Mabalin a Maisubli ti Panagtalek!
NUPAY ti agdama a krisis iti panagtalek ket tanda “kadagiti maudi nga al-aldaw,” nagminar metten ti kinaawan panagtalek rinibu a tawenen ti napalabas. (2 Timoteo 3:1) Immuna a rimsua dayta iti lugar a kasla imposible a pakapasamakanna—iti maysa a paraiso. Kuna ti Biblia maipapan iti daydi a lugar: “Ni Jehova Dios inkabilna iti maysa a minuyongan iti daya, idiay Eden; ket insaadna idiay ti tao a binukelna. Ket ni Jehova Dios pinatubona iti daga, amin a kayo a nakaay-ayo a makita, ken naimbag a kanen; kasta met ti kayo ti biag iti tengnga ti minuyongan, ken ti kayo ti pannakaammo ti imbag ken ti dakes.”—Genesis 2:8, 9.
Dagiti sumaganad a bersikulo lawaganda ti nakainaigan daytoy iti krisis iti panagtalek iti moderno a panawen. Mabasatayo: “Ni Jehova Dios, imbilinna idi tao a kinunana: Kadagiti amin a kayo iti minuyongan mangankanto a siwayawaya: Ngem ti aggapu iti kayo ti pannakaammo ti imbag ken ti dakes saanmonto a kanen: ta iti aldaw a pannanganmo iti daydiay mataykanto a di bumurong.” (Genesis 2:16, 17) Adda kadi aniaman a rason tapno pagduaduaan ni Adan ti kinuna ni Jehova?
Mabasatayo: “Itan ti uleg isu idi a kasisikapan kadagiti amin nga animal iti daga nga inaramid ni Jehova Dios. Ket isu kinunana iti babai, Pudno aya a kinuna ti Dios, Saankay a mangan iti amin a kayo iti minuyongan? Ket ti babai kinunana iti uleg, Kadagiti bunga dagiti kaykayo iti minuyongan maipalubos a mangankami: Ngem iti bunga ti kayo nga adda iti tengnga ti minuyongan, kinuna ti Dios, dikayto kanen, ken uray sagiden di la ket ta mataykayo. Ket ti uleg kinunana iti babai, Saan a pudno a mataykayonto: Ta ti Dios ammona nga iti aldaw a pannanganyo iti dayta, dagiti matayo maluktandanto, ket kaslakayton iti Dios a makaammo ti naimbag ken ti dakes. Ket idi ti babai nakitana a ti kayo nasayaat a kanen, ken makaay-ayo a buyaen ken kayo a makagargari a mamagsirib, pimmuros iti bungana ket nangan, kasta met inikkanna ni asawana ket isu nakipagkaan met.”—Genesis 3:1-6.
Iti dida panangikankano iti nabatad a pakdaar ti Dios, impakita da Adan ken Eva ti kinaawan panagtalekda ken Jehova. Insarmingda ti kabusor ti Dios a ni Satanas, a nakisarita ken Eva baeten ti literal nga uleg. Awan panagtalek ni Satanas iti panagturay ni Jehova. Gapu iti daytoy ken ti napannakkel ken ambisioso a pusona, nagrebelde iti Dios ket inallilawna dagiti tattao a mangaramid met iti kasta. Inimpluensiaanna ida a mangpanunot a saan a rumbeng a pagtalkan ti Dios.
Ti Resultana? Nariribuk a Relasion
Nalabit napaliiwyon a dagiti tattao a di agtalek kadagiti sabsabali marigatanda a mangtaginayon iti pannakigayyemda. Insurat ni Publilius Syrus, Latin a mannurat idi umuna a siglo K.K.P.: “Ti panagtalek isu ti kakaisuna a singgalut ti panaggayyem.” Iti panagrebeldeda, impakita da Adan ken Eva a dida nagtalek iti Dios. Gapuna, sigurado nga awan rason a pagtalkan ida ti Dios. Kas resulta ti pannakadadael ti talek, wenno panagkompiansa, napukaw dagiti immuna a tattao ti pannakigayyemda iti Dios. Awan mangipakita a nakisao pay ni Jehova kadakuada manen kalpasan a kinondenarna ida gapu iti iyaalsada.
Nadadael met ti relasion da Adan ken Eva. Pinakdaaran ni Jehova ni Eva: “Iti adu a rigat ipasngaymonto dagiti annakmo; ket iti asawam isunto ti kalikagumam, ket isu iturayannakanto.” (Genesis 3:16) Kuna ti The Jerusalem Bible: “Adipenennakanto.” Imbes nga ipakatna ti naayat a kinaulo iti asawana, kas kinalikaguman idi ti Dios, nagbalinen ni Adan nga apona, a nangadipen kenkuana.
