Panagibtur​—Nasken Kadagiti Kristiano

“Inayonyo iti pammatiyo . . . ti panagibtur.”​—2 PEDRO 1:5, 6.

1, 2. Apay a masapul nga agibturtay amin agingga iti panungpalan?

SARSARUNGKARAN ti agdaldaliasat a manangaywan ken ni baketna ti maysa a padada a Kristiano a nasuroken a 90 ti tawenna. Adu a dekada ti binusbosna iti amin-tiempo a ministerio. Bayat ti panagpapatangda, nalagip ti laklakay a kabsat ti dadduma kadagiti pribilehio a tinagiragsakna iti adu a tawen. “Ngem ita bassit lat’ maaramidakon,” aglulua nga insennaayna. Inukrad ti agdaldaliasat a manangaywan ti Bibliana ket binasana ti Mateo 24:13, a sadiay kinuna ni Jesu-Kristo: “Ti nakapagibtur agingga iti panungpalan isunto ti maisalakan.” Kalpasanna minatmatan ti manangaywan ti patpatgen a kabsat sana kinuna: “Ti maudi nga aramidentayo amin, uray kasano ti kaadu wenno kabassit ti maaramidantayo, isu ti panagibtur agingga iti panungpalan.”

² Wen, kas Kristiano masapul nga agibturtayo agingga iti panungpalan daytoy a sistema dagiti bambanag wenno agingga iti panungpalan ti biagtayo. Awanen sabali pay a pakagun-odan iti anamong ni Jehova tapno maisalakantayo. Makilumlumbatayo a maipaay iti biag, ket masapul nga ‘agtaray[tayo] a siaanus’ agingga a makagtengtayo iti pagpatinggaan. (Hebreo 12:1) Inyunay-unay ni apostol Pedro ti kinapateg daytoy a kababalin idi nga indagadagna kadagiti padana a Kristiano: “Inayonyo iti pammatiyo . . . ti panagibtur.” (2 Pedro 1:5, 6) Ngem ania kadi a talaga ti panagibtur?

Ti Kaipapanan ti Panagibtur

3, 4. Ania ti kayat a sawen ti panagibtur?

³ Ania ti kayat a sawen ti panagibtur? Ti Griego a verbo para iti “agibtur” (hy·po·meʹno) literal a kaipapananna “agtalinaed wenno agtalinaed iti sidong.” Mamin-17 a daras nga agparang dayta iti Biblia. Sigun kada leksikograpo a W. Bauer, F. W. Gingrich, ken F. Danker, ti panagibtur kaipapananna “agtalinaed imbes a pumanaw . . . , agbalin a natibker, mangnamnama.” Ti Griego a nombre para iti “panagibtur” (hy·po·mo·neʹ) ket nasurok a mamin-30 a daras nga agparang. Maipanggep itoy, kuna ti A New Testament Wordbook, ni William Barclay: “Isu dayta ti kababalin a mangitured kadagiti bambanag, saan laeng a panangawat iti pakarigatan, no di ket napakuyogan iti nasged a namnama . . . Isu dayta ti kababalin a mamagtalinaed iti maysa a tao a sitatakder iti sango ti napigsa nga angin. Isu dayta ti galad a mamagbalin iti kaingetan a pannubok a pakaidayawan agsipud ta iti laksid ti pakarigatan, siinanama iti kalat.”

⁴ No kasta, tulongannatay ti panagibtur nga agtalinaed a natibker ken saan a mapukawan iti namnama iti sango dagiti lapped wenno pakarigatan. (Roma 5:3-5) Saantay laeng nga ibturan ti rigat no di pay ket siinanama iti kalat​—iti gunggona, wenno sagut, a biag nga agnanayon, idiay langit man wenno ditoy daga.​—Santiago 1:12.

Apay a Masapul nga Agibturtayo?

5. (a) Apay a “masapul nga agibtur” dagiti amin a Kristiano? (b) Iti ania a dua a kategoria a mabingay dagiti pakasuotan a dumteng kadatayo?

