Itultuloyyo nga Ikaskasaba ti Pagarian

“Daytoy naimbag a damag ti pagarian maikaskasabanto iti amin a mapagnaedan a daga kas pammaneknek iti isuamin a nasnasion; ket iti kasta umayton ti panungpalan.”​—MATEO 24:14.

1, 2.(a) Aniat’ kapapatgan unay a trabaho iti daytoy a siglo, ket kasano kasaknapen ti pannakaar-aramidna? (b) Ania a pammaneknek ti adda iti pammendision ni Jehova iti daytoy a trabaho?

TI PANANGIKASKASABA ti naimbag a damag ti Pagarian ti Dios ti kapapatgan unay a trabaho iti daytoy a siglo. Isu dayta ti kayat ti Dios a Mannakabalin-amin a maaramidan itan, ket daytat’ maar-aramiden kas kaitungpalan ti naimpadtuan a Saona. Ti panagtignayyo iti dayta ti mabalin a makaapektar iti agnanayon a pagtungpalanyo.​—1 Corinto 9:16, 23.

² Makaparagsak a makita a ti bilang dagiti makiramraman iti daytoy a trabaho a panangasaba ti agtultuloy a rumangrang-ay, nga adda itan nasurok a tallo a milion a makiramramanen. Dumakdakkel met ti bilang dagiti sumsumrek iti amin-tiempo a ministerio. Ken adu pay dagiti interesado a tattao ti umaw-awat iti panangiyadal ti Biblia ken pagregreggetanda a maammuan ti panangaramid iti pagayatan ti Dios.

3.Aniat’ mabalin a maikuna ti dadduma maipapan ti pannakasapul ti panagtultuloy ti panangikaskasaba ti naimbag a damag?

³ No maminsan, nupay kasta, dadduma ti “mabannog iti panagaramid iti naimbag” ken “agkapuy[da]” no maipapan iti trabaho a panangasaba. (Galacia 6:9; Hebreo 12:3) Mabalin a kunaenda a ti naimbag a damag nasaknapen a naikaskasaba iti teritoriada ket innalan dagiti tattao ti takderda ket masuronda pay itan no sumarungkartayo kadagiti pagtataenganda. Dagidiay mangar-aramid ti panangasaba sadiay sumagmamano a resulta ti maal-alada wenno awan pay ketdi a pulos. Gapuna, mariknada, a nalabit nalpasen ti trabaho, ket saanen a kasapulan ti panangitultuloy pay. Aniat’ di umiso iti daytoy a panagpampanunot?

Apay nga Agtultuloy?

4.Aniat’ rebbeng a mangtignay kadatayo nga agtultuloy a mangikaskasaba agpapan pay nakapuy ti panangawatda kadagiti teritoria?

⁴ Umuna, ti panagibturtayo a simamatalek iti trabaho a panangaskasaba ti rebbeng saan nga agpannuray iti panagdengngeg dagiti tattao kadatayo wenno saan. Ni Jeremias ti nangaskasaba iti 40 a tawtawen idiay Jerusalem uray pay no nagbassit dagiti dimngeg ken adu dagiti sirurungsot a nangbusor kenkuana. Apay nga isut’ nagtultuloy? Agsipud ta isut’ mangar-aramid ti trabaho nga imbilin ni Jehova ken agsipud ta ti naimpadtuan a pannakaammona maipapan iti mapasamak iti Jerusalem ti nangpilit kenkuana nga agtultuloy nga agsao. (Jeremias 1:17-19) Kinunana: “Adda ngarud iti pusok ti kas sumsumged nga apuy a naripkan kadagiti tultulangko; ket mautoyanak nga agitured, ket saanak a makaibtur.” (Jeremias 20:7-10) Ti kasasaadtayo ti umas-asping iti dayta. Ni Jehova, babaen ken ni Jesu-Kristo, ti nangbilin a rebbeng a maikaskasaba ti “naimbag a damag” iti isuamin a mapagnaedan a daga. (Mateo 24:14) No madi a dumngeg dagiti tattao, daytoy ti mangted ti gundaway kadatayo a mangipakita ti naun-uneg a panagayat ken debosiontayo ken ni Jehova babaen ti panagtultuloy a panangaramid ti naimbag. (1 Juan 5:3) Malaksid pay, no mennamennaentayo no ania ti salsalimetmetan ti asidegen a masanguanan nga agpaay iti sangatauan, kasanotay a mamedmedan ti bagbagitayo iti intayo panangpadpadas a mangpakdaar kadagiti kaarrubatayo?​—2 Timoteo 4:2.

