Ti Napalawa a Trabaho Bayat ti Kaadda ni Kristo
“Iti dayta kunaento ti ari kadagiti adda iti makanawanna, ‘Umaykayo, dakayo a binendisionan ni Amak, tawidenyo ti pagarian a naisagana kadakayo nanipud idi pannakabangon ti lubong.’”—MATEO 25:34.
1. Iti ania a pamay-an a ti pa·rou·siʹa ket kas “kadagiti al-aldaw ni Noe”?
KAADDA ni Kristo—ti pasamak a nabayagen nga ur-urayen! Dimteng idi tawen 1914 ti panawen a kas “kadagiti aldaw ni Noe,” a nasao ni Jesus mainaig iti “panagpatingga ti sistema dagiti bambanag.” (Mateo 24:3, 37) Ngem aniat’ kaipapanan ti kaadda, wenno pa·rou·siʹa, ni Kristo iti napulotan a natda ti “matalek ken naannad nga adipen”? (Mateo 24:45) Ay ket, rebbeng nga agbalinda nga ad-adda nga aktibo kas managawit iti lawag! Dandanin mapasamak dagiti nakaskasdaaw a banag! Dandanin mangrugi ti awan pay kapadana a trabaho a panagurnong.
2. Ania a panagdalus ti naaramid kas kaitungpalan ti Malakias 3:1-5?
2 Ngem, kasapulan pay nga umuna a magugoran dagitoy napulotan a Kristiano. Kas impadto ti Malakias 3:1-5, immay ni Jehova a Dios ken ti “babaonen[na] ti tulag,” ni Jesu-Kristo, tapno sukimatenda ti naespirituan a templo idi primavera ti 1918. Mangrugi ti panangukom iti “balay ti Dios.” (1 Pedro 4:17) Impadto ti Malakias 3:3: “Isu [ni Jehova] tumugawto a kas iti mangdalus ken manggugor iti pirak ket gugorannanto dagiti annak ni Levi; ket dalusannanto ida a kas iti balitok ken pirak.” Panawen dayta ti panangdalus ken pananggugor.
3. Apay a nasken a maaramid ti naespirituan a panagdalus?
3 Iti ilalasatda iti daytoy a panangukom, a nagngudo idi 1918, nadalusan ti natda ti klase adipen manipud nailubongan ken narelihiusuan a pannakatulaw. Apay a dinalusan ida ni Jehova? Agsipud ta nairaman ti naespirituan a templona. Isu daytoy ti kasla templo nga urnos iti panagdaydayaw ken Jehova maibatay iti mamagkappia a daton ni Jesu-Kristo. Kayat ni Jehova a nadalus ti templona tapno inton maiyeg sadiay dagiti adu a managdaydayaw a naindagaan ti namnamada, masakaranda ti lugar a sadiay mapagraraeman ti sapasap a kinasoberanona, lugar a pakasantipikaran ti nadibinuan a naganna, ken lugar a sadiay mapagtultulnogan dagiti nalinteg a lintegna. Iti kasta, apresiarenda ni Jehova ken tumiponda a mangipakaammo kadagiti naindaklan a panggepna.
Kanayonan a Pribilehio
4, 5. (a) Kasano a kariten ti saludsod ni Jesu-Kristo ti tunggal kameng ti klase adipen ita? (b) Iti ania a dua a pamay-an a maawatan ti sasao a “matalek ken naannad nga adipen” ken “ti sangakabbalayanna”? (c) Aniat’ imbilin ni Jesus nga aramiden ti adipen?
