Agtultuloyda a Sumursurot iti Kordero
“Dagitoy isuda dagidiay agtultuloy a sumursurot iti Kordero iti uray sadino a papananna.”—Apoc. 14:4.
1. Ania ti reaksion dagiti pudno nga adalan ni Jesus iti panangsurotda kenkuana?
AGARUP dua ket kagudua a tawen iti ministeriona, ni Jesus ket “nangisursuro iti gimong iti publiko idiay Capernaum.” Gapu ta naklaatda iti impalawagna, “adu kadagiti adalanna ti napan iti bambanag a nalikudan ket saandan a makipagna kenkuana.” Idi dinamag ni Jesus iti 12 nga apostolna no kayatda met ti pumanaw, simmungbat ni Simon Pedro: “Apo, iti siasino ti papananminto? Addaanka iti sasao ti agnanayon a biag; ket namatikami ken naammuanmi a sika Daydiay Santo ti Dios.” (Juan 6:48, 59, 60, 66-69) Saan a simmardeng dagiti pudno nga adalan ni Jesus iti panangsurotda kenkuana. Kalpasan a napulotanda iti nasantuan nga espiritu, intultuloyda ti nagpaidalan ken Jesus.—Ara. 16:7-10.
2. (a) Asino “ti matalek ken masirib nga adipen,” wenno “ti matalek a mayordomo”? (b) Kasano a nakaipasdek ti adipen iti nagsayaat a pakasaritaan kas “sumursurot iti Kordero”?
2 Dagiti ngay met napulotan a Kristiano iti kaaldawantayo? Iti padtona maipapan “ti pagilasinan ti kaadda[na] ken ti panungpalan ti sistema ti bambanag,” inawagan ni Jesus ti grupo dagiti napulotan iti espiritu a pasurotna ditoy daga kas “ti matalek ken masirib nga adipen,” wenno “ti matalek a mayordomo.” (Mat. 24:3, 45; Luc. 12:42) Kas maysa a grupo, nakaipasdek ti klase adipen iti nagsayaat a pakasaritaan kas “agtultuloy a sumursurot iti Kordero iti uray sadino a papananna.” (Basaen ti Apocalipsis 14:4, 5.) Dagiti kameng dayta ket agtaltalinaedda a birhen iti naespirituan nga anag yantangay dida mulmulitan ti bagbagida kadagiti doktrina ken aramid ti “Babilonia a Dakkel,” ti sangalubongan nga imperio ti palso a relihion. (Apoc. 17:5) Awan palso a doktrina a ‘masarakan kadagiti ngiwatda,’ ken kanayon nga “awan pakapilawanda” iti lubong ni Satanas. (Juan 15:19) Iti masanguanan, dagiti natda a napulotan ditoy daga ‘surotendanto’ ti Kordero agingga idiay langit.—Juan 13:36.
3. Apay a rumbeng nga agtalektayo iti klase adipen?
3 Dinutokan ni Jesus ti matalek ken masirib nga adipen a mangaywan “kadagiti katulongna,” kayatna a sawen, iti tunggal kameng ti klase adipen, nga “ipaayna kadakuada ti taraonda iti umiso a tiempo.” Dinutokanna met dayta nga adipen “nga agaywan kadagiti amin a sanikuana.” (Mat. 24:45-47) Karaman kadagitoy a ‘sanikua’ ti umad-adu a “dakkel a bunggoy” ti “sabsabali a karnero.” (Apoc. 7:9; Juan 10:16) Saan kadi a rumbeng nga agtalek ti tunggal kameng dagiti napulotan ken “sabsabali a karnero” iti adipen a nadutokan a mangaywan kadakuada? Adu ti rason a maikari a pagtalkantayo ti klase adipen. Ti dua a kangrunaan kadagita ket: (1) agtalek ni Jehova iti klase adipen. (2) agtalek met ni Jesus iti adipen. Usigentayo dagiti pammaneknek a naan-anay nga agtalek da Jehova a Dios ken ni Jesu-Kristo iti matalek ken masirib nga adipen.
