastor nga inikkanda kadagiti annongen iti uneg ti kongregasion. (1 Pedro 5:5) Napaltiingan ni apostol Pablo a mangisurat: “Laglagipenyo dagidiay mangidadaulo kadakayo, isuda a nangisao kadakayo ti sao ti Dios, ket bayat nga ut-utobenyo ti pagbanagan ti kababalinda tuladenyo ti pammatida. Agtulnogkayo kadagidiay mangidadaulo kadakayo ket agpasakupkayo, ta agtultuloy a bambantayanda dagiti kararuayo a kasla isudanto dagidiay manungsungbat; tapno aramidenda daytoy a buyogen ti panagrag-o ket saan a buyogen ti panagsennaay, ta daytoy ket makadangran kadakayo.”—Hebreo 13:7, 17.
8. Ania ti iyaw-awis ni Pablo nga ‘utobentayo,’ ken kasano a maipakitatayo a ‘natulnogtayo’?
8 Imutektekanyo ta aw-awisennatayo ni Pablo a ‘mangutob,’ wenno mangusig a naimbag, iti resulta ti mapagwadan a kondukta dagiti panglakayen ken tuladentayo dagita nga ulidan ti pammati. Malaksid iti dayta, balakadannatayo nga agtulnog ken agpasakup iti panangiturong dagitoy a nadutokan a lallaki. Sigun iti eskolar ti Biblia a ni R. T. France, ti orihinal a Griego a sao a naipatarus ditoy kas “agtulnogkayo” ket saan a “ti gagangay a termino para iti panagtulnog, no di ket maysa a sao a kaipapananna ‘kombinsido,’ a mangipasimudaag iti sitatallugod a panangsurot iti panangidauloda.” Agtulnogtayo kadagiti panglakayen saan laeng a gapu ta imbilin dayta ti Sao ti Dios no di ket gapu ta kombinsidotayo a dagiti interes ti Pagarian ken ti pagimbagantayo ti kangrunaan a pakaseknanda. Sigurado a naragsaktayo no sidadaan a sumurottayo iti panangidauloda.
9. Apay a masapul a ‘managpasakuptayo’ malaksid iti panagbalintayo a natulnog?
9 Ngem kasano no adda dagiti gundaway a saantayo a kombinsido iti panangiwanwan dagiti panglakayen? Dita a sumrek ti panagpasakup. Nalaka ti agtulnog no nalawag dagiti bambanag ken umanamongtayo kadagita, ngem maipakitatayo ti pudpudno a panagpasakup no sumurottayo uray no ditay personal a maawatan ti naipaay nga instruksion. Ni Pedro, a nagbalin nga apostol idi agangay, impakitana dayta a kita ti panagpasakup.―Lucas 5:4, 5.
Uppat a Rason a Sitatallugod a Makitunos
10, 11. Iti ania a pamay-an a dagiti manangaywan ‘isasaoda ti sao ti Dios’ kadagiti padada a Kristiano idi umuna a siglo ken iti kaaldawantayo?
10 Iti Hebreo 13:7, 17 a naadaw itay, dinakamat ni apostol Pablo ti uppat a rason no apay a masapul nga agtulnog ken agpasakuptayo kadagiti Kristiano a manangaywan. Umuna, ‘isasaoda kadatayo ti sao ti Dios.’ Laglagipenyo a dagiti “sagut a tattao” nga inkabil ni Jesus kadagiti kongregasion ket agpaay iti ‘pannakaatur dagiti sasanto.’ (Efeso 4:11, 12) Inaturna ti panagpampanunot ken kondukta dagiti Kristiano idi umuna a siglo babaen kadagiti matalek a katulongan a papastor, a dadduma kadakuada ti napaltiingan nga agsurat kadagiti kongregasion. Inusarna dagiti manangaywan a dinutokan ti espiritu tapno iwanwan ken pabilgenda dagiti nagkauna a Kristiano.―1 Corinto 16:15-18; 2 Timoteo 2:2; Tito 1:5.
11 Iturturongnatayo ita ni Jesus babaen “ti matalek ken masirib nga adipen,” nga irepresentar ti Bagi a Manarawidwid ken dagiti nadutokan a panglakayen. (Mateo 24:45) Kas panagraemtayo iti “panguluen a pastor,” ni Jesu-Kristo, ipangagtayo ti balakad ni Pablo: “Maaddaankayo iti panagraem kadagidiay agtartrabaho a sipipinget iti tengngayo ken mangidadaulo kadakayo iti Apo ken mangbagbaga kadakayo.”—1 Pedro 5:4; 1 Tesalonica 5:12; 1 Timoteo 5:17.
