Agtalek ken Jah Jehova!
“Agtalekkayo ken ni Jehova, iti agnanayon, ta ken ni Jah Jehova isu ti maysa a Bato nga agnanayon.”—ISAIAS 26:4.
1, 2. Ania a mangitantan-ok a kanta ti panagdaydayaw ti naibinsabinsa idiay Isaias 26:1-6, ken apay?
TI PANNAKAIGARANGUGONG ti ‘ili dagiti nakaal-alinggek a nasnasion’ sapulenna ti maysa a kanta ti panagballigi! (Isaias 25:3) Ngarud, maiyanatup, naibinsabinsa ti padto idiay Isaias kapitulo 26, bersikulo 1 ingganat’ 6, ti mangitantan-ok a kanta ti panagdaydayaw iti Soberano nga Apo Jehova. Dayta pay ti maikankanta itan “idiay daga ti Juda,” a ti Juda kaipapananna “Maidaydayaw.” Ditoy, manen, ti King James Version us-usarenna ti sasao a “ni APO JEHOVA” a sadiay nadoble ti nasantuan a nagan. Ngem anian nga ad-adda pay a makaay-ayo dagita a sasao ti kanta iti panagparangda idiay New World Translation, a sadiay daytoy ken dagiti dadduma a nakaaramatan ti nasantuan a nagan isu ti umiso ti pannakaipaulogda!
2 Ita denggenyo, dayta makaay-ayo unay a kanta: “Adda kadakami ti maysa a siudad a nalagda. Isu [ni Jehova] isaadnanto ti pakaisalakanan a kas bakud ken sasarikedked. Luktanyo dagiti ruangan, tapno ti nalinteg a nasion a matalek makastrek. Aywanamto a natalna unay daydiay a ti panunotna agtalinaed kenka. Agtalekkayo ken ni Jehova, iti agnanayon, ta ken ni Jah Jehova maysa a Bato nga agnanayon. Ta isu imbabana dagiti agtaeng iti ngato, ti nangato unay nga ili. Isu ti ipababana agingga iti daga met laeng; isu ti idanonna iti tapuk met laeng. Isu payatpayatennanto iti saka, uray pay dagiti saksaka ti napanglaw, ken kadagiti ad-addang dagiti addaan pannakasapul.” Anian a rag-o ti maibilang kadagidiay managtalek a makiramraman itan iti panagkankanta iti daytoy a kanta—dagiti Saksi ni Jehova!
3. (a) Ania “ti nalinteg a nasion,” ket asino dagiti sumrekto iti silulukat a “ruanganna”? (b) Kasano a ti organisasion ni Jehova ket agtigtignay a sangsangkamaysa agpapan pay panagregget ti kabusor a mangdadael iti dayta?
3 Ni Apo Jehova—ni Jah Jehova—ti pudpudno a mangipababa iti natangsit ket ispalenna dagidiay kanayon nga agtalek kenkuana. Nupay no naminsan isuda ti “kabassitan,” ti naespirituan nga Israel nagbalinen a “maysa a napigsa a nasion,” “ti nalinteg a nasion.” Babaen kadagiti silulukat a “ruangan” iti kasla siudad nga organisasion ni Jehova adda met a nakastrek ti maysa a napigsa a bunggoy dagiti naimbag ti nakemna a kakaduada nga agbilang ti nasuroken a tallo a milion. Sangsangkamaysa buklenda ti maysa nga internasional a panagkakabsat, a ti populasionna lab-awanna ti sumurok-kumurang 57 kadagiti nasnasion a mangbukel ti makunkuna a Naciones Unidas. Ngem ti “nasion” ti Dios ken dagidiay naitimpuyog iti dayta ti pudpudno a sangsangkamaysada. Iti intero a daga, ti pagannayasanda ket isut’ panagtulnog kadagiti nalinteg a prinsipiona. Ti organisasional a “bakbakud” ti “nasion” ti Dios ti mangted iti maysa a sarikedked a maibusor kadagiti panagregget ni Satanas a bumiang kadagiti matalek a konduktana a panangsuportar iti kinapudno. Ti kabusor ket saandan a marakrak ti nasungdo a panagmartsa ti ili ti Dios! Ti panagtalektayo ti kanayon nga adda ken ‘Jah Jehova, ti Bato nga agnanayon.’—Isaias 54:17; 60:22.
