Ania ti Masursurom Kadagiti Ubbing?

“KASKA la ubing!” No kasta ti maibaga kadatayo, mabalin a masairtayo. Nupay nakaay-ayat dagiti ubbing, nalawag a dida pay nagun-od ti kinamataengan, kapadasan, ken sirib a kadawyan a nainaig kadagiti adulto.​—Job 12:12.

Nupay kasta, iti naminsan, imbaga ni Jesus kadagiti adalanna: “Pudno kunak kadakayo, Malaksid no agbaw-ingkayo ken agbalinkayo a kas ub-ubbing, saankayto a pulos makastrek iti pagarian ti langlangit.” (Mateo 18:3) Ania ti kayat a sawen ni Jesus? Ania dagiti galad ti babassit nga ubbing a naimbag a tuladen dagiti adulto?

Panangsukay iti Kinapakumbaba nga Adda iti Maysa nga Ubing

Usigenyo ti kasasaad no apay a naisawang ni Jesus dagita a sasao. Idi nakagteng idiay Capernaum kalpasan ti nawatiwat a panagdaliasat, nagimtuod ni Jesus kadagiti adalanna: “Ania ti nagririkiaranyo iti dalan?” Nagulimek dagiti nabainan nga adalan, ta nagririkiaranda no siasino ti katan-okan kadakuada. Kamaudiananna, naaddaanda iti tured a nagsaludsod ken Jesus: “Asino a pudpudno ti kadakkelan iti pagarian ti langlangit?”​—Marcos 9:33, 34; Mateo 18:1.

Kasla nakaskasdaaw a kalpasan ti dandani tallo a tawen a pannakikadua dagiti adalan ken Jesus, nagririkiarda maipapan iti saad. Nupay kasta, napadakkelda iti relihion dagiti Judio a mangipatpateg unay kadagita a bambanag. Nabatad a daytoy a narelihiosuan a pannakapadakkel, agraman ti kinaimperpekto, ti nakagutugot kadagiti adalan nga agpanunot iti kasta.

Nagtugaw ni Jesus, inayabanna dagiti adalanna, sa kinunana: “No ti asinoman agtarigagay nga agbalin nga umuna, isu masapul a maudi iti isuamin ken agserbi iti isuamin.” (Marcos 9:35) Mabalin a nasdaawda kadagitoy a sasao. Naiduma kadagiti Judio ti kapanunotan ni Jesus maipapan iti kinatan-ok! Inayaban ni Jesus iti sibayna ti maysa a bassit nga ubing. Babaen ti nadungngo a panangarakupna iti ubing, impaganetgetna: “Pudno kunak kadakayo, Malaksid no agbaw-ingkayo ken agbalinkayo a kas ub-ubbing, saankayto a pulos makastrek iti pagarian ti langlangit. Gapuna, siasinoman a mangipakumbabanto iti bagina kas itoy nga ubing isu daydiay kadakkelan iti pagarian ti langlangit.”​—Mateo 18:3, 4.

Nagsayaat ketdin dayta nga inusarna a mangiladawan iti kinapakumbaba! Iladawanmo ti eksena. Maysa a dakkel a grupo dagiti mararaem a lallaki ti nanglikmut ken mangmingmingming iti maysa a bassit nga ubing. Mababain ngem agtalek ti ubing! Awan iti panunotna ti pannakiribal ken panagilem! Talaga a managpasakup ken saan a natangsit! Wen, ti bassit nga ubing ti nagsayaat a pagarigan iti nadiosan a galad a kinapakumbaba.

Nalawag ti punto ni Jesus. Masapul a sukayentay amin ti kinapakumbaba nga adda iti maysa nga ubing tapno tawidentayo ti Pagarian ti Dios. No iti nagbabaetan dagiti adipen ni Jehova, awan ti lugar ti panagsasalisal wenno kinatangsit. (Galacia 5:26) Kinapudnona, dagita a kababalin ti nangtignay ken ni Satanas a Diablo nga agrebelde iti Dios. Awan duadua a kagura ni Jehova dagita a kababalin!​—Proverbio 8:13.

