No Kasano a Dagiti Sasao ni Jesus Mangyegda iti Kinaragsak
“[Ni Jesus] simmang-at idiay bantay; ket . . . immay kenkuana dagiti adalanna; ket . . . inrugina nga insuro ida.”—Mat. 5:1, 2.
1, 2. (a) Ania dagiti kasasaad idi impalawag ni Jesus ti Sermonna iti Bantay? (b) Kasano nga inrugi ni Jesus ti palawagna?
TAWEN 31 K.P. idi. Insardeng biit ni Jesus ti panangasabana idiay Galilea tapno makipagrambak iti Paskua idiay Jerusalem. (Juan 5:1) Idi nagsubli idiay Galilea, nagpatnag a nagkararag tapno iwanwan ti Dios iti panangpilina iti 12 nga apostolna. Kabigatanna, adda bunggoy a naguummong bayat a pinaimbag ni Jesus dagiti masakit. Kaduana dagiti adalanna ken ti dadduma pay, nagtugaw iti bantay ket rinugianna nga isuro ida.—Mat. 4:23–5:2; Luc. 6:12-19.
2 Inrugi ni Jesus ti palawagna—ti Sermon iti Bantay—babaen ti panangipakitana a ti kinaragsak ket resulta ti nasayaat a relasion iti Dios. (Basaen ti Mateo 5:1-12.) Ti kinaragsak ket ‘maysa a nasayaat a kasasaad nga aggubuay manipud iti pannakarikna iti pannakapnek agingga iti napalaus a rag-o.’ Dagiti siam a kinaragsak a dinakamat ni Jesus itampokna no apay a naragsak dagiti Kristiano, ken makagunggona dagitoy a sasao ita no kasano a nakagunggonada dandani 2,000 a tawen ti napalabasen. Usigentayo itan ti tunggal maysa kadagita.
“Dagidiay Sipapanunot iti Naespirituan a Kasapulanda”
3. Ania ti kayat a sawen ti panagbalin a sipapanunot iti naespirituan a kasapulantayo?
3 “Naragsak dagidiay sipapanunot iti naespirituan a kasapulanda, yantangay kukuada ti pagarian ti langlangit.” (Mat. 5:3) “Dagidiay sipapanunot iti naespirituan a kasapulanda” bigbigenda a napanglawda iti naespirituan ken kasapulanda ti asi ti Dios.
4, 5. (a) Apay a naragsak dagidiay sipapanunot iti naespirituan a kasapulanda? (b) Kasano a mapennek ti naespirituan a kasapulantayo?
4 Naragsak dagidiay sipapanunot iti naespirituan a kasapulanda “yantangay kukuada ti pagarian ti langlangit.” Gapu ta dagiti nagkauna nga adalanna inawatda ni Jesus kas Mesias, naaddaanda iti gundaway a makipagturay kenkuana iti nailangitan a Pagarian ti Dios. (Luc. 22:28-30) Ti namnamatayo man ket makipagturay ken Kristo idiay langit wenno agbiag nga agnanayon iti paraiso a daga iti sidong ti turay ti Pagarian, naragsaktayo no pudno a sipapanunottayo iti naespirituan a kasapulantayo ken naan-anay a bigbigentayo nga agpannuraytayo iti Dios.
5 Saan nga amin ket sipapanunot iti naespirituan a kasapulanda gapu ta adu ti awanan iti pammati ken di mangapresiar kadagiti sagrado a bambanag. (2 Tes. 3:1, 2; Heb. 12:16) Mapennek ti naespirituan a kasapulantayo babaen ti napasnek a panagadal iti Biblia, naregta a pannakipaset iti trabaho a panagaramid iti adalan, regular nga itatabuno kadagiti Nakristianuan a gimong, ken dadduma pay.—Mat. 28:19, 20; Heb. 10:23-25.