4 Idi 1919 mabalin a kumitan ti nadalusanen a klase adipen iti agsaksaknap a kanayon a trabaho. Idi 1914, nagun-oden ni Jesu-Kristo, nga Apoda, ti nailangitan a Pagarian. Idi nagsubli tapno sukimatenna amin a “sangakabbalayanna,” isut’ nakawesan iti naarian a kinadaeg, a saanna nga ik-ikutan idi adda ditoy daga. Aniat’ nasarakanna? Makumikom kadi ti klase adipen a mangay-aywan kadagiti intereses ti Apo? Kas nailanad idiay Mateo 24:45-47, adda saludsod ni Jesus a nangkarit iti tunggal napulotan nga adalan a mangsukimat iti personal a debosionna iti Mesias ni Jehova: “Siasino ngarud ti matalek ken naannad nga adipen nga inkabil ni apona nga agaywan iti sangakabbalayanna, tapno ikkanna ida ti taraon iti umiso a tiempo? Naragsak dayta nga adipen a masarakanto ni apona inton umay a kasta ti ar-aramidenna. Pudno kunak kadakayo, nga ikabilnanto nga agaywan iti amin a sanikuana.”
5 Nalawag, awan asinoman a tao ti pakaibagayan ti panangiladawan ni Jesus itoy matalek nga adipen. Saan, no di ket iladladawanna ti matalek a napulotan a kongregasion ni Kristo kas maysa a grupo. Ti sangakabbalayan isuda dagiti napulotan a pasurot ni Kristo kas indibidual. Ammo ni Jesus a subbotennanto dagitoy napulotan a pasurotna babaen ti mismo a darana, gapuna umisot’ panangtukoyna kadakuada a sangsangkamaysa kas ti adipenna. Kuna ti 1 Corinto 7:23 maipapan kadakuada: “Nagatangkayo [nga agsasao a sangsangkamaysada] iti maysa a pateg; dikay koma paad-adipen kadagiti tattao.” Binilin ni Jesus ti klase adipenna a pagsilnagenda ti silawda tapno makaallukoy ken makaaramid iti dadduma pay nga ad-adalan ken itultuloyda a pakanen ti sangakabbalayanna babaen ti pannangtedda iti naespirituan a taraonda iti umiso a tiempo.
6. Kasano a nagunggonaan ti adipen kas resulta ti panangsukimat ni Jesus?
6 Manipud panangrugi ti kaadda ni Kristo ken ingganat’ 1918, inkagumaan ti klase adipen nga impaayan ti sangakabbalayan iti naintiempuan a taraon, agpapan pay di kinapopular, pannakaidadanes, ken uray pay pannakariro. Daytoy ti nasarakan ti Apo idi nangrugi ti panangsukimatna. Naragsakan ni Apo Jesus, ket idi 1919 inawaganna a naragsak dayta matalek a naanamongan a klase adipen. Aniat’ makaay-ayo a gunggona ti adipen gaput’ panangtungpalna iti impaaramid kenkuana ti Apona? Naital-o! Wen, naikkan iti dakdakkel a responsabilidad iti panangiyadelantar kadagiti intereses ni Apona. Yantangay maysan a nailangitan nga Ari ti Apona, ay ket, nagbalin ngarud a napatpateg dagiti naindagaan a sanikuana.
7, 8. (a) Ania ti ‘amin a sanikua’ ti Apo? (b) Aniat’ makalikaguman iti adipen iti panangaywan kadagitoy a sanikua?
7 Ania ngarud, ti “amin a sanikuana”? Dagitoy isuda dagiti amin a naespirituan a sanikua a nagbalin a kukua ni Kristo mainaig iti autoridadna kas nailangitan nga Ari. Awan duadua a ramanen daytoy ti trabaho a panangaramid kadagiti adalan ni Kristo, a buyogen ti naindaklan a pribilehio kas dagiti pannakabagi ti naipasdeken a Pagarian ti Dios iti isuamin a nasion ditoy lubong.
8 Ti kasta a pannakaital-o iti panangaywan iti amin a sanikua ti Apo sapulenna ti pannangted ti klase adipen iti ad-adu a panawen ken atension iti panangiringpas ti trabaho ti Pagarian ken ti panangaramid pay kadagiti daddadakkel a pasilidad agpaay iti dayta a trabaho. Addaan dayta a trabaho itan iti nalawlawa a tay-ak—ti intero a mapagnaedan a daga.