Agtalek ni Jehova iti Adipen
4. Apay a makapagtalektayo iti naespirituan a taraon nga ipapaay ti matalek ken masirib nga adipen?
4 Usigentayo no kasano a makaipapaay ti matalek ken masirib nga adipen iti naintiempuan ken makapasalun-at a naespirituan a taraon. “Pagbalinenkanto nga addaan iti pannakatarus ket isuroka iti dalan a rebbeng a papanam,” kinuna ni Jehova. Innayonna: “Mangipaayakto iti balakad a ti matak situturong kenka.” (Sal. 32:8) Wen, iturturong ni Jehova ti adipen. Naan-anay ngarud a makapagtalektayo iti naibasar-Biblia a nauneg a pannakatarus, pannakaawat, ken panangiwanwan nga ipapaay kadatayo ti adipen.
5. Ania ti mangipakita a ti espiritu ti Dios pabpabilgenna ti klase adipen?
5 Ti klase adipen ket bembendisionan met ni Jehova iti nasantuan nga espirituna. Nupay ditay makita ti espiritu ni Jehova, makita ti bungana kadagidiay agpapaidalan iti dayta. Panunotenyo dagiti naaramidan ti matalek ken masirib nga adipen iti sangalubongan a panangasaba maipapan ken Jehova a Dios, iti Anakna, ken iti Pagarian. Siaaktibo nga iwarwaragawag dagiti agdaydayaw ken Jehova ti mensahe ti Pagarian iti nasurok a 230 a pagilian ken grupo dagiti isla. Saan kadi a nabatad dayta a pammaneknek a ti espiritu ti Dios ti mangpabpabileg iti adipen? (Basaen ti Aramid 1:8.) Tapno makaipaay iti naintiempuan a naespirituan a taraon iti ili ni Jehova iti intero a lubong, ti klase adipen ket masapul a mangaramid iti agkakapateg a desision. Iti panangaramid ken panangipatungpalna kadagita, ipakpakita ti adipen ti ayat, kinaalumamay ken dadduma pay nga aspeto ti bunga ti espiritu.—Gal. 5:22, 23.
6, 7. Kasano kadakkel ti panagtalek ni Jehova iti matalek nga adipen?
6 Tapno maawatantayo ti kadakkel ti panagtalek ni Jehova iti matalek nga adipen, panunotentayo ti inkarina kadagiti kameng dayta. Insurat ni apostol Pablo: “Aguninto ti trumpeta, ket dagiti natay maibangondanto a di agrupsa, ket mabaliwantayto. Ta daytoy nga agrupsa masapul nga agkawes iti di panagrupsa, ket daytoy a mortal masapul nga agkawes iti imortalidad.” (1 Cor. 15:52, 53) Dagiti napulotan a pasurot ni Kristo a simamatalek nga agserserbi iti Dios ken matay iti agrupsa a natauan a bagi ket mapagungarda kas espiritu a parsua ken maipaayanda iti napatpateg pay ngem iti biag nga agnanayon. Maipaayanda iti imortalidad—biag nga awan inggana ken di pannakadadael. Dida met agrupsa agsipud ta maipaayanda iti bagi a di agrakaya ken nalabit makasustiner a bukbukodna. Deskribiren ti Apocalipsis 4:4 dagitoy a napagungar kas situtugaw kadagiti trono ken nakoronaan iti balitok. Dagiti napulotan a Kristiano maipadayagdanto kas ar-ari. Ngem saan la a dayta.
7 Kuna ti Apocalipsis 19:7, 8: “Ti panagkasar ti Kordero dimtengen ket ti asawana naisagananan ti bagina. Wen, naipalubos kenkuana a makawesan iti nasileng, nadalus, napino a lienso, ta ti napino a lienso iladawanna dagiti nalinteg nga aramid dagiti sasanto.” Pinili ni Jehova dagiti napulotan a Kristiano kas masanguanan a nobia ti Anakna. Anian a nakaskasdaaw a sagut ti di panagrupsa, imortalidad, kinaari, ken ‘ti pannakaikasarda iti Kordero’! Dagita ti nabileg a pammaneknek nga agtalek ti Dios kadagiti napulotan nga “agtultuloy a sumursurot iti Kordero iti uray sadino a papananna.”