Kayat dagiti pudno a Kristiano ti agserbi, saan ket a mangituray. Ti pudno a kinapakumbaba tignayennatayo nga agserbi kadagiti sabsabali kasanoman ti kinarigat ti trabaho ken kinanumo ti pagserbian. Makapnek ti kasta a panagserbi. Kinuna ni Jesus: “Siasinoman nga umawat iti maysa kadagiti kastoy nga ubbing maigapu iti naganko, awatennak; ket siasinoman nga umawat kaniak, awatenna, saan laeng a siak, no di ket kasta met daydiay nangibaon kaniak.” (Marcos 9:37) Maikaykaysatayo iti kangatuan a Persona iti uniberso ken ti Anakna no patanorentayo ti naparabur, napakumbaba, ken kasla ubing a kababalin. (Juan 17:20, 21; 1 Pedro 5:5) Masagraptayto ti kinaragsak a bunga ti panangted. (Aramid 20:35) Ken mapnektayo gapu ta nakatulongtayo iti talna ken panagkaykaysa nga agraraira iti ili ti Dios.​—Efeso 4:1-3.

Nalaka nga Isuro ken Managtalek

Simmaganad nga impaganetget ni Jesus ti sabali pay a leksion a maadal dagiti adulto kadagiti ubbing: “Siasinoman a saan nga umawat iti pagarian ti Dios a kas iti maysa nga ubing saanto a pulos makastrek iti dayta.” (Marcos 10:15) Saan laeng a napakumbaba dagiti ubbing; nalakada met nga isuro. “Agsependa ti impormasion a kas iti maysa nga espongha,” kinuna ti maysa nga ina.

No kasta, tapno tawidentayo ti Pagarian ti Dios, masapul nga awaten ken agtulnogtayo iti mensahe ti Pagarian. (1 Tesalonica 2:13) Kas kayanak a maladaga, ‘patanorentayo ti panagtarigagay iti awan lalaokna a gatas a kukua ti sao, tapno babaen iti dayta dumakkeltayo koma nga agturong iti pannakaisalakan.’ (1 Pedro 2:2) No ngay kasla narigat a maawatan ti maysa a pannursuro ti Biblia? “Dagiti ubbing kanayonda nga agsaludsod iti ‘Apay?’ agingga a mapnekda iti sungbat dagiti saludsodda,” kinuna ti maysa nga agtartrabaho iti pagaywanan kadagiti ubbing. Naimbag a tuladentayo ti ulidanda. Isu nga itultuloyyo ti agadal. Makisaritakayo kadagiti aduanen kapadasan a Kristiano. Agkiddawkayo iti sirib ken ni Jehova. (Santiago 1:5) Awan duadua a ti kanayon a panagkararagyo magunggonaanto inton agangay.​—Mateo 7:7-11.

Ngem nalabit pampanunoten ti dadduma, ‘Saan kadi a dagiti nalaka nga isuro a tattao nalakada met a maallilaw?’ Saan, no la ketdi ta mapagtalkan ti pagpaiwanwananda. Kas pagarigan, dagiti annak nainkasigudan nga agpaiwanwanda kadagiti nagannak kadakuada. “Napaneknekanen a mapagtalkan dagiti nagannak ta salakniban ken inaldaw nga ipaayda ti kasapulan dagiti annakda,” kinuna ti maysa nga ama. Sigurado a kasta met laeng ti panagtalektayo iti nailangitan nga Amatayo a ni Jehova. (Santiago 1:17; 1 Juan 4:9, 10) Ni Jehova mangted iti mapagtalkan a panangiwanwan babaen ti naisurat a Saona. Liwliwaen ken saranayennatayo babaen ti nasantuan nga espiritu ken organisasionna. (Mateo 24:45-47; Juan 14:26) Saantayo a madangran iti naespirituan no aprobetsarentayo dagitoy a probision.​—Salmo 91:1-16.

Maaddaantayo met iti natalna a panunot no sukayentayo ti panagtalek iti Dios a kas iti maysa nga ubing. Kastoy ti kuna ti maysa nga eskolar iti Biblia: “Idi ubbingtayo pay nagdaliasattayo a ditay pulos nagpletplete, ken ditay ammo no makasangpettayo iti papanantayo, ngem nagtalektayo a sitatalged nga idanondatayo sadiay dagiti dadakkeltayo.” Kasta met kadi ti panagtalektayo ken Jehova bayat ti intero a panagbiagtayo?​—Isaias 41:10.