4, 5. (a) Ania “ti nangato unay nga ili,” ket kasano ti panangpayatpayat ti ili ni Jehova iti dayta iti piguratibo a pamay-an? (b) Kaanonto ti kangrunaan a kaitungpalan ti padto iti Isaias 26:10, ket kasano a kasta? (c) Ania ti dadduma pay nga aplikasion daytoy a padto?
4 Bayat ti panamakpakdaartayo a ni Jehova dandaninan nga ipababa “ti nangato unay nga ili,” ti “Babilonia a Dakkel” makaparagsak a makita a dagiti maparparigat ken maipababa a tattao ditoy daga inabrasada ti naimbag a damag ti Pagarian. (Apocalipsis 18:2, 4, 5) Iti makailadawan a pamay-an, isuda met, impayatpayatda dayta “nangato unay nga ili,” saan a babaen iti pannakiramanda iti aramid a panangdadael, no di ket agsipud ta makipaspasetda iti panangiwarwaragawag iti aldaw ti ibabales ni Jehova iti dayta narugit a sistema. (Isaias 61:1, 2) Iti pinulpullo a tawen itan, mangipakpakita dagiti Saksi ni Jehova ti kinamanangngaasi uray kadagiti managdakdakes babaen ti panangsarungkar kadakuada kadagiti pagtaenganda babaen iti makaispal-biag a mensahe ti Pagarian. Ngem ti resultana ket kas adda a nasao idiay Isaias 26:10: “Ti kaasi maiparang koma iti nadangkes, nupay kasta saan a makasursuro iti kinalinteg. Iti daga ti kinalinteg agaramidto a siallilaw unay ket isu dinanto mabuya ti kinadayag ni Jehova.”
5 Daytoy a padto ti pannakaisubli ti addaan naindaklan a kaitungpalanna itatta. Nupay naparaburanda iti gundaway, sumagmamano a tattao ti mayat a mangbalbaliw iti panagbiagda tapno awatenda ti anamong ni Jehova “idiay daga ti kinalinteg.” Dagidiay a manglalais ken ni Jehova ken kadagiti nasungdo a saksina “isu dinanto mabuya ti kinadayag ni Jehova,” ta saandanto a makalasat tapno tagiragsaken dagiti nakaskasdaaw a bendision nga agayus iti sangatauan kalpasan ti pannakasantipikar ti nagan ni Jehova. (Isaias 11:9) Ti padto ti mabalin nga agaplikar met, idiay Paraiso a daga kadagidiay maibangonto manipud kadagiti tanem. Asinoman a madi a makitunos kadagiti pagannurotan ti Dios, kas sibabatad a naibinsabinsa kadagiti nasantuan a “lukot ti libro” iti dayta a panawen, ti nagnaganda saanto a maisurat idiay “libro ti biag.”—Apocalipsis 20:12, 15; idiligyo iti Ezequiel 33:11.