5.(a) Agpaay iti ania a sabali a rason a rebbeng nga agibturtayo iti panangaskasaba? (b) Kasano a ti panangaskasaba ket pakaibatayan iti panangukom?

⁵ Mainayon pay, ti panangaskasaba ni Jeremias ket kinapudnona maysa a trabaho a panangukom. Idi 607 K.K.P., awan kadagidiay nagsagaba iti ipapatay wenno pannakaadipen idi natuang ti Jerusalem ti makaikuna a saanda a naammuan a daytoy ti mapasamak kadakuada. Ta iti 40 a tawtawen a napalabas, eksakto a pakpakdaaran ni Jeremias ida iti kasta a pasamak no agtultuloyda nga umalsa a maibusor ken ni Jehova. (Idiligyo iti Ezequiel 2:5.) Umas-asping met itatta, ti panangikaskasaba ti naimbag a damag kas “pammaneknek iti isuamin a nasnasion” ket isut’ pakaibatayan ti panangukom. Impakita a silalawag ni apostol Pablo daytoy idi a kinunana a ni Kristo Jesus balsennanto “dagiti saan a mangammo iti Dios ken di agtulnog iti naimbag a damag ni Apotayo a Jesus.” (2 Tesalonica 1:8, 9) Dagiti tattao maukomdanto sigun iti panangawatda iti naimbag a damag. Gapuna, masapul a maitultuloy a sipipigsa ken silalawag ti trabaho a panangaskasaba aginggana iti panungpalan. (Apocalipsis 14:6, 7) Awan ti aniaman a makalapped iti pannakaiyeg daytoy nasken unay a mensahe kadagiti tattao a masansan unay aginggat’ mabalin. Daytoy ti mangipataw ti dakkel a responsabilidad kadagiti isuamin a dedikado nga ad-adipen ni Jehova.

6.Nupay no ti mensahetayo ti mabalin a nakasaksaknapen, apay a kasapulan ti intay panagtultuloy a mangasaba?

⁶ Pudno, mabalin a naikaskasabatayon a sisaksaknap ti naimbag a damag kadagiti luglugartayo. Ngem nagadu dagiti bambanag a mapaspasamak iti lubong nga uray pay no adu dagiti tattao ti nakangngegen iti mensahetayo, mabalin a di agbayag malipatandanto dayta no isardengtayo ti panangaskasaba. Panunotenyo dagiti rebolusion, ti ar-aramid dagiti terorista, welga, eskandalo, ken dadduma pay a paspasamak a nasaknap ti pannakaipablaakna. Nagadu met a langa dagiti popular a pabuya ken dadduma pay a pakariribukan. Masapul nga agtultuloytayo a mangikaskasaba tapno kanayon a maipasango ti mensahe kadagiti tattao agpapan pay amin dagitoy nagadu a mangal-ala iti atensionda.

7.Kasano a ti panagtignay dagiti adu itatta umas-asping kadagiti Israelitas iti panangipadto ni Isaias, ngem apay a di rebbeng a manglapped daytoy kadatayo iti panangasabatayo?

