Ti Dakdakkel a Dayag ti Balay ni Jehova

“Pusekekto daytoy a balay iti kinadayag, kuna ni Jehova dagiti buybuyot.”​—HAGGEO 2:7.

1. Kasano a nainaig ti nasantuan nga espiritu iti pammati ken aramid?

BAYAT a mangaskasaba iti binalaybalay, naam-ammo ti maysa kadagiti Saksi ni Jehova ti maysa a babai a Pentecostal a nangikuna, ‘Addaankami iti nasantuan nga espiritu, ngem dakayo ti mangar-aramid iti trabaho.’ Sitataktika a nailawlawag kenkuana a ti maysa nga addaan iti nasantuan nga espiritu ket gagangay a matignay a mangaramid iti trabaho ti Dios. Kuna ti Santiago 2:17: “Ti pammati, no awan ar-aramidna, ket natay a mismo.” Babaen ti tulong ti espiritu ni Jehova, napatanor dagiti Saksina ti nabileg a pammati, ket ‘pinusekna ti balayna iti kinadayag’ babaen ti panangipaaramidna kadakuada kadagiti nalinteg nga aramid​—kangrunaanna ti ‘panangikasaba iti daytoy naimbag a damag ti pagarian iti isuamin a mapagnaedan a daga a maipaay a pangsaksi kadagiti isuamin a nasnasion.’ Inton maileppasen daytoy a trabaho iti kapkapnekan ni Jehova, “iti kasta umayton ti panungpalan.”​—Mateo 24:14.

2. (a) Ti kinaganetgettayo iti trabaho ni Jehova mangyeg iti ania a bendision? (b) Apay a rumbeng a maragsakantayo iti aniaman a kasla ‘pannakataktak’?

² Manipud kadagitoy a sasao ni Jesus, maikunatayo a ti trabahotayo ita masapul a maipamaysa iti panangasaba kadagiti sabsabali maipapan “iti nadayag a naimbag a damag ti naragsak a Dios,” a naitalek kadatayo. (1 Timoteo 1:11) Bayat nga ad-adda a siraragsak a ganetgetantayo ti agserbi ken Jehova, agparang a naparpartak ti iyaay ti panungpalan. Iti Habacuc 2:2, 3, mabasatayo ti sasao ni Jehova: “Isuratmo ti sirmata, ket aramidem a nabatad kadagiti tapi, tapno napardas koma a basaen. Ta ti sirmata agpaay pay laeng iti nadutokan a panawen, ken agsiglat a tumurong iti pannakatungpal, ket saanto nga agulbod: nupay no agtaktak, isu urayem; ta pudno nga umayto, a dinto agbayag [“dinto maladaw,” NW].” Wen, pumudnonto “ti sirmata” “nupay no agtaktak.” Iti daytoy, ti maika-83 a tawen a panagturay ti Pagarian ni Jesus, nalabit marikna ti dadduma nga addatayon iti panawen ti pannakataktak. Ngem saan kadi a rumbeng a maragsakantayo ta saan pay nga immay ti panungpalan? Kabayatan daytoy a dekada ti 1990, naikkaten dagiti panangipawil iti pannakaikasaba ti naimbag a damag, a kas man la karkarna, idiay Makindaya a Europa, paspaset ti Africa, ken dadduma pay a pagilian. Ti kasla ‘pannakataktak’ isut’ mangipalubos iti pannakaurnong ti ad-adu pay a “karnero” manipud kadagitoy a teritoria a nabiit pay a nalukatan.​—Juan 10:16.

3. Apay a ti napabaro a pannakatarustayo maipapan iti “daytoy a kaputotan” tignayennatayo koma nga agbalin a naganetget iti trabaho ti Dios?

