Nakasaganakayo Kadin Maipaay iti Aldaw ni Jehova?

“Ti dakkel nga aldaw ni Jehova asideg, isu asideg ken napardas unay.”​—SOFONIAS 1:14.

1. Kasanot’ panangdeskribir ti Kasuratan iti aldaw ni Jehova?

DANDANIN dumteng ti “dakkel ken nakakigkigtot nga aldaw” ni Jehova iti daytoy dakes a sistema ti bambanag. Deskribiren ti Kasuratan ti aldaw ni Jehova kas maysa a gubat, kinasipnget, pungtot, riribuk, rigat, panagbuak, ken pannakalangalang. Ngem addanto makalasat, ta “uray siasino nga umawagto iti nagan ni Jehova, maisalakanto.” (Joel 2:30-32; Amos 5:18-20) Wen, dadaelento ti Dios dagiti kabusorna ken isalakanna ti ilina.

2. Apay a rumbeng a mariknatayo ti kinaganat iti aldaw ni Jehova?

² Narikna dagiti mammadto ti Dios ti kinaganat iti aldaw ni Jehova. Kas pagarigan, insurat ni Sofonias: “Ti dakkel nga aldaw ni Jehova asideg, isu asideg ken napardas unay.” (Sofonias 1:14) Ad-adda a naganat ti kasasaad ita gapu ta ti Kangrunaan a Manangikisap ti Dios, ti Ari a ni Jesu-Kristo, dandaninan ‘ibarikes ti kampilanna iti luppona ket agsakay gapu iti pudno ken kinaemma ken kinalinteg.’ (Salmo 45:3, 4) Nakasaganakayo kadin maipaay iti dayta nga aldaw?

Dakkel Dagiti Ninamnamada

3. Ania dagiti ninamnama ti dadduma a Kristiano a taga-Tesalonica, ken ania dagiti dua a rason a dida natarusan?

³ Adu ti naaddaan kadagiti inanama a di natungpal maipapan iti aldaw ni Jehova. Kinuna ti dadduma a nagkauna a Kristiano idiay Tesalonica, “ti aldaw ni Jehova ket dimtengen!” (2 Tesalonica 2:2) Ngem adda dua a kangrunaan a rason no apay a saan pay idi a dimteng dayta. Iti panangdakamatna iti maysa kadagitoy, naikuna ni apostol Pablo: “Inton sasawenda: ‘Talna ken talged!’ iti kasta giddato nga umayto kadakuada ti kellaat a pannakadadael.” (1 Tesalonica 5:1-6) Iti daytoy “panawen ti panungpalan,” ur-urayentay a mismo ti kaitungpalan dagidiay a sao. (Daniel 12:4, NW) Awanan met idi dagiti taga-Tesalonica iti sabali pay a pammaneknek a dimtengen ti dakkel nga aldaw ni Jehova, ta kinuna ni Pablo kadakuada: “Saanto nga umay malaksid no dumteng nga umuna ti panagapostasia.” (2 Tesalonica 2:3) Idi insurat ni Pablo dagidiay a sao (agarup 51 K.P.), saan pay a naan-anay a timmanor “ti panagapostasia” manipud iti pudno a Kinakristiano. Ita, makitatay ti naan-anay nga itatanorna iti Kakristianuan. Nupay kasta, iti laksid dagiti di natungpal a ninamnamada, dagidiay a matalek a napulotan idiay Tesalonica, a simamatalek a nagserserbi iti Dios agingga ken patay, idi agangay inawatda ti nailangitan a gunggona. (Apocalipsis 2:10) Magunggonaantay met no agmatalektayo bayat nga ur-urayentayo ti aldaw ni Jehova.

4. (a) Aniat’ nainaig iti aldaw ni Jehova iti 2 Tesalonica 2:1, 2? (b) Aniat’ panangmatmat dagiti masasao nga Amma ti Iglesia maipapan iti panagsubli ni Kristo ken dagiti nainaig a bambanag?

