Nabileg iti Laksid Dagiti Pagkapuyan

DAGITI pagkapuyam ket mabalin a lapunosendaka. Kumpetda a kas kadagiti alimatek. Mabalin a pagarupem a pulos a dimon maparmek dagita, wenno mariknam a kasla awan kaimudingam no idiligmo ti bagim iti sabsabali ta dimo kabaelan ti ar-aramidenda. Wenno nalabit adda nakaro a sakitmo nga in-inut a mangpukpukaw iti ganasmo nga agbiag. Aniaman ti makagapu, kasla nagtupaken ti langit kenka. Mabalin a mariknam ti kas iti narikna ni Job a nangikuna iti Dios: “O italimengnak koma iti Sheol, tapno aywanannak a sililimed agingga nga agbaw-ing ti ungetmo, tapno itudingannak iti naikeddeng a tiempo ket lagipennak!”​—Job 14:13.

Kasanoka a makalapsut iti kasta a kinaawan namnama? Nupay mabalin a narigat, nasayaat no lipatem pay laeng dagiti parikutmo. Kas pagarigan, mabalin nga usigem ti naipaltiing a salsaludsod ni Jehova iti matalek nga adipenna a ni Job: “Sadino ti ayanmo idi imbangonko ti daga? Ibagam kaniak, no ammom ti pannakaawat. Siasino ti nangipasdek kadagiti rukodna, no kas pagarigan ammom, wenno siasino ti nangyunnat iti rabawna ti pagrukod a parteng?” (Job 38:4, 5) No panunotentayo ti ipasimudaag dagita a saludsod, posible a maamiristayo a nakatantan-ok ti kinasirib ken pannakabalin ni Jehova. Impalubosna nga agtultuloy ti agdama a kasasaad iti lubong gapu iti nasayaat a rason.

“Siit iti Lasag”

Adda pay matalek nga adipen a nagkiddaw ken Jehova a maikkat koma ti ‘siit iti lasagna’ a kanayon a pagparparikutanna. Namitlo a nagpakaasi ni apostol Pablo iti Dios tapno mapukaw koman dayta a parikutna. Aniaman dayta, kas man la makapasuron a siit a mabalin a mangpukaw iti rag-o ni Pablo nga agserbi ken Jehova. Para kenkuana, kasla kanayon a matungtungpa gapu iti dayta. Ngem ti sungbat ni Jehova ket: “Umdasen kenka ti di kaikarian a kinamanangngaasik; ta ti pannakabalinko maan-anay iti pagkapuyan.” Saan nga inikkat ni Jehova dayta a siit ti lasag. Masapul a daeran dayta ni Pablo, ngem kinunana: “Inton nakapuyak, iti kasta nabilegak.” (2 Cor. 12:7-10) Ania ti kayatna a sawen?

Saan a simimilagro a napukaw ti parikut ni Pablo. Ngem saan a dayta ti nakalapped iti panangitungpalna kadagiti naisangsangayan a bambanag iti panagserbina ken Jehova. Nagpannuray ni Pablo iti pannaranay ni Jehova ken kanayon a nagpatulong Kenkuana. (Fil. 4:6, 7) Idi dandanin agpatingga ti biagna ditoy daga, inyebkas ni Pablo: “Nakirupakak iti nasayaat a dangadang, tinarayko ti tarayen agingga iti pagpatinggaan, inalagadko ti pammati.”​—2 Tim. 4:7.

Us-usaren ni Jehova dagiti imperpekto a tattao a mangitungpal iti pagayatanna iti laksid dagiti pagkurangan ken parikutda, ket maiparbeng laeng nga isu ti mapadayawan. Mabalinna nga ipaayan ida iti sirib ken panangiwanwan tapno madaeranda dagiti rigat ken mataginayonda ti rag-o nga agserbi kenkuana. Wen, mabalin nga usarenna dagiti imperpekto a tattao a mangaramid kadagiti naindaklan a bambanag iti laksid dagiti pagkapuyanda.