³ “Dinto maladaw,” kuna ti mammadto. Kinuna ni Jesus a dinto lumabas ti agdama a nadangkes a kaputotan agingga nga “amin dagitoy a bambanag mapasamakda.” (Mateo 24:34) Ti kadi napabaro a pannakatarustayo iti sasaona kayatna a sawen a saan unay a naganat ti trabahotayo a panangasaba?a Dagiti pasamak ipakitada a maisupadi ketdi iti dayta! Ti agdama a kaputotantayo ket lumlumned iti nakaro a kinadakes ken kinarinuker nga awan pakayaspinganna iti amin a napalabas a historia. (Idiligyo ti Aramid 2:40.) Naganetget koma ti panagtrabahotayo. (2 Timoteo 4:2) Amin dagiti padto maipapan iti tiempo ti dakkel a rigat ipakitada nga umayto a bigla, giddato, sililimed​—a kasla mannanakaw. (1 Tesalonica 5:1-4; Apocalipsis 3:3; 16:15) “Gapu itoy dakayo met paneknekanyo a sisasaganakayo, agsipud ta iti oras a dikay ipagarup nga isu dayta, ti Anak ti tao umay.” (Mateo 24:44) Bayat nga umad-adani ti pannakadadael daytoy nagdakes a kaputotan ti sangatauan, awan duadua a ditay kayat nga iwaksi ti napateg a namnamatayo a biag nga agnanayon babaen ti panagsubli nga ‘agtulid-tulid iti kapitakan’ dagiti nailubongan a pakaringgoran!​—2 Pedro 2:22; 3:10; Lucas 21:32-36.

4. Ania a kasasaad ti makagapu a kasapulan ti iyaadu ti abasto a ‘taraon iti umiso a tiempo,’ ket kasano a narisut daytoy a panagkasapulan?

⁴ Maitunos iti padto ni Jesus, idi 1914 adda “pangrugian dagiti ut-ot ti panagrigat” bayat a simrek ti sangatauan iti “panungpalan ti sistema ti bambanag.” Limmanlan dagiti ladingit, makadidigra a pasamak, ken kinakillo agingga kadagitoy nga aldaw. (Mateo 24:3-8, 12) Kasta met, impaannong ni Jehova iti napulotan a klase matalek ken masirib nga adipen ti panangipaay iti naespirituan a ‘taraon iti umiso a tiempo’ agpaay iti sangakabbalayan ti Apoda, ni Kristo. (Mateo 24:45-47) Manipud iti tronona kadagiti langit, daytoy Mesianiko nga Ari tartarawidwidanna itan ti nakaskasdaaw a programa a naespirituan a panangpakan iti intero a daga.

Naruay nga “Abasto a Taraon”

5. Ania nga atension ti maipapaay iti kangrunaan a “taraon”?

⁵ Usigenyo ti pannakaisagana dagiti “abasto a taraon.” (Lucas 12:42) Ti Sao ti Dios, ti Biblia, isut’ kapatgan iti listaan dagiti Kristiano. Tapno maisuro a sieepektibo ti Biblia, napateg unay ti patarus a nalaka a basaen ken umiso. Kadagiti napalabas a tawen in-inut a naipaay daytoy a panagkasapulan, nangnangruna manipud idi 1950 idi nairuar ti New World Translation of the Christian Greek Scriptures iti Ingles. Idi 1961 magun-odanen ti New World Translation ti intero a Biblia, ket di nagbayag nagparang dagiti edision iti sabsabali pay a kangrunaan a pagsasao. Dagiti 3 a tomo a nairuar idi 1996 a tawen serbisio agdagup amin iti 27, a 14 ti kompleto a Biblia. Tapno mataming daytoy a trabaho mainaig iti Biblia, agraman kadagiti katulongan [iti panagadal] iti Biblia, agarup 1,174 a dedikado a Kristiano ti agtartrabaho ita iti amin-tiempo iti panagipatarus kadagiti 77 a pagilian.

6. Kasano a rinisut ti Sosiedad ti panagkasapulan kadagiti publikasion iti Biblia?

⁶ Tumultulong iti trabaho daytoy buyot dagiti managipatarus, ad-adun nga amang ti publikasion nga ar-aramiden dagiti 24 a pagimprentaan a sanga ti Watch Tower Society. Gapu iti daytoy, agtultuloy ti pannakaisaad dagiti kanayonan a high-speed rotary press kadagiti dadakkel a sanga. Binulan nga umadu ti mayim-imprenta a magasin a Pagwanawanan ken Agriingkayo!, nga agdagupen iti 943,892,500 a kopia, 13.4-porsiento nga irarang-ay iti daytoy a tawen. Ti dagup dagiti maimalmaldit a Biblia ken natangken-akkubda a libro idiay laeng Alemania, Brazil, Estados Unidos, Finland, Italia, Japan, Korea, ken Mexico ket ngimmato iti 40 a porsiento manipud idi 1995 agingga iti 76,760,098 a kopia idi 1996. Dakkel met ti naitulong dagiti sabsabali pay a sanga iti sapasap nga irarang-ay iti panagimaldit kadagiti literatura.