⁴ Inaig ti Biblia “ti dakkel nga aldaw ni Jehova” iti “kaadda ni Apotayo a Jesu-Kristo.” (2 Tesalonica 2:1, 2) Dagiti masasao nga Amma ti Iglesia addaanda iti nadumaduma a kapanunotan maipapan iti panagsubli ni Kristo, ti kaaddana, ken ti Sangaribu a Tawen a Panagturayna. (Apocalipsis 20:4) Idi maikadua a siglo K.P., ninamnama ni Papias ti Hierapolis ti nakaskasdaaw a kinabunga ti daga kabayatan ti Milenio a Panagturay ni Kristo. Maulit-ulit a dinakamat ni Justin Martyr ti maipapan iti kaadda ni Jesus ken ninamnamana ti naisubli a Jerusalem a pagsaadan ti Pagarianna. Insuro ni Irenæus ti Lyons a kalpasan ti pannakadadael ti Imperio ti Roma, agparangto ni Jesus, parautanna ni Satanas, ken agturay iti naindagaan a Jerusalem.

5. Aniat’ kinuna ti sumagmamano nga eskolar maipapan iti “Maikadua nga Iyaay” ni Kristo ken ti Milenio a Panagturayna?

⁵ Kinuna ni historiador a Philip Schaff a “ti kangrunaan a punto” iti kasakbayan ti Konsilio ti Nicaea idi 325 K.P. ket “ti pammati maipapan iti makita a panagturay ni Kristo iti kinadayag ditoy daga a kaduana dagiti napagungar a sasanto iti sangaribu a tawen, sakbay ti sapasap a panagungar ken panangukom.” Ti A Dictionary of the Bible, a rinebisar ni James Hastings, kunana: “Da Tertullian, Irenæus, ken Hippolytus mangnamnamada pay laeng iti umad-adanin nga Iyaay [ni Jesu-Kristo]; ngem iti kaadda dagiti Alejandrino nga Amma sumrektayo iti baro a kapanunotan. . . . Iti panangipadis ni Augustine iti Milenio iti panawen dagiti militante iti Iglesia, naitantan ti Maikadua nga Iyaay iti adayo a masanguanan.”

Ti Aldaw ni Jehova ken ti Kaadda ni Jesus

6. Apay a ditay koma ipapan nga adayo pay ti aldaw ni Jehova?

⁶ Dagiti di umiso a kapanunotan nangituggod iti pannakaupay, ngem ditay koma ipapan nga adayo pay ti aldaw ni Jehova. Nangrugin ti di makita a kaadda ni Jesus, a sigun iti Kasuratan nainaig iti dayta ti aldaw ni Jehova. Ti Pagwanawanan ken dagiti mainaig a publikasion dagiti Saksi ni Jehova masansan a mangipaay iti Nainkasuratan a pammaneknek a nangrugi ti kaadda ni Kristo idi tawen 1914.a No kasta, ania ti kinuna ni Jesus maipapan iti kaaddana?

7. (a) Ania ti dadduma a paset ti pagilasinan ti kaadda ni Jesus ken ti panungpalan ti sistema ti bambanag? (b) Kasanotayo a maisalakan?

⁷ Napagsasaritaan idi ti kaadda ni Jesus sakbay la unay ti ipapatayna. Kalpasan a nangngegda ti panangipadtona iti pannakadadael ti templo ti Jerusalem, nagimtuod dagiti apostolna a da Pedro, Santiago, Juan, ken Andres: “Kaanonto a mapasamak dagitoy a bambanag, ket anianto ti pagilasinan ti kaaddam ken ti panungpalan ti sistema ti bambanag?” (Mateo 24:1-3; Marcos 13:3, 4) Kas sungbatna, impadto ni Jesus dagiti gubat, bisin, ginggined, ken dadduma pay a paset “ti pagilasinan” ti kaaddana ken ti panungpalan ti sistema ti bambanag. Kinunana pay: “Ti nakapagibtur agingga iti panungpalan isunto ti maisalakan.” (Mateo 24:13) Maisalakantayo no simamatalek nga agibturtayo agingga iti panungpalan ti agdama a biagtayo wenno iti panungpalan daytoy dakes a sistema.

8. Sakbay ti panagpatingga ti Judio a sistema, aniat’ masapul idi a mairingpas, ken aniat’ maar-aramid ita maipanggep iti daytoy?

