Kapitulo 18

“Sapulen nga Umuna ti Pagarian”

TI KANGRUNAAN a tema ti Biblia isut’ pannakasantipikar ti nagan ni Jehova babaen iti Pagarian. Insuro ni Jesu-Kristo dagiti pasurotna a sapulenda nga umuna ti Pagarian, nga iyun-unada dayta ngem kadagiti dadduma nga interes ti biag. Apay?

Masansan nga inlawlawag Ti Pagwanawanan a gapu ta isut’ Namarsua, ni Jehova isut’ Sapasap a Soberano. Isut’ maikari a pangipaayan dagiti parsuana iti kangrunaan a panangitan-ok. (Apoc. 4:11) Nupay kasta, idi rugrugi ti natauan a historia, adda espiritu nga anak ti Dios a pinagbalinnat’ bagina a Satanas a Diablo a sitatangsit a nangkarit iti kinasoberano ni Jehova. (Gen. 3:1-5) Sa, impato ni Satanas nga adda agimbubukodan a motibo dagiti amin nga agserserbi ken Jehova. (Job 1:9-11; 2:4, 5; Apoc. 12:10) Iti kasta nasinga ti kinatalnat’ uniberso.

Iti adun a dekada, inlawlawag dagiti publikasion ti Watch Tower a nangipaay ni Jehova iti probision a mangrisut kadagitoy nga isyu iti wagas a mangipaduyakyakto, saan la nga iti mannakabalin amin a bilegna no di ket ti kinatan-ok ti siribna, kinahustisiana, ken ayatna. Maysa a sentral a paset dayta a probision isut’ Mesianiko a Pagarian ti Dios. Babaen iti dayta a Pagarian, ti sangatauan maikkan ti nawadwad nga oportunidad a mangadal kadagiti dalan ti kinalinteg. Babaen iti Pagarian, madadaelto dagiti nadangkes, maalangonto ti kinasoberano ni Jehova, ket ti panggepna mairingpasto nga isut’ panagbalin ti daga a paraiso a napno kadagidiay pudpudno nga agayat iti Dios ken iti maysa ken maysa ken mabendisionandat’ perpekto a biag.

Gaput’ pateg dayta, imbalakad ni Jesus kadagiti pasurotna: “Itultuloyyo, ngarud, a sapulen nga umuna ti pagarian.” (Mat. 6:10, 33) Nakaipaayen dagiti Saksi ni Jehova itoy moderno a tiempo ti adu nga ebidensia nga ikagkagumaanda nga ipangag dayta a balakad.

Tallikudan ti Isuamin Gaput’ Pagarian

Idi pay la damo, inamirisen dagiti Estudiante ti Biblia ti kayulogan ti panangsapul nga umuna ti Pagarian. Pinagsasaritaandat’ pangngarig ni Jesus nga impadanat’ Pagarian iti maysa a perlas a nanginat’ pategna a daydi lalaki “inlakona amin dagiti bambanag nga adda kenkuana ket ginatangna dayta.” (Mat. 13:45, 46) Inutobdat’ kaipapanan ti balakad ni Jesus iti daydi nabaknang nga agtutubo nga agturay nga ilakona ti isuamin, iwarasna kadagiti napanglaw a tattao, ket sumurot kenkuana. (Mar. 10:17-30)a Nabigbigda a tapno maikarida a mairaman iti Pagarian ti Dios, masapul a ti Pagarian isut’ umun-una a paginteresanda, a siaayatda a mangusar iti biagda, abilidadda, kinabaknangda, a pagserbi iti dayta. Isuamin a sabali a banag iti biagda ket agbalin a segundario laeng.

Personal nga impapuso ni Charles Taze Russell dayta a balakad. Inlakona daydi rumangrang-ay a negosiona a lupot dagiti lallaki, inin-inutna a kinissayan dagiti dadduma a negosiona, sana inusar amin a naindagaan a sanikuana a tumulong kadagiti tattao iti naespirituan. (Idiligyo ti Mateo 6:19-21.) Saanna la nga inaramid daydi iti sumagmamano a tawen. Inggat’ ipapatayna, inusarna amin a kupkupikopanna​—ti mental nga abilidadna, ti pisikal a salun-atna, ti material a sanikuana​—tapno isurona dagiti sabali iti naindaklan a mensahe ti Mesianiko a Pagarian. Idi pumpon ni Russell, kinuna ni Joseph F. Rutherford, a kaduana: “Nasungdo ni Charles Taze Russell iti Dios, nasungdo ken Kristo Jesus, nasungdo iti interes ti Pagarian ti Mesias.”

Idi Abril 1881 (idi a sumagmamano a gasut lat’ makigimgimong kadagiti Estudiante ti Biblia), impablaak ti Watch Tower ti artikulo a napauluan “Kasapulan 1,000 a Mangaskasaba.” Daydi ket awis kadagiti lallaki ken babbai nga awanan kadagiti pamilia tapno agtrabahoda kas colporteur nga ebanghelista. Iti sasao ti pangngarig ni Jesus iti Mateo 20:1-16, inyimtuod ti Watch Tower: “Asinot’ addaan narayray a tarigagay a mapan ket agtrabaho iti Kaubasan, ken ikarkararagna a luktan komat’ Apo ti dalan”? Dagiti makabael a mangipaay ti kaguduat’ tiempoda a naipamaysa iti trabaho ti Apo ket naawis nga agaplikar. Kas tulong kadagiti gastosda iti pasahe, taraon, kawes, ken pagdagusan, impaay ti Zion’s Watch Tower Tract Society kadagidi nagkauna a colporteur dagiti literatura ti Biblia tapno iwarasda, ibagada kadagiti bumalay ti bassit a kontribusion para iti literatura, sa naawis dagiti colporteur a mangtagikua iti sangkapaset dagiti pundo nga inawatda. Asinodat’ simmungbat kadagitoy nga urnos ket imbaklaydat’ serbisio kas colporteur?

Idi 1885 addan agarup 300 a colporteur a naitimpuyog iti Sosiedad. Idi 1914 naabutna met laengen ti nasurok a 1,000. Saan a nalaka a trabaho daydi. Kalpasan a nagbalaybalay kadagiti uppat a babassit nga ili ket tallo wenno uppat a tattao laeng ti nabirukanna a medio interesado, kastoy ti insurat ti maysa a colporteur: “Makunak a naliday ti nawatiwat a biahek, ta nagadut’ nakasaritak, ngem mammano lat’ maseknan maipapan iti plano ti Dios ken iti Iglesia. Tulongandak koma babaen kadagiti kararagyo, tapno siuumiso ken situtured nga idatagko ti kinapudno, ket diak koma maupay nga agaramid ti naimbag.”

Intukonda a Situtulok ti Bagbagida

Dagidi a colporteur talaga a winaknitanda ti dalan. Sinerrekda dagiti kasulinekan a paset ti daga idinto ta kadaanan dagiti lugan sa dagiti kalsada, kaaduanna, ket desdes laeng ti kariton. Ni Sister Early, sadi New Zealand, kastat’ inaramidna. Nangrugin sakbay pay ti Gubat Sangalubongan I, binusbosnat’ 34 a tawen iti kasta a serbisio iti amin a tiempo sakbay a natay idi 1943. Bisikleta ti ad-adda nga inusarna a nangsaknap iti nawatiwat a paset ti pagilian. Ket uray idi pinarigaten ti arthritis ket saanen a makabisikleta, inusarna dayta a pagsarukod ken pagkargat’ liblibro kadagiti lugar a pagtagilakuan iti Christchurch. Kabaelanna pay idit’ umuli kadagiti agdan, ngem nakatallikud a bumaba gaput’ makapilay nga an-anayenna. Nupay kasta, agingga nga adda nabati a pigsana, inusarna iti serbisio ni Jehova.

Dagitoy a tattao dida imbaklay dayta a trabaho gaput’ talekda iti bagbagida. Dadduma kadakuada ti dati a managbabain, ngem inay-ayatdan Jehova. Sakbay a nangasaba kadagiti pagtagilakuan, maysa kadagita a kabsat a babai kiniddawna nga ikararagan dagiti Estudiante ti Biblia iti lugarda. Idi agangay, immadut’ kapadasanna, ket nagbalin a narayray unay iti dayta a trabaho.

Idi nakisarita ni Malinda Keefer ken Kabsat Russell idi 1907 iti tarigagayna a sumrek iti amin a tiempo a serbisio, imbagana a masapulna pay ti ad-adu a pannakaammo. Kinaagpaysuna, idi la napan a tawen ti damo a pannakabasanat’ literatura dagiti Estudiante ti Biblia. Insungbat ni Kabsat Russell: “No kayatmo nga itagtagi-uray inggat’ maammuam amin, dikanto pulos makarugi, ngem makasursurokanto bayat a mangaskasabaka.” Saanen a nagkedked, ket inrugina a dagus sadi Ohio, ti Estados Unidos. Kanayon a malaglagipna ti Salmo 110:3, a kunana: “Ti ilim itulnogna ti bagina a situtulok.” Iti simmaruno a 76 a tawen, daytat’ inar-aramidna.b Balasang idi nangrugi. Tinagiragsakna ti nagserbi iti unos ti 15 a tawen nga addaan asawa. Ngem kalpasan a natay ni lakayna, nagtultuloy latta, iti tulong ni Jehova. Kas pananglagipnat’ napalabas, kinunana: “Anian ti yamanko a nangitulnog iti bagik a situtulok kas payunir idi balasangak pay ket inyun-unak a naynay ti interes ti Pagarian!”