7. Kasano a nagangganat ita ti Isaias 54:2?

⁷ Kaaduan kadagiti irarang-ay ket kasapulan iti dekada ti 1990 gapu iti pannakaikkat dagiti panangipawil kadagiti Saksi ni Jehova idiay Makindaya a Europa ken Africa. Nakaro ti panagbisin iti naespirituan a taraon kadagitoy a lugar. Gapuna agallungogan ti awis buyogen ti nakarkaro pay a kinaganat: “Padakkelem ti disso ti toldam, ken pabistradmo kadakuada dagiti bengbeng dagiti pagyanam; dika medmedan: paatiddogem dagiti lubidmo ken patibkerem dagiti pasokmo.”​—Isaias 54:2.

8. Ania a naparabur a panagtignay ti tumultulong iti panangipaay iti pinansial a suporta?

⁸ Gapuna, nasken ti panangpalawa kadagiti pasilidad iti adu kadagiti 104 a sanga ti Sosiedad. Gapu iti nakaro a kinarigat ti panagbiag iti kaaduan a kaluklukat a teritoria, masulsulnitan ti adu a paggastuan iti daytoy a panangpalawa babaen kadagiti kontribusion iti sangalubongan a trabaho manipud kadagiti narangrang-ay a pagilian. Makaparagsak, naimpusuan ti isusungbat dagiti kongregasion ken indibidual, maitunos iti espiritu ti Exodo 35:21: “Ket isuda immayda, tunggal maysa a natignay ti pusona ken siannugot ti nakemna, inyegda ti isagut ken Jehova, a maipaay iti pannakaaramid.” Gundawaymi ita ti agyaman kadagiti amin a nakiraman iti daytoy naparabur a panangipaay.​—2 Corinto 9:11.

9. Kasano a matungtungpal ita ti Roma 10:13, 18?

⁹ Kabayatan ti 1996 dagiti publikasion ti Watchtower Society pudno nga impadayagda ti nagan ken pangpanggep ni Jehova agingga kadagiti ungto ti daga. Natungpal ti kas iti impadto ni apostol Pablo. Iti panangadawna iti padto ni Joel ken ti maika-19 a Salmo, insuratna: “‘Tunggal maysa nga umawag iti nagan ni Jehova maisalakanto.’ Nupay kasta imtuodek, Napaayda aya a dimngeg? Ay ket, iti kinapudnona, ‘iti isuamin a daga rimmuar ti timekda, ket agingga kadagiti ungto ti mapagnaedan a daga dagiti sasaoda.’” (Roma 10:13, 18) Gapuna, babaen ti panangitan-ok iti napateg a nagan a Jehova, nakapatpateg ti naaramidan ti ilina iti panangpusek iti kinadayag iti balayna a pagdayawan. Nupay kasta, kasano nga espesipiko a rimmang-ay daytoy a proklamasion kabayatan ti 1996? Pangngaasiyo ta sukimatenyo ti sumaganad a tsart iti panid 18 agingga iti 21.

Panagani iti Sangalubongan

10. Ania dagiti nakaskasdaaw a banag a mapaliiwyo iti trabaho ti ili ni Jehova, kas nagupgop iti tsart iti panid 18 agingga iti 21?

¹⁰ Nabilbileg itan ti sasao ni Jesus a masarakan iti Lucas 10:2: “Kinapudnona, dakkel ti anien, ngem bassit dagiti managobra. Gapuna ipakaasiyo iti Apo ti panagani a mangibaon kadagiti managobra iti panaganina.” Ipangpangagyo kadi dayta nga awis? Minilion ti mangipangpangag iti intero a daga. Mapaneknekan daytoy iti baro a kangatuan a bilang a 5,413,769 nga agibumbunannag iti Pagarian a nagreport iti tay-ak ti serbisio kabayatan ti 1996. Mainayon pay, 366,579 a kabbaro a kakabsat ti nabautisaran. Anian a panangipategtayo kadagitoy “napateg a gameng dagiti amin a nasnasion,” a makiramraman itan iti ‘panangpusek iti balay ni Jehova iti kinadayag’!​—Haggeo 2:7.

