Ti Karkararag Sapulenna ti Ar-aramid

“Ni Jehova adayu kadagiti nadangkes, ngem ipangagna ti kararag dagiti nalinteg.”​—PROVERBIO 15:29.

1. Aniat’ maysa a kondision a maragpat tapno sungbatan ti Dios ti karkararagtayo?

AMIN dagiti pagannurotan ni Jehova ti nainsiriban, nalinteg, ken naayat. Nikaanoman saanda a makapadagsen. (1 Juan 5:3) Ramanen dayta dagiti pagannurotanna maipapan iti kararag, a maysa kadakuada ket masapul nga agbiagtayo a maitunos kadagiti karkaragtayo. Ti panagtigtignaytayo masapul a makaay-ayoda ken ni Jehova a Dios. Ta no saan, kasanotayo a manamnama ti panangusigna kadagiti dawdawat ken ararawtayo nga addaan pabor?

2, 3. Apay a di sinungbatan ni Jehova ti karkararag dagiti Israelitas, kas makita kadagiti sasao ni Isaias, Jeremias, ken ni Mikias?

² Daytoy ti paset ti kararag a maliplipatan ti kaaduan nga adda iti Kakristianuan, kas met laeng ti pannakalipat dagiti apostata nga Israelitas idi kaaldawan ni Isaias. Isut’ gapuna a kinuna ni Jehova babaen iti panangibagi ti mammadtona a kunkunana: “Uray no agaramidkayo kadagiti adu a lualo, diakto ipangag . . . Agbuggokayo; agdaluskayo; iyadayuyo ti dakes kadagiti ar-aramidyo manipud iti sanguanan dagiti matak; agsardengkayo nga agaramid iti dakes. Sursuruenyo ti agaramid iti naimbag.” (Isaias 1:15-17) Wen, no kayat dagidiay nga Israelitas ti pabor ti Dios, masapul nga agtignayda iti pamay-an a makaay-ayo kenkuana. Kas ti nagsayaat a pannakaisaona: “No kayatyo a ti Dios denggenna no agkarkararagkayo, masapul nga agdengngegtayo Kenkuana no isu ti agsasao.”

³ Kinapudnona, maulit-ulit a nakita ni Jehova a nasken ti panangipalagipna iti ilina nga Israel kadagitoy a kinapudno. Gapuna intay mabasa: “Ti di mangiyallingag iti lapayagna iti panagdengngegna iti linteg​—uray pay ti kararagna makarimon” iti Dios. “Ni Jehova adayu kadagiti nadangkes, ngem ipangagna ti kararag dagiti nalinteg.” (Proverbio 28:9; 15:29) Gapu iti daytoy a kasasaad, nagsennaay ni Jeremias: “Inabbongan [ni Jehova] ti bagim iti ulep, iti kasta awan ti makalasat a kararag.” (Un-unnoy 3:44) Pudno unay, ti pakdaar a naipaltiing nga impaay ni Mikias natungpal: “Iti kasta umawagdanto ken Jehova, ngem saannanto a sungbatan ida. Wen, ilingednanto ti rupana kadakuada iti dayta a panawen, a kas maiyanatup iti panagaramidda iti dakes kadagiti gapuananda.”​—Mikias 3:4; Proverbio 1:28-32.

4. Aniat’ mangipamatmat nga uray pay iti ili ni Jehova dadduma saanda nga apresiaren ti pannakasapul dagiti ar-aramid a maitunos iti karkararagda?

⁴ Gapuna nasken ti panagbiag a maitunos iti karkararagtayo. Nasken aya a maipaganetget daytoy a kinapudno itatta? Pudno a kasta, saan laeng a gapu iti kasasaad iti Kakristianuan no di ket gapu iti kasasaad iti dedikado nga ili ni Jehova. Kadagiti nasurok ngem 3,000,000 nga agibumbunannag ti naimbag a damag idi napan a tawen, dimmanon iti 37,000 dagiti nailaksid kadagiti kababalin a di maiyanatup iti maysa a Kristiano. Daytat’ agtinnag iti ratio nga agarup maysa iti kada 80. Mabalbalin, kaaduan kadagitoy nga indibidual agkarkararagda met a sagpaminsan. Ngem, agtigtignayda aya a maitunos iti karkararagenda? Nikaanoman! Uray pay dagiti dadduma kadagiti panglakayen nga addan iti amin-tiempo a serbisio iti pinulpullo a tawtawen ti nairaman kadagidiay nadisiplinaan. Anian a nakalkaldaang! Pudno unay, “Ti mangipagarup nga adda a sitatakder kitaenna ta di maikulbo,” nga isut’ di agtignay iti pamay-an a mamagbalin a di makaay-ayo dagiti karkararagna iti Nangaramid kenkuana.​—1 Corinto 10:12.

