Salsaludsod Dagiti Agbasbasa
Iti ania nga anag a nagbalin nga “umel” ni Ezequiel kabayatan ti pannakalakub ken pannakadadael ti Jerusalem?
Iti anag nga awanen ti mabalinna nga inayon iti impakaammona a naimpadtuan a mensahe ni Jehova.
Rinugian ni mammadto nga Ezequiel ti panagserbina kas matalek a bantay para kadagiti Israelita a naidestiero idiay Babilonia iti “maikalima a tawen ti pannakaidestiero ni Ari Jehoiaquin,” idi 613 K.K.P. (Ezequiel 1:2, 3) Iti maikasangapulo nga aldaw ti maikasangapulo a lunar month idi 609 K.K.P., impaltiing kenkuana ti Dios no kaano a mangrugi ti pananglakub ti Babilonia iti Jerusalem. (Ezequiel 24:1, 2) Ania ti pagbanagan ti pananglakub? Maliklikan kadi ti Jerusalem ken dagiti agnanaed iti dayta? Kas para bantay, impakaammo ni Ezequiel ti sigurado a mensahe ti panangdadael ni Jehova, ket awanen ti masapul pay nga inayonna tapno ad-adda a makakombinsir dayta a mensahe. Nagbalin nga umel ni Ezequiel iti aniaman a kanayonan nga impormasion maipapan iti pannakalakub ti Jerusalem.—Ezequiel 24:25-27.
Agarup innem a bulan kalpasan ti pannakadadael ti Jerusalem idi 607 K.K.P., maysa a pugante ti nangidanon iti damag ken ni Ezequiel idiay Babilonia maipapan iti pannakalangalang ti nasantuan a siudad. Iti dayta a rabii sakbay a simmangpet ti pugante, ‘linuktan ni Jehova ti ngiwat ni Ezequiel ket saanen nga umel.’ (Ezequiel 33:22) Dita a nagpatingga ti panagbalin nga umel ni Ezequiel.
Literal kadi nga umel ni Ezequiel kabayatan dayta a tiempo? Nalawag a saan, gapu ta uray idi nagbalin nga “umel,” nangipakaammo kadagiti padto a naiturong laeng kadagiti kabangibang a pagilian a nagrag-o iti pannakarpuog ti Jerusalem. (Ezequiel, kapitulo 25-32) Idi rugrugi ti panagserbi ni Ezequiel kas mammadto ken bantay, kinuna kenkuana ni Jehova: “Ti mismo a dilam idekketkonto iti ngangawmo, ket sigurado nga agumelkanto, ket saankanto nga agbalin kadakuada a maysa a lalaki a mangipapaay iti pannubngar, agsipud ta rebeliosoda a balay. Ket inton makisaoak kenka luktakto ta ngiwatmo.” (Ezequiel 3:26, 27) No awan idi ti mensahe ni Jehova agpaay iti Israel, agtalinaed a siuulimek ni Ezequiel maipapan iti nasion. No ania laeng ti kayat ni Jehova nga ibagana, dayta ti sawenna sigun iti tiempo nga intuding ti Dios. Ti panagbalin ni Ezequiel nga umel ipasimudaagna nga awan ti sawenna a padto mainaig kadagiti Israelita.
Ti moderno-aldaw a klase bantay, dagiti napulotan a Kristiano, mangpakpakdaarda maipapan iti pannakadadael ti Kakristianuan, nga iladladawan ti Jerusalem. Inton bumtak ti “dakkel a rigat” ken dadaelenna ti “Dakkel a Babilonia,” ti sangalubongan nga imperio ti palso a relihion, awanen ti sabali pay nga ibaga ti napulotan a klase Ezequiel maipapan iti panungpalan ti Kakristianuan, a mangbukel iti dakkel a paset ti imperio ti palso a relihion.—Mateo 24:21; Apocalipsis 17:1, 2, 5.
Wen, dumtengto ti aldaw inton dagiti napulotan a natda ken dagiti kakaduada agbalindanto nga umel, ta awanen ti kanayonan nga ipakaammoda iti Kakristianuan. Mapasamakto dayta inton ti “sangapulo a sara” ken “ti atap nga animal” pagbalinendanto a walangwalang ken lamolamo ti Dakkel a Babilonia. (Apocalipsis 17:16) Siempre, dina kayat a sawen daytoy a literal nga agbalin nga umel dagiti Kristiano. Kas ar-aramidenda ita, idaydayawda ni Jehova ken isu ti sasawenda iti inaldaw ken “kadagiti amin a kaputotan nga umay.”—Salmo 45:17; 145:2.