⁸ Sakbay ti panungpalan, matungpal ti nangnangruna a napateg a paset ti kaadda ni Jesus. Maipapan iti dayta, kinunana: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.” (Mateo 24:14) Sakbay a dinadael dagiti Romano ti Jerusalem ken nagpatingga ti Judio a sistema ti bambanag idi 70 K.P., maikuna ni Pablo a ti naimbag a damag “naikaskasaba kadagiti isuamin a parsua nga adda iti baba ti langit.” (Colosas 1:23) Nupay kasta, ar-aramiden ita dagiti Saksi ni Jehova ti nasaksaknap nga amang a panangasaba “iti isuamin a mapagnaedan a daga.” Kadagiti kallabes a tawen, linuktan ti Dios ti dana iti naindaklan a panangasaba idiay Makindaya a Europa. Gapu kadagiti pagimprentaan ken dadduma pay a pasilidad iti sangalubongan, sisasagana ti organisasion ni Jehova para iti naparang-ay nga aktibidad, uray iti “di naasak a teritoria.” (Roma 15:22, 23) Tignayennakay kadi ti pusoyo a mangaramid iti amin a kabaelanyo a mangasaba sakbay nga umay ti panungpalan? No kasta, mapabilegnakayo ti Dios a maaddaan iti makagunggona a pannakiraman iti trabaho nga adda iti masanguanan.​—Filipos 4:13; 2 Timoteo 4:17.

9. Aniat’ imbatad ni Jesus, kas nailanad iti Mateo 24:36?

⁹ Matungtungpal itan ti naipadto a trabaho a panangikasaba iti Pagarian ken dadduma pay a paset ti pagilasinan ti kaadda ni Jesus. Gapuna, dandanin agpatingga daytoy dakes a sistema ti bambanag. Pudno, kinuna ni Jesus: “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama.” (Mateo 24:4-14, 36) Ngem matulongannatayo ti padto ni Jesus nga agbalin a sisasagana iti “dayta nga aldaw ken oras.”

Nakasaganada

10. Kasanotayo nga ammo a posible ti agtalinaed a siririing iti naespirituan?

¹⁰ Tapno makalasat iti dakkel nga aldaw ni Jehova, masapul a siririingtayo iti naespirituan ken agtakder a sititibker maipaay iti pudno a panagdayaw. (1 Corinto 16:13) Ammotayo a posible ti kasta a panagibtur, ta naaramidan dayta ti managbuteng iti Dios a pamilia ket nalasatanda ti Layus a nangdadael kadagiti nadangkes a tattao idi 2370 K.K.P. Iti panamagdiligna iti dayta a panawen ken ti kaaddana, kinuna ni Jesus: “Kas iti kaaldawan idi ni Noe, kastanto ti kaadda ti Anak ti tao. Ta kas kadakuada idi kadagidiay nga al-aldaw kasakbayan ti layus, a mangmangan ken umin-inumda, mangas-asawa dagiti lallaki ken maiyas-asawa dagiti babbai, agingga iti aldaw a ni Noe simrek iti daong; ket dida nangikankano agingga a ti layus immay ket inyanudna amin ida, kastanto ti kaadda ti Anak ti tao.”​—Mateo 24:37-39.

11. Aniat’ inaramid ni Noe iti laksid ti kinaranggas a mapaspasamak idi kaaldawanna?

¹¹ Kas kadatayo, nagbiag ni Noe ken ti pamiliana iti naranggas a lubong. Naglasag dagiti nasukir nga angheliko a “lallaki nga annak ti Dios” ken nangalada kadagiti assawa a nangputotanda kadagiti nadangkok a Nefilim​—dagiti butangero a sigurado a namagbalin kadagiti kasasaad nga ad-adda a naranggas. (Genesis 6:1, 2, 4; 1 Pedro 3:19, 20) Nupay kasta, “nakipagna ni Noe iti Dios” a buyogen ti pammati. “Nalinteg ken naan-anay kadagiti kaputotanna”​—ti nadangkes a kaputotan idi kaaldawanna. (Genesis 6:9-11) Buyogen ti panagpannuray iti Dios iti kararag, maaramidantay met ti kasta iti daytoy naranggas ken nadangkes a lubong bayat nga ur-urayentayo ti aldaw ni Jehova.