⁷ No adu dagiti di mangikankano kadatayo, laglagipentayo ti kita dagiti tattao a kinaskasabaan met ni mammadto nga Isaias. Kuna ni Jehova kenkuana: “Ta isu nasukir nga umili, annak a managulbod, annak a dida kayat a denggen ti linteg ni Jehova; isuda nga agkuna kadagiti makakita iti masakbayan, ‘Dikayo kumita,’ ken kadagiti mammadto, ‘Dikayo mangipadto kadakami kadagiti nalinteg a bambanag. Mangisawangkayo kadakami kadagiti naalumamay a bambanag; mangipadtokayo kadagiti al-allilaw. Baybay-anyo ti dalan; sinaanyo ti dana. Pasardengenyo ti kaadda ti Santo iti Israel iti sanguananmi.’” Nupay kasta, simamatalek nga imbaga ni Isaias kadagiti umili: “Ni Jehova isu ti Dios ti panangukom. Naragsak dagiti isuamin nga agpannuray kenkuana.” (Isaias 30:9-11, 18) Kasta met koma ti aramidentayo. Bayat ti panagtultuloytayo, ti mensahetayo ti umukuokto iti kalalainganna. Dadduma mangipangagda ken dadduma ti saan. Ngem amin addaanto ti gundaway a dumngeg.

‘Kasanonto ti Pannakangngegda?’

8.Nupay agparang a dagiti tattao bumusorda iti kinapudno, ania dagiti bambanag a mabalin a mamagbalbaliw iti is-isipda?

⁸ Nalabit patientayo a dagiti tattao iti maysa a teritoria ti nangalan iti piho a takderda ken determinadoda a mangilaksid iti mensahetayo wenno uray pay busoren dayta. Ngem laglagipenyo, ti kasasaad ti panagbiag dagiti tattao ti kankanayon nga agbaliwbaliw. Mabalin a naipasangoda iti baro a problema wenno baro a kasasaad inton bigat, sumaganad a lawas, wenno iti sumaganad a bulan nga isuntot’ mamagbalin iti panangawatda iti kinapudno. Mabalin a makangngegdanto kadagiti makariribuk a pasamak iti lubong wenno nalabit agsagabadanto iti rigat ti panagbiag, sakit, wenno ipapatay iti pamilia. Dagita a bambanag ti mangriingto kadakuada ket tarigagayandanto a maammuan ti makagapu kadagiti pagdukdukotanda. No itultuloytay ti panangaskasaba, mabalin a maammuandanto no sadino ti taliawanda.

9.Kasano a ti trabahotayo a panangasaba maiyarig kadagidiay manangisalbar iti lugar ti didigra?

⁹ Ti kasasaadtayo ti mabalin a maiyarig kadagiti tattao a tumultulong iti disso ti didigra, kas iti kalpasan ti maysa a ginggined. Dadduma ti mabalin nga agtartrabahoda idiay disso a sadiay sumagmamano laeng dagiti masarakan a nakalasat, ngem ti kinapudno a dagiti padada a trabahador ad-adut’ masarsarakanda a nakalasat iti sabali a lugar ket saan nga isut’ mamagtignay ti panagkapuyda ken panagsardengda. Imbes ketdi, amin dagiti trabahador a mangsalsalbar ti kasla awan bannogda nga agtultuloy uray pay no patienda nga awanen dagiti dadduma a nakalasat idiay naikeddeng a pasetda. Ket kalpasanna, no maminsan, makakitada pay iti sabali a nakalasat. Ti trabaho a panagsapul ti mapasardengto laengen inton naglabasen ti tiempo a mangipamatmat nga awanen ti panginanamaan. Bueno, ti panagsapsapultayo ket saan pay a napasardeng, ket kaskasdi a rinibribo pay dagiti masarsarakantayo a kayatda ti paalaw manipud iti daytoy daan a lubong ken mailasat “iti dakkel a rigat.” (Apocalipsis 7:9, 14) Uray pay kadagiti luglugar a nawanas un-unayen ken sadiay kaaduan a tattao ti saanen a dumngeg, kaskasdi nga adda pay met sumagmamano a resulta. Ken addada pay kanayonan a rason iti panangitultuloy ti panangasaba.