11. Apay nga adda rason a makapagrag-otayo amin?

¹¹ Nakaskasdaaw dagiti report iti panagrang-ay kadagiti kaluklukat a tay-ak. Umapal kadi ti dadduma kadatayo kadagidiay mangtagtagiragsak itan iti kasta nga irarang-ay? Iti kasumbabangirna, makipagrag-otayo kadakuada. Amin a pagilian bassit idi ti nangrugianda. Insurat ti mammadto a kasadar ni Haggeo, a ni Zacarias: “Siasino ti nanglais iti aldaw dagiti babassit a bambanag?” (Zacarias 4:10) Maragsakantay unay ta kadagiti pagilian a naipasdeken a naimbag ti trabaho a panangasaba, adda itan minilion nga agibumbunannag iti Pagarian, ket masansan ti pannakawanas dagiti teritoria, a linawas pay ketdi iti adu a dadakkel a siudad. Adda kadi rason nga agkapuytayo bayat nga isaksaknapen ni Jehova ti gundaway maipaay iti pannakaisalakan kadagiti lugar a dati a mapawpawilan? Saan a pulos! “Ti talon isu ti lubong,” kinuna ni Jesus. (Mateo 13:38) Masapul nga agtultuloy a maipaay ti naan-anay a panangsaksi, no kasano a nangipaay iti naan-anay a panangsaksi dagidi nagkauna nga adalan kabayatan ti panungpalan ti Judio a sistema dagiti bambanag.​—Aramid 2:40; 10:42; 20:24; 28:23.

Umabante a Kankanayon

12. Aniat’ manggutugot kadatayo nga agtultuloy nga ‘umabante’? (Kitaenyo met ti kahon a, “Panagani ‘Manipud iti Pungto ti Daga.’”)

¹² Wen, masapul a makidanggaytayo, ‘umabante’ a kadua ti angheliko a nailangitan a karuahe ni Jehova. (Ezequiel 1:12, NW) Silalagiptayo iti sasao ni Pedro: “Saan a nabannayat ni Jehova maipapan iti karina, kas iti panangibilang dagiti dadduma a tattao a kinabannayat, no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng dagiti isuamin iti panagbabawi.” (2 Pedro 3:9) Magutugottayo koma iti mapagulidanan a kinaregta dagiti kakabsattayo kadagiti napanglaw a pagilian. Aniaman a kasla pannakataktak iti panagbettak ti Armagedon isut’ mangipalpalubos iti pannakaurnong dagiti ginasut a ribu kadagitoy a pagilian agraman ti adu kadagiti nasayaat ti pannakatrabahona a teritoria. Dikay koma mariro: “Ti dakkel nga aldaw ni Jehova asideg, isu asideg ken napardas unay.” (Sofonias 1:14) Apuraentay koma met nga ipaay ti naan-anay a maudi a panangsaksi!

13, 14. (a) Aniat’ maikuna maipapan iti pannakaiwaras dagiti publikasion kabayatan ti 1996? (b) Ania dagiti naisangsangayan a plano a mabalin nga aramiden dagiti kongregasion iti tinawen, ket kasanot’ panangiplanoyo a makiraman?

¹³ Nupay saan nga agparang dagiti detalye iti tsart ti serbisio, adda nakaskasdaaw nga irarang-ay iti pannakaiwaras dagiti Biblia, libro, ken magasin idi napan a tawen. Kas pagarigan, dagiti naipaima a magasin iti sangalubongan ipakitada ti 19-porsiento nga irarang-ay, nga agdagup iti 543,667,923 a kopia ti naipaima. Pinalaka a mismo dagiti magasintayo ti panangasaba​—iti lansangan, parke, pagsardengan ti bus, kadagiti lugar ti negosio. Ipakita dagiti report nga iti dadduma a teritoria a masansan a pakaikaskasabaan ti Pagarian, magustuan dagiti propesional a tattao ti kalidad dagiti magasintayo ken kayatda ti makipagadal iti Biblia.