Imbaga ni Pablo no apay a saan nga inikkat ti Dios ti siit iti lasagna: “Tapno saanak a maitan-ok iti aglablabes.” (2 Cor. 12:7) Ti “siit” nga adda ken Pablo ti nangipalagip kenkuana kadagiti limitasionna ken timmulong kenkuana nga agtalinaed a napakumbaba. Maitunos dayta iti insuro ni Jesus: “Siasinoman a mangitan-ok iti bagina maipababanto, ket siasinoman a mangipababa iti bagina maitan-okto.” (Mat. 23:12) Gapu kadagiti pakasuotan, masursuro dagiti adipen ti Dios ti agpakumbaba ken maamirisda a nasken nga agpannurayda ken Jehova tapno makapagibturda a simamatalek. Gapuna, kas ken Pablo, mabalinda ti ‘agpasindayag mainaig ken Jehova.’​—1 Cor. 1:31.

Dagiti Nalmeng a Pagkapuyan

Ti dadduma ket mabalin nga addaan iti pagkapuyan a dida madmadlaw wenno dida kayat nga annugoten. Kas pagarigan, nalabit agkompiansa unay ti maysa a tao iti bagina gapu ta agtalek kadagiti bukodna a paglaingan. (1 Cor. 10:12) Ti maysa pay a pagkapuyan a gagangay kadagiti imperpekto a tattao ket ti tarigagay nga agbalin a nalatak.

Ni Joab, a dati a heneral iti buyot ni Ari David ket natured, alisto nga agpanunot, ken manangipamuspusan. Nupay kasta, nakaaramid iti nadagsen a basol a mangipasimudaag iti kinakuspag ken kinaambisiosona. Siraranggas a pinatayna ti dua a heneral iti buyot. Umuna, pinatayna ni Abner tapno makaibales. Idi agangay, sinsinan kinablaawan ni Joab ti kasinsinna a ni Amasa. Tinengngelna ni Amasa babaen ti panangiggem ti makannawan nga imana iti barbas dayta a kasinsinna tapno kasla agkanna. Ngem maigiddato iti dayta, dinuyokna ni Amasa babaen ti makannigid nga imana. (2 Sam. 17:25; 20:8-10) Inusar ni Joab dayta a gundaway tapno mapatayna ti karibalna a ni Amasa a naisukat kenkuana kas heneral iti buyot. Nalabit ninamnamana nga isu ket maisubli iti kinaheneralna. Nabatad a saan a kinontrol ni Joab ti pagannayasanna, agraman ti agimbubukodan nga ambisionna. Nagtignay a siuulpit ken awan ti pakakitaan nga isu ket nagbabawi. Idi dandanin matay ni Ari David, binilinna ti anakna a ni Solomon a siguraduenna nga ikaro ni Joab ti kinadakesna.​—1 Ar. 2:5, 6, 29-35.

Rumbeng ngarud a ditay tumulok kadagiti dakes a tarigagaytayo agsipud ta kabaelantayo a parmeken dagiti pagkapuyantayo. Umuna, nasken a mailasin ken annugotentayo dagita. Iti kasta makaaramidtayo kadagiti pamuspusan a mangparmek kadagita. Mabalintay ti regular nga agkararag ken Jehova, a kiddawentayo a tulongannatayo a mangparmek kadagita a pagkapuyan, ken sipipinget nga adalentayo ti Saona, nga ipamuspusantayo a kontrolen dagita a pagannayasan. (Heb. 4:12) Rumbeng nga itultuloytayo a sarangten dagiti pagkapuyantayo ken saantayo koma a maupay. Nalabit nga agtultuloy pay ketdi dayta a pannakidangadangtayo bayat nga imperpektotayo pay laeng. Inannugot ni Pablo a kasta ti kasasaadna isu a naisuratna: “No ania ti kayatko, daytoy ket saanko nga an-annuroten; no di ket ti kagurak isu ti aramidek.” Ngem kas iti ammotayon, saan a timmulok ni Pablo kadagiti pagkapuyanna, a kas man la dinan maparmek dagita. Imbes ketdi, intultuloyna a sinaranget dagiti pagkapuyanna, a nagpannuray iti tulong ti Dios babaen ken Jesu-Kristo. (Roma 7:15-25) Gapuna, kinuna ni Pablo: “Disdisnogek ti bagik ket ad-adipenek, tapno, kalpasan a nakaskasabaak ti sabsabali, uray kasano siak saanak nga agbalin a di naanamongan.”​—1 Cor. 9:27.