No Apay dagiti Karkararag Kasapulanda ti Ar-aramid

5. Tapno sungbatan ni Jehova ti karkararagtayo, kasanotay a paneknekan ti kinapasnektayo?

⁵ Tapno dagiti karkararagtayo ipangag ni Jehova a Dios, saantay laeng koma a nadalus iti moral ken iti espiritual no di ket paneknekantay met ti kinapasnektayo iti karkararagtayo babaen iti panangitungpal iti adda nga ikarkararagtayo. Ti kararag a mismo ket saan nga isut’ kasukat ti maysa a naimpusuan, nasaririt a panagregget. Saan nga aramiden ni Jehova para kadatayo ti maaramidantay iti bagbagitayo babaen iti sipapasnek a panangiyaplikar iti balakad ti Saona ken ti panangsurot iti panangiwanwan ti nasantuan nga espirituna. Rebbeng a situtuloktayo a mangaramid iti amin a kabaelantayo iti daytoy a banag tapno maaddaan ti pangibatayan a sungbatanna ti karkararagtayo. Gapu iti dayta, ‘rebbengna a ditay agdawdawat iti nasursurok ngem ti mabalintay nga aramiden,’ kas iti umiso a panangiyebkas iti maysa.

6. Agpaay kadagiti ania a dua a rason a masapul nga agkarkararagtayo?

⁶ Nupay kasta, mabalin a maisaludsod: ‘Apay pay laeng nga agkararag no itrabahotay pay met laeng ti karkararagentayo?’ Rebbeng nga agkararagtayo gapu kadagiti dua a naimbag a rason. Umuna, babaen iti karkararagtayo bigbigentayo nga amin a naimbag a bambanag aggapu iti Dios. Isu ti Manangted iti isuamin a naimbag ken naan-anay a sagut​—ti lawag ti init, ti tudo, dagiti nabunga a panawen, ken adu pay! (Mateo 5:45; Aramid 14:16, 17; Santiago 1:17) Maikadua, naballigi man wenno saan dagiti panagreggettayo agpannuray iti bendision ni Jehova. Kas mabasatayo idiay Salmo 127:1: “No saan a ni Jehova ti mangbangon iti balay, agbannogda a barengbareng dagiti mangbangon. No saan a ni Jehova ti mangaywan iti siudad, ti agbantay agpuyat ngem bambannogna laeng.” Ti nangaramid iti isu met laeng a punto isu dagitoy a sasao ni apostol Pablo idiay 1 Corinto 3:6, 7: “Nagmulaak, ni Apollos nagsibug, ngem inted ti Dios ti idadakkel; iti kasta uray ti nagmula, uray ti agsibug, awan aniaman no di laeng ti Dios a mangted ti idadakkel.”

Sumagmamano kadagiti Kadaanan nga Ulidan

7, 8. (a) Ania a pasamak iti biag ni Jacob ti mangipakita nga inapresiarna a dagiti karkararag masapul a mapakuyogan ti ar-aramid? (b) Ania a pangarigan ti inted ni Ari David iti daytoy?

⁷ Dagiti Kasuratan mangtedda kadagiti adu a kaso a mangipakpakita a nagreggetan dagiti matalek nga ad-adipen ni Jehova ti inkararagda. Usigentay ti sumagmamano kadagiti mapagulidanan. Gapu ta nagun-odan ni Jacob nga apoko ni Abraham ti bendision ti kinainauna nga anak, ni Esau a manongna ti naaddaan iti makapapatay a gura kenkuana. (Genesis 27:41) Agarup 20 a tawen kamaudiananna, idi agsubsublin ni Jacob manipud Padan-aram iti daga a nakaiyanakanna nga addaan dakkel a sangakabbalayan ken adu a dingoen, nangngegna a sumabsabat ni Esau kenkuana. Idi malagipna ti sakit ti nakem ni Esau, nagkararag a sipapasnek ni Jacob ken ni Jehova a maipaay iti pannalaknibna manipud pungtot ti kabsatna. Ngem binaybay-anna aya dayta iti daytan? Pudno a saan. Isut’ immun-una a nagipatulod kadagiti naparabur a sagsagut, a pinampanunotna: “Babaen iti sagut nga ipatulodko nga umuna mabalin nga isu ti mapalamiis.” Ket pudno a nagbalin a kasta, ta idi nagsabaten dagiti agkabsat, ni Esau inabrasana ni Jacob ket inagkanna.​—Genesis, kapitulo 32, 33.