¹⁴ Tinawen kabayatan ti bulan ti Abril, masansan a mangyurnos dagiti kongregasion iti naisangsangayan a trabaho a panagmagasin, nga agmalmalemda a mamalaybalay ken kadagiti publiko a lugar. Makiramanto kadi ti kongregasionyo iti daytoy kabayatan ti Abril 1997? Naisagana dagiti naisangsangayan a ruar Ti Pagwanawanan ken Agriingkayo! iti Abril, ket awan duadua a nakaskasdaaw ti aggigiddan a pannakaiparangda iti sangalubongan! Iti isla ti Cyprus, dagiti kongregasion, a pinagbalinda a pagsasaoda ti “idanon ti mensahe ti Pagarian kadagiti isuamin a mabalin,” nga ar-aramidenda pay ketdi a binulan ti kasta nga eskediul iti trabaho a panagmagasin, a naabutda ti baro a kangatuan a bilang a 275,359 a naipaima iti dayta a tawen, maysa a 54-porsiento nga irarang-ay.

Dagiti Maudi a Mensahe ni Haggeo

15. (a) Apay a nagipatulod ni Jehova kadagiti kanayonan a mensahe babaen ken Haggeo? (b) Aniat’ rumbeng a maadaltayo iti maikatlo a mensahe ni Haggeo?

¹⁵ Imbaon ni Jehova ni Haggeo, 63 nga aldaw kalpasan a naidanonna ti maikadua a mensahena, nga awitna ti maikatlo a proklamasion a nasayaat nga ipapusotay ita. Agsasao ni Haggeo a kasla ikabkabil idi dagiti Judio ti pundasion ti templo, a kinapudnona naikabildan 17 a tawen sakbay dayta. Nakita manen ni Jehova a kasapulan ti panangdalus. Nagliway dagiti papadi ken dagiti umili ket ngarud, narugitda iti imatang ni Jehova. Saan ngata a nagliway ti dadduma kadagiti tattao ni Jehova ita, a nakiramanda pay kadagiti napanuynoy ken materialistiko a wagas ti lubong? Naganat nga ipapusotay amin “manipud iti daytoy nga aldaw ken agpatpatuloy” ti panangipadayag iti nagan ni Jehova, nga agtalektayo iti karina: “Manipud iti daytoy nga aldaw bendisionankayto.”​—Haggeo 2:10-19, NW; Hebreo 6:11, 12.

16. Ania a ‘panamagkintayeg’ ti asidegen, ket anianto ti resultana?

¹⁶ Iti dayta met laeng nga aldaw, ti sao ni “Jehova dagiti buybuyot” dimteng ken Haggeo iti maikapat ken maudi a gundaway. Impakaammona no aniat’ nairaman iti ‘panamagkintayegna kadagiti langlangit ken ti daga,’ a kunkunana: “Rebbaekto ti trono dagiti pagpagarian; ket dadaelekto ti pigsa dagiti pagpagarian dagiti nasnasion; ket rebbaekto dagiti luglugan, ken dagidiay lumugan kadakuada: ken dagiti kabkabayo ket dagiti sisasakay kadakuada matnagdanto, tunggal maysa babaen ti kampilan ni kabsatna.” (Haggeo 2:6, 21, 22) Ti ‘panamagkintayeg’ madanonnanto ngarud ti tampokna inton naan-anay a dalusan ni Jehova ti daga inton Armagedon. Iti kasta naiserrekton “dagiti napateg a gameng dagiti amin a nasnasion,” a mangbukel iti pamunganayan ti natauan a kagimongan para iti baro a lubong. Anian a pakaigapuan ti panagragsak ken panangidayaw ken Jehova!​—Haggeo 2:7; Apocalipsis 19:6, 7; 21:1-4.

17. Kasano a napagbalin ni Jesus kas maysa a “singsing a pagselio”?

¹⁷ Iti panangingudona iti padtona, insurat ni Haggeo: “Iti daydiay nga aldaw, kuna ni Jehova dagiti buybuyot, alaenkanto, O Zorobabel . . . , ket aramidenkanto a kas maysa a singsing a pagselio; ta siak pinilika, kuna ni Jehova dagiti buybuyot.” (Haggeo 2:23) Ni Kristo Jesus ket maysa itan nga antitipiko a Mesianiko nga Ari ken Nangato a Padi [a dinutokan] ni Jehova, a napagtipon idiay langit ti nagsina idi nga akem da Gobernador Zorobabel ken ni Nangato a Padi a Josue iti naindagaan a Jerusalem. Kas maysa nga opisial a singsing a pagselio iti makannawan nga ima ni Jehova, ni Jesus ti nagbalin a “Wen” kas instrumento ni Jehova iti panangipatungpalna iti adu a “kari ti Dios.” (2 Corinto 1:20; Efeso 3:10, 11; Apocalipsis 19:10) Ti intero a naimpadtuan a mensahe ti Biblia ipamaysana iti panangipaay ni Jehova ken Kristo kas Ari ken padi a Mannubbot.​—Juan 18:37; 1 Pedro 1:18, 19.