No maangay idi un-unana dagiti dadakkel a kumbension, nayurnos dagiti espesial a sesion para kadagiti colporteur. Nasungbatan dagiti saludsod, nayurnos ti pannakasanay dagiti kabbaro, ken naipaay dagiti pammaregta.

Nagtultuloy nanipud 1919, ad-aduda pay nga adipen ni Jehova ti nangipateg unay iti Pagarian ti Dios ket talaga nga impamaysadat’ biagda iti dayta. Dadduma kadakuadat’ nangpanaw kadagiti panggedanda ket impamaysadat’ biagda iti ministerio.

Panangtaming Kadagiti Material a Kasapulan

Kasanoda a tinaming dagiti material a kasapulanda? Malagip ni Anna Petersen (Rømer idi agangay), ebanghelisador iti amin a tiempo sadi Denmark: “Nakatulong kadakami dagiti naipaimami a literatura para kadagiti inaldaw a kasapulan, ket bassit laeng idi ti masapulmi. No adda dadakkel a paggastuan, adda latta remediona dagitoy. Inikkandakami dagiti kakabsat iti kawesmi, bado wenno amerikana, ket ipadasmi a dagdagus sakam usarenen, iti kasta adut’ kawesmi. Ket no kalam-ekna agtrabahoak iti opisina iti dua a bulan. . . . No itiempok ti aggatang no adda baratilio, magatangkon ti pagkawesko iti makatawen. Mayat ti biagmi. Dikam pulos maaw-awanan.” Saan a material ti ad-adda a pakaseknanda. Ti panagayatda ken Jehova ken kadagiti dalanna kasla beggang nga umap-apoy kadakuada, ket masapul nga ipeksada idi dayta.

Tapno adda pagturoganda nangabangdat’ bassit a kuarto bayat a nangaskasabada dita a lugar. Adda dagidiay nagusar iti trailer​—dagitay simple, basta adda pagturogan ken pangananda. Daddumat’ naturog kadagiti tolda bayat a nagakar-akarda. Kadagiti dadduma a lugar inyurnos dagiti kakabsat dagiti “kampo ti payunir.” Imbalayan ida dagiti Saksi dita a lugar, sa adda maysa a madutokan a mangaywan. Dagiti payunir a mangaskasaba dita a lugar mabalindat’ maturog sadiay, sa tumulongda aniaman iti magastos.

Di impalubos dagitoy a trabahador iti amin a tiempo a dagiti arig-karnero ket dida makabasat’ literatura ti Biblia no awan kuartada. Masansan a nakisinnukat dagiti payunir kadagiti produkto kas iti patatas, mantikilia, itlog, kappuros ken delata a prutas, manok, sabon, ken gistay uray ania. Saanda idi nga agpabpabaknang; no di ket, panangipamuspusanda daytoy a tulongan dagidiay napasnek tapno magun-oddat’ mensahe ti Pagarian, ket maigiddato a makagun-oddat’ material a kasapulanda tapno maitultuloyda ti ministerioda. Nagtalekda iti kari ni Jesus a no inda “itultuloy . . . a sapulen nga umuna ti pagarian ken ti kinalinteg [ti Dios],” iti kasta dagiti nesesita a taraon ken kawes maaddadanto.​—Mat. 6:33.

Situtulok nga Agserbi No Sadinot’ Pakasapulan

Ti naregget a tarigagayda a mangaramid iti trabaho nga intuding ni Jesus kadagiti adalanna ti nangituggod kadagiti trabahador iti amin a tiempo a mapan kadagiti baro a teritoria, agraman baro a pagilian. Idi naawis ni Frank Rice a panawanna ti Australia tapno luktanna ti pannakaikasabat’ naimbag a damag sadi Java (paset ti Indonesia itan) idi 1931, sangapulo a tawennan idi iti amin a tiempo a ministerio. Ngem itan adda dagiti baro a kustombre ken baro a pagsasao a sursuruenna. Ag-Ingles idi no kasabaanna dagiti pagtagilakuan ken opisina, ngem kayatna met a kasabaan dagiti dadduma. Sipapasnek a nagadal, ket iti tallo a bulan ammonan ti Olandes ket nagbalaybalayen. Kalpasanna inadalnan ti Malay.

Agedad ti 26 ni Frank idi napan idiay Java, ket kaaduan kadagiti innem a tawenna dita ken idiay Sumatra, nagmaymaysa. (Idi agngudot’ 1931, immay timmulong da Clem Deschamp ken Bill Hunter a taga Australia. Nagkadua dagitoy a nangasaba iti probinsia, bayat a trinabaho ni Frank ti kabisera ti Java. Idi agangay, naibaon metten da Clem ken Bill iti nagduma a lugar.) Awan kongregasion a pakigimongan idi ni Frank. No dadduma naliday ti sasaadenna, ket saan la a namimpinsan nga inutobna ti sumardeng tapno agawiden sadi Australia. Ngem nagtultuloy. Kasano? Ti naespirituan a taraon iti The Watch Tower isut’ nangpakired kenkuana. Idi 1937 napan nagserbi sadi Indochina, a sadiay gistay natay gaput’ narungsot a panaggugulo kalpasan ti Gubat Sangalubongan II. Dayta nga espiritu ti kinatulok nga agserbi ket sibibiag pay la idi 1970’s idi nagsurat a nangiyebkas iti rag-ona gapu ta agserserbi ken Jehova ti intero a pamiliana ken impadamagna nga agsagsaganada manen ken ni baketna a mapan agserbi iti dakdakkel a pakasapulan sadi Australia.

‘Panagtalek ken Jehova iti Isuamin a Pusoda’

Inkeddeng ni Claude Goodman nga ‘agtalek ken Jehova iti isuamin a pusona ket di nagpannuray iti bukodna a pannakaawat,’ isu a pinilinat’ serbisio a colporteur kas Kristiano nga ebanghelisador imbes a nagnegosio. (Prov. 3:5, 6) Agraman ken Ronald Tippin, ti timmulong kenkuana a nangadal iti kinapudno, nagserbi kas colporteur sadi Inglaterra iti nasurok a nakatawen. Idi dimteng ti 1929, nagserbida a dua idiay India.c Anian a karit daydi!

Kadagiti simmaganad a tawen, nagdaliasatda saan laeng nga iti pannagna ken iti tren ken bus no di pay ket kadagiti bagon ti tren, kariton, kamelio, sampan, ricksha, ken eroplano agraman pribada a tren. No dadduma naturogda iti estasion ti tren, kulluong ti baka, karuruotan iti bakir, balay a ti kadsaaranna napalitadat’ ibleng ti baka, ngem no dadduma naturogda kadagiti agkakangina a hotel ken iti palasio ti raja. Kas ken apostol Pablo, nasursurodat’ sekreto ti kinakontento uray bassit wenno adu ti probisionda. (Fil. 4:12, 13) Kadarato a narasay ti material a kupkupikopanda, ngem dida pulos naawanan kadagidiay nasken a kasapulanda. Personal a napasaranda ti kaitungpalan ti kari ni Jesus a no sapulenda nga umuna ti Pagarian ken kinalinteg ti Dios, maitedto kadakuada dagiti material a kasapulanda.

Napasaranda ti grabe a panagsakit iti dengue, malaria, ken tipus, ngem siaayat nga inasikaso ida dagiti padada a Saksi. Masapul a mangasabada kadagiti nakapuspusek a siudad a kas iti Calcutta, ket dumanonda met kadagiti plantasion ti tsa kadagiti bambantay ti Ceylon (Sri Lanka itan). Tapno maipaayda dagiti naespirituan a kasapulan dagiti umili, intukonda dagiti literatura, impangngegda dagiti palawag a naiplaka iti lokal a pagsasao, ken nagpalawagda pay. Bayat nga immadut’ trabaho, nasursuro met ni Claude ti agpaandar iti pagimprentaan tapno maasikaso ti trabaho kadagiti opisina ti sanga ti Sosiedad.

Idi 87 ti edadnan, malagipna dagiti nabaknang a kapadasanna iti serbisio ni Jehova sadi Inglaterra, India, Pakistan, Ceylon, Burma (Myanmar itan), Malaya, Thailand, ken Australia. Agpada bayat a baro ken kas asawa ken ama, inyun-unana ti Pagarian iti biagna. Nakurang a dua a tawen kalpasan a nagbautisar idi sinerrekna ti serbisio iti amin a tiempo, ket minatmatanna dayta kas karerana iti unos ti biagna.

