Sitatakder iti Ruangan ti Dakdakkel a Trabaho
“AWAN ti sinnalisal. Kayat ti amin nga agballigi ti tunggal maysa.” Kasta ti kinuna da Richard ken Lusia maipapan kadagiti padada nga estudiante iti maika-105 a klase ti Watchtower Bible School of Gilead. “Saankami nga agpapada, ngem kadakami, napateg ti tunggal estudiante.” Impasarunson ti kaklaseda a ni Lowell: “Dagiti pagdudumaanmi ti namagsinged kadakami.”
Pudno a saan nga agpapada dagiti mangbukel iti klase, a nagturpos idi Setiembre 12, 1998. Nagpaypayunir idi ti dadduma nga estudiante kadagiti lugar a dakkel ti panagkasapulan kadagiti agibumbunannag iti Pagarian; simamatalek a nagserbi dagiti dadduma kadagiti lugar nga asideg iti pagnanaedanda. Inkarigatan dagiti sumagmamano, kas kada Mats ken Rose-Marie, a pinarang-ay ti Ingles-da sakbay nga immayda nageskuela. Sipud pay iti kinaubingda, ar-arapaapen ti adu kadagiti estudiante ti agserbi kas misionero. Adda agassawa a namin-12 a nagaplay; anian a ragsakda idi naawisda iti maika-105 a klase!
Napartak a naglabas ti 20 lawas a nainget a panagadalda. Saan a napuotan dagiti estudiante a nalpas gayamen ti klaseda idi nayawatdan ti maudi a naisurat nga eksamenda, ken naiparangdan ti maudi nga oral a reportda, ket dimtengen ti aldaw ti panagraduar.
Ti tserman ti programa, ni Albert Schroeder, miembro ti Bagi a Manarawidwid dagiti Saksi ni Jehova, pinalagipanna dagiti estudiante a “sitatakderda iti ruangan ti dakdakkel a trabaho iti tay-ak ti panangisuro iti Biblia,” a sarunuenda ti nasurok a 7,000 a sabsabali pay nga immun-una a nagturpos iti Gilead. Dinakamatna nga iti napalabas a kalgaw, naaddaan dagiti estudiante iti naisangsangayan a gundaway a nakilangen kadagiti nabayagen a misionero idi binisita dagitoy ti sangalubongan a hedkuarter a naipatang kadagiti internasional a kombension.
Kalpasanna, inyam-ammo ni Brother Schroeder ni Max Larson, miembro ti Bethel Operations Committee. Inlawlawagna ti tema nga “Edukasion a Mangiturong iti Biag nga Agnanayon.” Inadaw ni Brother Larson ti Proverbio 1:5, a kunana: “Ti masirib a tao dumngeg koma, ket dumegdeg iti pannakasursuro; ken tapno ti tao a mannakaawat magaw-atna koma dagiti nainggundawayan a patpatigmaan.” Kasapulan ti kinalaing iti panagbalin nga epektibo a misionero. Dagiti nalaing a tattao ti agtakder iti saklang dagiti ari. (Proverbio 22:29) Kalpasan ti lima a bulan a panagadalda, nakasaganan a naimbag dagiti estudiante a mangirepresentar kadagiti katan-okan nga Ari, ni Jehova a Dios ken ni Kristo Jesus.
Ni David Olson iti Service Department ti simmaruno a nagpalawag iti tema a “Tumulongkayo a Mangparagsak iti Puso ni Jehova.” Insaludsodna: “Ania ti mabalin nga aramiden dagiti imperpekto a tattao tapno maparagsakda ti puso ti Dios?” Ti sungbat? Mabalinda ti agserbi kenkuana a simamatalek, sisusungdo, ken buyogen ti rag-o. Kayat ni Jehova a tagiragsaken dagiti tattaona ti agserbi kenkuana. No sirarag-o nga aramidentayo ti pagayatan ti Dios, maparagsaktayo ti pusona. (Proverbio 27:11) Binasa ni Brother Olson ti maysa a surat a naggapu iti agassawa a misionero a nagturpos iti maika-104 a klase ti Gilead. Naragsakda kadi iti baro a nakaidestinuanda? Maipapan iti kongregasionda, kastoy ti insuratda: “Addaankami iti agarup 140 nga agibumbunannag. Ag-250 agingga iti 300 ti promedio a bilang dagiti tumabtabuno kadagiti gimong. Ti serbisio iti tay-ak ti kasayaatan. Addaan ti tunggal maysa iti uppat nga iyad-adalan, ket makigimgimongen dagiti dadduma.”