Panangurnong Kadagiti Karnero
9. Aniat’ resulta ti napalawa a trabaho ti adipen?
9 Sitatallugod ngarud a pinalawa ti matalek ken naannad nga adipen ni Kristo ti trabahona. Ti resulta? Naurnongen dagiti maudi kadagiti napulotan a 144,000. Kalpasanna, ti sirmata ni Juan a nailanad idiay Apocalipsis 7:9-17 ket maysan a nakaay-ayat, makaparagsak a kinapudno. Nangnangruna nanipud 1935, tagtagiragsaken ti klase adipen ti pannakaimatang iti agtultuloy a pannakaipalgak ti kaitungpalan daytoy a sirmata. Manipud iti intero a daga, riniwriw a “dakkel a bunggoy” ti agdudupudopen iti aglawlaw ti naespirituan a templo ni Jehova kas managdaydayawna. Kinuna ti anghel ni Jehova ken Juan nga awan ti makabilang itoy dakkel a bunggoy. Kayatna a sawen, awan naikeddeng a bilang dagiti tao nga iyeg ti klase adipen iti naespirituan a templo ni Jehova. La ketdi no silulukat ti dalan, agtultuloy ti panangurnong kadakuada.
10. Ania a naayat a trabaho ti tungtungpalen ti adipen ita?
10 Addaan ti matalek a klase adipen iti nadagsen a rebbengen a mangaywan iti di agsarday a yaadu ti bilang ti “sabsabali a karnero,” a pagaammona a dagitoy kimmarnero a tattao a naggapu iti amin a nasion ket napategda unay iti Apo, ni Jesus. Kinapudnona, isuda ti arbanna. (Juan 10:16; Aramid 20:28; 1 Pedro 5:2-4) Gapuna, buyogen ti ayat iti Apo ken kadagiti karnero, siraragsak ti klase adipen a mangay-aywan kadagiti naespirituan a kasapulan ti dakkel a bunggoy.
11-13. Aniat’ maikanatad a kinuna daydi presidente ti Watch Tower Society maipapan iti trabaho ti adipen?
11 Wen, ti kadakkelan a paset ti trabaho ti adipen a panagawit-lawag ramanenna ti panangurnong kadagitoy naindagaan nga iturayan ti Pagarian ti Dios. Iti panangisalaysayna iti dumakdakkel a trabaho ti matalek nga adipen, kastoy ti kinuna daydi presidente ti Watch Tower Society a ni F. W. Franz, sakbay ti ipapatayna idi Disiembre 1992:
12 “Ad-adda a nakaskasdaaw ti panangusar ni Jesu-Kristo iti organisasion iti amin a tiempo, sigun iti 99 a tawen a kapadasak iti panagbiagko. Saan a tao ti mangiturturong ti organisasion, no di ket ni Apo Jesu-Kristo. Ngamin, nagbalin dayta nga adayo a dakdakkel ken nakaskasdaaw ngem iti impagaruptayo. Itatta addaantayon iti maysa nga organisasion a limmawa iti sangalubongan. Agtigtignay dayta iti Deppaar ti Amianan ken Abagatan, iti Daya ken iti Laud. Maymaysa laeng a persona ti responsable itoy nakaskasdaaw a panagsaknap—ti Anak ti Dios, a mangimatmaton iti klase matalek ken naannad nga adipen. Tungtungpalenna dagiti responsabilidadna, ket dayta ti makagapu iti daytoy naindaklan a panagsaknap a maim-imatangantayo.
13 “Saan nga agpannuray daytoy iti maymaysa a tao. Addaantayo iti maysa a teokratiko nga organisasion, ket agan-andar dayta iti teokratiko a wagas, iti pamay-an nga iturturong ti Dios. Awan tao, uray pay ti nangbuangay iti Watch Tower Bible and Tract Society, ti makapagaklon wenno pakaikumitan ti responsabilidad iti nagapuananen iti intero a lubong. Pudno a nakaskasdaaw dayta.” Saan aya a naimpusuan nga umanamong dagiti amin a kameng ti dakkel a bunggoy kadagitoy a karirikna daydi Kabsat Franz? Wen, talaga nga agyamanda unay iti napalawa a trabaho ti matalek nga adipen.