Ni Jehova ti Mangikeddeng ti Talna
6. Ania a sasao ti ipukkawto a siraragsak ti nasungdo nga ili ni Jehova, ken apay a kasta?
6 Nupay kasta, ti nasungdo nga ili ti Dios, ti interesado unay a makakita iti pannakaitan-ok, pannakaalangon ni Jah Jehova. Umawagdanto kenkuana a “mangikeddeng iti talna” agpaay iti ilina, ket sirarag-o nga ipukkawda: “Sika pinadakkelmo ti nasion; O Jehova, pinadakkelmo ti nasion; sika maidaydayawka. Sika pinalawam amin a bedbeddeng ti daga.” (Isaias 26:12, 15) Iti agangay 210 a dagdaga iti intero a lubong, itultuloy nga inaynayon ni Jehova dagiti kimmarnero a tattao iti naespirituan a nasionna. Ginasgasut a ribo kadagiti baro a maitimtimpuyog ti mababautisaran. Nasurok a kagudua milion kadagiti espesial, regular, ken auxiliary a payunir ti agserserbi kadagiti kangrunaan a bulbulan. Umad-adu a Kingdom Halls ken Assembly Halls ti maibangbangon. Palpalawaen ti sanga ti Watch Tower dagiti Pagtaenganda a Bethel ken paktoriada ken naynayonanda pay dagiti aruaten a pagimalditanda. Ti panagdakkel ket agtultuloy!
7. Aniat’ makagapu iti panagsaknap ti kas siudad nga organisasion ni Jehova?
7 Daytoy a panagsaknap ket um-umay gapu ta ti “Prinsipe ti Kappia” ti mangiturturong kadagiti ar-aramid ti ili ti Dios ditoy daga. Kas kinuna a nasapsapa ni Isaias iti padtona: “Ti idadakkel ti panangiturayna ken ti kappia awanto ti inggana, iti trono ni David ken iti pagarianna tapno bangonenna ken salimetmetanna babaen iti kinahustisia ken kinalinteg, manipud ita ken iti agnanayon. Ti regta ni Jehova dagiti buybuyot ti mangaramid iti daytoy.” (Isaias 9:6, 7) Anian nga engrande ti pannakatungpal dagidiay a sasao itatta! Dagidiay nga agtaltalek ken ni Jehova ket napasarandan ti talna, ti kinahustisia, ti kinalinteg, dayta naprinsipean a panagturay. Dayta ti nangiyeg kadakuada iti naayat a panagkaykaysa a tagtagiragsaken laeng dagiti pudno nga ad-adalan ni Jesus. (Juan 13:34, 35) Mainayon pay, ur-urayenda a buyogen iti napasnek a pananginanama iti napardas-iyaadanina a panawen inton ti panagturay ti Pagarian ni Jesus ken “ti pannakaammo ken Jehova” ket punuennanton ti intero a daga.—Isaias 11:9; Daniel 2:35, 44, 45.
8. Aniat’ ipamatmat ti sasao ni Jehova idiay Isaias 26:20, ket kadagiti ania ti nakainaigan dagiti “siled”?
8 Bayat a ti panagsaknap ti Pagarian agturturongen iti kangitingitanna, umaweng ti panangawis ni Jehova idiay Isaias 26:20: “Umayka, ilik, sumrekka kadagiti siledmo, ket ripkam dagiti ruangan a maipaay kenka. Aglemmengka iti bassit a kanito agingga iti masibet ti pungtot.” Awan duadua dagiti “siled” iti daytoy a padto ket nainaigda unay kadagiti nasurok a 54,000 a kasla siudad a kongregasion nga agserserbi kadagiti Saksi ni Jehova iti intero a daga itatta. No ania ti pampanunoten ni Jehova ti makitanto pay. Ngem makasigurotayo nga inton dadaelenna dagiti managdakdakes, salaknibannanto ti managtalek nga ilina, kas inaramidna idi kaaldawan ni Isaias idi pinarmekna dagiti naranggas nga Asirio.—Isaias 10:24-26.
Naipasiguro ti Panangispal!
9. (a) Kasanot’ panangipakita ni Ari Ezekias ti panagtalekna ken ni Jehova? (b) No maidaddadanestayo wenno malalais babaen kadagiti gumurgura ken ni Jehova, ania ti maiyanatup a sungbattayo?