18. Kasano a maaddaan iti makapabang-ar a kaitungpalan ti panggibus a sao “ni Jehova dagiti buybuyot”?

¹⁸ Pudno nga iti kaaldawantayo, masarakan ti katan-okan a dayag iti naraniag a naespirituan a templo ni Jehova! Ket iti mabiiten, kalpasan ti naan-anay a panangpukaw ni Jehova iti sistema ni Satanas, addanto pay makaparagsak a kaitungpalan ti Haggeo 2:9: “Iti daytoy a disso mangtedakto iti talna, kuna ni Jehova dagiti buybuyot.” Talna kamaudiananna!​—mataginayon, sapasap a talna, a pinatalgedan ti “singsing a pagselio” ni Jehova, ni Kristo Jesus, ti “Prinsipe ti Kappia,” a maipapan kenkuana adda a naisurat: “Ti idadakkel ti panangiturayna ken ti Kappia awanto ti inggana . . . Ti regta ni Jehova dagiti buybuyot ti mangaramidto iti daytoy.” (Isaias 9:6, 7) Iti agnanayon, ti dayag ti balay a pagdaydayawan ken Jehova mayanninawto iti intero a natalna a pagturayan ti sapasap a kinasoberanona. Sapay koma ta kankanayon nga agtalinaedtayo iti dayta a balay!​—Salmo 27:4; 65:4; 84:10.

[Footnote]

Mailawlawagyo Kadi?

◻ Kasano a ‘mapuspusek [ita] iti kinadayag’ ti balay ni Jehova?

◻ Apay a nakagangganat unay ti panangikasaba iti naimbag a damag?

◻ Mangipaay ti Report ti 1996 a Tawen Serbisio iti ania a pakagutugotan a mangasaba a sigaganetget?

◻ Kasano nga agserserbi ni Kristo kas “singsing a pagselio” ni Jehova?

[Kahon iti panid 15]

Panagani “Manipud iti Pungto ti Daga”

ITI Isaias 43:6, mabasatayo ti bilin ni Jehova: “Dika igawid; iyegmo dagiti annakko a lallaki manipud iti adayo, ken dagiti annakko a babbai manipud iti pungto ti daga.” Adda naisangsangayan a kaitungpalan ita daytoy a kasuratan idiay Makindaya a Europa. Alaentay a pagarigan ti dati a Komunista a pagilian ti Moldova. Adda dagiti purok nga agarup kagudua kadagiti agnanaed ket Saksida itan. Masapul nga agbiaheda iti adayo tapno agbirok iti teritoria a pangasabaan, ngem naballigi ti panagreggetda! Adu nga agibumbunannag kadagitoy a kongregasion ket annak dagidi naidestiero idiay Siberia idi rugrugi ti dekada ti 1950. Ita dagiti pamiliada ti mangidadaulo iti trabaho a panagani. Kadagiti 12,565 nga agibumbunannag, 1,917 ti nabautisaran iti daytoy napalabas a tawen. Uppat a pulo ket tallo kadagiti kongregasion ti addaan iti agarup 150 nga agibumbunannag, ket immadu dagiti sirkito manipud uppat agingga iti walo iti baro a tawen ti serbisio.