Dagiti Iturayan ti Pagarian
14, 15. (a) Aniat’ impakita ni Jesus iti pangngarig dagiti talento (Mateo 25:14-30)? (b) Maiyanatup unay, aniat’ sumaganad iti Mateo kapitulo 25?
14 Idiay Mateo kapitulo 25, deskribiren ti pangngarig ni Jesus maipapan kadagiti karnero ken kalding daytoy naindaklan a trabaho a panangurnong kadagiti naindagaan nga iturayan ti Pagarian ti Dios. Iti immun-una a pangngarig, ti pangngarig dagiti talento, impakita ni Jesus a dagiti napulotan nga adalan a mangnamnama a makipagturay kenkuana iti nailangitan a Pagarianna masapul nga ikagumaanda a paaduen dagiti naindagaan a sanikuana. Ngarud, maiyanatup unay, iti sumaganad a pangngarig, impakita ni Jesus no aniat’ makalikaguman kadagidiay mayat nga agbalin nga iturayan ti nailangitan a Pagarianna.
15 Imutektekanyo ti kinunana idiay Mateo 25:31-33: “Inton ti Anak ti tao umay iti dayagna, ken amin dagiti anghel maikuyog kenkuana, agtugawto iti nadayag a tronona. Ket maurnongto dagiti isuamin a nasion iti sanguananna, ket paglalasinennanto ti maysa ken maysa kadagiti tao, a kas iti pastor ilasinna dagiti karnero kadagiti kalding. Ket isaadnanto dagiti karnero iti makanawanna, ket dagiti kalding iti makatigidna.”
16. Kasano a matipontipon dagiti nasion ken mapaglalasin dagiti tattao?
16 Dimteng ni Jesus iti dayagna idi 1914. Isu, agraman amin nga anghelna, dinarupda ken pinaksiatda dagiti demonio a kabkabusorna idiay langit. Ti sumaruno iti pangngarigna makatulong kadatayo a mangtarus a ti panagtugaw ni Jesus iti nadayag a tronona itakderanna ti posision ti panangukom bayat ti kaaddana. Ti panangurnong iti amin a nasion iti sanguananna kaipapananna ti panangawat ni Jesus kadagiti nasion kas mainanama nga arbanna, iti piguratibo a panagsao. Maysa dayta nga arban a buklen dagiti karnero ken kalding. Nupay alaennat’ paset ti aldaw a paglasinen dagiti karnero ken kalding iti literal nga arban, ti sangalubongan a panamaglalasin kadagiti tattao nga addaan kalintegan nga agpili ket mabaybayag bassit. Ngamin, naibatay ti panamaglalasin iti tignay ti tunggal indibidual.
17. Apay a nainget ti kasasaad ita kadagiti amin a tattao?
17 Iti pangngarig, ti Pastor nga Ari isaadna dagiti kasla karnero iti makanawanna ket dagiti kasla kalding iti makatigidna. Ti pannakaikabil iti makanawan kaipapananna ti pannakaukom a paborable ti ibungana—biag nga agnanayon. Ti pannakaikabil iti makatigid itakderanna ti di naanamongan a pannakaukom—agnanayon a pannakadadael. Nainget dagiti pagbanagan ti pangngeddeng ti Ari iti daytoy a banag.
18. Apay nga awan asinoman a laksiden ti di pannakakita iti Ari?
18 Ti di pannakakita iti agturturayen nga Anak ti tao bayat ti kaaddana, wenno pa·rou·siʹa, awan asinoman a laksidenna. Umad-adu itatta a kimmarnero a tattao ti tumiptipon iti klase adipen iti panangikaskasaba ti naimbag a damag ti Pagarian ti Dios iti intero a lubong, a pagsilsilnagenda ti silawda. Pudno unay, nakadanonen ti panangaskasabada iti amin a paset ti daga.—Mateo 24:14.