⁸ Ni David ti nangted iti sabali pay nga ulidan iti panagregget a maipaay iti inkararagna. Idi inagaw ni Absalom nga anakna ti tronona, ti mamalakad ni David nga isu ni Ahitofel pinilina ti dasig ni Absalom. Gapuna nagaramid ti napasnek nga araraw ni David tapno matungday koma ti balakad ni Ahitofel. Nagkararag kadi laeng ni David a maipaay iti dayta? Saan, binilinna ti nasungdo a mamalakadna a ni Cusai a tumipon ken ni Absalom tapno matungdayna ti balakad ni Ahitofel. Ket kasta nga agpayso ti nagbanagan dagiti bambanag. Nagtignay ni Absalom a maitunos iti dakes a balakad nga inted ni Cusai kenkuana, ket linaksidna ti balakad ni Ahitofel.​—2 Samuel 15:31-37; 17:1-14; 18:6-8.

9. Kasanot’ panangipakita ni Nehemias nga inapresiarna ti prinsipio a dagiti kararag kasapulanna dagiti ar-aramid?

⁹ Ti sabali pay a pangarigan a mabalin a maisitar a pakabagbagaantayo isu ti maipapan ken ni Nehemias. Isut’ addaan dakkel a proyekto nga itungpal​—ti pannakaibangon manen dagiti bakud ti Jerusalem. Nupay kasta, adu dagiti kabusor a nagkukumplot a maibusor kenkuana. Ni Nehemias ti agpadpada a nagkararag ken nagtrabaho, kas ti intay mabasa: “Ngem nagkararagkami iti Dios ket nangisaadkami ti agbantay a maibusor kadakuada iti aldaw ken rabii.” Manipud iti dayta, kagudua kadagiti agtutubo a lallaki ni Nehemias ti nagtakder a sisasagana a mangsalaknib iti sabali pay a kagudua, dagidiay mangibangbangon iti bakud.​—Nehemias 4:9, 16.

Ti Ulidan ni Jesus

10, 11. Ania dagiti ulidan nga inted ni Jesus a mangipakpakita nga isut’ nagtignay a maitunos iti karkararagna?

¹⁰ Ni Jesu-Kristo ti nangted nasayaat nga ulidan ti intayo panangitrabaho iti ikarkaragtayo. Sinuruannatayo nga agkararag: “Madaydayaw koma ti naganmo.” (Mateo 6:9) Ngem ni Jesus inaramidna met amin a kabaelanna tapno dagiti agdengdengngeg kenkuana ket masantipikarda met ti nagan ni Amana. Kasta met, saan a kinedngan ni Jesus ti bagina iti panagkararag: “Ama, itan-okmo ti naganmo.” (Juan 12:28) Saan, inaramidna ti kabaelanna a mangitan-ok ti nagan ni Amana ket tinignayna met dagiti dadduma a mangaramid iti kasta.​—Lucas 5:23-26; 17:12-15; Juan 17:4.

¹¹ Idi makitana ti naindaklan a naespirituan a pagkasapulan dagiti tattao, kuna ni Jesus kadagiti adalanna: “Pudno a ti anien adu, ngem bassitda dagiti agani. Dawatenyo ngarud, iti Apo ti anien [ni Jehova a Dios] tapno mangibaon koma kadagiti agani iti paganianna.” (Mateo 9:37, 38) Binaybay-an aya ni Jesus dagiti bambanag kalpasan dayta? Saan a pulos! Kalpasan dayta, isut’ nangibaon iti 12 nga apostol a paris-paris iti panagdaliasat a mangaskasaba, wenno iti ‘panagani.’ Kamaudiananna, nangibaon pay ni Jesus ti 70 a managebanghelio a mangaramid iti kasta met laeng.​—Mateo 10:1-10; Lucas 10:1-9.