9 Dagiti ad-adipen ni Jehova itatta ket agtaltalekda kenkuana kas ti panagtalek met laeng idi ni Ari Ezekias. Isut’ nagpannuray a naan-anay ken ni Jehova kas Soberano nga Apona. Gapuna, idi kangitingitan ti iraraut ti Asiria, nagkararag ken Jehova kadagitoy a sasao: “O Jehova dagiti buybuyot, Dios ti Israel, nga agtugaw iti ngatuen dagiti kerubin, sika ti pudno a Dios, siksika la a maymaysa, kadagiti isuamin a pagarian iti lubong. Sika inaramidmo ti langit ken daga. Iyallingagmo ta lapayagmo, O Jehova ket denggem. Luktam dagiti matam, O Jehova, ket kitaem, ken denggem amin dagiti sao ni Senakerib isu a nagbaon a mangkarit iti Dios a sibibiag.” (Isaias 37:16, 17) No maidaddadanes, mauy-uyaw, wenno malalais kadagiti gumurgura ken Jehova, saan kadi a ti umas-asping a kararag ti agtaud met iti pusoyo? Buyogen ti naan-anay a panagtalek ken ni Jehova, dikay aya iyararaw kenkuana a maikkat ti pakaumsian ti naganna? Kasta ti panagrikna ni Jesus idi dandani matay iti kayo a pagtutuokan. Indawatna pay a ti kopa nga inumanna ti “lumabas” koma kenkuana gapu iti dakkel a pakaumsian ni Amana.—Mateo 26:39-44.
10. (a) Aniat’ imparangarang ti kararag ni Ezekias maipapan iti kangrunaan a pakaseknanna? (b) Kasanot’ panagbalintayo a kas ken Ezekias no naipasangotayo kadagiti pakasuotan kasakbayan la unay ti Armagedon?
10 Impakita ti kararag ni Ezekias nga isut’ awanan inaagum a motibo iti panangdawatna iti pannakaispal manipud kadagiti Asirio. Saanna laeng a basta padpadasen nga isalakan ti biagna. Imbes ketdi, isut’ maseknan a masantipikar koma ti nagan ni Jehova ken maalangon ti kinasoberanona. Gapuna ti kararagna rinamanna dagiti sasao nga: “Ita ngarud, O Jehova a Diosmi, ispalennakami iti imana, tapno isuamin dagiti pagpagarian iti lubong ammuenda koma a sika ni Jehova, siksika laeng.” (Isaias 37:20) Umas-asping iti dayta, bayat a maipaspasangotayo kadagiti pakasuotan a pakpakauna ti maudi a gubat ti Armagedon, laglagipentay koma a ti personal a pannakaisalakantayo ket segundario laeng iti pannakasantipikar ti nagan ni Jehova. Kas indeklara ti Soberano nga Apotayo agarup 60 a daras babaen ken mammadtona nga Ezequiel: “Ket maammuandanto a siak ni Jehova.”—Ezequiel 38:23.
11. (a) Ania a biddut ti inaramid ni Senakerib, ket aniat’ imbaga ni Jehova maipapan iti daytoy? (b) Gapu iti napagteng ken ni Senakerib, ania a panagtalek ti mabalin a maadda kadatayo?
11 Kalpasan ti panagkararag ni Ezekias, pinakaammuan ni Isaias ti ari maipapan ti sinao ni Jehova a maibusor ken Senakerib. Anian a nagdakkelan a panagkamali ti inaramid ti manangtabbaaw nga Asirio iti pananglaisna ti Dios a sibibiag! Babaen ken Isaias, kinuna ni Jehova maipapan ken Senakerib: “Siasino ti kinaritmo ken tinabbaawam? Ket asino ti pakaibusuran ti natbag a timekmo ken nangitangadam kadagita matam iti nangato? Maibusor met laeng iti Santo ti Israel.” Ket ti Santo ti Israel ti nagtignay iti dayta a rabii! Maysa laeng nga anghel ni Jehova ti innalana tapno mangkabil ken mangaramid a “bangkay” kadagiti 185,000 a buybuyot ti Asiria, dagiti kasasayaatan iti buyot ni Senakerib. Dayta a natangsit nga ari nagsanud iti pannakaibabain a napan idiay Nineve ket sumagmamano a tawen ti kamaudiananna, dayta natangsit nga ari ti pinatay dagiti annakna met laeng bayat nga agdaydayaw kadagiti didiosenna. Mabalintay ti agtalek ken ni Jehova, a manginanama nga isunto met ti mangipatay ti umas-asping a panangtrato ken ni Satanas ken amin dagiti buybuyotna a sitatabbaaw a manglalais ken mangidaddadanes kadagiti Saksi ni Jehova.—Isaias 37:23, 36-38.