⁵ Kas Kristiano, “masapul nga agibtur[tayo].” (Hebreo 10:36) Apay? Kangrunaanna, agsipud ta “aglak-amtayo kadagiti nadumaduma a pakasuotan.” Isingasing ti Griego a teksto ditoy idiay Santiago 1:2 ti di ninamnama wenno di matarigagayan a pannakaipasango, a kas no saneben ti tulisan ti maysa a tao. (Idiligyo ti Lucas 10:30.) Maipasangotayo kadagiti pakasuotan a mabalin a mabingay iti dua a kategoria: dagidiay gagangay a dumteng iti tao a bunga ti basol a tawid, ken dagidiay tumaud gapu iti panangsurottayo iti nadiosan a debosion. (1 Corinto 10:13; 2 Timoteo 3:12) Ania ti dadduma kadagitoy a pakasuotan?

6. Kasano a nagibtur ti maysa a Saksi idi nga agsagsagaba iti naut-ot a sakit?

⁶ Nakaro a sakit. Kas ken Timoteo, masapul nga ibturan dagiti dadduma a Kristiano ‘ti masansan a panagsakit.’ (1 Timoteo 5:23) Masapul nga agibturtayo, agtalinaed a natibker, iti tulong ti Dios ken sipapanunot iti Nakristianuan a namnamatayo nangruna no adda di maimbagan, nalabit naut-ot unay a sakittayo. Alaentayo a pangarigan ti maysa a Saksi a nasurok a 50 ti tawenna. Nabayag ken napalalo ti rigatna a nangib-ibtur iti napartak panagdakkelna a makapapatay a tumor. Namindua a naoperaan ket sititibker a sinalimetmetanna ti determinasionna a di agpayalison ti dara. (Aramid 15:28, 29) Ngem nagtubo manen ti tumor iti tianna ket nagtultuloy a dimmakkel agingga iti asideg ti durina. Kasta unay ti rigatna a nangan-andur iti ut-ot ta awan agas a makaep-ep iti dayta. Ngem, iti laksid ti rigat a sinagabana, siinanama iti gunggona a biag iti baro a lubong. Saan a nagsardeng a nangiranud iti nasged a namnamana kadagiti doktor, nars, ken bisita. Nagibtur agingga iti panungpalan​—iti panungpalan ti biagna. Mabalin a ti sakityo saanna a pagpeggaden ti biagyo wenno saan a kas kaut-ot iti napasaran dayta a patpatgen a kabsat, ngem mabalin a suotenna iti kasta unay ti panagibturyo.

7. Ania a kita ti pakarigatan ti nasken nga ibturan dagiti dadduma a naespirituan a kakabsattayo a lallaki ken babbai?

⁷ Emosional a pakarigatan. Mapasaran no kua dagiti dadduma nga adipen ni Jehova “ti ladingit ti puso” a ‘mangdudog ti espiritu.’ (Proverbio 15:13) Gagangay ti nakaro a panagleddaang kadagitoy “napeggad a panawen a narigat a pakilangenan.” (2 Timoteo 3:1) Impadamag ti Science News a Disiembre 5, 1992: “Umad-adu dagiti agsagsagaba iti nakaro, masansan a makapalupoy a liday iti tunggal kaputotan sipud idi 1915.” Nagduduma ti pakaigapuan dagiti kasta a panagleddaang, a pakairamanan dagiti marikrikna ken dagiti nasaem a kapadasan. Kadagiti dadduma a Kristiano, masapul nga agibturda iti inaldaw a pannakidangadangda nga agtalinaed a natibker iti sidong ti emosional a pakarigatan. Ngem saanda a sumuko. Matalekda latta ken Jehova iti baet dagiti napait a kapadasanda.​—Idiligyo ti Salmo 126:5, 6.

8. Ania a pinansial a pakasuotan ti mabalin a mapasarantayo?

⁸ Mabalin a karaman kadagiti nadumaduma a pakasuotan a mapasarantayo ti nakaro a material a pakarigatan. Idi di ninamnama a napukawan iti panggedan ti maysa a kabsat a lalaki idiay New Jersey, E.U.A., siempre pampanunotenna ti pangtaraonna iti pamiliana ken madanagan amangan no maawanan iti pagtaengan. Nupay kasta, silalagip latta iti namnama iti Pagarian. Bayat nga agbirbiruk iti sabali a trabaho, ginundawayanna ti nag-auxiliary pioneer. Idi agangay, nakasapul iti trabaho.​—Mateo 6:25-34.