Ti Pannakabalin ti Dios Mangan-anay iti Kinakapuy

Ni Ben Brickell maysa met kadagidi naregta a Saksi​—a kas met la kadagiti dadduma a nakurapay ken adut’ an-anayenna. Isut’ naisalsalumina iti pammati. Idi 1930 nagbalin a colporteur sadi New Zealand, a sadiay nangasaba kadagiti teritoria a saanen a pulos nasublian iti adu a dekada. Dua a tawen kalpasana, sadi Australia, lima a bulan a nangaskasaba kadagiti disierto a saan pay a pulos nakaskasabaan. Kargado ti bisikletana kadagiti ules, kawes, taraon, ken liblibro nga ipaima. Nupay napasag dagiti dadduma a lallaki a nangpadas a nagbiahe dita, isu napan latta, a sitatalek ken Jehova. Kalpasanna, nagserbit’ Malaysia, a nakaalaanna ti grabe a sakit ti puso. Saan a simmardeng. Kalpasan ti panagpaungarna, nagserbi manen iti amin a tiempo sadi Australia. Kalpasan ti agarup maysa a dekada, nayospital gaput’ grabe a sakit, ket idi agawiden imbagat’ doktor nga isu ket “85 porsiento nga imbalido.” Dina pay idin kabaelan ti magna a makipalengke a di agsardesardeng nga aginana.

Ngem determinado ni Ben Brickell nga agsubli manen, ket nakasubli, nga aginana no kasapulan. Di nabayag nangaskasaba manen iti aw-away ti Australia. Inal-aluadanna ti salun-atna, ngem ti serbisio ken Jehova isut’ kangrunaan iti biagna agingga a natay 30 a tawen kalpasanna idi isu ket agarup 65.d Binigbigna a ti pagkuranganna gaput’ kinakapuyna ket naanayan gaput’ bileg ni Jehova. Idi kumbension sadi Melbourne idi 1969, nagserbi iti departamento ti payunir nga adda dakkel a tsapana, a kunana: “No adda kayatyo nga ammuen maipapan iti panagpayunir, imtuodenyo kaniak.”​—Idiligyo ti 2 Corinto 12:7-10.

Panangdanon Kadagiti Balbalay iti Kabakiran ken Pagminasan iti Kabambantayan

Ti kinaregtat’ serbisio ken Jehova saanna la a tinignay dagiti lallaki no di pay ket babbai a dimmanon kadagiti di pay naas-asak a tay-ak. Ni Freida Johnson a maysa kadagiti napulotan, nupay medio bassit ken nasuroken a 50 ti edadna, maymaysana idi a nagdakiwas kadagiti parte ti Central America, a dinanunna dagiti deppaar kas iti umamianan a kosta ti Honduras a sikakabalio. Dakkel a pammati ti masapul tapno matrabaho nga agsolsolo daytoy a lugar, a sinarungkaranna dagiti agaaddayo a plantasion ti saba, dagiti ili ti La Ceiba, Tela, ken Trujillo, agraman naiputputong a purpurok ti Carib. Nangaskasaba sadiay idi 1930 ken 1931, sa idi manen 1934, ken idi 1940 ken 1941, a nakaipaimat’ rinibribo a literatura a naglaon iti kinapudno ti Biblia.

Kadagidi a tawtawen adda sabali a naregta a trabahador a nangirubbuat iti amin a tiempo a ministeriona. Isu ni Kathe Palm, a nayanak sadi Alemania. Ti nangtignay kenkuana isut’ itatabunona iti kumbension sadi Columbus, Ohio, idi 1931, idi nga inabrasa dagiti Estudiante ti Biblia ti nagan a Saksi ni Jehova. Idin nga inkeddengna a sapulen nga umuna ti Pagarian, ket idi 1992, idi agedaden iti 89, aktibo pay laeng iti dayta.

Nangrugi a payunir sadi Siudad ti Nueva York. Idi agangay, sadi South Dakota, adda kaduana iti sumagmamano la a bulan ngem idi agangay nagsolsolon, ket kabalio ti usarna a nagsursor. Idi naawis nga agserbi sadi Colombia, Sud America, dagdagus nga inakseptarna, a dimmanon sadiay idi arinunos ti 1934. Adda manen kaduana iti apagbiit sa nagsolsolon. Saan a daydit’ gapu tapno agikay.

Adda agassawa a nangawis kenkuana a kumadua sadi Chile. Nalawa daydi a teritoria, nga 4,265 a kilometro iti unday ti lumaud a kosta ti kontinente ti Sud America. Kalpasan a kinasabaanna dagiti pagopisinaan idiay kabisera, insublatna ti sulinek ti amianan. Nagbalaybalay iti kada kampo ti minas, kada ili ti kompania, dakkel wenno bassit. Dagiti trabahador idiay kabambantayan ti Andes nasdaawda idi sinarungkaran ida ti agsolsolo a babai, ngem determinado nga awan labsanna uray maysa iti deppaar a naituding kenkuana. Idi agangay, nagpa-abagatan, a sadiay sumagmamano nga estancia (rancho dagiti karnero) dinappatanda ti ag-100,000 ektaria. Dagiti agnanaed sadiay ket mannakigayyem ken managpadagusda ket inawisda a nakisango kadakuada no oras ti pannangan. Iti kastoy ken dadduma pay a wagas, isut’ inaywanan ni Jehova, iti kasta naaddaan kadagiti pisikal a kasapulan ti biag.

Ti panangikasabat’ naimbag a damag ti Pagarian ti Dios isut’ nangpunno ti biagna.e Idi lagipennat’ tawtawen a panagserbina, kinunana: “Ammok a nakabakbaknang ti kabibiagko. Kada tawen a makiasambleaak iti ili ni Jehova, adda nabara, napnek a riknak no makitak dagiti nagadu a tattao nga inyadalak iti Biblia kas mangirakrakurak iti naimbag a damag, a tumultulong kadagiti sabsabali nga agturong iti danum ti biag.” Tinagiragsakna a matmatan ti yaadu dagiti agdaydayaw ken Jehova sadi Chile nanipud 50 aginggat’ nasurok nga 44,000.

“Adtoyak! Ibaonnak”

Idi nangngegnat’ diskurso a naibasar iti awis ni Jehova nga agserbi kas nairekord iti Isaias 6:8 ken ti positibo a sungbat ti propeta nga, “Adtoyak! Ibaonnak,” nagpabautisar ni Martin Poetzinger sadi Alemania. Dua a tawen kalpasanna, idi 1930, nagserbi iti amin a tiempo sadi Bavaria.f Di nagbayag, impariten dagiti opisial sadiay ti panangasaba dagiti Saksi, narikepan dagiti paggigimonganda, sa nakompiskar dagiti literaturada. Nangam-ames dagiti Gestapo. Ngem dagiti pasamak idi 1933 saanda a pinagngudo ti ministerio ni Kabsat Poetzinger.

Inawisda a nagserbi sadi Bulgaria. Nausar idi dagiti tarheta ti testimonia a mangintroduser iti literatura ti Biblia. Ngem adu kadagiti umili ti di makabasa. Gapuna, sinursuro ni Kabsat Poetzinger ti pagsasaoda, a Cyrillico nga alpabeto ti nausar. No adda literatura a naibati iti maysa a pamilia, masansan a masapul nga ibasa dayta dagiti ubbing kadagiti dadakkelda.

Kaaduan iti daydi damo a tawenna, maymaysa ni Kabsat Poetzinger, ket insuratna: “Idi Panglaglagip, diniskursuak ti bagik, nagkararagak a maymaysa, ket rinikepak ti gimong a bukbukodko.” Idi 1934, pinagtalawda dagiti baniaga, isu a napan sadi Hungary. Ditoy inadalna manen ti baro a pagsasao tapno maikasabana ti naimbag a damag. Nanipud Hungary napan kadagiti pagilian a maaw-awagan idi a Czechoslovakia ken Yugoslavia.

Nagadut’ naragsak a kapadasanna​—nakabiruk kadagiti agayat iti kinapudno bayat a nagsursor kadagiti aw-away ken purpurok, nga insakupitna dagiti literatura; napasarannat’ panangaywan ni Jehova bayat a dagiti managpadagus inikkandat’ taraon ken pagturogan iti rabii; nakisarsarita a nagrabrabii kadagidiay dimmar-ay iti pagdagusanna tapno denggenda ti makaliwliwa a mensahe ti Pagarian.

Nakaro met ti pannakasuot ti pammatina. Idi nga agserserbi iti baniaga a daga, ket awan kuartana, nagsakit iti grabe. Awan doktor a mayat a mangtaming kenkuana. Ngem nangipaay ni Jehova. Kasano? Idi agangay, nakasaritada ti nangato a consultant ti lokal a hospital. Daytoy a tao, a namati unay iti Biblia, inasikasona ni Kabsat Poetzinger a kas anak, nga awan siningirna. Nasdaaw ti doktor iti managsakripisio nga espiritu daytoy nga agtutubo a nagminar iti trabahona, ket inakseptarna a kas sagut ti sumagmamano a libro ti Sosiedad.