Kalpasan ti panagbasolda, pinabasol ni Adan ti asawana. Iti panagkunana ti inaramid ni Eva ti makagapu a napagtalawda iti perpekto a hardin a naipanda iti di pay napasayaat a daga, a naadipenda kadagiti narigat a kasasaad sakbay a nagsublida iti tapok. (Genesis 3:17-19) Mapanunottayo unay a daytoy ti nagsinnupiatanda a dua. Nalabit pinadpadakkel ni Adan dayta, nga imbagana a saanton a pulos mamatpati ken Eva. Nalabit impapanna nga adda kalinteganna a mangibaga iti kastoy ken Eva, ‘Manipud itan, siak ti masurot!’ Iti kasumbabangirna, nalabit nakita ni Eva a di naaramidan ni Adan ti akemna kas ulo ti pamilia, a dayta ti nangpukaw iti panagtalekna ken Adan. Aniaman ti napasamak, babaen ti panangyebkasda iti kinaawan panagtalek iti Dios, napukaw dagiti tattao ti pannakigayyemda kenkuana ken dinadaelda ti relasionda.
Siasino ti Pagtalkantayo?
Saan nga amin ket maikari a pagtalkantayo, kas iyilustrar ti napasamak kada Adan ken Eva. Kasanotay nga ammo no siasino ti maikari ken di maikari a pagtalkantayo?
Balakadannatayo ti Salmo 146:3: “Dika agkammatalek kadagiti prinsipe, ken iti anak ti tao, a kenkuana awan ti tulong.” Ken iti Jeremias 17:5-7, mabasatayo: “Mailunod ti tao nga agkammatalek iti tao, ken pagbalinenna ti lasag a takiagna, ket ti pusona sumina ken Jehova.” Iti sabali a bangir, “nagasat [“naragsak,” NW] ti tao nga agkammatalek ken Jehova, ket ti talgedna ni met laeng Jehova.”
Nupay kasta, saan a kanayon a dakes ti agtalek kadagiti tattao. Dagidiay a teksto pagminarenda laeng a kanayon nga umiso ti agtalek iti Dios, ngem ti panagtalek kadagiti imperpekto a tattao ket pasaray mangituggod iti didigra. Kas pagarigan, mapaay laeng dagidiay agkammatalek kadagiti tattao a mangipaay kadagiti banag a ti laeng Dios ti makaaramid—mangipaay iti pakaisalakanan ken mangyeg iti naan-anay a talna ken talged.—Salmo 46:9; 1 Tesalonica 5:3.
Kinapudnona, dagiti tattao ken institusion ti tao ket maikari laeng a pagtalkan no tumunosda kadagiti panggep ti Dios ken ipakitada dagiti nadiosan a prinsipio. Gapuna, tapno magutugottayo dagiti sabsabali nga agtalek kadatayo, masapul nga agsaotayo iti pudno, agbalin a napudno ken mapagtalkan. (Proverbio 12:19; Efeso 4:25; Hebreo 13:18) Babaen laeng ti panagbiagtayo a maitunos kadagiti prinsipio ti Biblia a ti panagtalek dagiti sabsabali kadatayo ket nainkalintegan ken gubuayan ti panagpipinnabileg ken panagpipinnaregta.
Panangisubli iti Panagtalek
Adda natibker a pangibatayan dagiti Saksi ni Jehova iti panagtalekda iti Dios ken ti panangiparegtada kadagiti sabsabali a mangaramid met iti kasta. Matalek ken nasungdo ni Jehova, a kanayon a mapangnamnamaan a mangaramid iti insaona, agsipud ta ‘di mabalin nga agulbod ti Dios.’ Ti panagtalek iti Dios ti ayat dinto pulos mangituggod iti pannakapaay.—Hebreo 6:18; Salmo 94:14; Isaias 46:9-11; 1 Juan 4:8.
Dagiti tattao a nagkaykaysa nga agtalek ken Jehova ken agbibiag maitunos kadagiti prinsipiona ad-adda a matignayda a mangipakita iti panagtalek iti maysa ken maysa. Iti lubong nga addaan iti krisis iti panagtalek, anian a makaparagsak ti pannakakita kadagiti tattao a mapagtalkan! Panunotenyo no kasano a nagpaiduma koma ti lubong no addaantayo iti naan-anay a panagtalek iti kunaen ken aramiden ti isuamin! Iti asidegen a baro a lubong nga inkari ti Dios, kastoyto ti kasasaad. Awanton a pulos ti krisis iti panagtalek!
Kayatyo kadi ti agbiag sadiay? No kasta, awisendakayo dagiti Saksi ni Jehova a mangpabileg iti panagtalekyo iti Dios ken kadagiti karina babaen ti panangammo iti ad-adu pay maipapan kadagiti kalikagumanna maipaay iti biag. Ti panagadal iti Biblia mangidatag iti pammaneknek nga adda Dios, nga interesado iti pagimbagan ti sangatauan, ken iti mabiiten ilintegnanto dagiti parikut ditoy lubong babaen ti Pagarianna. Minilion dagiti nakasursuro nga agtalek iti Dios ken iti Saona, ti Biblia. Maragsakanto dagiti Saksi ni Jehova a mangidemostra kadakayo ti serbisio publiko a panangyadal iti Biblia nga ituktukonda a libre. Wenno agsuratkayo kadagiti agipabpablaak iti daytoy a magasin maipaay iti ad-adu pay nga impormasion.
[Blurb iti panid 5]
Ti kinaawan panagtalek iti Dios mangituggod iti nariribuk a relasion dagiti tattao
[Blurb iti panid 6]
Maikari laeng a pagtalkan dagiti tattao no agtignayda a maitunos kadagiti nadiosan a prinsipio