Panangiyaplikar iti Prinsipio

12. Aniat’ pakainaigan ti aramid iti karkararagtayo nga itden koma ti Dios ti inaldaw a taraontayo?

¹² Nalawag, ni Jehova a Dios namnamaentayo nga agbalin a napamaysa, nga agtignay a maitunos iti karkararagtayo, iti kasta pampaneknekantay ti kinapasnektayo. Imbaga ni Jesus nga agkararagtayo: “Itedmo kadakami ita ti taraonmi itoy nga aldaw.” (Mateo 6:11) Nainkalintegan laeng, ngarud, nga amin dagiti paspasurotna agdawatda iti Dios iti dayta a banag. Ngem namnamaentayo aya a sungbatan ti nainlangitan nga Amatayo dayta a kararag no ditay agtignay maipapan iti dayta? Siempre saan. Gapuna intay mabasa: “Ti nasadut agtarigagay”​—nalabit babaen pay ti panagkararagna​—“ngem ti kararuana awan mapaaddana.” (Proverbio 13:4) Kasta met laeng ti punto nga inaramid ni apostol Pablo idiay 2 Tesalonica 3:10, a kunkunana: “No adda madi nga agtrabaho, di met koma mangan.” Ti panangikararag ti inaldaw a taraontayo ti masapul a mapakuyogan iti kinatuloktay nga agtrabaho. Makapainteres, sisisirib a kinuna ni Pablo a dagidiay madi nga “agtrabaho” saanda koma a mangan. Dadduma a tarigagayanda ti agtrabaho ti mabalin nga awan panggedanda, masakit, wenno nataenganda unayen nga agtrabaho. Kayatda ti agtrabaho, ngem daytoy ket adda iti labes dagiti kasasaadda. Gapuna, mabalin a nainkalintegan nga ikararagda ti inaldaw a taraonda ket manginanama nga awatenda dayta.

13. Tapno sungbatan ni Jehova ti kararagtayo maipaay iti nasantuan nga espirituna, aniat’ masapul nga aramidentayo?

¹³ Binalakadannatay met ni Jesus nga idawat iti nainlangitan nga Amana ti nasantuan nga espirituna. Kas impasiguro ni Jesus kadatayo, ad-adda a situtulok nga itden ti Dios kadatayo ti nasantuan nga espirituna ngem kadagiti naindagaan a nagannak a mangted kadagiti naimbag a bambanag kadagiti annakda. (Lucas 11:13) Ngem manamnamatayo aya a ni Jehova a Dios mangipaay iti nasantuan nga espirituna kadatayo a namilagruan nga awan ti aniaman a panagregget iti biangtayo? Nikaanoman! Masapul nga aramidentayo ti amin a kabaelantayo nga umawat ti nasantuan nga espirituna. Mainayon iti panangikararag iti dayta, kasapulan ti intay panangtaraon a sigagaget iti bagbagitayo iti Sao ti Dios. Apay? Agsipud ta saan nga itden ni Jehova a Dios ti nasantuan nga espirituna a maisina manipud iti Saona, ken ditay met manamnama nga awaten ti nasantuan nga espiritu no laksidentayo ti naindagaan a kalasugan nga us-usaren ni Jehova itatta, “ti matalek ken naannad nga adipen,” nga ireprepresentar ti Bagi a Manarawidwid dagiti Saksi ni Jehova. No awan tulong manipud iti daytoy nga “adipen,” pulos a ditay maawatan a naan-anay ti pateg iti basbasaentayo wenno ditay ammo no kasano ti panangiyaplikartayo iti maad-adaltayo.​—Mateo 24:45-47.

14, 15. (a) Tapno sungbatan ni Jehova ti karkararagtayo a maipaay iti kinasirib, kasano ti masapul a pannakitunostayo? (b) Kasano a paneknekan daytoy ti ulidan ni Ari Salomon?

¹⁴ Ti prinsipio a dagiti karkararag kasapulanda ti ar-aramid agaplikar met kadagitoy a sasao ni adalan a Santiago, ti kabsat ni Jesus iti ina: “Ngem no siasinoman kadakayo agkurang iti kinasirib, agdawat koma iti Dios, isu a mangted a sikakaasi kadagiti isuamin ken saan a mangpabain; ket maitedto kenkuana.” (Santiago 1:5; Mateo 13:55) Ngem ipaay aya ti Dios daytoy a kinasirib kadatayo babaen iti maysa a milagro? Saan. Umuna, masapul a maaddaantay ti umiso a kababalin, kas iti intay mabasa: “Isuronanto ti dalanna iti naemma.” (Salmo 25:9) Ket kasano ti panangisuro ti Dios “iti naemma”? Babaen iti Saona. Ditoy manen, masapul nga agreggettayo tapno maawatan dayta ken iyaplikar dayta, kas naipamatmat idiay Proverbio 2:1-6: “Anakko, no awatemto dagiti saok ket ipempenmo kenka dagiti bilinko, iti kasta iyallingagmo ta lapayagmo iti kinasirib, ken ikapetmo ita pusom ti pannakaawat; wen, awagam ti kinasaririt ket idir-im ta timekmo a maipaay iti pannakaawat, no isu birukem a kas pirak, . . . iti kasta maawatamto ti panagbuteng ken ni Jehova, ken masarakamto ti pannakaammo iti Dios. Ta ni Jehova mangted iti sirib.”