Sabali manen a nakaro a suot ti immapay uppat a bulan kalpasan ti kasarna. Naaresto ni Kabsat Poetzinger idi Disiembre 1936 ket naibalud nga umuna iti maysa a kampo konsentrasion sa iti sabali manen, ngem ni baketna sabali pay met a kampo ti yanna. Dida nagkitkitan a pulos iti las-ud ti siam a tawen. Saan a linapdan ni Jehova ti kakasta a nadangkok a pannakaidadanes, ngem pinakiredna ni Martin, ken ni Gertrud a baketna, ken dagiti rinibo pay a sabsabali tapno makaibturda.

Idi naluk-atandan, tinagiragsak ni Kabsat Poetzinger ti adu a tawen a serbisio kas agbambaniaga a manangaywan sadi Alemania. Natabunuanna dagiti nakaay-ayat a kumbension kalpasan ti gubat a naangay iti estadium sadi Nuremberg a dati a pagmartmartsaan ni Hitler. Ngem itan napno daytat’ nagadu nga umariwekwek a nasungdo a pasurot ti Pagarian ti Dios. Tinabunuanna dagiti di malipatan a kumbension idiay Yankee Stadium ti Nueva York. Tinagiragsakna a naan-anay ti pannakasanayna sadi Watchtower Bible School of Gilead. Ket idi 1977 nagbalin a miembro ti Bagi a Manarawidwid dagiti Saksi ni Jehova. Ti panangmatmatna, agingga a naturpos ti naindagaan a trabahona idi 1988, mayebkas kadagitoy a sasao: ‘Daytoy ti banag nga aramidek​—sapulen nga umuna ti Pagarian.’

Panangadal iti Talaga a Kaipapananna

Ti managsakripisio nga espiritu nabatad a di kabbaro kadagiti Saksi ni Jehova. Idi naipablaak ti kaunaan unay a tomo ti Millenial Dawn idi 1886, ti pannakakonsagrar (wenno, dedikasion itan) nabatad a naisalaysay. Nailawlawag sigun iti Kasuratan a dagiti pudno a Kristiano “ikonsagrarda” iti Dios dagiti isuamin a banag; ramanenna dagiti abilidadda, dagiti material a sanikuada, dagiti mismo a biagda. Iti kasta dagiti Kristiano agbalinda a mayordomo iti daydiay banag a “konsagrado” iti Dios, ket bilang mayordomo, masapul nga agdatagdanto​—saan nga iti tattao no di iti Dios.

Umad-adu idi ti Estudiante ti Biblia a talaga nga inyawatdat’ bagida nga agserbi iti Dios. Inusarda a naan-anay dagiti abilidadda, sanikuada, ti amin a pigsada, a nangaramid iti pagayatanna. Iti kasumbangirna, addada met dagidi nangipapan a ti kangrunaan isut’ panangpatanorda iti makunkuna a Nakristianuan a pakasarsaritaan tapno kualipikadoda a makiraman iti Pagarian a kaduan Kristo.

Nupay ti rebbengen ti tunggal pudno a Kristiano a mangikasaba ti Pagarian ti Dios ket masansan a nadakamat ni Kabsat Russell, ad-adda pay a naipaganetget daytoy kalpasan ti Gubat Sangalubongan I. Ti artikulo a “Pakasarsaritaan Wenno Tulag​—Ania Kadagitoy?” iti The Watch Tower ti Mayo 1, 1926, isut’ nabatad nga ehemplo. Sipaprangka nga inamirisna dagiti makadangran nga epekto ti masasao a panangpataud iti kababalin sana ingunamgunam ti kinapateg ti panangtungpal kadagiti obligasion ti maysa iti Dios babaen kadagiti aramid.

Sakbay dayta, ti The Watch Tower ti Hulio 1, 1920, inusisanat’ naindaklan a padto ni Jesus maipapan ‘iti pagilasinan ti yaayna ken ti panungpalan ti lubong.’ (Mat. 24:3, KJ) Intampokna ti trabaho a panangasaba a mairingpas kas kaitungpalan ti Mateo 24:14 ket insaluminana ti mensahe a maiwaragawag, a kunkunana: “Ti naimbag a damag ditoy isut’ maipapan iti panungpalan ti daan nga urnos ti bambanag ken ti pannakaipasdek ti pagarian ti Mesias.” Inlawlawag ti The Watch Tower a no ibasar iti daydiay nangibagaan ni Jesus itoy kas mainaig kadagiti dadduma a paset ti pagilasinan, daytoy a trabaho masapul a mairingpas “iti nagbaetan ti dakkel a sangalubongan a gubat [Gubat Sangalubongan I] ken iti tiempo ti ‘dakkel a rigat’ a dinakamat ti Maestro iti Mateo 24:21, 22.” Naganetget idi dayta a trabaho. Asinot’ mangaramid iti dayta?

Nalawag a naipabaklay daytoy kadagiti kameng “ti iglesia,” ti pudno a kongregasion Kristiano. Nupay kasta, idi 1932, babaen iti Agosto 1 a ruar Ti Pagwanawanan (iti Ingles), naibalakad kadakuada a paregtaenda ti “klase Jonadab” a makiraman kadakuada iti trabaho, kas maitunos iti espiritu ti Apocalipsis 22:17. Ti klase Jonadab​—a mangnamnamat’ agnanayon a biag iti Paraiso a daga​—nagtignayda, ket adu kadakuadat’ sireregta a nangaramid iti dayta.

Ti kinapateg daytoy a trabaho napalalot’ pannakaipaganetgetna: “Ti pannakiraman iti serbisio ti Apo kas met lat’ kapateg ti itatabuno iti gimong,” kunat’ The Watch Tower idi 1921. “Tunggal maysa masapul a manangikaskasaba iti ebanghelio,” imbatadna idi 1922. “Pinagbalin ni Jehova a ti panangasaba isut’ kapatgan a trabaho a mabalin a pakiramanan ti asinoman kadatayo ditoy a lubong,” kunana idi 1949. Ti sinao ni apostol Pablo idiay 1 Corinto 9:16 kadarato a naadaw a: “Naipabaklay kaniak daytoy a pannakasapul. Talaga, asiak pay no diak impakaammo ti naimbag a damag!” Naiyaplikar daytoy a teksto kadagiti amin a Saksi ni Jehova.

Manot’ Mangikaskasaba? Kasanot’ Kawadwadna? Apay?

Addada kadi mapilpilit idi a makiraman itoy a trabaho maikontrat’ nakemda? “Awan,” kuna ti The Watch Tower iti Agosto 1, 1919, a ruarna, “awan mapilpilit nga agaramid iti aniaman. Puro boluntario a serbisio daytoy, a maipagaput’ panagayat iti Apo ken maipuon iti kinalinteg. Saan a piliten nga ipasalista ni Jehova ti asinoman.” No maipapan iti motibo ti kasta a serbisio, innayon ti The Watch Tower a Setiembre 1, 1922: “Daydiay talaga nga adda panagyaman iti pusona ken panangapresiar iti gapuanan ti Dios kenkuana kayatnanto ti agsubad; ket bayat a dumakdakkel ti apresasionna iti kinamanangaasi ti Dios, narayrayto met ti panagayatna, ket no narayrayray ti panagayatna, dakdakkelto met ti tarigagayna nga agserbi kenkuana.” Nailawlawag a ti panagayat iti Dios, maipakita babaen iti panagtulnog kadagiti bilinna, ket maysa kadagita a bilin isut’ panangikasaba ti naimbag a damag ti Pagarian ti Dios.​—Isa. 61:1, 2; 1 Juan 5:3.

Dagidiay nangibaklay itoy a trabaho dida naallukoy gaput’ aniaman a nailubongan nga ambision. Naibaga a diretso kadakuada nga inton agbalaybalayda wenno agitukondat’ literatura idiay kalsada, mamatmatandanto kas “maag, nakapuy, nanumo,” a “malalais, maidadanesdanto,” ket maibilangdanto nga “awan kaes-eskanna sigun iti panangmatmat ti lubong.” Ngem ammoda a kasta met lat’ pannakatrato idi da Jesus ken dagidi immuna a disipulona.​—Juan 15:18-20; 1 Cor. 1:18-31.

Ipatpato kadi dagiti Saksi ni Jehova a mateggeddat’ pannakaisalakanda babaen iti panangaskasaba? Saan a pulos! Ti libro a Nagkaykaysa iti Panagdayaw iti Maymaysa a Pudno a Dios, a nausar nanipud 1983 a tumulong iti estudiante nga agturong iti Nakristianuan a kinanataengan, salaysayenna daytoy. Kunana: “Linuktan met ti daton ni Jesus ti gundawaytayo ti biag nga awan inggana . . . Saan a gunggona daytoy a naganartayo. Uray kasano kadakkel ti ar-aramidentayo iti serbisio ni Jehova, ditay pulos makaibangon ti kasta a merito a ti Dios makaut-utang ti biag katatayo. Ti biag nga agnanayon isu ti naparabur a ‘sagut ti Dios . . . ken Jesu-Kristo nga Apotayo.’ (Roma 6:23; Efe. 2:8-10) Nupay kasta, no addaantay ti pammati iti dayta a sagut ken panangipateg iti pamay-an a napagbalin a posible dayta, iparangarangtayo dayta. Iti pannakaawattayo nga anian a nakaskasdaaw ti panangusar ni Jehova ken ni Jesus iti panangibanagna kadagiti pagayatanna ken no anian a nagpateg ti intay amin panangsurot a naimbag kadagiti addang ni Jesus, pagbalinentayo ngarud ti Nakristianuan a ministerio a maysa kadagiti kapapatgan a banag iti biagtayo.”