19. Aniada a kualidad ti klase karnero ti naipamatmat iti pangngarig dagiti karnero ken kalding?
19 Apay a gunggonaan ti Pastor nga Ari dagiti kimmarnero a tattao iti naparaburan a masanguanan? Gapu iti naimpusuan a panangsuportarda iti trabaho a panangikaskasaba ti Pagarian ken iti kinaimbag nga ipakpakitada kadagiti napulotan a kakabsatna, nga ibilang ni Jesus nga inaramidda metten kenkuana. Gapuna, kunaen ti Ari nga Anak ti tao kadakuada: “Umaykayo, dakayo a binendisionan ni Amak, tawidenyo ti pagarian a naisagana kadakayo nanipud idi pannakabangon ti lubong.”—Mateo 25:34; 28:19, 20.
Panangtulong iti Ari
20, 21. Ania a pammaneknek ti ipapaay dagiti karnero nga addada iti dasig ti Pagarian?
20 Paliiwenyo ta idi inawis ti Ari dagitoy a karnero a tawidenda ti naindagaan a sakop ti Pagarian ti Dios, naklaatda. Insaludsodda kenkuana: ‘Apo, kaanomi nga inaramid dagitoy kenka?’ Insungbatna: “Pudno kunak kadakayo, Gapu ta inaramidyo daytoy iti maysa kadagiti kanunumuan kadagitoy a kakabsatko, inaramidyo met kaniak.” (Mateo 25:40) Idi nagparang ni Jesus ken Maria Magdalena iti aldaw ti panagungarna, isut’ nagsao maipapan kadagiti naespirituan a kakabsatna idi kinunana kenkuana: “Inka kadagiti kakabsatko.” (Juan 20:17) Bayat ti di makita a kaaddana, addaan laeng ni Jesus iti bassit a natda kadagiti 144,000 a naespirituan a kakabsatna nga adda pay laeng a silalasag ditoy daga.
21 Yantangay di makita ni Jesus idiay langit, saan a direkta ti panangaramid dagiti kimmarnero a tattao kadagitoy naayat a bambanag kenkuana. Isut’ makitkitada iti tronona babaen laeng kadagiti mata ti pammatida. Apresiaren ni Jesus dagiti panagreggetda a tumulong kadagiti naespirituan a kakabsatna, a kaduananto nga agtawid idiay langit. Ti naaramid kadagiti kakabsatna ibilangna a naaramid metten kenkuana. Nagaramid iti naimbag dagitoy a kasla karnero kadagiti kakabsat ni Kristo gapu ta bigbigenda ida a kasta. Ammoda a dagiti naespirituan a kakabsat ni Jesus isuda dagiti embahador ti Pagarian ni Jehova, ket kayatda a paneknekan a kadasigda ida iti dayta a Pagarian.
22. Kasano a magunggonaan ti klase karnero? (Idiligyo ti Apocalipsis 7:14-17.)
22 Ammon a sigud ni Jehova nga agparangto daytoy klase karnero iti panawen ti kaadda ti Anakna, ket adda nakaay-ayat a gunggona nga insaganana kadakuada! Tawiden ti dakkel a bunggoy dagiti bendision ti talna ditoy daga bayat ti naragsak a Milenio a Panagturay ti Ari nga insaad ni Jehova, ni Jesu-Kristo.
