GADARENO, DAGITI
[Iti (Kukua ti) Gadara].
Ti nagan a nayawag kadagiti agnanaed iti lugar a nangparuaran ni Kristo Jesus kadagiti sairo manipud dua a lallaki. Sigun iti maibilbilang a kasayaatan a magun-odan a pammaneknek a manuskrito, orihinal nga inusar ni Mateo ti “pagilian dagiti Gadareno,” idinto ta da Marcos ken Lucas, iti panangisalaysayda itoy a pasamak, inaramatda ti “pagilian dagiti Geraseno.”—Mt 8:28; Mr 5:1; Lu 8:26.
Naipakita nga adda dagitoy a pagilian “iti sabali a bangir,” kayatna a sawen, iti makindaya a deppaar ti Baybay ti Galilea. Ti termino a “pagilian dagiti Gadareno” ket mabalin a nayawag iti distrito nga adda iti aglawlaw ti siudad ti Gadara (agdama nga Umm Qeis), a nagsaad iti agarup 10 km (6 mi) iti abagatan a daya ti Baybay ti Galilea. Masansan nga adda makita a barko kadagiti sinsilio ti Gadara, a mangipasimudaag a ti teritoriana mabalin a naglayon agingga iti Baybay ti Galilea ket ngarud ramanenna met ti maysa a paset ti “pagilian dagiti Geraseno,” iti daya dayta a dandanum. Adda dagiti mangibagbaga a ti “pagilian dagiti Geraseno” ket isu ti rehion iti aglawlaw ti Kursi, ti ili nga inawagan da Origen ken Eusebius iti Gergesa. Adda dayta iti makindaya nga igid ti Baybay ti Galilea, agarup 20 km (12 mi) iti amianan ti Gadara. Maitunos daytoy iti geograpikal a detalye ti salaysay. Patien met ti dadduma a tumukoy daytoy iti dakkel a distrito a naisentro iti siudad ti Gerasa (Jarash) agarup 55 km (34 mi) iti abagatan nga abagatan-a-daya ti Baybay ti Galilea, ket kunaenda a dimmanon dayta iti daya ti ban-aw ken sinaklawna ti “pagilian dagiti Gadareno.” Aniaman ti kasasaad, ti salaysay ni Mateo saan a pulos maisupiat iti salaysay da Marcos ken Lucas.
Iti asideg ti maysa a di nainaganan a siudad iti pagilian dagiti Gadareno, nasabet ni Jesu-Kristo ti dua a nakaro ti kinarungsotda a lallaki a nagunggan ti sairo. Agnanaed dagitoy kadagiti tanem, kayatna a sawen, tantanem a naikungkong iti bato wenno nainkasigudan a rukrukib a kasta ti nakausaranda. Idi pinaruarna dagiti sairo, pinalubosanna ida a sumanib iti dakkel a pangen dagiti baboy a nagdaruros idi agangay iti teppang ket nalmesda iti Baybay ti Galilea. Gapu iti daytoy, nariribukan unay dagiti agnanaed iti dayta a lugar nga uray la nagpakaasida ken Jesus a pumanaw iti dayta a disso.—Mt 8:28-34.
Nupay dua a lallaki ti dakamaten ni Mateo, nangnangruna a tukoyen da Marcos (5:2) ken Lucas (8:27) ti maymaysa a lalaki, awan duadua a gapu ta ad-adda a naidumduma ti kasasaadna. Mabalin a narungrungsot ken nabaybayagen ti panagsagabana manipud panangkontrol dagiti sairo ngem iti daydiay maysa a lalaki; nupay kasta kalpasan dayta nalabit is-isuna ti nagtarigagay a kumuyog iti Anak ti Dios. Saan a pinalubosan ni Jesus a kumuyog ti lalaki, ket imbilinna ketdi kenkuana nga ipakaammona ti inaramid kenkuana ti Dios.
Naiduma daytoy iti kadawyan nga ibilbilin ni Jesus a saan a panangiwaragawag kadagiti milagrona. Imbes a tarigagayanna ti naparammag a publisidad ken bay-anna a mangngeddeng dagiti tattao maibatay iti makapagagar a damdamag, nalawag a tinarigagayan ni Jesus a mangngeddeng ti sabsabali sigun iti natibker a pammaneknek nga isu a talaga ti Kristo. Daytoy ti kaitungpalan ti naimpadtuan a sasao nga insawang ni Isaias: “Saanto a makisusik, wenno uray agikkis iti napigsa, saanto met a mangngeg ti asinoman ti timekna iti akaba a daldalan.” (Mt 12:15-21; Isa 42:1-4) Ngem saan a kasta ti napasamak iti kaso ti sigud a nagunggan ti sairo, a mayanatup laeng iti daytoy a gundaway. Mabalinna ti mangsaksi kadagiti umili a saan a personal a makasarita ti Anak ti Dios, nangnangruna gapu ta naikalikagum a pumanaw sadiay ni Jesus. Ti kaadda ti lalaki ket agserbi a pammaneknek maipapan iti pannakabalin ni Jesus nga agaramid iti kinaimbag, a mangsumra iti aniaman a negatibo a damag a maiwaras gapu iti pannakalmes ti pangen dagiti baboy.—Mr 5:1-20; Lu 8:26-39; kitaenyo ti BABOY.