Impalawag ni Lyman Swingle, miembro ti Bagi a Manarawidwid, ti topiko nga “Agsarimadengkayo ket Panunotenyo Dagiti Bendision a Sagsagrapenyo.” Adu a bendision ti inawat dagiti estudiante iti panagadalda idiay Gilead. Tinulonganna ida a rumang-ay iti pannakaammo, mangparayray iti apresasionda iti organisasion ni Jehova, ken mangpatanor kadagiti nasken unay a galad, kas iti kinapakumbaba. “Mamagpakumbaba a kapadasan ti panagsursuro ditoy,” kinuna ni Brother Swingle, sana innayon: “Pumanawkayo ditoy nga ad-adda a nakabalan a mangidaydayaw ken Jehova.”
“Anian a Nagdakkel ti Rag-oyo—Isu nga Apay Koma a Madanagankayo?” Dayta ti paulo ti palawag ni Daniel Sydlik, maysa met a miembro ti Bagi a Manarawidwid. Indagadagna a no rumsua dagiti problema, agpaiwanwantayo kadagiti Kasuratan. Babaen ti panangusarna kadagiti napili a bersikulo iti maika-6 a kapitulo ti Mateo, impakita ni Brother Sydlik no kasano a maaramidan daytoy. No kurang ti pammatitayo, mabalin a pakaringgorantayo dagiti material a banag, kas iti taraon ken kawes. Nupay kasta, ammo ni Jehova no ania ti kasapulantayo. (Mateo 6:25, 30) Ti panagdanag nayonanna laeng dagiti parikut iti tunggal aldaw. (Mateo 6:34) Iti sabali a bangir, nasken ti panagplano. (Idiligyo ti Lucas 14:28.) “Saan a ti nainsiriban a panangpanunot iti masakbayan ti iparparit ni Jesus, no di ket ti di nainsiriban a panagsikor iti dayta,” inlawlawag ni Brother Sydlik. “Ti panagtignay ti maysa kadagiti kasayaatan a pangparmek iti danag. No madanagantayo, nasayaat no isarsaritatayo ti kinapudno.”
Pammalubos a Balakad Manipud Kadagiti Instruktor
Simmaruno a nagpalawag dagiti tallo a miembro ti faculty ti Gilead. Ni Karl Adams ti immuna a nagpalawag, iti tema nga “Ania ti Isubadyo ken Jehova?” Naibatay ti palawagna iti maika-116 a Salmo, a nalabit kinanta ni Jesus iti daydi rabii sakbay ti ipapatayna. (Mateo 26:30, footnote iti Ingles) Ania ti adda iti panunot ni Jesus idi a kinantana ti sasao nga: “Ania ti itdekto ken Jehova a subad dagiti paraburna kaniak”? (Salmo 116:12) Mabalin a pampanunotenna idi ti perpekto a bagi nga insagana ni Jehova para kenkuana. (Hebreo 10:5) Iti sumuno nga aldaw, indatonna dayta a bagi, a mangpaneknek iti kauneg ti ayatna. Naramanan dagiti estudiante ti maika-105 a klase ti kinaimbag ni Jehova iti napalabas a lima a bulan. Ita ipakitada ti ayatda iti Dios babaen ti naanep a panagtrabahoda kadagiti pakaibaonanda kas misionero.
Ni Mark Noumair, ti maikadua nga instruktor ti Gilead a nagpalawag, binalakadanna dagiti estudiante nga “Itultuloy[da] nga Aramiden ti Umiso.” Idi nailako ni Jose kas adipen sadi Egipto, 13 a tawen nga inibturanna ti pannakairurumen. Simmardeng kadi a nagserbi iti Dios gapu iti di umiso nga aramid dagiti sabsabali? Saan, intultuloyna nga inaramid ti umiso. Idi dimteng ti tiempo nga inkeddeng ti Dios, nakalung-aw ni Jose kadagiti pakasuotanna. Pagammuan nagbaliw ti kasasaad, manipud balud agingga a nagnaed iti palasio. (Genesis, kapitulo 37-50) Sinaludsod ti instruktor kadagiti estudiantena: “No saan a matungpal dagiti namnamaenyo iti pakaibaonanyo kas misionero, sumardengkayo kadi? Maupaykayo kadi? Wenno agibturkayo, kas ken Jose?”
Kamaudiananna, ti registrar ti Gilead School, ni Wallace Liverance, indaulona ti nabiag a diskusion kadagiti miembro ti klase iti tema nga “Ipablaakyo ti Ari ken ti Pagarian.” Insalaysay ti dadduma kadagiti estudiante dagiti kapadasanda iti panangasabada kadagiti balbalay, tiendaan, ken lansangan. Sinarita dagiti dadduma no kasano ti panangasabada kadagiti tattao a sabali ti pagsasaoda. Adda met dagiti nangipakita no kasano a kasabaan dagiti tattao a nagduduma ti relihionda. Magagaran ti amin a nagturpos a makiraman a naan-anay iti ministerio kas misionero.