12. (a) Malaksid iti panagbangon iti daong, ania a trabaho ti inaramid ni Noe? (b) Kasanot’ panagtignay dagiti tao iti panangasaba ni Noe, ket aniat’ nagbanaganda?

¹² Nalatak ni Noe kas ti nangibangon iti daong a nakaispalan ti biag kabayatan ti Layus. Nagbalin met a “manangaskasaba iti kinalinteg,” ngem ‘di nangikankano’ dagiti kasadaranna iti inted-Dios a mensahena. Nangnangan ken nagiinumda, nagaassawa, nagpamilia, ken intultuloyda ti normal a panagbiagda agingga a nayanudda amin iti Layus. (2 Pedro 2:5; Genesis 6:14) Dida kinayat a denggen ti maipapan iti nalinteg a sasao ken kababalin, a kas met ti di panangipangag ti agdama a nadangkes a kaputotan iti ibagbaga dagiti Saksi ni Jehova maipapan iti “panagbabawi iti Dios,” pammati ken Kristo, kinalinteg, ken “iti pannakaukom nga umayto.” (Aramid 20:20, 21; 24:24, 25) Awan magun-odan a rekord no mano a tao ti agbibiag ditoy daga idi ipakpakaammo ni Noe ti mensahe ti Dios. Ngem maysa a banag ti sigurado, gistay naikisap ti populasion ti daga idi 2370 K.K.P.! Inkisap ti Layus dagiti nadangkes, a dagidiay laeng sisasagana iti dayta nga aramid ti Dios ti imbatina​—ni Noe ken ti pito a sabsabali pay iti pamiliana.​—Genesis 7:19-23; 2 Pedro 3:5, 6.

13. Ania a hudisial a pangngeddeng ti nagtalkan a naan-anay ni Noe, ket kasano a nagtignay maitunos iti daytoy?

¹³ Saan nga impakpakauna ti Dios ken ni Noe iti adu a tawen ti maipapan iti eksakto nga aldaw ken oras ti Layus. Nupay kasta, idi agtawen ni Noe iti 480, inkeddeng ni Jehova: “Ti espirituk saanto a kankanayon a mangbabalaw iti tao, ta isu ngarud linalasag: nupay kasta dagitinto aldawna sangagasut ket duapulo a tawen.” (Genesis 6:3) Nagtalek a naan-anay ni Noe iti daytoy hudisial a pangngeddeng ti Dios. Idi agtawenen iti 500, “pinutotna ni Sem, ni Cam, ken ni Jafet,” ket ti kustombre kadagidi nga aldaw ipaspasimudaagna a 50 agingga iti 60 a tawen ti napalabas sakbay a nangasawa dagiti annakna. Idi naibaga ken Noe a bangonenna ti daong a pakaisalakanan iti Layus, nabatad a timmulong kenkuana dagidiay nga annak ken dagiti assawada iti dayta a trabaho. Di pagduaduaan a naigiddan ti pannakaibangon ti daong iti panagserbi ni Noe kas “maysa a manangaskasaba iti kinalinteg,” a namagbalin kenkuana nga okupado iti naudi nga 40 agingga iti 50 a tawen sakbay ti Layus. (Genesis 5:32; 6:13-22) Kadagidiay a tawtawen, nagtignayda a sangapamiliaan buyogen ti pammati. Ipakitatay met ti pammati bayat nga ikasabatayo ti naimbag a damag ken ur-urayentayo ti aldaw ni Jehova.​—Hebreo 11:7.

14. Aniat’ imbaga ni Jehova ken ni Noe idi agangay, ken apay?

¹⁴ Idi dandanin malpas ti daong, nalabit pinampanunot ni Noe a dandanin ti Layus, nupay dina ammo nga eksakto no kaano a mapasamak. Idi agangay imbaga ni Jehova kenkuana: “Apaman a mapalabes ti pito nga aldaw, siak pagtuduekto iti rabaw ti daga kadagiti uppat a pulo nga aldaw ken uppat a pulo a rabii.” (Genesis 7:4) Nangted dayta iti umdas a panawen a panangiserrek ni Noe ken ti pamiliana kadagiti amin a kita ti animal iti daong ken makastrekda a mismo sakbay a nangrugi ti Layus. Saan a kasapulan a maammuantayo ti aldaw ken oras a panangrugi ti pannakadadael daytoy a sistema; saan a naitalek kadatayo ti pannakaisalakan dagiti animal, ket dagiti tao a manamnama a makalasat sumsumrekdan iti simboliko a daong, ti naespirituan a paraiso ti ili ti Dios.