Kas tattao, agannayastayo a mangikalintegan iti bagbagitayo. Ngem maparmektayo dayta babaen ti panangtuladtayo iti panangmatmat ni Jehova, nga aramidentayo ti indagadag ni Pablo kadagiti Kristiano: “Karurodyo ti dakes, kumpetkayo iti naimbag.” (Roma 12:9) Iti pannakidangadangtayo a mangparmek kadagiti pagkapuyantayo, masapul nga agbalintayo a napudno, napinget, ken disiplinaentayo ti bagitayo. Kiniddaw ni David ken Jehova: “Pasudiem dagiti bekkelko ken ti pusok.” (Sal. 26:2) Ammona a kabaelan ti Dios a siuumiso a tingitingen dagiti kaunggan a pagannayasantayo ken ipaay kadatayo ti tulong iti tiempo a kasapulantayo dayta. No agpaidalantayo ken Jehova babaen ti Saona ken ti nasantuan nga espirituna, in-inut nga agballigitayo a mangparmek kadagiti pagkurkurangantayo.

Nalabit mariribukan ti dadduma gapu kadagiti parikutda. Panagriknada ket dida madaeran dagita a bukbukodda. Sigurado a makaipaay dagiti panglakayen iti kongregasion iti naayat a tulong ken pammaregta. (Isa. 32:1, 2) Ngem nainsiriban ti maaddaan iti realistiko nga inanamaen. Iti daytoy agdama a sistema ti bambanag, awan ti naan-anay a solusion ti dadduma a parikut. Nupay kasta, adun ti nakasursuro a mangdaer kadagita, ken dayta ti tumultulong kadakuada a maaddaan iti makapnek a biag.

Mainanamatayo ti Tulong ni Jehova

Aniaman ti parikuttayo kadagitoy narigat a tiempo, manamnamatayo nga iwanwan ken saranayennatayo ni Jehova. Idagadag ti Biblia kadatayo: “Agpakumbabakayo, ngarud, iti sidong ti mannakabalin nga ima ti Dios, tapno itan-oknakayo iti naikeddeng a tiempo; bayat nga iyallatiwyo kenkuana ti isuamin a pakaringgoranyo, agsipud ta isu maseknan kadakayo.”​—1 Ped. 5:6, 7.

Agserserbi ni Kathy iti Bethel iti adun a tawen. Idi naammuanna a ni lakayna ket addaan iti Alzheimer’s disease, nariknana a dina kabaelan a daeran dagiti rigat a kakuykuyog dayta a sakit. Gapuna, nagbalin a nakapatpateg a paset ti inaldaw a panagbiagna ti iyaararawna ken Jehova tapno maaddaan iti sirib ken natibker a pakinakem. Bayat nga in-inut a kimmaro ti sakit ni lakayna, inkagumaan dagiti naayat a kakabsat a lallaki ti nanggun-od iti ad-adu nga impormasion maipapan iti panangasikaso iti dayta a sakit, idinto ta dagiti naayat a kakabsat a babbai ti nangipaay iti emosional a pannaranay. Dagita a Kristiano ket paset iti makapabileg a tulong nga impaay ni Jehova, isu a nabaelan ni Kathy nga inaywanan ni lakayna iti agarup 11 a tawen agingga a natay. Kinuna ni Kathy: “Insangitko ti naimpusuan a panagyamanko ken Jehova gapu iti amin a tulongna; dayta ti kanayon a nangpabileg kaniak. Diak ninamnama a kabaelak gayam nga itungpal dagiti pagrebbengak iti kasdiay a kabayag agpapan pay iti napalalo a bannogko!”