10.Kasano laeng nga ammo dagiti tattao no sadino ti pagturonganda no kayatda a sapulen ti kinapudno, sigun iti Roma 10:13, 14?

¹⁰ Kasapulan ti agtultuloy a pannakapalagip kadagiti tattao tapno “siasinoman nga umawagto iti nagan ni Jehova maisalakanto.” Nupay kasta, kas panangitultuloy ni Pablo iti suratna kadagiti taga Roma, “kasanonto ngarud ti panangawagda iti daydiay dida pinati? Ket kasano ti panamatidanto iti daydiay dida nangnangngeg? Ket kasanonto ti pannakangngegda, no awan ti mangaskasaba?” (Roma 10:13, 14) Dagitoy a sasao ti rebbeng a mangipasagepsep iti tunggal maysa kadatayo ti pannakasapul ti panagtultuloy iti panangikaskasaba ti naimbag a damag ti Pagarian ti Dios.

11.Ania a responsabilidad ti adda kadatayo maipaay kadagiti agtutubo a dumakdakkel iti kinanataengan?

¹¹ Bayat ti panagtultuloy ti panawen ti panungpalan, naipasngay dagiti annak ken dimmakkeldan iti kinanataengan wenno iti edad iti panangawat ti responsabilidad. Masansan dagitoy agtutubo a tattao saanda a mangipapaay iti aniaman nga atension iti kinapudno. Mabalin a dagiti nagannak kadakuada ti nangilaksid iti mensahe ken mabalin a nagsaoda pay ti maibusor iti dayta. Ngem itan dagitoy nga agtutubo nataengandan nga agpanunot a sisiserioso a maipaay kadagiti bagbagida maipapan kadagiti kasasaad ti lubong ken maipapan iti panggep ti panagbiagda. Uray isuda met kasapulan nga umawagda iti nagan ni Jehova no kayatda ti maisalakan. Ngem “kasanonto . . . ti panamatida iti daydiay dida nangnangngeg?” (Roma 10:14) Kadagiti adu a kaso dagitoy a tin-edyer ken dagiti agtutubo awatenda ti kinapudno, gapuna kasapulan ti intay panangsapul kadakuada ken panangasaba kadakuada.

12.Kasano a ti panagtultuloytayo iti panangaskasaba buklenna ti ebkas ti asi ni Jehova?

¹² Ti kinapudnona a ti dalan ket kaskasdi a silulukat a maipaay iti panangaskasaba ket ebkas ti kinamanangngaasi ni Jehova. Insurat ni apostol Pedro: “Saan a namayamay ni Jehova a maipapan iti karina, kas iti panangibilang dagiti dadduma iti kinabayag, no di ket agur-uray a siaanus gapu kadatayo a dina kayat a mapukaw ti uray siasino no di ket agturongda koma amin iti panagbabawi. Ket, ibilangyo a ti atiddog a panagitured ni Apotayo isu ti pakaisalakanan.” (2 Pedro 3:9, 15) Ti tarigagay ni Jehova nga amin a kita dagiti tattao maisalakanda ket ebkas saan laeng a ti siaanus a panangipalubosda iti panawen sakbay ti panangdusana no di ket kasta met ti agtultuloy nga iyaawagna kadagiti tattao nga agturong kenkuana ken maisalakan. (1 Timoteo 2:4) Bayat nga agtultuloytayo a mangikaskasaba iti naimbag a damag, itantandudotayo ti asi ti Dios, ket iti daytoy a pamay-an isu ti idaydayawtayo.

Liklikanyo ti Panagbasol iti Dara

13, 14.(a) Kasano a ti panangasabatayo maiyarig iti trabaho ti maysa a managbantay, kas nadakamat idiay padto ni Ezequiel? (b) Apay a maikuna ni Pablo nga isut’ ‘nadalus manipud dara ti isuamin a tattao,’ ket kasano laeng a maikuna dagiti Saksi ni Jehova daytoy itatta?