Makuna kadi nga amin a Saksi ni Jehova ket manangiwaragawag iti Pagarian ti Dios? Wen! Daytat’ kaipapanan ti panagbalin a Saksi ni Jehova. Iti nasurok a kaguduat’ siglon, adda dagidi nagkuna a saan a nesesita a makiramandat’ serbisio iti tay-ak, iti panangasabat’ publiko ken iti binalaybalay. Ngem ita awan Saksi ni Jehova nga agkuna nga isu ket libren iti kasta a serbisio gapu iti saadna iti lokal a kongregasion wenno iti sangalubongan nga organisasion. Makiraman dagiti lallaki ken babbai agraman agtutubo ken lallakay. Ibilangda dayta a napateg a pribilehio, sagrado a panagserbi. Adu dagidiay mangasaba uray grabe ti an-anayenda. Ket dagidiay gaput’ pisikal a rason dida kabaelan ti agbalaybalay, iremedioda a danonen dagiti tattao ket personal a kasabaanda ida.

Kadagiti naglabas, adda idi pagannayasan a nasapa unay a palubosan a makiraman dagiti kabbaro iti serbisio idiay tay-ak. Ngem kadagiti kallabes a dekada, ad-adda a naigunamgunam ti kualipikasionda sakbay a maawisda. Aniat’ kaipapanan dayta? Dina kaipapanan a masapul a kabaelanda nga ilawlawag amin nga addat’ Biblia. Ngem, kas ilawlawag ti libro nga Organisado a Mangitungpal ti Ministeriotayo, masapul nga ammoda ken patienda dagiti pamunganayan a sursuro ti Biblia. Nadalus pay komat’ kabibiagda, a maitunos kadagiti estandarte ti Biblia. Tunggal maysa talaga a kayatda ti agbalin a Saksi ni Jehova.

Di namnamaen nga isuamin a Saksi ni Jehova agpapadat’ kawadwad ti panangaskasabada. Agdudumat’ sirkumstansia dagiti indibidual. Ti edad, salun-at, rebbengen iti pamilia, agraman kapasnek ti apresasion adda amin epektoda. Sigsigud a nabigbig a kastoy. Naipaganetget dayta iti ruar Ti Pagwanawanan iti Disiembre 1, 1950 (iti Ingles), idi sinalaysayna “ti naimbag a daga” iti pangngarig ni Jesus iti agmulmula, iti Lucas 8:4-15. Ti Kingdom Ministry School Course, a naisagana kadagiti panglakayen idi 1972, inusisana ti pagalagadan a ‘panagayat ken Jehova iti isuamin a kararua’ ket inlawlawagna a “ti nasken saan a ti kantidad ti magapuanan ti maysa a maidilig iti gapuanan ti sabali, no di ket panangaramid iti kabaelan ti maysa.” (Mar. 14:6-8) Kas panangparegtana iti serioso a panangusisa iti bagi, nupay kasta, impakitana met a ti kasta a panagayat kaipapananna “nga amin nga aspeto ti kabibiagtayo ket mairaman iti panagserbitay iti Dios; awan aramid, kapasidad wenno tarigagay iti biag a malibre.” Intero nga abilidadtayo, ti isuamin a kararuatayo, agtignay koma a mangaramid iti pagayatan ti Dios. Impaganetget dayta a libro a ti “Dios kalikagumanna, saan a basta pannakiraman, no di ket ti isuamin a kararua a panagserbi.”​—Mar. 12:30.

Makapaleddaang, ta ti tendensia ti imperpekto a tao isut’ pannakabangkingna, nga igunamgunamna ti maysa sananto liwayan ti dadduma. Isu nga, idi pay la 1906, kapilitan nga impakdaaren ni Kabsat Russell a ti panangisakripisio ti bagi dina kayulogan nga isakripiso dagiti dadduma. Dina kayulogan a saanmon a suportaran ni baketmo, dagiti ubbing pay nga annakmo, wenno ubananen a nagannak ket librekan a mangasaba kadagiti sabali. Kadarato nanipud idin, rimmuar kadagiti publikasion ti Watch Tower ti kakasta a pammalagip.

Nagin-inut, babaen iti tulong ti Sao ti Dios, ti intero nga organisasion rinagpatna ti Nakristianuan a kinabalanse​—naregta no iti serbisio ti Dios, bayat a siuumiso nga asikasuen amin nga aspeto ti pudno a Kinakristiano. Nupay ti “panangpataud iti kababalin” ket namunganay iti errado a pannakatarus, impakita Ti Pagwanawanan a ti bungbunga ti espiritu ken ti Nakristianuan a kondukta saan koma a tagtagibassiten. Idi 1942, imbatad unay Ti Pagwanawanan: “Adda dagidiay nangipapan a no la ket makiramandan iti trabaho a panagbalaybalay siwayawayadan a mangpennek kadagiti tarigagayda a dida madusa. Laglagipenda koma a ti panangaskasaba saan a daydayta laeng ti alagaden.”​—1 Cor. 9:27.

Iyun-una Dagiti Nasken

Nabigbigen dagiti Saksi ni Jehova a ti ‘panangsapul nga umuna ti Pagarian ken ti kinalinteg ti Dios’ kaipapanannat’ panangyun-una kadagiti banag a nasken. Ramanenna ti kaadda ti umiso a lugar ti personal a panagadal iti Sao ti Dios ken regular nga itatabunot’ gimong ti kongregasion iti biag ti maysa ket di ipalubos nga umun-una dagiti dadduma a banag. Ramanenna ti panagdesision a mangiparangarang iti napudno a tarigagay a kumomporme kadagiti kalikaguman ti Pagarian ti Dios, kas nailanad iti Biblia. Ramanenna dayta ti panangusar kadagiti prinsipio ti Biblia a pangibasaran kadagiti desision a mangsaklaw iti kabibiag ti pamilia, panaglinglingay, nailubongan nga edukasion, panggedan, ug-ugali iti negosio, ken dagiti relasion iti pada a tao.

Ti panangsapul nga umuna ti Pagarian saanna a kayat a sawen a basta makiraman iti kada bulan a mangipadamag iti panggep ti Dios kadagiti sabali. Kaipapananna nga iyun-una dagiti interes ti Pagarian iti intero a kabibiag ti maysa, bayat nga asikasuenna a siuumiso dagiti dadduma a Nainkasuratan nga obligasionna.

Adut’ nadumaduma a wagas a ti debotado a Saksi ni Jehova ket maparang-ayna dagiti interes ti Pagarian.

Pribilehio a Panagserbi Idiay Bethel

Daddumat’ agserbi kas miembro ti sangalubongan a pamilia ti Bethel. Buklen dagitoy dagiti ministro iti amin a tiempo a nagboluntario a mangtaming iti aniaman a naituding kadakuada a mangisagana ken mangipablaak kadagiti literatura ti Biblia, mangtaming kadagiti nesesita a trabaho ti opisina, ken dagiti nasken a serbisio para iti panagandar dagita. Saan a trabaho daytoy a pakaragpatandat’ personal a dayaw wenno material a sanikua. Tarigagayanda a dayawen ni Jehova, ket kontentoda kadagiti probision a mait-ited a kas iti taraon, pagturogan, ken sangkabassit a supusop ti personal a gastosda. Gaput’ wagas ti kabibiag ti pamilia ti Bethel, dagiti nailubongan nga agtuturay sadi Estados Unidos, kas pangarigan, matmatanda ida a miembro ti relihiuso nga ordin a nagsapata iti kinapanglaw. Dagiti addat’ Bethel pagragsakanda nga usaren a naan-anay ti biagda iti serbisio ni Jehova ken agtrabaho iti pagimbagan dagiti adu a kakabsatda a Kristiano ken dagiti kabbaro nga interesado, a no dadduma internasional ti saklawna. Kas met la kadagiti amin a Saksi ni Jehova, regularda met a makiramraman iti ministerio idiay tay-ak.

Ti immuna a pamilia ti Bethel (wenno, pamilia ti Bible House, kas pangnagan kadakuada idi) adda idi idiay Allegheny, Pennsylvania. Idi 1896, ti dagupda ket 12. Idi 1992, dagiti kameng ti pamilia ti Bethel agdagupdan ti 12,900, nga agserserbida iti 99 a daga. Sa, gapu ta awan makaumanay a pagdagusan kadagiti patakder ti Sosiedad, ginasgasut a dadduma pay a boluntario ti masapul nga inaldaw a mapan kadagiti pagtaengan ti Bethel ken paktoria tapno agtrabahoda. Imbilangda a pribilehio ti makipaset iti trabaho. No kasapulan, rinibo pay dagiti Saksi nga inda ibati dagiti panggedanda ken dadduma pay nga aktibidadda ket iti nagsasabalit’ kawatiwatna a tiempo tumulongda nga agpatakder kadagiti pasilidad a kasapulan ti Sosiedad a mausar iti sangalubongan a panangikasaba ti naimbag a damag ti Pagarian ti Dios.