Ti naan-anay a panagtalek iti Dios tulongannatayo a mangliklik kadagiti kababalin ken tignay a makadangran iti espiritualidadtayo. Agtalektayo a naan-anay iti imbaga ni Jesus nga ammo ti nailangitan nga Amatayo dagiti aramidtayo ken aywanannatayo no la ket ta iyun-unatay a sapulen ti Pagarian ti Dios ken ti kinalintegna. Tumulong daytoy kadatayo tapno saantay a masulisog a mangipamaysa kadagiti material a kasapulantayo ket mabaybay-antayo ti espiritualidadtayo.​—Mateo 6:19-34.

“Maladaga No iti Kinadakes”

Nupay naipasngayda nga imperpekto, awan pay la ti pakapilawan dagiti babassit nga ubbing. Dayta ti makagapu nga iparegta ti Biblia kadagiti Kristiano: “Agbalinkayo a maladaga no iti kinadakes.”​—1 Corinto 14:20.

Panunotenyo ti agtawen iti lima a ni Monique, a maragsakan a nangibaga ken ni nanangna: “Ti kabarbaro a gayyemko a ni Sarah, kulot ti buokna a kas kaniak!” Saan a nadakamat ti kolor ken puli ni Sarah. Kastoy ti kinuna ti maysa nga ina: “Awan ti puli nga idaddaduma dagiti ubbing.” No kasta, nagsayaat la ketdin ti panangiparangarang dagiti ubbing iti panangmatmat ti awan idaddadumana a Diostayo, a mangay-ayat kadagiti tattao iti amin a nasion.​—Aramid 10:34, 35.

Nakaskasdaaw met ti kinamanangpakawan dagiti ubbing. Kastoy ti kinuna ti maysa a nagannak: “No agapa idi da Jack ken Levi, ibagami kadakuada nga agpinnakawanda, ket di agbayag siraragsakda manen nga agay-ayam. Saanda nga agim-impen, saanda nga ikaskasir ti napalabas, wenno mangted iti kondision sakbay a mamakawanda. Basta aggayyem ken agay-ayamda manen.” Nagsayaat la ketdi dayta a tuladen dagiti adulto!​—Colosas 3:13.

Malaksid iti dayta, dagus a patien dagiti babassit nga ubbing nga adda Dios. (Hebreo 11:6) Masansan a ti kadawyan a kinapudnoda ti mangtignay kadakuada a situtured a mangasaba iti sabsabali. (2 Ar-ari 5:2, 3) Matignay dagiti natangken a puso kadagiti simple ken naimpusuan a kararagda. Ket no maipasangoda iti pannakasulisog, maipakitada ti nakaskasdaaw a kinatibker ti pakinakemda. Nagpateg la ketdin a sagut dagiti babassit nga ubbing!​—Salmo 127:3, 4.

Napabaro a Kinapintas

Nalabit mapanunotyo, ‘Mabalin kadi a tuladen dagiti adulto dagiti nagpipintas a galad dagiti ubbing?’ Wen ti simple ken mangipanamnama a sungbat! Sigurado a ti bilin ni Jesus nga “agbalinkayo a kas ub-ubbing” paneknekanna a posible dayta.​—Mateo 18:3.

Kas ilustrasion: Nalabit maysa a grupo dagiti agtartarimaan ti mangisubli iti sigud a langa ti nagpateg a lamina. Mabalin nga ikkatenda nga umuna dagiti rugitna ken baliwanda dagiti immuna a di napintas a pannakatarimaanna. Kalpasan ti adu nga anus ken panangikagumaan dagiti agtartarimaan, makitan ti amin ti nagduduma a kolor ken natural a kinapintas ti sigud a lamina. Kasta met, babaen ti kanayon a panangikagumaan, ti tulong ti nasantuan nga espiritu ni Jehova, ken ti naayat a tulong ti Nakristianuan a kongregasion, mabalin a matuladtayo dagiti nagsasayaat a galad a kadawyan nga imparangarangtayo idi ubbingtayo pay.​—Efeso 5:1.

[Ladawan iti panid 9]

Kadawyan a napakumbaba dagiti ubbing

[Ladawan iti panid 10]

Saan a mangidumduma dagiti ubbing, ken dagus a mamakawan ken lipatenda ti napalabas