¹⁵ Idi a nagkararag ni Ari Salomon a maipaay iti kinasirib ket simimilagro a sinungbatan ti Dios ti kararagna, ti kadi prinsipio a dagiti kararag kasapulanna ti ar-aramid agaplikar met? Wen, agaplikar met, ta kas ari ti Israel, ni Salomon nakalikaguman nga isuratna ti kabukbukodanna a kopia ti Linteg, a basaenna nga inaldaw dayta, ken iyaplikar dayta iti panagbiagna. Ngem idi kimmuntra ni Salomon kadagiti bilbilinna, kas idi pinaaduna ti asawana ken kabayona, dagiti ar-aramidna saandan a maitunos iti karkararagna. Kas resultana, nagbalin nga apostata ni Salomon ket natay kas maysa a “maag.”​—Salmo 14:1; Deuteronomio 17:16-20; 1 Ar-ari 10:26; 11:3, 4, 11.

16. Ania nga ilustrasion ti mangipakita a dagiti karkararagtayo a mangparmek ti nainlasagan a pagkapuyan ti masapul a mapakuyogan ti ar-aramid?

¹⁶ Ti prinsipio a dagiti karkararag mapakuyoganda ti ar-aramid agaplikar met no idawdawattayo ti tulong iti Dios a mangparmek iti maysa a naigameren, naagum a kababalin. Gapuna inamin ti maysa a kabsat a payunir a babai ti pannakaadiktona kadagiti nakabaybayag nga estoria iti telebision, a buybuyaenna ida manipud alas 11:00 t.b. ingganat’ alas 3:30 t.m. kada aldaw. Idi naammuanna manipud maysa a palawag iti kumbension distrito no kasano ti kinadakes dagitoy imoral a programa, inyegna dayta a banag iti Dios babaen iti kararag. Nupay kasta, nabayag bassit kenkuana sakbay a naparmekna dayta a kababalin. Apay? Agsipud ta kas kinunana: ‘Agkararagak tapno maparmekko dayta a bisio ngem kalpasanna buyaekto met laeng dayta a programa. Gapuna naikeddengko nga agtalinaedak iti tay-ak ti serbisio iti agmalmalem tapno saanakon a masulisog. Iti kamaudiananna, nakagtengak iti punto a mabalinkon nga iddepen ti TV iti agsapa ket salimetmetan dayta nga agmalmalem.’ Wen, mainayon iti panangikararag a maparmek ti pagkapuyanna, isu met ti nagtrabaho tapno maparmekna dayta.

Ti Kararag ken ti Panangasabatayo

17-19. (a) Aniada a kinapudno ti mangipakita a dagiti Saksi ni Jehova agtigtignayda a maitunos iti karkararagda? (b) Ania a pangarigan iti indibidual ti mangaramid iti dayta met la a punto?

¹⁷ Awanen pakasarakan ti ad-adda a kinaagpayso ti prinsipio a dagiti kararag sapulenna ti ar-aramid ngem iti trabaho a panangikasaba iti Pagarian. Gapuna, amin dagiti Saksi ni Jehova saanda laeng nga ikararag ti irarang-ay ti makipagani no di ket ipaayda met dagiti bagbagida iti dayta a trabaho. Kas resultana, nakitada ti nakaskasdaaw nga idudur-as iti agsasaruno a dagdaga. Kas ti maysa laeng a pangarigan: Idi 1930 adda laeng maysa a saksi ni Jehova a mangaskasaba idiay Chile. Itatta, dayta maymaysa a Saksi ti nagbalinen a saan laeng a sangaribo no di ket agangay 30,000. (Isaias 60:22) Bunga laeng kadi daytoy ti panagkarkararag? Saan, nairaman met ti panagtrabaho. Ta, idi 1986 laeng, dagiti Saksi ni Jehova idiay Chile ti nakabusbos ti nasurok a 6,492,000 nga oras iti panangaskasaba!