Panangibales kadagiti “Napapatay”
12. (a) Kasanot’ panangsalaysay ti Isaias 26:21 iti panagidatag a maaramidto inton Armagedon? (b) Asino dagiti “napapatay” a maibalesto uray pay sakbay ti Armagedon, ken kasano a kasta?
12 Daytat’ maysa a nakaal-alinggek a bakal idi, ngem ti ad-adda a nakaam-amak a panagidatag ti mapasamakto bayat ti “dakkel a rigat.” (Mateo 24:21) Awisennatayo ni Jehova a mangbuya iti kasaknap dayta a panangpapatay: “Ta adtoy! Ni Jehova rummuarto iti lugarna tapno mangdusa kadagiti agnaed iti daga a gapu iti kinadangkesda, ti daga lukasannanto met ti darana ket uray kaano dinanto abbonganen dagiti napapatay a kukuana.” (Isaias 26:21) Umuna, tignayen ni Jehova dagiti napolitikaan a pannakabalin a mangdusa kadagiti manangitandudo kadagiti narelihiusuan a kinaulbod. Dagiti ulbod a didiosenda ket saanto a makaisalakan kadakuada iti dayta nga aldaw! Bay-anyo ti Romano a papa nga agtultuloy a mangurnong kadagiti amin a relihion iti “Babilonia a Dakkel” a maipaay kadagiti aglalaok a pammati a karkararag. Awan kadagitoy a manangannurot ti aglalaok a pammati ti nangdayaw iti pudno ken sibibiag a Dios, ni Jehova. Dagiti sursuroda ket ulbodda, awan idiay Biblia, ken kasta met dagiti ar-aramidda. Nagpipinnatayda iti maysa ken maysa kadagiti naglabasen a siglo. Imbuyatda ti dara dagiti mannakikappia a Kristiano. Iti daytoy maika-20 a siglo, adu kadagitoy a managsalungasing ti nangsuportar kadagiti naulpit a diktador a nangpappapatay kadagiti Saksi ni Jehova kadagiti pagbaludan ken kampo konsentrasion babaen iti firing squad ken iti wasay. Kas silalawag nga indeklara ni Jehova babaen kadagiti mammadtona, dagita a “napapatay” ket maibalesdanto.—Deuteronomio 32:41, 43; Isaias 1:24; 63:4; Apocalipsis 17:15-18; 18:21, 24.
13. Aniat’ ipadto ni Isaias maipapan “iti aldaw ni Jehova,” ket iti siasino ti pagaplikaran dagiti sasao?
13 Kalpasan ti pannakarbekto ti ulbod a relihion, agtignayto a sipapardas ni Jehova a maibusor kadagiti isuamin a natda a bumusbusor ti Pagarian ni Kristo. Kadagita amin a bumusbusor, agraman ti “Babilonia a Dakkel,” agaplikar dagiti sasao ti Dios idiay Isaias 13:6, 9: “Agdung-awkayo, ta ti aldaw ni Jehova dumteng! Kas iti pannakadadael nga aggapu iti mannakabalin-amin umayto. Adtoy! Ti aldaw ni Jehova sumungad, naranggas, a buyogen ti pungtot ken narungsot nga unget, tapno paglangalangenna ti daga, ken mangdadael kadagiti managbasol iti nagtengngaanda.” Isunto ti kas impadto ni salmista David: “Ni Jehova salaknibanna amin dagiti agayat kenkuana, ngem amin dagiti nadangkes dadaelennanto ida.”—Salmo 145:20; Apocalipsis 19:11-21.
