Ti Naimbag a Damag ti Pagarian​—Ania Dayta?

Idi napan a tawen, adda 6,035,564 nga agtutubo ken nataengan manipud 235 a pagilian iti intero a lubong a nangbusbos iti 1,171,270,425 nga oras a nakisarita iti dadduma maipapan iti dayta. Ngem malaksid iti panangisarita, impaimada iti publiko ti nasurok a 700 milion a pagbasaan a mangipakpakaammo ken mangilawlawag iti dayta. Nakaiwarasda met iti rinibu nga audiocassette ken videocassette tapno maipablaak dayta. Ania ngay “dayta”?

ISU “dayta” ti naimbag a damag maipapan iti Pagarian ti Dios. Kinapudnona, ita pay laeng ti kastoy kasaknap a pannakaikasaba “daytoy naimbag a damag ti pagarian.”​—Mateo 24:14.

Boluntario amin dagiti mangar-aramid iti daytoy trabaho a panangasaba ken panangisuro iti intero a lubong. No iti sekular a panangmatmat, agparang a dida kualipikado iti daytoy a trabaho. Apay ngarud a natured ken naballigida? Maigapu dayta iti bileg ti naimbag a damag ti Pagarian, agsipud ta damag dayta maipapan kadagiti bendision a sagrapento ti sangatauan. Dagitoy dagiti bendision nga il-iliwen ti amin a tattao​—kinaragsak, ilulung-aw iti rigat ti panagbiag, nasayaat a gobierno, talna ken talged, ken ti kasla imposible para iti kaaduan​—biag nga agnanayon! Pudno a naimbag a damag dayta kadagiti tattao a mangbirbirok iti kaipapanan ken panggep ti biag. Wen, masagrapyo amin dagitoy a bendision ken ad-adu pay no ipangag ken agtignay a maitunos iti maipakpakaammo a naimbag a damag ti Pagarian.

Ania Dayta a Pagarian?

Ngem ania dayta a Pagarian a maipakpakaammo kas naimbag a damag? Dayta ti Pagarian a naisuro nga ikararag ti minilion babaen dagitoy a pamiliar a sasao: “Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.”​—Mateo 6:9, 10.

Isu dayta daydiay Pagarian a dinakamat ti Hebreo a propeta a ni Daniel idi insuratna dagitoy a sasao nasurok a 25 a siglon ti napalabas: “Mangipasdekto ti Dios ti langit iti maysa a pagarian a saanto pulos a madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”​—Daniel 2:44.

No kasta, ti naimbag a damag isu ti maipapan iti Pagarian, wenno gobierno ti Dios, a mangikkat iti amin a kinadakes ket iturayanna ti intero a daga buyogen ti talna. Ibanagnanto ti orihinal a panggep ti Namarsua para iti sangatauan ken iti daga.​—Genesis 1:28.

“Ti Pagarian ti Langlangit Asidegen”

Nganngani 2,000 a tawenen ti napalabas, damo a naipakaammo kadagiti tattao ti naimbag a damag ti Pagarian babaen ti maysa a dedikado a lalaki a makaatrakar ti langa ken tigtignayna. Isu ni Juan a Mammautisar, anak ti Judio a padi a ni Zacarias ken ti asawana a ni Elisabet. Naaramid iti dutdot ti kamelio ti pagan-anay ni Juan, sa nakabarikes iti lalat a kas ken mammadto Elias, a nangiladawan kenkuana. Ngem ti mensahena ti nangkayaw iti adu a tattao. “Agbabawikayo,” kinunana, “ta ti pagarian ti langlangit asidegen.”​—Mateo 3:1-6.

Inturong ni Juan dagitoy a sasao kadagiti Judio, nga agkunkuna a daydayawenda ti pudno a Dios, ni Jehova. Kas maysa a nasion, inawatda ti Linteg ti tulag babaen ken Moises agarup 1,500 a tawen sakbayna. Nakatakder pay laeng idiay Jerusalem ti nadaeg a templo, a nakaidatagan dagiti daton kas imbilin ti Linteg. Impagarup dagiti Judio nga an-anamongan ti Dios ti panagdayawda.