9. (a) Kasano a ti pannakapukaw ti ingungoten gapu iti ipapatay sapulenna ti panagibtur? (b) Ania dagiti kasuratan a mangipakita a saan a dakes ti agsangit gapu iti ladingit?

⁹ No napasaranyon ti napukawan iti ingungoten gapu ken patay, kasapulanyo ti panagibtur uray no nakasublin dagiti adda iti dennayo iti normal a panagbiagda. Mabalin pay ketdi a nangnangruna a narigat kadakayo tunggal dumteng ti tiempo iti tawen a pannakatay daydi ingungotenyo. Ti panangibtur iti kasta a pukaw saanna a kayat a sawen a dakes ti agladingit. Natural laeng a lumdaangtayo no matay ti maysa a tao a patpatgentayo, ket saan nga ipakita daytoy ti kinakurang ti pammati iti namnama iti panagungar. (Genesis 23:2; Idiligyo ti Hebreo 11:19.) “Nagsangit” ni Jesus idi natay ni Lazaro, nupay impanamnamana ken ni Marta: “Agungarto ni kabsatmo.” Ket agpayso a nagungar ni Lazaro!​—Juan 11:23, 32-35, 41-44.

10. Apay nga addaan dagiti tattao ni Jehova iti naipangruna a pannakasapul iti panagibtur?

¹⁰ Malaksid pay iti panangibtur kadagiti pakasuotan a gagangay kadagiti amin a tao, addaan dagiti tattao ni Jehova iti naipangruna a pannakasapul iti panagibtur. “Guraendakayto dagiti amin a nasion gapu iti naganko,” imballaag ni Jesus. (Mateo 24:9) Kinunana pay: “No indadanesdak, idadanesdakayto met.” (Juan 15:20) Apay a guraen ken idadanesdatayo? Ngamin, sadinoman ti pagnanaedantayo ditoy daga kas ad-adipen ti Dios, ikagkagumaan ni Satanas a dadaelen ti kinatarnawtayo ken Jehova. (1 Pedro 5:8; idiligyo ti Apocalipsis 12:17.) Maipaay itoy a panggep, masansan a mangparnuay ni Satanas iti nakaro a pannakaidadanes, a suotenna iti kasta unay ti panagibturtayo.

11, 12. (a) Ania a suot ti inibturan dagiti Saksi ni Jehova ken dagiti annakda idi 1930’s ken idi rugrugi ti 1940’s? (b) Apay a saan nga agsaludo dagiti Saksi ni Jehova iti bandera?

¹¹ Kas pangarigan, idi 1930’s ken idi rugrugi ti 1940’s, naidadanes dagiti Saksi ni Jehova ken dagiti annakda idiay Estados Unidos ken Canada gapu iti saanda a panangsaludo iti bandera maipuon iti konsiensia. Raemen dagiti Saksi ti bandera ti nasion a pagnanaedanda, ngem sursurotenda ti prinsipio a sagudayen ti Linteg ti Dios a nailanad idiay Exodo 20:4, 5: “Dika mangaramid iti agpaay kenka a kinitikitan a ladawan wenno uray ania a kapadpada ti adda idiay ngato sadi langit wenno ti adda iti baba ditoy daga wenno ti adda iti danum iti uneg ti daga. Dika agrukbab kadakuada wenno pagserbian ida, ta siak ni Jehova a Diosmo maysa a Dios a mangkalikagum iti naipamaysa a debosion.” Idi naikkat ti sumagmamano nga annak dagiti Saksi kadagiti pagadalanda gapu ta ni laeng Jehova a Dios ti tinarigagayanda a pagdaydayawan, nangipasdek dagiti Saksi kadagiti Kingdom School a pagbasaanda. Nagsubli dagitoy nga estudiante kadagiti publiko a pagadalan idi a binigbig ti Korte Suprema ti Estados Unidos ti narelihiusuan a takderda, kas iti ar-aramiden ita dagiti nalawlawaganen a nasion. Nupay kasta, ti natured a panagibtur dagitoy nga agtutubo agserbi a nasayaat nga ulidan nangruna kadagiti agtutubo a Kristiano a mabalin a malalais ita gapu iti panangikagumaanda a mangsalimetmet kadagiti pagalagadan ti Biblia.​—1 Juan 5:21.