Agtalek ni Jesus iti Adipen
8. Kasano ti panangipakita ni Jesus nga adda panagtalekna kadagiti napulotan iti espiritu a pasurotna?
8 Ania ti pammaneknek a naan-anay nga agtalek ni Jesus kadagiti pasurotna a napulotan iti espiritu? Iti naudi a rabii ti biagna ditoy daga, kastoy ti inkari ni Jesus iti 11 a matalek nga apostolna: “Dakayo dagidiay nagtalinaed kaniak kadagiti pannakasusuotko; ket mangaramidak iti tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian, tapno mabalinyo ti mangan ken uminum iti lamisaanko idiay pagariak, ket agtugawkayo kadagiti trono tapno ukomenyo ti sangapulo ket dua a tribu ti Israel.” (Luc. 22:28-30) Ti tulag nga inaramid idi ni Jesus kadagiti 11 ket agpaay iti amin a 144,000 a napulotan a Kristiano. (Luc. 12:32; Apoc. 5:9, 10; 14:1) No saanna ida a pagtalkan, mangaramid ngata ni Jesus iti tulag a kayuloganna ti pannakipagarida kenkuana iti Pagarian?
9. Ania dagiti karaman “kadagiti amin a sanikua [ni Kristo]”?
9 Kanayonanna, dinutokan ni Jesu-Kristo ti matalek ken masirib nga adipen “nga agaywan kadagiti amin a sanikuana”—amin a banag ditoy daga nga adda pakainaiganna iti Pagarian. (Mat. 24:47) Karaman kadagita dagiti pasilidad iti sangalubongan a hedkuarter dagiti Saksi ni Jehova, dagiti sanga nga opisina iti nadumaduma a pagilian, dagiti Assembly Hall ken Kingdom Hall iti intero a lubong. Karaman met ti trabaho a panangasaba iti Pagarian ken panangaramid iti adalan. Adda aya asinoman a mangipaaywan kadagiti agkakapateg a sanikuana iti maysa a dina talken?
10. Ania ti mangipakita nga adda ni Jesu-Kristo kadagiti napulotan a pasurotna?
10 Sakbay unay ti iyuulina sadi langit, nagparang ti napagungaren a ni Jesus kadagiti matalek nga adalanna ken nagkari kadakuada: “Adtoy! addaak kadakayo iti amin nga al-aldaw agingga iti panungpalan ti sistema ti bambanag.” (Mat. 28:20) Tinungpalna kadi dayta a karina? Iti napalabas a 15 a tawen, ti bilang dagiti kongregasion dagiti Saksi ni Jehova iti intero a lubong ket immadu manipud iti agarup 70,000 agingga iti nasuroken a 100,000—nasurok nga 40 a porsiento nga irarang-ay. Mano met ti nainayon a kabbaro nga adalan? Dandani 4.5 a milion nga adalan ti nabautisaran iti napalabas a 15 a tawen—promedio a nasurok a 800 kada aldaw. Dagita a naisangsangayan nga irarang-ay ket nalawag a pammaneknek nga iwanwanwan ni Kristo dagiti napulotan a pasurotna babaen kadagiti gimong ti kongregasion ken supsuportaranna ida iti trabahoda a panangaramid iti adalan.
Matalek ken Masirib ti Adipen
11, 12. Kasano nga ipakpakita ti adipen ti kinamatalek ken kinasiribna?
11 Yantangay naan-anay nga agtalek da Jehova a Dios ken ni Jesu-Kristo iti matalek ken masirib nga adipen, saan kadi a rumbeng a kastatayo met? Ngamin, pinaneknekanen ti adipen nga isu ket matalek iti panangitungpalna iti naituding nga annongenna. Kas pagarigan, agarup 130 a tawenen a maipabpablaak ti magasin a Pagwanawanan. Dagiti gimong, asamblea, ken kombension dagiti Saksi ni Jehova ket agtultuloy a mangpabpabileg iti espiritualidadtayo.