Nakaskasdaaw met ti irarang-ay idiay Albania. Sadiay, adda laeng sumagmamano a nasungdo a Saksi a nakaibtur iti kadadawelan a kinadiktador iti agarup 50 a tawen. Adu kadakuada ti napapatay. Daytoy ti mangipalagip iti kari ni Jesus: “Dika pagamkan dagiti bambanag a dandanimon sagabaen. Adtoy! Ti Diablo itultuloynanto nga ipisok ti sumagmamano kadakayo iti pagbaludan tapno naan-anay a masubokkayo . . . Paneknekam ta bagim a matalek uray agingga ken patay, ket itedkonto kenka ti korona ti biag.” (Apocalipsis 2:10; kitaenyo met ti Juan 5:28, 29; 11:24, 25.) Aniat’ makitatayo ita idiay Albania? Pudno a nakaskasdaaw a kaitungpalan ti kari ni Jehova a masarakan iti Isaias 60:22: “Ti bassit agbalinto a sangaribu!” Idi 1990 maysa laeng nga agibumbunannag ti nagreport iti serbisio idiay Albania. Nupay kasta, ad-adu pay a “managobra” manipud Italia ken dadduma pay a pagilian ti nangsungbat iti awis ni Jesus: “Inkayo ngarud ket mangaramidkayo kadagiti adalan a tattao . . . , a bautisaranyo ida.” (Mateo 28:19; Lucas 10:2) Kabayatan ti Memorial ti ipapatay ni Jesus idi 1996, 773 nga agibumbunannag ti aktibo iti tay-ak, ket inummong dagitoy ti 6,523 a tattao iti panagtataripnongda iti Memorial, a nasurok a walo a daras no idilig iti bilang dagiti agibumbunannag! Nakaskasdaaw ti naireport a kaadu dagiti timmabuno manipud kadagiti naiputputong a lugar. Nupay awanan kadagiti lokal nga agibumbunannag, adda timmabuno a 192 ken 230 kadagiti siudad ti Kukës ken Divjakë. Adda 212 a timmabuno idiay Krujë, a maymaysa laeng ti agibumbunannagna. Nangabang dagiti 30 nga agibumbunannag idiay Korçë kadagiti pasilidad a para iti nasurok a 300. Idi napuseken ti auditorium iti kastat’ kaadu, kasapulan a pagawidenda ti sabali pay a 200 ta awan pagyanandan. Pudno a natangkenanen a tay-ak maipaay iti panagani!

Kastoy ti report a naggapu idiay Romania: “Bayat a mangaskasabakami iti binalaybalay, naam-ammomi ti maysa a tao a nangibaga nga isu ket maysa kadagiti Saksi ni Jehova ken agnanaed iti maysa a bassit nga ili a, ti ammomi, awan Saksi. Imbagana kadakami a malaksid kenkuana adda sabali pay a 15 a tattao nga adu a tawenen nga aggigimong kadagiti Huebes ken Domingo ken nangrugidan a mangaskasaba iti binalaybalay. Napankami iti dayta nga ili iti sumuno nga aldaw. Iti dua a kuarto, agur-uray kadakami ti 15 a lallaki, babbai, ken ubbing nga immawat iti 20 a libro ken 20 a kaudian a magasin. Impakitami kadakuada no kasano ti mangyadal iti Biblia. Nagkakantakami ken sinungbatanmi dagiti naganat unay a saludsodda. Impudno ti mangidadaulo iti grupo: ‘Sumagmamano nga aldaw ti napalabasen, nagkararagak ken Jehova buyogen ti lulua a mangibaon koma kadakami iti pastor, ket nasungbatan ti kararagko.’ Naragsakankam unay, ket idi pumanawkamin, kas iti maysa nga ulila a kamaudiananna nakasaraken iti ama, kinunana: ‘Pangngaasiyo ta didakam liplipatan. Umaykayto koma manen ket kitaendakami!’ Inaramidmi dayta, ket ita pito a panangyadal iti Biblia ti maidadaulo iti dayta nga ili. Iti adu a teritoria a saan pay a pulos a nakaskasabaan, nakaskasdaaw ti pannakairugi ti trabaho babaen kadagiti literatura iti Biblia, a naapresiar unay, ket daytoy ti mangipakita a ti trabaho ket namunganay iti Dios.”

[Tsart iti panid 18-21]

REPORT TI 1996 A TAWEN SERBISIO DAGITI SAKSI NI JEHOVA ITI SANGALUBONGAN

(Kitaem ti bound volume)

[Dagiti Ladawan iti panid 16, 17]

Maur-urnong “dagiti napateg a gameng dagiti amin a nasnasion” kadagiti Puro ti Taaw (1), Sud America (2), Africa (3), Asia (4), Norte America (5), ken Europa (6)