¹² Dagiti nadumaduma a pakasuotan a mapasarantayo​—agpadpada dagidiay gagangay iti tao ken dagidiay pakaipasanguantayo gapu iti Nakristianuan a pammatitayo​—ipakitana no apay a masapul nga agibturtayo. Ngem kasanotay a makapagibtur?

Agibtur Agingga iti Panungpalan​—Kasano?

13. Kasano nga ipaay ni Jehova ti panagibtur?

¹³ Nasaysayaat ti kasasaad ti ili ti Dios ngem dagidiay saan nga agdaydayaw ken Jehova. No maipaay iti tulong, mabalintay ti umadani iti “Dios a mangipaay iti panagibtur.” (Roma 15:5) Nupay kasta, kasano nga ipaay ni Jehova ti panagibtur? Ti maysa a wagas a panangaramidna iti dayta ket babaen dagiti pagulidanan ti panagibtur a nailanad iti Saona, ti Biblia. (Roma 15:4) No ut-utobentayo dagitoy, saantay laeng a maparegta nga agibtur no di pay ket adut’ masursurotayo no kasano ti agibtur. Usigentayo ti dua a naisalumina a pagulidanan​—ti natured a panagibtur ni Job ken ti awan pakapilawanna a panagibtur ni Jesu-Kristo.​—Hebreo 12:1-3; Santiago 5:11.

14, 15. (a) Aniada a pakasuotan ti inibturan ni Job? (b) Kasano a naibturan ni Job dagiti pakasuotan a dimteng kenkuana?

¹⁴ Ania dagiti situasion a nangsuot iti panagibtur ni Job? Naglak-am iti material a pakarigatan idi a napukawna ti gistay amin a sanikuana. (Job 1:14-17; idiligyo ti Job 1:3.) Dakkel a pukaw ti sinagaba ni Job idi a natay dagiti amin a sangapulo nga annakna babaen ti napigsa nga angin. (Job 1:18-21) Isu ket kinaptan ti nakaro, naut-ot unay a sakit. (Job 2:7, 8; 7:4, 5) Kiniwkiwan ti mismo nga asawana a tallikudanna ti Dios. (Job 2:9) Nangisawang dagiti nadekket a gagayyemna kadagiti makapasakit, nagubsang, ken di tumutop a balikas. (Idiligyo ti Job 16:1-3 ken Job 42:7.) Iti laksid amin dagitoy, nagtalinaed a natibker ni Job, a sinalimetmetanna ti kinatarnawna. (Job 27:5) Dagiti inibturanna ket kas met la kadagiti pakasuotan a mapaspasaran dagiti tattao ni Jehova ita.

¹⁵ Kasano a naibturan ni Job amin dagidiay a pakasuotan? Ti maysa a banag a nangpakired kenkuana isu ti namnama. “Adda namnama uray ti maysa a kayo,” kinunana. “No mapukan, agsaringitto manen, ket ti sangana dinto agpatingga.” (Job 14:7) Ania ti namnama ni Job? Kas ipakita ti sumagmamano a naud-udi a bersikulo, kinunana: “No matay ti tao, agbiagto aya manen? . . . Umawagkanto ket sungbatankanto. Adda koma maysa a kalikagummo [wenno, tarigagay].” (Job 14:14, 15) Wen, saan laeng nga inibturan ni Job ti rigat a sagsagabaenna. Ammona nga aggibusto met laeng dagiti pakasuotan a dimteng kenkuana. Nasken nga agibtur agingga ken patay no isut’ kasapulan. Namnamaenna nga isut’ pagungarento ni Jehova, a siaayat ken sidadaan a mangpagungar kadagiti natay.​—Aramid 24:15.