“Agtultuloykayo nga Agbantay”

15. (a) Iti bukodyo a sasao, kasanoyo nga ilawlawag ti sasao ni Jesus a masarakan iti Mateo 24:40-44? (b) Aniat’ epektona ti saantay a pannakaammo iti eksakto a panawen nga iyaay ni Jesus a mangiwayat iti pammales ti Dios?

¹⁵ Maipapan iti kaaddana, inlawlawag ni Jesus: “Iti kasta dua a lallaki ti addanto [nga agtartrabaho] iti talon: maysa ti maalanto a maikuyog ket ti sabali mabaybay-an; dua a babbai ti aggilgilingto [iti bukbukel a pagbalinenda a bellaay] iti paggilingan babaen iti ima: maysa ti maalanto a maikuyog ket ti sabali mabaybay-an. Agtultuloykayo nga agbantay, ngarud, agsipud ta dikay ammo no iti ania nga aldaw nga umay ti Apoyo. Ngem ammuenyo ti maysa a banag, a no ti bumalay naammuanna koma no iti ania a panagbantay nga umay idi ti mannanakaw, nagtultuloy koma a siririing ket dina impalubos a maserrek ti balayna. Gapu itoy dakayo met paneknekanyo a sisasaganakayo, agsipud ta iti oras a dikay ipagarup nga isu dayta, ti Anak ti tao umay.” (Mateo 24:40-44; Lucas 17:34, 35) Ti saantay a pannakaammo iti eksakto nga iyaay ni Jesus a mangiwayat iti pammales ti Dios pagridamennatayo ken ikkannatayo iti inaldaw a gundaway a mangpaneknek a pagserbiantayo ni Jehova buyogen ti nadalus a motibo.

16. Aniat’ mapasamak kadagiti tattao a “mabaybay-an” ken dagidiay “maala a maikuyog”?

¹⁶ Karaman kadagiti “mabaybay-an” a madadael a maikanunong kadagiti nadangkes dagidiay dati a nalawlawagan ngem naigamer iti inaagum a panagbiag. Sapay koma ta mairamantayo kadagiti “maalanto a maikuyog,” dagidiay naan-anay ti debosionda ken Jehova ken pudno nga agyamyaman gapu kadagiti naespirituan a probisionna baeten “ti matalek ken masirib nga adipen.” (Mateo 24:45-47) Agingga iti panungpalan, pagserbiantay ti Dios buyogen ti “ayat manipud iti maysa a nadalus a puso ken manipud iti maysa a naimbag a konsiensia ken manipud iti pammati nga awanan panaginsisingpet.”​—1 Timoteo 1:5.

Nasken Dagiti Nasantuan nga Aramid

17. (a) Aniat’ naipadto iti 2 Pedro 3:10? (b) Aniat’ sumagmamano kadagiti aramid ken gapuanan nga imparegta ti 2 Pedro 3:11?

¹⁷ Insurat ni apostol Pedro: “Ti aldaw ni Jehova umayto a kasla mannanakaw, nga iti dayta ti langlangit aglabasdanto buyogen ti sumayetset a daranudor, ngem dagiti elemento gapu ta nakabarbarada unay marunawdanto, ket ti daga ken ti ar-aramid nga adda kenkuana matakuatanto.” (2 Pedro 3:10) Dagiti simboliko a langit ken daga didanto malasatan ti pudot ti sumsumged a pungtot ti Dios. Gapuna inayon ni Pedro: “Yantangay isuamin dagitoy a bambanag marunawdanto a kasta, ania a kita ti tattao ti rebbeng koma a pagbalinanyo kadagiti nasantuan a panagbibiag ken ar-aramid ti nadiosan a debosion!” (2 Pedro 3:11) Ti regular a kaadda kadagiti Nakristianuan a gimong, panagaramid iti naimbag kadagiti sabsabali, ken nabagas a pannakiraman iti panangikasaba iti naimbag a damag ket karaman kadagitoy a gapuanan ken aramid.​—Mateo 24:14; Hebreo 10:24, 25; 13:16.