Dagiti Agledleddaang a “Naragsak”
6. Siasino “dagidiay agleddaang,” ken apay a ‘naragsakda’?
6 “Naragsak dagidiay agleddaang, yantangay maliwliwadanto.” (Mat. 5:4) “Dagidiay agleddaang” ket kapadada “dagidiay sipapanunot iti naespirituan a kasapulanda.” Agledleddaangda saan a gapu ta ay-ayenda ti kasasaad ti panagbiagda no di ket gapu ta ammoda a managbasolda ken gapu kadagiti agdama a kasasaad a resulta ti kinaimperpekto ti tao. Apay ngarud a “naragsak” dagita nga agledleddaang? Gapu ta adda pammatida iti Dios ken ni Kristo ken maliwliwada iti pannakaammo nga adda nasayaat a relasionda ken Jehova.—Juan 3:36.
7. Ania ti rumbeng a panangmatmattayo iti lubong ni Satanas?
7 Agledleddaangtayo kadi met gapu iti agraraira a kinadakes iti lubong ni Satanas? Ania a talaga ti panangmatmattayo iti daytoy a lubong? Insurat ni apostol Juan: “Amin a banag iti lubong—ti derrep ti lasag ken ti derrep dagiti mata ken ti panangiparammag iti sanikua a pagbiag ti maysa—saan nga agtaud iti Ama.” (1 Juan 2:16) Ngem no ngay mariknatayo a ti espiritualidadtayo ket maim-impluensiaanen iti “espiritu ti lubong,” ti nabileg a puersa a mangkonkontrol iti natauan a kagimongan a naisina iti Dios? No kasta, sipapasnek nga agkararagtayo, agadal iti Sao ti Dios, ken agpatulong kadagiti panglakayen. Bayat a sumingsingedtayo ken Jehova, ‘makasaraktayo iti liwliwa’ aniaman ti pakaigapuan ti panagleddaangtayo.—1 Cor. 2:12; Sal. 119:52; Sant. 5:14, 15.
Anian a Nagragsak “Dagiti Naalumamay ti Kababalinda”!
8, 9. Ania ti kayat a sawen ti panagbalin a naalumamay, ken apay a naragsak dagiti naalumamay ti kababalinda?
8 “Naragsak dagiti naalumamay ti kababalinda, yantangay tawidendanto ti daga.” (Mat. 5:5) Ti “kinaalumamay ti kababalin” ket saan a maysa a pagkapuyan wenno pammarang a kinaemma. (1 Tim. 6:11) Naalumamaytayo no iparangarangtayo ti kinaemma babaen ti panangaramid iti pagayatan ni Jehova ken panagpaiwanwan kenkuana. Masapul met nga ipakitatayo ti kinaalumamay iti wagas ti pannakilangentayo kadagiti kapammatian ken iti sabsabali. Maitunos ti kasta a kinaemma iti balakad ni apostol Pablo.—Basaen ti Roma 12:17-19.
9 Apay a naragsak dagiti naalumamay ti kababalinda? Gapu ta “tawidendanto ti daga,” kinuna ti naalumamay a ni Jesus. Isu ti kangrunaan nga Agtawid iti daga. (Sal. 2:8; Mat. 11:29; Heb. 2:8, 9) Uray dagidiay naalumamay a “makipagtawid ken Kristo” tawidenda met ti daga. (Roma 8:16, 17) Iti sidong ti Pagarian ni Jesus, adu pay a naemma ti mangtagiragsakto iti agnanayon a biag ditoy daga.—Sal. 37:10, 11.
10. No saantayo a naalumamay, kasano a maapektaran ti panangragpattayo kadagiti pribilehio iti kongregasion ken ti relasiontayo iti sabsabali?
10 Kas ken Jesus, rumbeng nga agbalintayo a naalumamay. Komusta ngay no agdindinamag a mannakiringgortayo? Adaywandatayo dagiti tattao no managpungpungtot ken nauyongtayo. No maysatayo a kabsat a lalaki nga agtartarigagay a rumagpat kadagiti pribilehio iti kongregasion, saantayo a makualipikar no adda kadatayo dagita a kababalin. (1 Tim. 3:1, 3) Ni Pablo kinunana ken Tito nga itultuloyna a balakadan dagiti Kristiano idiay Creta, a masapul a “saanda a mannakiringgor, nga agbalinda a nainkalintegan, nga ipakitada ti isuamin a kinaalumamay kadagiti amin a tattao.” (Tito 3:1, 2) Pudno a bendision kadagiti sabsabali ti kasta a kinaalumamay!