14. Ania pay a sasao ni Isaias ti nasayaat nga ipangag dagiti nasnasion, ken apay?
14 Naimbag no dagiti nasnasion ti daga ipangagda dagiti kanayonan a sasao ti Isaias idiay Isakapitulo 34, bersikulo 1 agingganat’ 8: “Umasidegkayo a dumngeg, dakayo a nasnasion; ken timudenyo, dakayo nga il-ili, dumngeg koma ti daga. . . . Ta ni Jehova adda pungtotna kadagiti amin a nasnasion, ken rungsotna iti amin a buyotda. Isu dinadaelna ida a tinalipupos, inyawatna ida iti pagpapatayan. Dagiti minatayda maibellengdanto met, ket ti buyok dagiti bangkayda umulinto; ken dagiti bambantay marunawdanto iti darada. . . . Ta ni Jehova addaan maysa nga aldaw a panangbales.” Kadagiti pagturturayan ti politika, dadakkel a negosio, ken ulbod a relihion, aglaplapusanan unay ti kinarugit ken imoralidad. Ngem pangpanggepen ni Jehova iti nadalus a daga. Gapu itoy, ur-urnongenna manipud kadagiti nasnasion—a maipaay iti pannakaisalakan—dagidiay tattao a situtulok a mamagbalbaliw iti biagda nga agserbi kenkuana iti kinalinteg. Amin dagiti dadduma maikisapdanto iti aldaw ti ibabalesna.—Jeremias 25:31-33.
Maysa a Paraiso ti Talna
15. Aniat’ salaysayen ni Isaias idiay Isa kapitulo 35 maipapan (a) itatta? (b) iti masanguanan?
15 Idiay Isaias kapitulo 35, intuloy ti mammadto ti Dios, kadagiti nagpintas a makailadawan a sasao, a mangsalaysay ti kasasaad ti naisubli nga ili ni Jehova, dagidiay kanayon a mangisasaad ti panagtalekda kenkuana itatta. Gapu ta naurnongdan iti maysa a naespirituan a paraiso, dagitoy “makitadanto ti dayag ni Jehova, ti kinadaeg ti Diostayo.” Ur-urayenda met ti maysa a pisikal a paraiso ken kaitungpalan ti kari: “Iti kasta maluktanto dagiti mata ti bulsek, ken dagiti lapayag ti tuleng maluktandanto. Iti kasta aglagtonto ti pilay a kas maysa nga ugsa ken ti dila ti umel agkantanto. Ta iti let-ang pumsuakto dagiti dandanum, ken barbaresbes iti tay-ak a langalang.”(Isaias 35:1, 2, 5, 6) Maragsakankayo aya iti dayta a panginanamaan? Agtalekkayo aya ken ni Jehova, a manginanama a tungpalennanto dagidiay a karkari?
16, 17.(a) Ania a naganat a panagkalikagum ti inaramid ni Isaias bayat nga iladladawanna ti Paraiso? (b) Kasanot’ rebbeng nga isusungbat ti ili ni Jehova iti daytoy a panagkalikagum?
16 Agtalekkayo ken ni Jehova, mabalin a makiramankayo a mangparegta kadagiti kabbaro, agraman dagiti dadduma a ti pammatida kasapulan a mapapigsa. Iti tengnga ti panangiladawan iti Paraiso, insalet ni mammadto Isaias daytoy naganat a kalikagum: “Patibkerenyo dagiti napaksuyan nga im-ima, ket pakirdenyo dagiti nakapuy a tumtumeng. Kunaenyo kadagiti managbutbuteng a puso: ‘Bumilegkayo. Dikayo agbuteng. Adtoy! Ti Diosyo umayto iti panangibales, iti panangsupapak ti Dios. Isu umayto ken isalakannakayo.’” (Isaias 35:3, 4) Wen, kayattayo a makita nga amin a ti puspusoda ket agannayas iti kinalinteg mapabilegda iti panagtalekda ken ni Jehova, tapno makadanonda met iti dayta Paraiso a daga.