Adu kadagiti miembro ti sangalubongan a pamilia ti Bethel a daytan ti trabahoda iti unos ti biagda. Ni Frederick W. Franz, nga, idi 1977, nagbalin a maikapat a presidente ti Watch Tower Society, iti daydi a tiempo 57 a tawenen a miembro ti pamilia ti Bethel sadi Nueva York ken nagtultuloy a nagserbi idiay Bethel iti 15 a tawen pay agingga iti ipapatayna idi 1992. Ni Heinrich Dwenger nangrugi a nagserbit’ Bethel sadi Alemania idi 1911, ket nanipud idin sipapakumbaba a nagserbi iti uray ania a nakaitudinganna; ket idi 1983, a tawen ti ipapatayna, agserserbi pay la a miembro ti pamilia ti Bethel sadi Thun, Switzerland. Ni George Phillips, a taga Scotland, inawatna ti trabaho iti sanga nga opisina sadi Sud Africa idi 1924 (idi nga ay-aywanan dayta ti panangaskasaba manipud Cape Town inggat’ Kenya) ket nagtultuloy a nagserbi sadi Sud Africa inggat’ ipapatayna idi 1982 (nga idi a tiempo addan pito a sangat’ opisina ti Sosiedad ken agarup 160,000 a Saksi dagiti aktibo dita a lugar). Dagiti Kristiano a kakabsat a babbai, kas kada Kathryn Bogard, Grace DeCecca, Irma Friend, Alice Berner, ken Mary Hannan, impamaysada met dagiti nataengan a panagbiagda iti serbisio idiay Bethel, nga inaramidda ti kasta inggat’ ipapatayda. Adu met ti kasta a miembro ti pamilia ti Bethel ti nagserserbin iti unos ti 10, 30, 50, 70, ken ad-adu pay a tawen.g

Dagiti Managsakripisio nga Agdaldaliasat a Manangaywan

Iti intero a lubong, adda agarup 3,900 a manangaywan ti sirkito ken distrito nga, agraman assawada, tamtamingenda dagiti trabaho adinoman a pakasapulan kadakuada, a masansan nga adda kadagiti pagilianda. Adu kadagitoy ti nangpanaw kadagiti pagtaenganda ket itan agakar-akardat’ linawas wenno sumagmamano a lawas tapno agserbida kadagiti naituding a kongregasion. Awan sueldoda ngem yamanenda ti maipaay a taraon ken pagdagusan kadagiti pagserbianda, agraman ti limitado a probision para kadagiti personal a paggastosanda. Idiay Estados Unidos, nga adda 499 a manangaywan ti sirkito ken distrito nga agserserbi idi 1992, 54 a tawen ti promedio nga edad dagitoy nga agdaldaliasat a panglakayen, ket dadduma kadakuada ti nagserserbin a kasta iti nasurok a 30, 40, wenno ad-adu pay a tawen. Kadagiti adu a daga, kotse ti pagluganan dagitoy a manangaywan. Ti teritoria ti Pacifico masansan a kasapulanna ti panaglugan iti eroplano ken barko. Kadagiti adu a lugar nagteng dagiti manangaywan ti sirkito dagiti sulinek a kongregasion babaen iti panagkabalio wenno iti pannagna.

Dagiti Payunir Tumulongda iti Pakasapulan

Tapno mairugi a maikasabat’ naimbag a damag kadagiti lugar nga awan pay Saksi, wenno tumulong kadagiti naisangayan a kasapulan iti maysa a lugar, inyurnos ti Bagi a Manarawidwid ti pannakaibaon dagiti espesial a payunir. Ebanghelisador dagitoy iti amin a tiempo a busbosendat’ di kumurang 140 oras iti kada bulan iti ministerio idiay tay-ak. Sidadaanda nga agserbi iti uray adino a lugar a pakasapulan iti pagilianda wenno, kadagiti dadduma a kaso, iti kabangibang a pagilian. Gaput’ serbisioda, awanen tiempoda a mangged para kadagiti material a kasapulanda, isu a naisubli ti ginastosda para iti pagdagusan ken dadduma a kasapulanda. Idi 1992, adda nasurok a 14,500 nga espesial a payunir iti nadumaduma a paset ti daga.

Idi naibaon dagiti immuna nga espesial a payunir idi 1937, isudat’ nangirubbuat ti panangipangngeg kadagiti naiplaka a palawag ti Biblia a denggen dagiti bumalay iti mismo a ruanganda ken nagusardat’ plaka a pakaibatayan ti panagsasaritada iti Biblia iti isusublida. Kastat’ naaramid kadagiti dadakkel a siudad nga addaan idin kadagiti kongregasion. Kalpasan ti sumagmamano a tawen, naibaonen dagiti espesial a payunir kadagiti lugar nga awanan kongregasion wenno kadagiti kongregasion a kasapulanda unay ti badang. Kas resultat’ epektibo a trabahoda, ginasgasut dagiti naporma a baro a kongregasion.

Imbes a saknapanda laeng ti teritoria sada manen umakar iti sabali, trabahuenda a maulit-ulit ti naituding a teritoria, a sarungkaranda amin nga interesado sada mangyadal iti Biblia. Naiyurnos dagiti gimong para kadagiti interesado. Isu nga, idiay Lesotho, umabagatan nga Africa, iti damo a lawas idiay teritoriana, inawis ti espesial a payunir amin a nasabatna tapno umayda buyaen no kasanot’ panangikondukta dagiti Saksi ni Jehova iti Eskuelaan ti Teokratiko a Panagministro. Isu ken ti pamiliana ti nangala ti amin a paset ti programa. Kalpasanna inawisna man amin idan iti Panagadal iti Pagwanawanan. Idi nauman dagiti dadduma, 30 ti nagtultuloy a timmabuno iti Panagadal iti Pagwanawanan, ket 20 ti promedio a timmabuno iti eskuelaan. Kadagiti daga a dakkel ti naitulong dagiti misionero a nasanay sadi Gilead a nangiyusuat iti pannakaikasabat’ naimbag a damag, no dadduma al-alistot’ idudur-as no dagiti Saksi a taga dita ket kualipikadodan nga agespesial a payunir, ta masansan a mas epektibo dagitoy a tumulong kadagiti lokal nga umili.

Mainayon kadagitoy a naregta a trabahador, addada pay ginasgasut a ribo a Saksi ni Jehova a sireregget a mangparang-ay kadagiti interes ti Pagarian. Ramanen daytoy dagiti agtutubo ken lallakay, lalaki ken babai, kasado ken di kasado. Dagiti regular a payunir busbosendat’ di kumurang 90 oras kada bulan iti ministerio idiay tay-ak; dagiti auxiliary payunir, di kumurang 60 oras. Ikeddengda ti kayatda a teritoria. Kaaduan kadakuada makikaduada kadagiti naipasdeken a kongregasion; dadduma dagiti mapan kadagiti naiputputong a lugar. Supusopanda dagiti material a gastosda babaen iti pannanggedda, wenno tulongan ida dagiti miembro ti pamiliada. Idi 1992, adda nasurok a 914,500 a nakiraman iti serbisio kas regular ken auxiliary a kinapayunir iti paset dayta a tawen.

Dagiti Eskuelaan a Naisangayan ti Gandatda

Tapno makabalan dagiti boluntario kadagiti nagduduma a tipo ti serbisio, adda dagiti naisangayan nga eskuelaan. Nanipud 1943, kas ehemplo, ti Eskuelaan ti Gilead nasanaynan dagiti rinibo nga eksperiensiado a ministro a kas misionero, ket dagiti nagraduar naibaonda kadagiti isuamin a paset ti daga. Idi 1987 nairubbuat ti Ministerial Training School tapno tumulong a mangipaay iti espesial a pakasapulan, agraman panangtaripato iti kongregasion ken dadduma pay a responsabilidad. Ti urnos a pannakaangay ti eskuelaan kadagiti nadumaduma a lugar palakaenna ti ipapan dagiti estudiante iti sentral a disso ken didan masapul nga adalen pay ti sabali a pagsasao tapno mabenepisiaranda iti dayta nga eskuelaan. Isuamin a maawis itoy nga eskuelaan ket papanglakayen ken ministerial nga ad-adipen a nangpaneknek a talaga a sapsapulenda nga umuna ti Pagarian. Adu kadakuadan ti nakasagana nga agserbi iti sabsabali a daga. Ti espirituda kas ken propeta Isaias, a nagkuna: “Adtoyak! Ibaonnak.”​—Isa. 6:8.