Ngem iti panagimdengda ken Juan, nabigbig ti dadduma a saan nga umiso ti relihionda kas impagarupda. Nalaokan kadagiti Griego a kultura ken pilosopia dagiti narelihiosuan a sursuro dagiti Judio. Natulawan ti linteg nga inawatda iti Dios babaen ken Moises, nga uray la pinagbalinda nga awan serserbina gapu kadagiti inaramid ti tao a sursuro ken tradision. (Mateo 15:6) Saanen nga awaten ti Dios ti panagdayaw ti kaaduan kadakuada gapu ta nagpaallilaw dagitoy kadagiti pimmamulinawen ti puspusoda ken awanan-asi a papangulo ti relihionda. (Santiago 1:27) Nasken a pagbabawyanda dagiti basolda iti Dios ken iti Linteg ti tulag.

Iti daydi a tiempo, adu a Judio ti mangnamnama iti panagparang ti naikari a Mesias, wenno Kristo, ket adu ti masmasdaaw ken Juan: “Isu ngata ti Kristo?” Nupay kasta, imbaga ni Juan a saan nga isu daydiay naikari. Imbes ketdi, adda sabali nga inyam-ammona kadakuada, a kinunana maipapan iti daytoy: “Iti galut dagiti pallokana saanak a maikari a mangwarwar.” (Lucas 3:15, 16) Iti panangyam-ammo ken Jesus kadagiti adalanna, kinuna ni Juan: “Kitaenyo, ti Kordero ti Dios a mangikkat iti basol ti lubong!”​—Juan 1:29.

Pudno a naimbag a damag dayta agsipud ta, iti anagna, iturturong ni Juan ti amin a tattao iti dalan nga agturong iti biag ken kinaragsak​—isu ni Jesus, daydiay “mangikkat iti basol ti lubong.” Kas kaputotan da Adan ken Eva, mayanak amin a tattao iti panangituray ti basol ken ipapatay. Kuna ti Roma 5:19: “No kasano a babaen ti kinasukir ti maysa a tao [ni Adan] adu ti naibilang a managbasol, kasta met a babaen ti panagtulnog ti maysa a persona [a ni Jesus] adu ti maibilangto a nalinteg.” Kas daton a kordero, ni Jesus ti “mangikkat iti basol” ken mangbalbaliw iti nakaay-ay-ay a kasasaad ti sangatauan. “Dagiti isupapak ti basol isu ti ipapatay,” kuna ti Biblia, “ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.”​—Roma 6:23.

Inkasaba ni Jesus ti naimbag a damag kas perpekto a tao​—kinapudnona, kas katan-okan a tao a nagbiag. Ibaga kadatayo ti salaysay ti Biblia iti Marcos 1:14, 15: “Ita kalpasan a ni Juan naaresto napan ni Jesus idiay Galilea, a mangikaskasaba iti naimbag a damag ti Dios ket kunkunana: ‘Ti naituding a tiempo natungpalen, ket ti pagarian ti Dios immasidegen. Agbabawikayo, ket maaddaankayo iti pammati iti naimbag a damag.’”

Aglaplapusanan a bendision ti nasagrap dagidiay nangipangag iti mensahe ni Jesus ken namati iti naimbag a damag. Kuna ti Juan 1:12: “Kadagiti amin nga immawat kenkuana [ni Jesus], nangted kadakuada iti autoridad nga agbalin nga annak ti Dios, agsipud ta winatwatwatda ti pammati iti naganna.” Kas annak ti Dios, mangnamnamada iti gunggona a biag nga agnanayon.​—1 Juan 2:25.

Ngem saan laeng a dagiti tattao idi umuna a siglo ti addaan iti pribilehio nga umawat kadagiti bendision ti Pagarian. Kas nadakamaten, maiwarwaragawag ken maisursuro ti naimbag a damag ti Pagarian ti Dios iti amin a mapagnaedan a daga ita. No kasta, mabalin pay a masagrap dagiti bendision ti Pagarian. Ania ti nasken nga aramidenyo tapno matagiragsak dagita a bendision? Ilawlawag dayta ti sumaganad nga artikulo.