Mabisinda iti “Kinalinteg”
11-13. (a) Ania ti kayat a sawen ti panagbisin ken pannakawaw iti kinalinteg? (b) Kasano a ‘mapennek’ dagidiay mabisin ken mawaw iti kinalinteg?
11 “Naragsak dagidiay mabisin ken mawaw iti kinalinteg, yantangay mapennekdanto.” (Mat. 5:6) Ti “kinalinteg” a tuktukoyen ni Jesus ket ti panangaramid iti umiso babaen ti panagbiag a maitunos iti pagayatan ken bilbilin ti Dios. Kinuna ti salmista nga isu ket “maidagel iti panangil-iliw” kadagiti nalinteg a hudisial a pangngeddeng ti Dios. (Sal. 119:20) Ipatpategtayo kadi ti kinalinteg nga uray la mabisin ken mawawtayo iti dayta?
12 Kinuna ni Jesus a naragsak dagidiay mabisin ken mawaw iti kinalinteg gapu ta naan-anay a “mapennekdanto.” Natungpal dayta kalpasan ti Pentecostes 33 K.P., idi a ti nasantuan nga espiritu ni Jehova nangrugi a ‘mangipaay iti makaallukoy a pammaneknek iti lubong maipapan iti kinalinteg.’ (Juan 16:8) Babaen ti nasantuan nga espiritu ti Dios, pinaltiinganna dagiti lallaki a mangisurat iti Kristiano a Griego a Kasuratan, a makagunggona “iti panangdisiplina iti kinalinteg.” (2 Tim. 3:16) Ti espiritu ti Dios tulongannatayo met a ‘mangikawes iti baro a personalidad a naparsua maitunos iti pagayatan ti Dios iti pudno a kinalinteg.’ (Efe. 4:24) Saan kadi a makaliwliwa a maammuan a maaddaan iti nalinteg a takder iti imatang ti Dios dagidiay agbabawi ken dumawat iti pammakawan kadagiti basolda maibatay iti pangsubbot a daton ni Jesus?—Basaen ti Roma 3:23, 24.
13 No naindagaan ti namnamatayo, naan-anay a mapennek ti bisin ken wawtayo iti kinalinteg inton tagiragsakentayo ti biag nga agnanayon ditoy daga iti sidong ti nalinteg a kasasaad. Kabayatanna, determinadotayo koma nga agbiag a maitunos kadagiti pagalagadan ni Jehova. Kinuna ni Jesus: ‘Itultuloyyo a sapulen nga umuna ti pagarian ken ti kinalinteg ti Dios.’ (Mat. 6:33) No aramidentayo dayta, agbalintayo nga okupado kadagiti nadiosan nga aramid ken pudno a naragsaktayo.—1 Cor. 15:58.
No Apay a Naragsak “Dagiti Naasi”
14, 15. Kasanotayo a maipakita ti asi, ken apay a naragsak “dagiti naasi”?
14 “Naragsak dagiti naasi, yantangay maipakitaandanto iti asi.” (Mat. 5:7) “Dagiti naasi” ammoda ti makipagrikna iti sabsabali. Simimilagro a binang-aran ni Jesus ti panagsagaba ti adu gapu ta naasian kadakuada. (Mat. 14:14) Maiparangarang met ti asi no pakawanen ti maysa daydiay nakabasol kenkuana, no kasano a ni Jehova siaasi a pakawanenna dagidiay agbabbabawi. (Ex. 34:6, 7; Sal. 103:10) Kasta koma ti aramidentayo, malaksid pay iti panagbalintayo a naasi iti sao ken aramid tapno mabang-aran dagiti nakaay-ay-ay ti kasasaadda. Ti panangiranud kadagiti kinapudno iti Biblia ti maysa a nagsayaat a pamay-an a maipakita ti asi. Gapu ta naasian ni Jesus iti bunggoy, “rinugianna nga isuro ida iti adu a banag.”—Mar. 6:34.