Tapno maparang-ay ti kinaepektibo dagidiay agserserbin kas regular ken espesial a payunir, nairubbuat ti Pioneer Service School idi 1977. No mabalbalin, nayurnos ti eskuelaan iti kada sirkito iti intero a lubong. Naawis amin a payunir tapno mabenepisiaranda iti daytoy dua-lawas a kurso. Nagtultuloy nanipud idin, dagiti payunir a nakakompleton iti nakatawen a serbisio naikkanda iti kasta a pannakasanay. Agingga idi 1992, nasurok a 100,000 a payunir ti nasanay itoy nga eskuelaan sadi Estados Unidos laeng; linab-awanna ti 10,000 dagiti masansanay a tinawen. Adda 55,000 pay a nasanay sadi Japan, 38,000 sadi Mexico, 25,000 sadi Brazil, ken 25,000 idiay Italia. Mainayon iti daytoy a kurso, regular a tagtagiragsaken dagiti payunir ti espesial a miting nga angayen ti manangaywan ti sirkito bayat ti ibibisitana kada innem a bulan iti kada kongregasion agraman ti espesial a sesion a panangsanay nga ipaay dagiti manangaywan ti sirkito ken distrito bayat ti tinawen nga asamblea sirkito. Iti kasta, dagidiay mangbukel iti dakkel nga armada dagiti mangiwarwaragawag iti Pagarian nga agserserbi kas payunir saanda laeng a situtulok a trabahador no di pay ket nasanayda unay a ministro.

Panagserbi iti Dakdakkel a Pakasapulan

Adu a ribo a Saksi ni Jehova​—daddumat’ payunir, daddumat’ saan​—sidadaanda a nagserbi saan laeng nga iti ilida no di pay ket kadagiti dadduma a lugar a dakdakkel ti pakasapulan kadagiti mangiwaragawag iti naimbag a damag. Kada tawen rinibo dagidiay mangbusbos iti lawlawas wenno bulbulan, sigun iti personal a kabaelanda, kadagiti lugar a masansan nga adayo kadagiti pagtaenganda tapno kasabaanda dagidiay saan a regular a mabisbisita dagiti Saksi ni Jehova. Rinibo pay dagidiay nangpanawen iti balayda ket immakarda tapno makatulongda iti naun-unday a periodo. Adu kadagitoy dagiti pagassawaan wenno pampamilia nga addaan annak. Ti yaakarda masansan ramanenna ti di unay adayo a lugar, ngem dadduma kadagita ti naulit-ulit a nangaramid iti kasta iti unos ti tawtawen. Adu kadagitoy naregta a Saksi ti nagserbi payen kadagiti baniaga a daga​—dadduma iti sumagmamano a tawen, dadduma permanenten nga agyanda sadiay. Serkenda ti aniaman a panggedan nga adda tapno masuportaranda dagiti masapulda, ket isudat’ naggasto iti dayta nga iyaakarda. Ti maymaysa a tarigagayda isut’ pannakiramanda a naan-anay sigun iti sirkumstansiada a mangisaknap iti mensahe ti Pagarian.

No ti ulo ti pamilia ket saan a Saksi, nalabit iyakarnat’ pamiliana gapu iti panggedan. Ngem dagiti Saksi a miembro ti pamilia nalabit gundawayanda daytoy tapno isaknapda ti mensahe ti Pagarian. Kastat’ napasamak kadagiti dua a Saksi a taga Estados Unidos a naiyakar iti kampo ti konstruksion idiay kabakiran ti Suriname idi arinunos ti 1970’s. Maminduat’ makalawas nagriingdat’ alas 4:00 t.b., nakiluganda iti bus ti kompania iti maysa-oras a makabannog a biahe nga agturong iti bario, ket nagmalmalemda a nangasaba. Di nagbayag 30 a panangyadal iti Biblia ti ang-angayenda kada lawas kadagiti umili nga agbisbisin iti kinapudno. Ita addan kongregasion iti dati a di madandanon a paset ti napuskol a kabakiran.

Aprobetsaren ti Tunggal Maikanatad a Gundaway a Mangasaba

Siempre, saan nga isuamin a Saksi ni Jehova ket umakar iti sabali a daga, wenno iti sabali nga ili, tapno ituloyda ti ministerioda. Nalabit a ti sirkumstansiada dina palubosan ida nga agpayunir. Kaskasdi, pagaammoda unay ti pammagbagat’ Biblia nga ikagumaan “amin a naregget a pamuspusan” ken “aduankayo laeng iti aramid ti Apo.” (2 Ped. 1:5-8; 1 Cor. 15:58) Ipakpakitada a sapulenda nga umuna ti Pagarian no ipangpangrunada dagiti interesna ngem dagiti panggedan ken paglinglingayanda. Dagidiay a ti pusoda napno iti panangapresiar iti Pagarian makiramanda a regular iti ministerio idiay tay-ak agingga nga ipalubos ti sirkumstansiada, ket adu kadakuadat’ mangbalbaliw iti sirkumstansiada tapno ad-adu pay ti pannakiramanda. Siaalibtakda met a naynay a mangaprobetsar iti maikanatad a gundaway nga ikasabat’ Pagarian kadagiti sabali.

Kas ehemplo, ni John Furgala, a hardware ti negosiona sadi Guayaquil, Ecuador, napintas ti panangiyurnosna kadagiti literatura ti Biblia idiay puestona. Bayat nga as-asikasuen ti katulong dagiti order ti parokianona, kaskasabaan ni John dayta.

Idiay Nigeria adda naregta a Saksi a mangmangged kas elektrikal a kontratista a determinado a manggundaway iti tiempo a mangasaba kadagiti klientena. Yantangay isut’ makinnegosio iti dayta, isut’ nangikeddeng iti eskediol ti panagtrabaho. Binigat, sakbay ti panagtrabahoda, ummongenna da baketna, annakna, dagiti empleado, ken dagiti aprentis tapno pagsasaritaanda ti teksto ti Biblia iti dayta nga aldaw, agraman dagiti kapadasan a nailanad iti Yearbook of Jehovah’s Witnesses. Tunggal mangrugi ti tawen, regaluanna met dagiti klientena iti kalendario ti Watch Tower Society, agraman dua a magasin. Kas resultana, dadduma nga empleado ken klientena nakitimpuyogdan nga agdaydayaw ken Jehova.

Nagadu dagiti Saksi ni Jehova a kasta met lat’ espirituda. Aniaman ti ar-aramidenda, naynayda nga agbirbiruk iti gundaway a mangiraman iti naimbag a damag kadagiti sabali.

Dakkel a Buyot Dagiti Naragsak nga Ebanghelisador iti Amin a Tiempo

Bayat ti ilalabas dagiti tawen, saan a kimmapuy ti regta dagiti Saksi ni Jehova a nangikasabat’ naimbag a damag. Nupay adu a bumalay ti sipipinget a nagkuna kadakuada a saanda nga interesado, adut’ agyamyaman gaput’ panangtulong dagiti Saksi kadakuada a nangtarus iti Biblia. Determinado dagiti Saksi ni Jehova nga agtultuloy a mangaskasaba agingga a sibabatad nga ipasimudaag a mismo ni Jehova a nalpasen ti trabaho.

Imbes a timmamnayda, ti sangalubongan nga asosasion dagiti Saksi ni Jehova talaga a dinegdegandat’ panangaskasabada. Idi 1982 impakitat’ tinawen a sangalubongan a report a 384,856,662 nga oras ti nabusbos iti ministerio idiay tay-ak. Sangapulo a tawen kalpasanna (idi 1992) 1,024,910,434 nga oras ti nabusbos itoy a trabaho. Aniat’ makagapu iti napalalo nga irarang-ay dayta a trabaho?

Pudno a ti dagup dagiti Saksi ni Jehova ket immadu. Ngem saan nga iti kasta a kawadwad. Iti dayta a periodo, idinto ta ti bilang dagiti Saksi ket ngimmato iti 80 porsiento, ti bilang dagiti payunir ngimmato iti 250 porsiento. No iti promedio kada bulan, 1 iti kada 7 a Saksi ni Jehova iti intero a lubong ti adda iti maysa a sanga ti amin a tiempo a panangasaba.

Asinoda dagidiay nakiraman iti kasta a serbisio a kinapayunir? Kas ehemplo, sadi Republika ti Korea, adu dagiti Saksi nga agtagtagibalay. Gaput’ rebbengenda iti pamilia dida makapag-regular a payunir, ngem adu kadakuadat’ nangusar iti napaut a bakasion ti eskuela no kalam-ekna kas auxiliary a payunir. Kas resultana, 53 porsiento ti dagup dagiti Saksi sadi Republika ti Korea nakipasetda iti maysa a sanga ti amin a tiempo a serbisio idi Enero 1990.

Kadagidi nagkauna a tawtawen, gaput’ naregta nga espiritu ti kinapayunir iti biang dagiti Filipino a Saksi nabaelanda nga indanon ti mensahe ti Pagarian kadagiti ginasgasut a mapagnanaedan nga isla iti Filipinas. Ad-adda pay ita a nagminar dayta a kinaregta. Idi 1992, kas promedio kada bulan, 22,205 nga agibumbunannag ti nakiraman idiay ministerio iti tay-ak kas payunir iti Filipinas. Ramanenna dagiti adu nga agtutubo a nagayatanda a ‘laglagipen ti Namarsuada’ ket inusarda ti kabanuaganda nga agserbi kenkuana. (Ecl. 12:1) Kalpasan ti agsangapulo a tawen a panagpayunir, kinunat’ maysa kadagita nga agtutubo: “Naadalko ti aganus, ti maaddaan simple a panagbiag, ti agtaklin ken Jehova, ken agpakumbaba. Pudno a napasarak met dagiti rigat ken pannakaupay, ngem awan pateg dagitoy no idiligko kadagiti bendision nga imbunga ti kinapayunir.”

