Dagiti Saludsod Manipud Kadagiti Managbasa
◼ Apay a ti Un-unnoy 4:10 tukoyenna dagiti inna a nangsida kadagiti annakda met laeng kas “dagiti naasi a babbai”?
Iti panangsalaysayna ti nakaayay-ay a kasasaad dagiti Judio bayat ti pananglakub ti Babilonia iti Jerusalem idi 607 K.K.P, insurat ni Jeremias: “Dagiti im-ima dagiti naasi a babbai linutoda dagiti annakda met laeng. Isuda idi ti taraonda iti pannakarbek ti anak a babai ti ilik.”—Un-unnoy 4:10.
Adu a siglo sakbayna, pinakdaaran ni Moises dagiti Israelitas a ti masanguananda matandaanto ti “bendision” wenno “lunod.” Lak-amendanto dagiti bendision no salimetmetanda ti bilbilin ti Dios, ngem agsagabadanto no laksidenda dagiti nalinteg a daldalanna. Maysa kadagiti nakabutbuteng a bunga a ta dagiti Israelitas agtungpaldanto a mangsida kadagiti annakda a mismo. (Deuteronomio 28:1, 11-15, 54, 55; Levitico 26:3-5, 29) Aktual a napasamak daytoy kalpasan ti panangiwaksi ni Jehova iti awanan-pammati, nasukir a nasion iti im-ima dagiti taga Babilonia.
Idiay Un-unnoy 4:10 dinakamat ni mammadto Jeremias ti di mailibak a kinapudno a ti ina ket nainkasigudan a nadungngo, manangngaasi, ken manangsalaknib kadagiti annakna. (1 Ar-ari 3:26, 27; 1 Tesalonica 2:7) Kaskasdi, ti bisin idiay nalakub a Jerusalem ket nakaro unay ket ti imbungana a panagbisin ti napilit unay a dagiti inna a dati a manangngaasi liningtada ken kas asuang a kinnanda dagiti annakda.—Idiligyo ti Un-unnoy 2:20.
Ti umas-asping a situasion ti napasamak kadagiti Judio a nangilaksid iti Mesias, a namakdaar maipapan iti mapasungad a pannakalakub ti Jerusalem. (Mateo 23:37, 38; 24:15-19; Lucas 21:20-24) Inladawan ni historiador a Josephus ti maysa kadagiti nakabutbuteng a pasamak iti pannakalakub idi 70 K.P.: “Ni Maria nga anak ni Eleazar . . . pinatayna ti anakna a lalaki, kalpasanna tinunona ket kinnanna ti kaguduana, inlemmengna ken indulinna ti dadduma.”—The Jewish War, impatarus ni G. A. Williamson, kapitulo 20, panid 319.
Pudno unay, ti panangtallikud iti linlinteg ti Dios saan a kurso ti kinasirib.