¹³ Ti responsabilidad dagiti dedikado a Saksi ni Jehova a mamakpakdaar kadagiti tattao maipapan iti um-umay a panangdusa ti Dios ti mabalin a maiyarig ken ni Ezequiel idi tiempona. Isut’ naituding nga agbantay iti balay ti Israel. Ti nakaitudinganna isut’ panangpakdaar kadagiti Israelitas nga um-umayen ti pannakadadaelda no saanda nga agbaw-ing manipud dakes nga ar-aramidda. No isu kas maysa nga agbantay saanna nga ited ti pammakdaar, kaskasdi nga umayto ti dusa iti ili a managdakdakes, ngem ti darada addanto iti ulo ti naliway a managbantay. Iti daytoy ipakpakita ni Jehova ti kababalinna maipapan iti panangdusa: “Awan ragsakko iti ipapatay ti nadangkes, no di ket ti nadangkes agbaw-ing koma iti dalanna, ket agbiag. Agbaw-ingkayo, agbaw-ingkayo kadagiti dakes a daldalanyo, ta apay a mataykayo, O balay ti Israel?”​—Ezequiel 33:1-11.

¹⁴ Binigbig ni apostol Pablo ti responsabilidadna kas maysa a managbantay, a kunkunana kadagiti panglakayen manipud Efeso: “Gapuna, ipaneknekko kadakayo itoy nga aldaw, nga awan pakatulawak maipuon iti dara dagiti amin a tao.” Apay a maikunana dayta? Ituloyna: “Ta saanko a binaybay-an ti panangipakaammo ti amin a bagbaga ti Dios.” (Aramid 20:26, 27) Kasta met iti klase managbantay itatta, ti natda kadagiti napulotan a paspasurot ni Jesu-Kristo. Amin dagitoy, agraman ti nasursurok ngem tallo a milion a kakaduada nga addaan namnama a makalasat iti panungpalan daytoy sistema dagiti bambanag ken umawatto ti biag nga agnanayon ditoy daga, ti masapul a saanda koma a kumapuy iti panangikaskasaba iti naimbag a damag ti Pagarian ti Dios ken ti panangpakdaar iti um-umay a panangibanagna iti panangdusana. Iti daytoy a pamay-an maliklikanda ti panagbasol iti dara.

15.Sigun iti Ezequiel kapitulo 9, asino dagiti natandaan, ket asino ti agmarmarka?

¹⁵ Ti trabaho a panangaskasaba itatta ti naisalaysay babaen iti padto idiay Ezequiel kapitulo 9. Ditoy, ti panangdusa ni Jehova ti naikeddengen a maipaay iti siudad ti Jerusalem. Sakbay ti pannakaibanag dayta a dusa, maysa a lalaki a sikakawes ti lienso ken addaan pagtinteroan ti mannurat iti siketna ti naibaga a lumasat iti siudad ket tandaanna ti mugmuging dagidiay amin nga agsensennaay gapu kadagiti makarimon a bambanag a maar-aramid sadiay. Idi nalpasen daytoy trabaho a panangtanda, amin nga adda iti siudad malaksid dagidiay natandaan a maipaay iti pannakailasat ket mapapatayda. Iti naballigi a pannakairingpas ti trabahona a panangtanda, kinuna ti lalaki: “Inaramidko a kas imbilinmo kaniak.” (Ezequiel 9:11) Simamatalek nga intungpalna ti naituding nga aramidna agingga iti panungpalan.

16.(a) Asino ti iladladawan ti lalaki a nakakawes ti lienso itatta? (b) Kasano a ti isyu iti pannakaalangon ti kinasoberano ni Jehova dagdagennatayo nga agtultuloy a mangaskasaba?