16. (a) Aniat’ masursurotayo maipapan iti panagibtur iti ulidan ni Job? (b) Kasanot’ rumbeng a kapayso kadatayo ti namnama iti Pagarian, ken apay?

¹⁶ Aniat’ masursurotayo iti panagibtur ni Job? Tapno makapagibturtayo agingga iti panungpalan, masapul a sipapanunottayo a kanayon iti namnamatayo. Laglagipentayo met a ti di mapagduaduaan a namnama iti Pagarian kaipapananna nga “apagbiit” laeng ti aniaman a sagabaentayo. (2 Corinto 4:16-18) Sititibker a naibatay ti nagpateg a namnamatayo iti kari ni Jehova maipapan iti maysa a panawen iti asidegen a masanguanan inton “punasenna ti amin a lua kadagiti mata[tayo], ket awanton ni patay, awanto metten ti sasaibbek, wenno sangsangit, wenno rigrigat.” (Apocalipsis 21:3, 4) Dayta a namnama, a “saan a mangiturong iti pannakaupay,” masapul a saluadanna ti panunottayo. (Roma 5:4, 5; 1 Tesalonica 5:8) Masapul a napaypayso dayta kadatayo​—napaypayso unay ta babaen ti mata ti pammatitayo, mailadawantayo ti bagitayo nga adda iti baro a lubong​—a saanen a makidangadang iti sakit ken liday no di ket agriing iti tunggal aldaw a nakaradkad ken nasaliwanwan ti panunotna; saanen a maringgoran gapu iti nakaro a material a pakarigatan no di ket agbiag a sitatalged; saanen nga agdung-aw gapu iti ipapatay dagiti ingungotentayo no di ket maragsakan a makakita kadakuada a mapagungar. (Hebreo 11:1) No awan ti kasta a namnama, mabalin a ringbawandatayo iti kasta unay dagiti agdama a pakasuotan a dumteng kadatayo nga uray la pasukuendatayo. Ti namnamatayo papigsaenna ti pakinakemtayo nga agpatuloy a makidangadang, nga agibtur agingga iti panungpalan!

17. (a) Aniada a pakasuotan ti inibturan ni Jesus? (b) Aniat’ mangipakita a nakaro ti rigat nga inibturan ni Jesus? (Kitaenyo ti footnote.)

¹⁷ Idagadag ti Biblia kadatayo a ‘sipapasnek a kitaentayo’ ni Jesus ken ‘panunotentayo a naimbag.’ Ania dagiti pakasuotan nga inibturanna? Dadduma kadagitoy ket bunga ti basol ken kinaimperpekto dagiti sabsabali. Inibturan ni Jesus saan laeng a ti “panangsupring dagiti managbasol” no di pay ket dagiti parikut a rimsua kadagiti adalanna, agraman ti panagsusuppiatda no siasino kadakuada ti katan-okan. Saan la a dayta, naipasango pay iti awan kapadana a pakasuotan ti pammati. “Inibturanna ti kayo a pagtutuokan.” (Hebreo 12:1-3; Lucas 9:46; 22:24) Kinapudnona, narigat uray ti panangpanunot laeng iti mental ken pisikal a panagsagabana idi a nailansa ken gapu iti nakababain a pannakapapatayna kas maysa a managtabbaaw.a

18. Sigun ken apostol Pablo, ania dagiti dua a banag a nangpakired ken ni Jesus?

¹⁸ Aniat’ nakatulong ken Jesus a nagibtur agingga iti panungpalan? Dua a banag ti dinakamat ni apostol Pablo a nangpakired ken Jesus: ‘ar-araraw ken dawdawat’ ken kasta met “ti rag-o nga agur-uray kenkuana.” Ni Jesus, ti perpekto nga Anak ti Dios, ket saan a mabain nga agpatulong. Nagkararag a “buyogen ti nasged a sangsangit ken lulua.” (Hebreo 5:7; 12:2) Inulit-ulit ken impaspasnekna ti nagkararag tapno dumawat iti pammakired idi nga umas-asidegen ti nakaro a pakasuotan nga agur-uray kenkuana. (Lucas 22:39-44) Kas sungbat iti ar-araraw ni Jesus, saan nga inikkat ni Jehova ti pakasuotan, no di ket pinakiredna ni Jesus a mangibtur iti dayta. Nagibtur met ni Jesus agsipud ta iti laksid ti panagsagabana iti kayo a pagtutuokan, siinanama iti gunggonana​—ti rag-o nga agtaud iti panangsantipikar iti nagan ni Jehova ken iti panangsubbot iti natauan a pamilia manipud ken patay.​—Mateo 6:9; 20:28.