12 Masirib met ti matalek nga adipen ta pulos a di agtignay a sipapangas, dina un-unaan ni Jehova, ken di agtukiad no ti maysa a banag ket nalawag nga iturturong ti Dios. Kas pagarigan, dagiti panguluen ti palso a relihion ket agdadata nga anamongan wenno sibabatad a panuynoyanda kas gagangayen ti inaagum ken di nadiosan a kababalin dagiti tattao iti lubong, ngem ti adipen ket mangipapaay kadagiti pakdaar maipapan kadagiti palab-og ti dakes a sistema ni Satanas. Gapu ta bembendisionan da Jehova a Dios ken Jesu-Kristo ti adipen, kabaelanna nga ipaay dagiti nainsiriban ken naintiempuan a pakdaar. Maikari ngarud ti adipen iti naan-anay a panagtalektayo. Ngem kasanotay a maipakita nga agtalektayo iti matalek ken masirib nga adipen?
‘Kumuyog’ Kadagiti Napulotan Bayat a Sursurotenda ti Kordero
13. Sigun iti padto ni Zacarias, kasanotay a maipakita ti panagtalektayo iti matalek ken masirib nga adipen?
13 Ti Zacarias a libro iti Biblia dinakamatna ti “sangapulo a lallaki” nga immasideg iti “maysa a lalaki a Judio,” sada kinuna: “Kumuyogkaminto kadakayo.” (Basaen ti Zacarias 8:23.) Yantangay ti “maysa a lalaki a Judio” ket nadakamat kas “kadakayo,” irepresentarna ngarud ti maysa a grupo dagiti tattao. Iti kaaldawantayo, irepresentarna dagiti natda a Kristiano a napulotan iti espiritu—a paset “iti Israel ti Dios.” (Gal. 6:16) Ti “sangapulo a lallaki manipud kadagiti amin a pagsasao ti nasnasion” irepresentarna ti dakkel a bunggoy ti sabsabali a karnero. No kasano a dagiti napulotan a Kristiano sursurotenda ni Jesus iti sadinoman a papananna, ti dakkel a bunggoy ‘kumuykuyog’ wenno makikadkadua iti matalek ken masirib nga adipen. Dagidiay paset ti dakkel a bunggoy dida koma pulos mabain a mangyam-ammo iti bagida kas kakadua dagidiay “makiramraman iti nailangitan a pannakaayab.” (Heb. 3:1) Saan nga imbain ni Jesus nga awagan dagiti napulotan iti “kakabsat.”—Heb. 2:11.
14. Kasanotay a maipaay ti nasungdo a panangsuportatayo kadagiti kakabsat ni Kristo?
14 Kinuna ni Jesu-Kristo a no supsuportarantayo dagiti kakabsatna, kas man la isu ti supsuportarantayo. (Basaen ti Mateo 25:40.) Iti ania a pamay-an ngarud a dagidiay addaan iti naindagaan a namnama masuportaranda dagiti napulotan iti espiritu a kakabsat ni Kristo? Ti kangrunaan ket babaen ti panangtulong kadakuada iti trabaho a panangikasaba iti Pagarian. (Mat. 24:14; Juan 14:12) Bayat a bumasbassit ti bilang dagiti napulotan ditoy daga iti panaglabas dagiti dekada, umad-adu ti sabsabali a karnero. No makipaset iti trabaho a panangasaba dagidiay addaan iti naindagaan a namnama, nga agserbida no posible kas amin-tiempo nga ebanghelisador, supsuportaranda dagiti napulotan iti espiritu a mangitungpal iti annongen a panangaramid iti adalan. (Mat. 28:19, 20) Ditay met liwliwayan dagiti gundaway a mangsuportar iti dayta a trabaho babaen ti panangipaaytayo kadagiti pinansial a kontribusion iti nadumaduma a wagas.
15. Ania ti rumbeng a reaksion ti tunggal Kristiano kadagiti naintiempuan a naespirituan a taraon nga ipapaay ti adipen ken kadagiti ar-aramidenna a desision mainaig iti organisasion?