15 Adda rasontayo nga umanamong kadagiti sasao ni Jesus: “Naragsak dagiti naasi, yantangay maipakitaandanto iti asi.” No naasitayo kadagiti sabsabali, dakdakkel ti posibilidad a naasidanto met kadatayo. Inton panawen ti panangukom, mabalin a pakitaannatayo ti Dios iti asi gapu iti impakitatayo nga asi kadagiti sabsabali. (Sant. 2:13) Ti pannakapakawan dagiti basol ken ti biag nga agnanayon ket agpaay laeng kadagiti naasi.—Mat. 6:15.
No Apay a Naragsak “Dagiti Nasin-aw ti Pusoda”
16. Ania ti kayat a sawen ti panagbalin a ‘nadalus iti puso,’ ken kasano a dagidiay addaan iti kasta a galad ‘makitada ti Dios’?
16 “Naragsak dagiti nasin-aw ti pusoda, yantangay makitadanto ti Dios.” (Mat. 5:8) ‘Nasin-aw ti pusotayo’ no nadalus dagiti tarigagay, motibo, ken bambanag nga ipatpategtayo. Aggubuay ti ‘ayattayo manipud iti nadalus a puso.’ (1 Tim. 1:5) No nadalus ti kaunggantayo, ‘makitatayo ti Dios.’ Dina kayat a sawen a makitatayo a literal ni Jehova gapu ta “awan ti tao a makakita [iti Dios] ket kaskasdi nga agbiag.” (Ex. 33:20) Gapu ta naan-anay nga inyanninaw ni Jesus ti personalidad ti Dios, naikunana: “Ti nakakita kaniak nakitana met ti Ama.” (Juan 14:7-9) Kas agdaydayaw ken Jehova ditoy daga, ‘makitatayo ti Dios’ iti anag a mapaliiwtayo dagiti ar-aramidna maipaay kadatayo. (Job 42:5) Dagiti napulotan a Kristiano naan-anayto a makitada ti Dios inton mapagungarda kas espiritu ken aktual a makitada ti nailangitan nga Amada.—1 Juan 3:2.
17. Ania ti rumbeng nga aramidentayo no nasin-aw ti pusotayo?
17 Gapu ta ti nasin-aw a puso ket nadalus iti moral ken naespirituan a pamay-an, saanna nga aramiden dagiti bambanag a narugit iti imatang ni Jehova. (1 Cron. 28:9; Isa. 52:11) No nasin-aw ti pusotayo, rumbeng a nadalus met dagiti sasao ken aramidtayo, ken masapul nga awan ti paset ti panagserbitayo ken Jehova a pammarang laeng.
“Dagiti Mannakikappia” Agbalinda nga Annak ti Dios
18, 19. Kasano ti panagtignay “dagiti mannakikappia”?
18 “Naragsak dagiti mannakikappia, yantangay maawagandanto iti ‘annak ti Dios.’” (Mat. 5:9) Mailasinyo “dagiti mannakikappia” babaen kadagiti ar-aramidenda ken saanda nga ar-aramiden. Maysatayo kadagiti tuktukoyen ni Jesus a mannakikappia no ditay ‘supapakan iti panangdangran ti asinoman.’ Imbes ketdi, ‘kanayon nga agaramidtayo iti naimbag kadagiti amin a tattao.’—1 Tes. 5:15, Ti Baro a Naimbag a Damag Biblia.
19 Ti Griego a termino a naipatarus a “mannakikappia” iti Mateo 5:9 literal a kaipapananna “mangitantandudo iti kappia.” Tapno maibilangtayo a mannakikappia, masapul nga aktibo nga itandudotayo ti kappia. Dagiti mangitantandudo iti kappia saanda a mangaramid iti aniaman a ‘mamagsisina kadagidiay nasinged iti maysa ken maysa.’ (Prov. 16:28) Kas mannakikappia, mangaramidtayo kadagiti pamay-an tapno maitandudotayo ti “talna iti amin a tattao.”—Heb. 12:14.