Dagiti Nararagsak a Nabayagen a Misionero
Imparang ni Robert Wallen ti sumaruno a paset, a napauluan “Dagiti Naragsak a Resulta ti Panagserbi kas Misionero.” Iti daytoy a paset, nainterbiu dagiti uppat a kakabsat a miembro ti staff iti hedkuarter nga iti di pay nabayag, naaddaanda iti gundaway a nakipinnabileg kadagiti natenneb a misionero. Sidadaan nga inannugot dagidiay a misionero a saan a nalaka para kadakuada ti agsursuro iti baro a lenguahe, makibagay iti sabali a kultura, wenno mangiruam iti bagbagida iti naiduma a klima. Maysa pay, narigat nga iliwliwag ti iliw. No dadduma, adda dagiti parikut iti salun-at. Ngem iti baet amin dagitoy, sinalimetmetan dagiti misionero ti positibo a kababalin, ket nasupapakan ti kinaanusda. Adu a tattao ti natulongan dagiti dadduma a mangammo ken Jehova. Iti nagduduma a pamay-an, nakatulong dagiti dadduma iti irarang-ay ti trabaho ti Pagarian iti pagilianda.
Ni Carey Barber, miembro ti Bagi a Manarawidwid, ti maudi a nagpalawag. Rinepasona dagiti tampok a paset ti programa ti “Dalan ti Dios iti Biag” a kombension. Sinaludsodna iti tallaong, “Ania ti epekto ti programa ti kombension iti relasionyo ken Jehova?” Pinaggidiat ni Brother Barber dagiti nasayaat a resulta ti panangsurot iti dalan ti Dios ken ti dakes a pagtungpalan dagidiay mangsursurot iti dalan ti lubong. Iti panangdakamatna iti salungasing ni Moises idiay Meriba, imballaagna: “Uray pay no adu a tawenen a simamatalek nga agserserbi ti maysa a tao, saan a laglag-anen ni Jehova ti uray bassit laeng a pananglabsing kadagiti nalinteg a lintegna.” (Numeros 20:2-13) Sapay koma ta petpetan a naimbag dagiti amin nga adipen ti Dios iti sadinoman dagiti napateg a pribilehioda iti serbisio!
Dimteng ti kanito a panangawat dagiti estudiante iti diplomada. Kalpasanna, binasa ti pannakabagi ti klase ti maysa a surat a pagyaman iti panagadal dagiti estudiante. Nagngudo ti programa ti panagturpos babaen ti kanta ken naimpusuan a kararag. Ngem, para iti maika-105 a klase, pangrugian laeng daytoy, ta dagiti kabbaro a misionero “sitatakder[da] iti ruangan ti dakdakkel a trabaho.”
[Kahon iti panid 23]
Estadistika ti Klase
Bilang dagiti pagilian a nairepresentar: 9
Bilang dagiti pagilian a pakaibaonanda: 17
Bilang dagiti estudiante: 48
Bilang dagiti agassawa: 24
Promedio nga edad: 33
Promedio a tawen iti kinapudno: 16
Promedio a tawen iti amin-tiempo a ministerio: 12
[Kahon iti panid 24]
Pinilida ti Amin-Tiempo a Serbisio
“Idi agbaroak, awan planok idi nga agpayunir,” kuna ni Ben, nagturpos iti maika-105 a klase. Kunana pay: “Impagarupko a dagidiay laeng addaan naisangsangayan nga abilidad ken nasayaat ti kasasaadda ti makapagpayunir. Ngem nasursurok nga ipateg ti serbisio iti tay-ak. Maysa nga aldaw, nautobko a ti panagbalin a payunir kaipapananna laeng ti ad-adda a pannakiraman iti ministerio. Idi laeng a naamirisko a makapagpayunirak.”
“Iti lugarmi, maipatpateg unay dagiti agserserbi iti amin a tiempo,” kuna ni Lusia. Malaglagipna ti gagar dagiti kakabsat iti kongregasionda tunggal addada sumarungkar a misionero. “Idi agmatmataenganakon, inramanko kadagiti planok ti amin-tiempo a serbisio,” kunana.
Agtawen iti 15 ni Theodis idi natay ni nanangna. “Inan-andingaydak idi dagiti kakabsat iti kongregasionmi,” kunana, “isu nga insaludsodko iti bagik, ‘Ania ti mabalinko nga aramiden tapno maipakitak ti apresasionko?’” Daytoy ti nangtignay kenkuana a sumrek iti amin-tiempo a serbisio ket ita agserbin kas misionero.
[Ladawan iti panid 25]
Ti Maika-105 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar
(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.