¹⁸ Pudno met dayta idiay pakaiparitan ti panangaskasaba. Saan laeng nga ikarkararag dagiti Saksi ti idudur-as no di ket inaramidda dayta a sililimed ket intultuloyda ti panangaskasaba. Gapuna, agpapan pay opisial nga ibubusor, maar-aramid ti panagrang-ay kadagitoy a dagdaga. Gapuna, kadagiti 33 a dagdaga nga ayan ti kasta nga opisial nga ibubusor kadagiti Saksi ni Jehova, bayat iti 1986 a tawen serbisio nakabusbosda ti nasurok a 32,600,000 nga oras iti panangaskasabada ket nagragsakanda ti 4.6-porsiento nga irarang-ay!

¹⁹ Siempre, ti prinsipio a dagiti kararag kasapulanda ti ar-aramid agaplikar met iti indibidual. Mabalin nga ikararagtayo ken ni Jehova a maaddaantayo ti panangiyadal iti Biblia iti pagtaengan ngem mabalin a ditay met ar-aramiden ti amin a kabaelantayo a makagun-od iti maysa. Daytat’ kapadasan ti maysa a payunir. Gapu ta maymaysa laeng ti iyad-adalanna ti Biblia, isu ti nangikararag a maaddaan koma pay ti ad-adu. Binaybay-anna laeng aya dagiti bambanag iti dayta? Saan, no di ket siaannad nga inadalna ti ministeriona ket naduktalanna a kadagiti panagsarungkarna saanna nga iririing ti tema maipapan iti panangiyadal ti Biblia iti pagtaengan. Iti panagtultuloyna iti daytoy a linea, di nagbayag isut’ naaddaan pay iti dua a panangiyadal iti Biblia.

20. Kasano a magupgop ti prinsipio a dagiti kararag kasapulanda ti ar-aramid?

²⁰ Adu pay a pangarigan ti maited a mangpaneknek a dagiti kararag kasapulanda ti ar-aramid. Kas pangarigan, adda dagidiay maipapan iti personal a relasion iti pamilia wenno iti kongregasion. Ngem dagiti napalabasen a pangarigan umdasdan a mangipakita a naan-anay a nalawag a dagiti kararag kasapulanda ti ar-aramid. Daytoy ti nainkalintegan unay, ta ditay manamnama a mangted ni Jehova a Dios iti paborable a konsiderasion kadagiti dawattayo no isu met ti mapaladingittayo babaen iti mismo a kababalintayo. Masapul met nga aramidentayo ti amin a kabaelantayo a maitunos iti karkararagtayo no namnamaentayo nga aramiden ni Jehova para kadatayo ti ditay maaramidan a bukbukodtayo. Pudno unay, dagiti prinsipio ni Jehova ket nainsiriban ken nainkalintegan. Daytat’ addaan ti pateg, ket agpaay a pakagunggonaantayo no agtignaytayo a maitunos kadakuada.

Malagipyo Pay Aya?

◻ Ania a kasapulan maipapan iti kararag ti nalipatan dagiti adu iti kadaanan nga Israel?

◻ Apay a nainkalintegan a kalikaguman ti Dios nga agtrabahotayo agraman panagkararagtayo iti intay tartarigagayan?

◻ Ania dagiti kadaanan a pangarigan a mangipakpakita a nagaramid dagiti ad-adipen ni Jehova iti banag nga inkararagda?

◻ Tapno sungbatan ti Dios dagiti karkararagtayo maipapan iti nasantuan nga espirituna ken kinasirib, aniat’ masapul nga ar-aramidentayo?

◻ Kasano a ti prinsipio a dagiti kararag sapulenda ti ar-aramid agaplikar iti ministeriotayo iti tay-ak?

[Ladawan iti panid 17]

Ingunamgunam ni Jesus kadagiti adalanna a kararagen ti ad-adu pay nga agani. Ngem isu met ti nangibaon kadakuada iti panangaskasaba wenno iti trabaho a ‘panagani’

[Ladawan iti panid 18]

Ikarkararagyo aya ti tulong a matengngel ti panagbuybuyayo iti telebision? Ngarud iyaplikaryo ti prinsipio a dagiti kararag kasapulanda ti ar-aramid babaen ti panangiddepyo iti TV