20. Siasino ita dagiti maibilang nga “annak ti Dios,” ken siasino pay dagiti agbalinto nga annak ti Dios?
20 Naragsak dagiti mannakikappia gapu ta “maawagandanto iti ‘annak ti Dios.’” Ni Jehova inamponna dagiti matalek a napulotan a Kristiano isu a nagbalinda nga “annak ti Dios.” Nasinged ti relasionda ken Jehova kas annakna gapu ta pampaneknekanda ti pammatida kenni Kristo ken naimpusuan a daydayawenda “ti Dios ti ayat ken ti talna.” (2 Cor. 13:11; Juan 1:12) Komusta met ngay dagiti mannakikappia a “sabsabali a karnero” a kukua ni Jesus? Isu ti agbalin kas ‘Agnanayon nga Amada’ bayat ti Milenio a Panagturayna. Ngem kalpasanna, isu a mismo agpaiturayto ken Jehova ket naan-anay nga agbalindanton nga annak ti Dios.—Juan 10:16; Isa. 9:6; Roma 8:21; 1 Cor. 15:27, 28.
21. Kasano ti panagtignaytayo no “agbibiagtayo babaen ti espiritu”?
21 No “agbibiagtayo babaen ti espiritu,” ti panagbalin a mannakikappia ti maysa kadagiti nabatad a galadtayo. Masapul a ditay “mangsulsulbog iti panagsisinnalisal” wenno “agpipinnasakit.” (Gal. 5:22-26; Ti Baro a Naimbag a Damag Biblia) Imbes ketdi, pagreggetantayo ti ‘makikappia iti amin a tattao.’—Roma 12:18.
Naragsak Uray Maidaddadanes!
22-24. (a) Apay a naragsak dagidiay maidaddadanes maigapu iti kinalinteg? (b) Ania ti usigentayo iti sumaganad a dua a mapagadalan nga artikulo?
22 “Naragsak dagidiay maidaddadanes maigapu iti kinalinteg, yantangay kukuada ti pagarian ti langlangit.” (Mat. 5:10) Kas panangilawlawag, innayon ni Jesus: “Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak. Agrag-o ken aglagtokayo gapu iti rag-o, yantangay dakkel ti gunggonayo iti langlangit; ta iti kasta a pamay-an indadanesda dagiti mammadto nga immun-una ngem dakayo.”—Mat. 5:11, 12.
23 Kas kadagiti mammadto ti Dios idi ugma, namnamaen dagiti Kristiano a maumsi, maidadanes, ken mapadakesda—“maigapu iti kinalinteg.” Ngem no simamatalek nga ibturantayo dagiti kasta a pannubok, naragsaktayo ta maay-ayo ken maidaydayawtayo ni Jehova. (1 Ped. 2:19-21) Ti panagsagabatayo dina kissayan ti ragsaktayo nga agserserbi ken Jehova ita wenno iti masanguanan, uray pay ti ragsak ti pannakipagturay ken Kristo iti nailangitan a Pagarian wenno ti rag-o ti pannakagun-od iti agnanayon a biag kas maysa kadagiti iturayan dayta a gobierno ditoy daga. Dagita a bendision ket pammaneknek iti anamong, kinaimbag, ken kinaparabur ti Dios.
24 Adu pay ti masursurotayo iti Sermon iti Bantay. Nagduduma ti maadaltayo kadagiti sumaganad a dua a mapagadalan nga artikulo. Kitaentayo no kasano a mayaplikartayo dagiti sasao ni Jesu-Kristo.
Ania ti Sungbatyo?
• Apay a naragsak “dagidiay sipapanunot iti naespirituan a kasapulanda”?
• Apay a naragsak “dagiti naalumamay ti kababalinda”?
• Apay a naragsak dagiti Kristiano uray maidaddadanesda?
• Ania kadagiti kinaragsak a dinakamat ni Jesus ti nangnangruna a nakatukay kenka?
[Ladawan iti panid 7]
Makagunggona agingga ita dagiti siam a kinaragsak nga intampok ni Jesus
[Ladawan iti panid 8]
Ti panangiranud kadagiti kinapudno iti Biblia ti maysa a nasayaat a pamay-an a maipakita ti asi