Idi Abril ken Mayo 1989, impablaak Ti Pagwanawanan ti pannakaibutaktak ti Babilonia a Dakkel, nga isut’ ulbod a relihion buyogen dagiti nagadu a pormana iti intero a lubong. Naimaldit dagiti artikulo a nagbabansag iti 39 a pagsasao ket adu a kopia ti naiwaras. Idiay Japan, a sadiay ti bilang dagiti Saksi nga agpaypayunir ket masansan a nasurok nga 40 a porsiento, adda baro a kangatuan a bilang nga 41,055 nga auxiliary a payunir ti timmulong iti trabaho idi Abril. Idiay Kongregasion ti Otsuka, iti Siudad ti Takatsuki, Distrito ti Osaka, 73 kadagiti 77 a bautisado nga agibumbunannag ti nakipaset iti serbisio a kinapayunir iti dayta a bulan. Idi Abril 8, idi nga amin nga agibumbunannag sadi Japan naparegtada a makipaset iti pannakaiwaras daytoy nasken a mensahe, ginasgasut a kongregasion, kas iti Kongregasion ti Ushioda, sadi Siudad ti Yokohama, ti nangiyurnos ti agmalmalem a panagserbi iti kalsada ken iti binalaybalay, manipud alas 7:00 t.b. inggat’ 8:00 t.r., tapno madanonda amin no mabalbalin dagiti adda dita.

Kas met la kadagiti amin a lugar, dagiti Saksi ni Jehova sadi Mexico agtrabahoda tapno adda material a kasapulanda. Kaskasdi, kada bulan idi 1992, adda promedio a 50,095 a Saksi ni Jehova sadiay ti nangiwaya ti panagpayunirda tapno matulonganda dagiti umili a mabisin iti kinapudno a mangadal iti Pagarian ti Dios. Kadagiti dadduma a pamilia bimmadang ti intero a sangakabbalayan tapno ti intero a grupoda, wenno sumagmamano kadakuada, ti makapayunir. Tinagiragsakda ti nabunga a ministerio. Idi 1992, dagiti Saksi ni Jehova sadi Mexico regular nga ikonkonduktadat’ 502,017 a panangyadal iti Biblia kadagiti indibidual ken pampamilia.

Dagiti panglakayen nga agserserbit’ kasapulan dagiti kongregasion dagiti Saksi ni Jehova addaandat’ nadagsen a responsabilidad. Kaaduan a panglakayen sadi Nigeria ket adda pamiliada, ket kasta met ti kasasaad dagiti panglakayen iti dadduma a luglugar. Ngem, malaksid iti panagsaganada a mangikondukta wenno makiraman kadagiti gimong ti kongregasion, agraman panangipastor iti arban ti Dios, dadduma kadagitoy a lallaki payunirda pay. Kasano a posible ti kasta? Ti naannad a panangeskediol iti tiempo ken ti nasayaat a panagbibinnadang ti pamilia masansan nga importante unay.

Nabatad nga, iti intero a lubong, dagiti Saksi ni Jehova impapusoda ti pammagbaga ni Jesus nga ‘ituloy a sapulen nga umuna ti pagarian.’ (Mat. 6:33) Ti ar-aramidenda isut’ naimpusuan nga ebkas ti panagayatda ken Jehova ken ti panangapresiarda iti kinasoberanona. Kas ken salmista David, kunada: “Itan-okkanto, O Diosko nga Arik, ket bendituekto ti naganmo iti tiempo a di nakedngan, uray iti agnanayon.”​—Sal. 145:1.

[Dagiti Footnote]

[Blurb iti panid 292]

Ad-adda a pannakaigunamgunam ti rebbengen a mangasaba

[Blurb iti panid 293]

Matmatandat’ panagbalaybalay kas napateg a pribilehio

[Blurb iti panid 294]

Panangtarus ti kayulogan ti serbisio a buyogen ti amin a kararua

[Blurb iti panid 295]

Ti talaga a kayulogan ti “sapulen nga umuna ti pagarian”

[Blurb iti panid 301]

Iyun-una dagiti naregta a Saksi ti interes ti Pagarian a nangnangruna ngem iti panggedan ken panagpalpaliwa

[Kahon/Ladawan iti panid 288]

“Ayan Dagiti Siam?”

Idi Panglaglagip iti ipapatay ni Kristo, idi 1928, adda tract a naited kadagiti amin a timmabuno a napauluan “Ayan Dagiti Siam?” Ti panangsalaysayna iti Lucas 17:11-19 tinignayna ti puso ni Claude Goodman ket isut’ nanggutugot kenkuana iti trabaho kas colporteur, wenno payunir, ken iti panagtalinaed iti dayta a serbisio.

[Dagiti ladawan iti panid 296, 297]

Panagserbi Idiay Bethel

Idi 1992, adda 12,974 nga agserserbi iti Bethel kadagiti 99 a daga

[Dagiti Ladawan]

Napateg ti personal a panagadal kadagiti miembro ti pamilia ti Bethel

España

Kada Bethel Home, mangrugi ti aldaw babaen iti panangsalaysay iti teksto ti Biblia

Finland

Kas met la kadagiti Saksi ni Jehova iti isuamin a lugar, makiraman dagiti miembro ti pamilia ti Bethel iti panagserbi iti tay-ak

Switzerland

Kada rabii ti Lunes agkakadua ti pamilia ti Bethel a mangadal iti “Pagwanawanan”

Italia

Nagdudumat’ trabaho, ngem maaramid amin a mangsuporta iti pannakaiwaragawag ti Pagarian ti Dios

Francia

Papua New Guinea

Estados Unidos

Alemania

Filipinas

Mexico

Britania

Nigeria

Netherlands

Brazil

Japan

Sud Africa

[Kahon/Dagiti ladawan iti panid 298]

Sumagmamano a Napaut ti Serbisioda Idiay Bethel

Ni F. W. Franz​—Estados Unidos (1920-92)

Ni Heinrich Dwenger​—Alemania (agarup 15 a tawen idi 1911-33), Hungary (1933-35), Czechoslovakia (1936-39), sa idiay Switzerland (1939-83)

Ni George Phillips​—Sud Africa (1924-66), 1976-82)

Agkabsat iti lasag (da Kathryn Bogard ken Grace DeCecca) a 136 a tawen ti panagserbidat’ Bethel no pagtiponen​—Estados Unidos

[Graph iti panid 303]

(Para iti aktual a pannakaurnosna, kitaem ti publikasion)

Umad-adu a Payunir!

Payunir

Agibumbunannag

Porsiento ti Irarang-ay Nanipud 1982

250%

200%

150%

100%

50%

1982 1984 1986 1988 1990 1992

[Ladawan iti panid 284]

Sinursor ni Sister Early ti kaaduan a paset ti New Zealand a sibibisikleta tapno iranudna ti mensahe ti Pagarian

[Ladawan iti panid 285]

Iti unos ti 76 a tawen​—kas balasang, naasawaan, ken kas balo​—impamaysa ni Malinda Keefer ti biagna iti amin a tiempo a ministerio

[Dagiti ladawan iti panid 286]

Dagiti simple a trailer isut’ nagturogan dagidi nagkauna a payunir bayat a nagakar-akarda

Canada

India

[Ladawan iti panid 287]

Ni Frank Rice (sitatakder iti kannawan), ni Clem Deschamp (situtugaw iti sango ni Frank, ken ni Jean, asawa ni Clem, sumaruno kadakuada), ken ti grupo dagiti padada a Saksi ken kabbaro nga interesado idiay Java

[Dagiti ladawan iti panid 288]

Ti kabibiag ni Claude Goodman iti amin a tiempo a ministerio isut’ gapu a nagserbi sadi India ken pito a sabali pay a daga

[Ladawan iti panid 289]

Idi nasalun-at pay ni Ben Brickell, tinagiragsakna nga inusar dayta iti serbisio ni Jehova; nupay nagsakit idi limmakayen saan a daytat’ nangpasardeng kenkuana

[Ladawan iti panid 290]

Nangasaba ni Kathe Palm iti isuamin a kitat’ teritoria, nanipud kadagiti opisina ti dakkel a siudad inggat’ nasulinek a kampo ti pagminasan ken rancho dagiti karnero sadi Chile

[Ladawan iti panid 291]

Ti determinasion da Martin ken Gertrud Poetzinger nayebkas kadagitoy a sao: ‘Daytoy ti banag nga aramidek​—sapulen nga umuna ti Pagarian’

[Ladawan iti panid 300]

Ti Pioneer Service School (kas makita ditoy sadi Japan) impaaynat’ espesial a pannakasanay dagiti pinullo ribo a naregta a trabahador