¹⁶ Ti lalaki a sikakawes ti lienso iladladawanna ti napulotan a natda kadagiti paspasurot ni Kristo, ket isuda ti kinaduaan ti “dakkel a bunggoy” dagiti “sabsabali a karnero.” Ti dakkel a salisal itatta, kas idi panawen ni Ezequiel, isu ti pannakaalangon ti kinasoberano ni Jehova. Maipapan iti panungpalan daytoy agdama a dakes a sistema dagiti bambanag inton gubat ti dakkel nga aldaw ti Dios a Mannakabalin-amin, kuna ni Jehova: “Ket dagiti nasnasion mabigbigdanto a siak ni Jehova.” (Apocalipsis 7:9; Juan 10:16; Ezequiel 39:7) Tapno maammuan daytoy dagiti nasnasion, inkapilitan a dagiti ad-adipen ni Jehova ditoy daga agtultuloyda a mangikaskasaba ti nagan ken pangpanggepna kas maysa a saksi kadagiti isuamin a nasnasion.

17, 18.(a) Kasano a ti panagtultuloytayo a mangaskasaba tulongannatayo a mangsalimetmet iti kinamanagbantaytayo? (b) Ania a report ti kayattay amin nga aramiden inton iyegnan ti panungpalan ti panangaskasaba, ket kasanotay laeng a maaramidan daytoy?

¹⁷ Babaen ti panagtultuloy a mangikaskasaba ti naimbag a damag ti Pagarian, mataginayontayo met ti mismo a kinamanagbantaytayo. Silalagiptayo a kanayon iti pateg ti nagan ken panggep ni Jehova. No kumapuytayo, mabalin a kumapuy ti pananginanamatayo iti Pagarian ket maiyanudtayo babaen kadagiti “ag-agawa ken gamgameng ken ragragsak daytoy a biag . . . ket awan iyegda iti kinaan-anay.” (Lucas 8:14) Babaen ti sireregta a panagtultuloy iti panangiwarwaragawag “ti naimbag a damag,” simamatalek a sursurotentayo ti bilbilin ti Apotayo, ni Jesu-Kristo: “Agtalinaedkayo a sisisiput, agsalukagkayo a kanayon, ta dikay ammo ti naituding a tiempo. Ket ti kunak kadakayo kunak kadagiti isuamin, Agsalukagkayo.”​—Marcos 13:10, 33, 37.

¹⁸ Ngarud, datay amin, agtultuloytayo a sapulen ‘dagidiay agsensennaay’ agingga nga ipalubos ni Jehova ti tiempo nga agpaay iti dayta. Sapay koma ta amintayo, napulotan a natda man wenno “sabsabali a karnero,” agmatalek a mangitungpal iti daytoy a naituding a trabahotayo a panangikasaba ti naimbag a damag ti Pagarian iti isuamin a mapagnaedan a daga kas maysa a pammaneknek iti isuamin a nasnasion. (Mateo 24:14) Inton ni Jehova a mismo iyegnan ti panagpatingga daytoy a trabaho babaen ti panangrugi “ti dakkel a rigat,” sapay koma ta tunggal maysa kadatayo maikunananto ken Jehova, ‘Inaramidmi a kas imbilinmo kadakami.’

Malagipyo Aya?

◻ Ania ti ipamatmat dagiti resulta maipapan iti panangaskasabatayo?

◻ Ania dagiti dadduma a rason no apay rebbeng nga itultuloytayo ti panangaskasaba?

◻ Kasano a ti panangaskasabatayo ket ebkas iti asi ni Jehova?

◻ Kasanotay nga agtalinaed a nadalus manipud dara ti isuamin a tattao?

◻ Kasano a ti panangaskasaba tulongannatayo nga agtultuloy a sisasalukag?

[Tsart iti panid 28]

DAGITI RESULTA ITI PANANGASABA ITI LAS-UD TI PITO A TAWEN

Dagiti Nabautisaran Timmabuno ti Memorial Bilang Panangiyadal ti Biblia

1981 119,836 5,987,893 1,475,177

1982 138,540 6,252,787 1,586,293

1983 161,896 6,767,707 1,797,112

1984 179,421 7,416,974 2,047,113

1985 189,800 7,792,109 2,379,146

1986 225,868 8,160,597 2,726,252

1987 230,843 8,965,221 3,005,048