Tulong Tapno Maparmek Dagiti Nalmeng a Pagkapuyan

No marikna dagiti tattao nga awanen ti serserbida, mabalin a pagarupenda a saan a denggen ni Jehova ti panagpatulongda kenkuana no agrigatda. No kasta, nasayaat ngarud no utobenda ti kinuna ni David idi agbabbabawi gapu iti nadagsen a basol a naaramidanda ken Bat-seba: “Ti puso a nadunor ken naidagel, O Dios, saanmonto nga umsien.” (Sal. 51:17) Sipapasnek a nagbabawi ni David. Ammona a mabalinna ti umadani iti Dios ken ninamnamana nga isu ket maipakitaan iti asi. Tultuladen ni Jesus ti kinamanagayat ni Jehova. Ni Mateo a mannurat iti Ebanghelio inyaplikarna ken Jesus dagiti kinuna idi ni Isaias: “Awanto ti rumekenna a naparpar a runo, ket awanto ti iddepenna nga agkurkuridemdem a pabilo a lino.” (Mat. 12:20; Isa. 42:3) Bayat ti kaadda ni Jesus ditoy daga, nakipagrikna kadagiti nanumo ken mailupitlupit. No ar-arigen, saanna nga iniddep ti kaudian a silnag ti agkurkuridemdemen a pabilo ti lampara. Imbes ketdi, no kasano a mangikarga ti maysa a tao iti lana iti lamparana tapno agtultuloy a sigagangat dayta, sidudungngo a sinaranay ni Jesus dagidiay agsagsagaba babaen ti panangipaawatna kadakuada nga ammo ni Jehova dagiti pakasuotanda. Kasta ti inaramidna bayat ti kaaddana ditoy daga kas tao. Iti panagkunam, saan kadi a kasta pay laeng ti ar-aramiden ita ni Jesus ken kabaelanna ti makipagrikna kadagiti pagkapuyam? Imutektekam ta ipasimudaag ti Hebreo 4:15 nga isu ket Maysa a mabalinna ti “makipagrikna kadagiti kinakapuytayo.”

Idi nagsurat ni Pablo maipapan ti ‘siit ti lasagna,’ kinunana a ti pannakabalin ni Kristo ket “kas iti maysa a tolda” a naisalinong kenkuana. (2 Cor. 12:7-9) Nariknana ti pannalaknib ti Dios babaen ken Kristo, a kas iti marikna ti maysa a tao nga adda iti sirok ti tolda nga isu ket masalsalakniban manipud iti tudo wenno silnag ti init. Kas ken Pablo, masapul a ditay tumulok kadagiti pagkapuyan ken ditay sumuko kadagiti parikuttayo. Tapno agtalinaed a natibker ti espiritualidadtayo, mabalintayo nga usaren ti amin a probision nga ipapaay ni Jehova kadatayo babaen ti naindagaan a paset ti organisasionna. Aramidentayo ti amin a posible a kabaelantayo sa agpannuraytayo ken Jehova buyogen ti naan-anay a panagtalek nga iwanwanna dagiti addangtayo. Bayat a pabpabilgennatayo ti Dios tapno maparmektayo dagiti pagkapuyantayo, mabalintayto a kunaen met ti kas iti kinuna ni Pablo: “Inton nakapuyak, iti kasta nabilegak.”​—2 Cor. 12:10.

[Ladawan iti panid 3]

Kanayon a nagkararag ni Pablo kenni Jehova agpaay iti panangiwanwan tapno maitungpalna ti ministeriona

[Ladawan iti panid 5]

Ni Joab ti nangitalkan ni Ari David iti buyotna

[Ladawan iti panid 5]

Pinatay ni Joab ti karibalna a ni Amasa

[Ladawan iti panid 6]

Mangipapaay dagiti panglakayen iti naayat a Nainkasuratan a panangiwanwan a makatulong kadatayo a mangdaer kadagiti parikuttayo