18. No mapatpatanortayo ti kinasinged iti lubong, aniat’ rumbeng nga aramidentayo?

¹⁸ Dagiti “nasantuan a panagbibiag ken ar-aramid ti nadiosan a debosion” kalikagumanna a ‘pagtalinaedentayo ti bagitayo nga awanan mulit manipud iti lubong.’ (Santiago 1:27) Ngem ania ngay no mapatpatanortayo ti kinasinged iti daytoy a lubong? Nalabit masulsulisogtayo iti napeggad a kasasaad iti imatang ti Dios babaen ti pannakiraman iti narugit a paglinglingayan wenno panagdengngeg iti musika ken kankanta a mangitantandudo iti dakes nga espiritu daytoy a lubong. (2 Corinto 6:14-18) No kasta ti kasasaad, agpatulongtayo iti Dios iti kararag tapno saantay a mapukaw a maikanunong iti lubong no di ket makapagtakdertayo a naanamongan iti sanguanan ti Anak ti tao. (Lucas 21:34-36; 1 Juan 2:15-17) No nakapagdedikartayon iti Dios, sigurado a kayattay nga aramiden ti amin a kabaelantayo a mangpatanor ken mangtaginayon iti nabara a pannakirelasion kenkuana ket iti kasta sisasaganatayo iti dakkel ken nakakigkigtot nga aldaw ni Jehova.

19. Apay a mangnamnama ti bunggoy dagiti manangiwaragawag iti Pagarian a makalasatda iti panungpalan daytoy dakes a sistema ti bambanag?

¹⁹ Nalasatan ni managbuteng iti Dios a Noe ken ti pamiliana ti Layus a nangdadael iti kadaanan a lubong. Nakalasat dagiti nalinteg a tattao iti panungpalan ti Judio a sistema ti bambanag idi 70 K.P. Kas pagarigan, aktibo pay laeng ni apostol Juan iti panagserbi iti Dios idi agarup 96-98 K.P., idi insuratna ti libro nga Apocalipsis, ti salaysayna iti Ebanghelio, ken tallo a naipaltiing a suratna. Kadagiti rinibu a nangabrasa iti pudno a pammati idi Pentecostes 33 K.P., nalabit adu ti nakalasat iti panungpalan ti Judio a sistema. (Aramid 1:15; 2:41, 47; 4:4) Ita mangnamnama ti bunggoy dagiti manangiwaragawag iti Pagarian a makalasatda iti panungpalan ti agdama a dakes a sistema ti bambanag.

20. Apay a rumbeng a naregtatayo a “manangaskasaba iti kinalinteg”?

²⁰ Yantangay adda iti masanguanantayo ti pannakaisalakan nga agturong iti baro a lubong, agbalintay koma a naregta a “manangaskasaba iti kinalinteg.” Anian a pribilehio ti agserbi iti Dios kadagitoy maudi nga al-aldaw! Ken anian a rag-o ti mangiturong kadagiti tao iti agdama-aldaw a “daong,” ti naespirituan a paraiso a tagtagiragsaken ti ili ti Dios! Sapay koma ta agtalinaed a matalek dagiti minilion nga adda iti dayta, siririing iti naespirituan, ken sisasagana iti dakkel nga aldaw ni Jehova. Ngem ania ti tumulong kadatayo amin tapno makapagtalinaed a siririing?

[Footnote]

Kasanoyo a Sungbatan?

◻ Aniat’ ninamnama dagiti dadduma maipapan iti aldaw ni Jehova ken kaadda ni Kristo?

◻ Apay a maikunatayo a nakasagana ni Noe ken ti pamiliana iti Layus?

◻ Aniat’ mapasamak kadagidiay ‘agtultuloy nga agbantay’ ken kadagidiay saan?

◻ Apay a nasken ti nasantuan nga ar-aramid, nangnangruna bayat nga umad-adanitayo iti dakkel nga aldaw ni Jehova?