23. Kadagiti ania a pamay-an a pagaammo dagiti karnero a tultulonganda dagiti kakabsat ti Ari?
23 No usigentayo dagiti padto ti Biblia nga agaplikar iti panawen ti kaadda ni Kristo, agraman ti pangngarig ni Jesus maipapan kadagiti karnero ken kalding, aniat’ makitatayo? Isu daytoy: Saan a ti di pannakaammo ken naiparna a panangaramid ti naimbag iti maysa kadagiti naespirituan a kakabsat ti Ari ti mamagbalin a karnero iti maysa a tao nga addaan nalinteg a takder iti imatang ti Dios ken ti Arina. Ammo dagidiay kimmarnero ti ar-aramidenda, nupay dida makita ti agturturayen nga Ari iti literal a matada. Ikagkagumaanda a tulongan dagiti kakabsat ti Ari saan laeng nga iti material a wagas no di pay ket iti naespirituan. Kasano? Babaen ti panangbadang kadakuada iti panangikaskasaba ti naimbag a damag ti Pagarian ti Dios ken iti panangidaulo kadagiti panagadal iti Biblia tapno makaaramid kadagiti adalan maipaay ken Kristo. Kas banagna, adda itan nasurok nga uppat a milion a managawit-lawag a manangiwaragawag ti Pagarian ti Dios.
Napalawa a Trabaho
24. Aniada a naayat nga aramid ti namagbalin iti klase adipen a kararagsakan a tattao ditoy daga itatta?
24 Intay binsabinsaen ti sumagmamano kadagiti adu a nasayaat nga aramid ti matalek a klase adipen. Umuna, naisaad ti klase adipen a mangaywan kadagiti amin a sanikua ti Apo—dagiti intereses ti Pagarianna ditoy daga—ket agtultuloy nga umadu dagitoy a sanikua. Maikadua, pakpakanen dayta a klase saan laeng a ti napulotan a sangakabbalayan no di pay ket ti umad-adu a dakkel a bunggoy ti sabsabali a karnero iti naespirituan a taraon. Maikatlo, idadaulo ti klase adipen ti panangisaknap ti lawag ti Pagarian. Maikapat, ti kadakkelan a napalawa a trabahona isu ti panangurnong iti dakkel a bunggoy ti sabsabali a karnero, nga iyegna ida iti naespirituan a templo ni Jehova. Maikalima, buyogen naimpusuan a pannakitinnulong dagiti kimmarnero a tattao, mangipapaay ti klase adipen kadagiti napadakkel a pasilidad agpaay kadagiti organisasion ti sangsanga iti intero a daga, kasta met iti hedkuarter idiay Estados Unidos. Ti kakasta a naayat a panagbannog ti namagbalin iti klase adipen a kararagsakan a tattao ditoy daga itatta, ket pinaragsakda met ti riniwriw a dadduma pay a tattao. Amin dagitoy pagyamananda ni Jehova a Dios ken ni Jesu-Kristo, a mangiturturong iti napalawa a trabaho ti naannad nga adipen!
25. Kasano a maitultuloy dagiti karnero a suportaran ti klase adipen, ket aniat’ inanamaenda iti masanguanan?
25 Ad-adda a regreggetan ita ti klase adipen a tungpalen dagiti pagrebbenganna nga intuding ti Dios. Nganngani maibusen ti natda a tiempo sakbay ti panagbettak ti “dakkel a rigat”! (Mateo 24:21) Nasken nga agtalinaed dagitoy a karnero ti Dios iti makanawan a dasig ti pabor ti Pastor nga Ari! Gapuna, amin koma sireregta nga itultuloyda a suportaran ti matalek ken naannad nga adipen. Babaen laeng ti panangaramid iti daytoy a dumtengto ti aldaw iti mabiiten nga amin dagiti kasla karnero mangngegdanto ti naragsak a sasao: “Umaykayo, dakayo a binendisionan ni Amak, tawidenyo ti pagarian a naisagana kadakayo nanipud idi pannakabangon ti lubong.”
Masungbatanyo Kadi?
◻ Ania a panangukom ti simmaruno iti pannakaitrono ti Ari?
◻ Kasano a natungpal ti Mateo 24:45-47 iti moderno a panawen?
◻ No maipapan iti napalawa a trabaho, ania ti pagragsakan unay ti klase adipen ken ti dakkel a bunggoy?
◻ Kasano a matungtungpal ti Mateo 25:34-40 bayat ti pa·rou·siʹa?
[Ladawan iti panid 16]
Intalek ti apo ti amin a sanikuana iti matalek nga adipen
[Ladawan iti panid 18]
Nagtugaw ni Jesus iti nadayag a tronona tapno ukomenna ti sangatauan