12. Kasano a dagiti manangaywan ‘agtultuloy a bambantayanda dagiti kararuatayo’?
12 Maikadua, makitunostayo kadagiti Kristiano a manangaywan gapu ta ‘agtultuloy a bambantayanda dagiti kararuatayo.’ No adda madlawda a panangmatmat wenno kababalintayo a mamagpeggad iti espiritualidadtayo, dagus a mangipaayda iti balakad tapno maatur dayta. (Galacia 6:1) Ti Griego a sao a naipatarus nga ‘agbambantay’ ket literal a kaipapananna “saan a matmaturog.” Sigun iti maysa nga eskolar ti Biblia, “ipasimudaagna ti agtultuloy a kinaridam ti pastor.” Malaksid iti panagtalinaedda a siririing iti naespirituan, mabalin a literal pay nga agpuyat dagiti panglakayen gapu iti pannakaseknanda iti naespirituan a pagimbagantayo. Saantay kadi a matignay a makitunos kadagita a naayat a katulongan a papastor, a mangikagkagumaan a mangtulad iti kinadungngo ni Jesu-Kristo, ti “naindaklan a pastor dagiti karnero”?―Hebreo 13:20.
13. Iti siasino ken iti ania a pamay-an a manungsungbat dagiti manangaywan ken ti amin a Kristiano?
13 Maikatlo, sitatallugod a makitunostayo kadagiti manangaywan gapu ta bambantayandatayo “a kasla isudanto dagidiay manungsungbat.” Silalagip dagiti manangaywan a katulongan ida dagiti nailangitan a Pastor, ni Jehova a Dios ken Jesu-Kristo. (Ezequiel 34:22-24) Ni Jehova ti Makinkukua kadagiti karnero, a “ginatangna babaen ti dara ti bukodna nga Anak,” ket panungsungbatenna dagiti nadutokan a manangaywan no ‘nadungngo’ met laeng ti panangtratoda iti arbanna. (Aramid 20:28, 29) Maitunos iti dayta, sungsungbatantayo ken ni Jehova ti aniaman nga aramidentayo mainaig iti panangiwanwanna. (Roma 14:10-12) Ti panagtulnogtayo kadagiti nadutokan a panglakayen mangted met iti pammaneknek nga agpaspasakuptayo ken ni Kristo, ti Ulo ti kongregasion.―Colosas 2:19.
14. Ania ti mabalin a ‘mamagsennaay’ kadagiti Kristiano a manangaywan, nga agresulta iti ania?
14 Dinakamat ni Pablo ti maikapat a rason no apay a rumbeng a sipapakumbaba nga agpasakuptayo kadagiti Kristiano a manangaywan. Insuratna: “Tapno aramidenda daytoy a buyogen ti panagrag-o ket saan a buyogen ti panagsennaay, ta daytoy ket makadangran kadakayo.” (Hebreo 13:17) Nadagsen dagiti annongen nga ibakbaklay dagiti Kristiano a papanglakayen kas iti panangisuro, panangipastor, panangidaulo iti panangasaba, panangtaripato iti pamiliada, ken panangtaming kadagiti parikut ti kongregasion. (2 Corinto 11:28, 29) No saantay a makitunos kadakuada, ad-adda a mapadagsenantayo ida, nga agresulta iti ‘panagsennaayda.’ Saan a makaay-ayo dayta ken ni Jehova ken mangyeg iti pagdaksantayo. Ngem no raemen ken makitunostayo kadagiti panglakayen, sirarag-o a maibanagda dagiti annongenda, nga ad-adda a mangparayray iti panagkaykaysa ken naragsak a pannakipaset iti pannakaikasaba ti Pagarian.―Roma 15:5, 6.