19, 20. Kasano a tulongannatayo ti ulidan ni Jesus a maaddaan iti realistiko a panangmatmat iti ramanen ti panagibtur?

¹⁹ Adut’ masursurotayo iti ulidan ni Jesus a makatulong kadatayo a maaddaan iti realistiko a panangmatmat iti ramanen ti panagibtur. Saan a nalaka ti agibtur. No marigatantayo a mangibtur iti maysa a pakasuotan, maliwliwatayo iti pannakaammo a pudno met dayta uray ken ni Jesus. Tapno makapagibturtayo agingga iti panungpalan, masapul nga ikararagtay a kanayon ti pammakired. No masuottayo, mabalin a mariknatayo no dadduma a saantayo a maikari nga agkararag. Ngem awisennatayo ni Jehova a mangiparukpok iti pusotayo kenkuana ‘agsipud ta maseknan kadatayo.’ (1 Pedro 5:7) Ket gapu iti inkari ni Jehova iti Saona, sidadaan a mangipaay iti “bileg a napigpigsa ngem ti gagangay” kadagidiay umawag kenkuana a buyogen ti pammati.​—2 Corinto 4:7-9.

²⁰ No dadduma masapul nga agibturtayo a buyogen ti lulua. Saan a ti panagsagabana iti kayo a pagtutuokan ti pakaragsakan ni Jesus no di ket ti gunggona nga agur-uray kenkuana. No maipapan kadatayo, saan a realistiko a namnamaen a kanayon a maragragsakan ken maay-ayatantayo iti sidong ti pakasuotan. (Idiligyo ti Hebreo 12:11.) Nupay kasta, no sipapanunottayo iti gunggona, mabalintayo nga ‘ibilang a rag-o amin’ uray no masuottayo iti kasta unay. (Santiago 1:2-4; Aramid 5:41) Ti nasken ket agtalinaedtayo a natibker​—uray no adu ti lua nga agarubos. Total, saan a kinuna ni Jesus a, ‘Ti kabassitan ti luana maisalakanto’ no di ket, “Ti nakapagibtur agingga iti panungpalan isunto ti maisalakan.”​—Mateo 24:13.

21. (a) Idiay 2 Pedro 1:5, 6, aniat’ naidagadag nga inayontayo iti panagibturtayo? (b) Ania dagiti saludsod a mausigto iti sumaganad nga artikulo?

²¹ Nasken ngarud ti panagibtur iti pannakaisalakan. Nupay kasta, idiay 2 Pedro 1:5, 6, naidagadag nga inayontayo ti nadiosan a debosion iti panagibturtayo. Ania kadi ti nadiosan a debosion? Kasano a nainaig dayta iti panagibtur, ken kasanoyo a mapatanor dayta? Mausig dagitoy a saludsod iti sumaganad nga artikulo.

[Footnote]

Kasanoyo a Sungbatan?

◻ Ania ti kayat a sawen ti panagibtur?

◻ Apay nga addaan dagiti tattao ni Jehova iti naipangruna a pannakasapul iti panagibtur?

◻ Aniat’ nakatulong ken Job a nagibtur?

◻ Kasano a tulongannatay ti ulidan ni Jesus a maaddaan iti realistiko a panangmatmat iti panagibtur?

[Ladawan iti panid 10]

Naipasdek dagiti Kingdom School a pagbasaan dagiti Kristiano nga ubbing a naikkat kadagiti pagadalanda gapu ta ni laeng Jehova ti pinagdaydayawanda

[Ladawan iti panid 12]

Determinado a mangpadayaw iti Amana, nagkararag ni Jesus maipaay iti pigsa nga agibtur