17 Ngarud tulongantayo ti aniaman a kumapkapuy nga im-ima tapno salimetmetanda “ti panangpetpet a siirut iti sao ti biag.” Patibkerentayo ti asinoman nga addaan kumapkapuy a tumeng, ta ikkan ida ti sadinoman a pakasapulan tapno “magnada a maikari ken Jehova a maipaay iti amin a pakaay-ayuan.” (Filipos 2:16; Colosas 1:10) Wen, liwliwaentayo ti asinoman a malmaldaangan iti puso, ket paregtaentayo ti maysa ken maysa, tapno maipasango kadagiti pakasusuotan wenno pannakaidadanes, tapno maipakita nga “ad-adda pay ti turedda nga agsao iti sao ti Dios nga awan butbutengna.” (Filipos 1:14; 1 Tesalonica 5:14; Efeso 5:15, 16) Ket, inton dumtengen ti aldaw nga ibabales ni Jehova, maipasiguro kadatayo ti bendisionna ‘inton umay a mangispal ti ilina.’ Idi dayta nga aldaw, maysakayto aya kadagidiay agtaltalek ken Jehova maipaay iti pannakaisalakan?
18.Ania a nadayag a panginanamaan ti adda iti masanguanan dagidiay agtalek ken Jehova, ket ania ti determinasionda?
18 Kadagidiay agtaltalek a kanayon ken Jehova, anian a nagdayag a panginanamaan ti adda iti labes dayta nga aldaw! Dagiti sibabasol a manangirurumen awandanton! Idiay baro a lubong, dagiti managayat ken ni Jah Jehova isublinto ti Anakna ti awan basolna a kinaperpekto! Diyo aya il-iliwen dayta a tiempo? Ti panagtalekyo ken Jehova ti mangiyeg kadakayo iti dayta nakaskasdaaw nga aldaw. Wen, agtalektayo a kanayon ken Jehova, ta daytoy kaipapananna ti pannakaisalakan!
[Salsaludsod a Pangrepaso]
◻ Aniat’ iparparegta ti kanta ti panagballigi idiay Isaias 26 nga aramidentayo?
◻ Ania ti “nangato unay nga ili” nga impababa ni Jehova, ket kasano ti intayo panangpayatpayat iti dayta?
◻ Aniat’ maadaltayo manipud kararag ni Ezekias iti imatang ti panangbutbuteng ni Senakerib?
◻ Kasano a maibalesto dagiti “napapatay” idiay Isaias 26:21?
◻ Anianto ti pagbanaganna no agtalektayo ken ni Jah Jehova?
[Kahon iti panid 19]
Idarum ti Santa Seseda?
Iti pananggupgopna ti artikulo ni Umberto Siniscalchi iti Il Giornale idiay Milan, kuna ti World Press Review: “Ti kangatuan a Court of Appeals idiay Italia ti nababalaw iti kasta unay gapu ta pinagbalinna nga awan mamaayna idi Hulio [1987], dagiti mandamiento de aresto para kadagiti tallo nga opisiales ti banko ti Vaticana a nairaman iti eskandalo iti Banco Ambrosiano.” Ti desision, a naibatay iti daanen a tulagan iti nagbaetan ti Vaticana ken ti gobierno ti Italia, ti mangipapaay iti pannakaabsuelto iti tsirman ti banko, a maysa nga arsobispo, agraman ti direktor ti banko ken ti kangatuan a tinidor de libro. Innayon ti pagiwarnakan: “Dadduma kadagiti kritiko, nupay saanda a pabpabasolen dagiti hues gapu iti desision, kunada a dayta a tulagan ket tungpa iti rupa ti konstitusion ti Italia gaput’ panangabsueltona kadagidiay agsalungasing nga adda iti daga ti Italia. Sumagmamano a lehislador ti mangitartrabaho iti maysa a tulagan a mamalubos iti sistema ti kinahustisia iti Italia a mangidarum iti Santa Seseda maipaay kadagiti krimen a maar-aramid sadi Italia.”