15 Kas indibidual a Kristiano, kasano ti panangmatmattayo iti naintiempuan a naespirituan a taraon nga ipapaay ti matalek nga adipen babaen kadagiti naibasar-Biblia a publikasion ken Nakristianuan a taripnong? Siyayaman kadi nga ap-aprobetsarentayo dagita ken sidadaan nga iyap-aplikartayo dagiti naadaltayo? Ania ti reaksiontayo kadagiti desision nga ar-aramiden ti adipen mainaig iti organisasion? Ti situtulok a panagtulnogtayo iti naipaay a panangiturong ket pammaneknek nga agtaltalektayo iti urnos ni Jehova.—Sant. 3:17.
16. Apay a rumbeng nga agimdeng ti amin a Kristiano kadagiti kakabsat ni Kristo?
16 Kinuna ni Jesus: “Imdengan dagiti karnerok ti timekko, ket am-ammok ida, ket surotendak.” (Juan 10:27) Pudno dayta kadagiti napulotan a Kristiano. Dagiti ngay ‘kumuykuyog’ kadakuada? Masapul nga imdenganda ni Jesus ken dagiti kakabsatna. Ngamin, naitalek kadakuada ti kangrunaan a rebbengen a mangaywan iti naespirituan a pagimbagan ti ili ti Dios. Ania ti karaman iti panagimdeng iti timek dagiti kakabsat ni Kristo?
17. Ania ti karaman iti panagimdeng iti klase adipen?
17 Ti matalek ken masirib nga adipen ita ket irepresentar ti Bagi a Manarawidwid a mangidadaulo ken mangur-urnos iti trabaho a panangikasaba iti Pagarian iti intero a daga. Dagiti kameng ti Bagi a Manarawidwid ket papanglakayen nga aduan iti kapadasan ken napulotan iti espiritu. Partikular nga isuda ti madeskribir kas “dagidiay mangidadaulo” kadatayo. (Heb. 13:7) Iti panangaywanda iti nasurok a 7,000,000 a manangiwaragawag iti Pagarian iti intero a lubong iti nasurok a 100,000 a kongregasion, dagitoy a napulotan a manangaywan ‘aduanda iti aramiden iti trabaho ti Apo.’ (1 Cor. 15:58) Ti panagimdeng iti klase adipen kaipapananna ti naan-anay a pannakikooperar iti Bagi a Manarawidwidna.
Mabendisionan Dagidiay Agimdeng iti Adipen
18, 19. (a) Kasano a mabendisionan dagidiay nagimdeng iti matalek ken masirib nga adipen? (b) Ania ti rumbeng a determinasiontayo?
18 Sipud idi nadutokan, nagtultuloyen ti matalek ken masirib nga adipen a “mangyeg kadagiti adu iti kinalinteg.” (Dan. 12:3) Karaman kadagitoy dagidiay addaan iti namnama a makalasat iti pannakadadael ti agdama a dakes a sistema ti bambanag. Anian a bendision dayta a nalinteg a takder iti Dios!
19 Iti masanguanan, inton ‘ti nasantuan a siudad, ti Baro a Jerusalem [a buklen ti 144,000] ket bumaba nga aggapu idiay langit manipud iti Dios ken naisagana kas nobia a naarkosan maipaay iti asawana,’ anianto ti mapasaran dagidiay nagimdeng iti timek ti adipen? Kuna ti Biblia: “Ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apoc. 21:2-4) Aduantayo ngarud iti rason nga agimdeng ken Kristo ken kadagiti mapagtalkan a napulotan iti espiritu a kakabsatna.
Ania ti Naadalyo?
• Ania ti pammaneknek nga agtalek ni Jehova iti matalek ken masirib nga adipen?
• Ania ti mangipakita a naan-anay nga agtalek ni Jesu-Kristo iti klase adipen?
• Apay a maikari a pagtalkantayo ti matalek nga adipen?
• Kasanotay nga ipakita ti panagtalektayo iti adipen?
[Ladawan iti panid 25]
Ammoyo kadi no siasino ti pinili ni Jehova nga agbalin a nobia ti Anakna?
[Ladawan iti panid 26]
Intalek ni Jesu-Kristo dagiti “sanikuana” iti matalek ken masirib nga adipen
[Ladawan iti panid 27]
No mangaskasabatayo, supsuportarantayo dagiti napulotan iti espiritu