Panangipakita nga Agpaspasakuptayo
15. Kasano a maipakitatayo a natulnog ken agpaspasakuptayo?
15 Adu ti praktikal a pamay-an a maipakitatayo a makituntunostayo kadagiti nadutokan a manangaywan. Tapno bumagay kadagiti baro a kasasaad iti teritoria, nangyurnos kadi dagiti panglakayen kadagiti taripnong sakbay ti panangasaba kadagiti aldaw ken oras nga agkalikagum iti panangbalbaliwmo iti eskediulmo? Ikagumaantayo koma a suportaran dagita a baro nga urnos. Mabalin a masagraptayo dagiti di ninamnama a bendision. Ti kadi manangaywan iti serbisio sarsarungkaranna ti Panagadal iti Libro ti Kongregasion a nakaikamengantayo? Pagreggetantayo koma a naan-anay ti makipaset iti panangasaba iti dayta a lawas. Naikkantay kadi iti paset iti Teokratiko nga Eskuelaan ti Panagministro? Ikagumaantayo koma nga iparang dayta a pasettayo. Impakaammo kadi ti manangaywan iti Panagadal iti Libro ti Kongregasion a ti grupotayo ti nakaeskediul nga agdalus iti Kingdom Hall? Naan-anay koma a suportarantayo sigun iti ipalubos ti salun-at ken pigsatayo. Babaen kadagitoy a pamay-an ken iti dadduma pay a wagas, maipakitatayo nga agpaspasakuptayo kadagiti lallaki a dinutokan ni Jehova ken ti Anakna tapno mangaywan iti arban.
16. No saan nga agtignay ti panglakayen sigun iti instruksion, apay a saan a rason dayta tapno agrebeldetayo?
16 No dadduma, mabalin a saan nga agtignay ti panglakayen sigun iti instruksion ti matalek ken masirib nga adipen babaen ti Bagi a Manarawidwid. No itultuloyna ti kasta a tignayna, adda sungsungbatanna ken ni Jehova, ‘ti pastor ken manangaywan kadagiti kararuatayo.’ (1 Pedro 2:25) Ngem adda man ti pagkurangan wenno pagkamalian ti sumagmamano a panglakayen, saan a rason dayta tapno saantayon nga agpasakup kadakuada. Saan a bendisionan ni Jehova ti panagsukir ken panagrebelde.―Numeros 12:1, 2, 9-11.
Bendisionan ni Jehova ti Sitatallugod a Pannakitunos
17. Ania koma ti kababalintayo kadagiti manangaywan?
17 Ammo ni Jehova a Dios nga imperpekto dagiti lallaki a dinutokanna kas manangaywan. Ngem kaskasdi nga us-usarenna ida, ket babaen ti espirituna, ipaspastoranna dagiti adipenna ditoy daga. Pudno dayta kadagiti panglakayen―ken kadatayo amin―a ‘biang ti Dios ti pannakabalin a nalablabes ngem iti gagangay ket saan nga agtaud iti bagbagitayo.’ (2 Corinto 4:7) Agyamantayo ngarud ken ni Jehova gapu kadagiti ar-aramidenna babaen kadagitoy a matalek a manangaywan, isu a sitatallugodtayo koma a makitunos kadakuada.
18. No agpaspasakuptayo kadagiti manangaywan, ania ti talaga nga ar-aramidentayo?
18 Ar-aramiden dagiti manangaywan ti amin a kabaelanda a mangtungpal iti kalkalikaguman ni Jehova kadagiti papastor a nangitalkanna iti arbanna kadagiti maudi nga al-aldaw, kas mabasa iti Jeremias 3:15: “Ipaayankayto kadagiti pastor maitunos iti pusok, ket sigurado a pakanendakayto iti pannakaammo ken pannakatarus.” Awan duadua a nasayaat ti maar-aramidan dagiti papanglakayen no maipapan iti panangisuro ken panangsalaknib kadagiti karnero ni Jehova. Sapay koma ta itultuloytayo nga ipakita nga ap-apresiarentayo dagiti panagreggetda babaen ti sitatallugod a pannakitunos, panagtulnog, ken panagpasakuptayo kadakuada. No aramidentayo dayta, ipakpakitatayo nga ap-apresiarentayo dagiti nailangitan a Papastortayo, ni Jehova a Dios ken ni Jesu-Kristo.
Pangrepaso
• Kasano nga impakita ni Jehova ken ni Jesu-Kristo a naayatda a Papastor?
• Malaksid iti panagtulnog, apay a kasapulan ti panagpasakup?
• Kadagiti ania a praktikal a pamay-an a maipakitatayo ti panagpasakuptayo?
[Ladawan iti panid 27]
Dagiti Kristiano a papanglakayen agpasakupda iti panangidaulo ni Kristo
[Dagiti Ladawan iti panid 29]
Adu ti pamay-an a maipakitatayo ti panagpasakuptayo kadagiti papastor a dinutokan ni Jehova