Agtalekkayo ken Jehova​—Ti Sibibiag a Dios

Kimmitakayo kadin iti naariwanas a tangatang iti rabii ket nakitayo ti ginasgasut a bituen? Mailawlawagyo kadi ti kaaddada?

BAYAT ti naulimek a rabii, arigna a nagsao dagiti bituen ken David nga ari ti nagkauna nga Israel, a nangtignay kenkuana a nangisurat: “Ti langlangit idekdeklarada ti dayag ti Dios; ket maipapan iti aramid ti im-imana ibagbaga ti tangatang.” (Salmo 19:1) Wen, ti Namarsua imbes a ti parsua ti maikari “nga umawat iti dayag ken iti dayaw ken iti pannakabalin.”​—Apocalipsis 4:11; Roma 1:25.

“Ti nangibangon iti amin a bambanag isu ti Dios,” kuna ti Biblia. (Hebreo 3:4) Kinapudnona, ti pudno a Dios, ‘nga agnagan Jehova, ti Kangatuan iti intero a daga.’ (Salmo 83:18) Ti Dios ket saan nga ilusion​—maysa a parmata. Kinuna ni Jesu-Kristo maipapan iti nailangitan nga Amana, ni Jehova: ‘Daydiay nangibaon kaniak pudno.’​—Juan 7:28.

Ni Jehova​—Ti Manangitungpal Kadagiti Panggepna

Ti naisalsalumina a nagan ti Dios a Jehova ket agparang iti nganngani 7,000 a daras iti laeng Hebreo a Kasuratan. Dayta a mismo a nagan ti mangpaneknek a ti Dios ket pudpudno. Ti nagan ti Dios ket literal a kaipapananna “Pagbalinenna.” Babaen iti dayta, impabigbig ni Jehova a Dios ti bagina kas ti Manangitungpal kadagiti panggepna. Idi dinamag ni Moises ti nagan ti Dios, impaawat ni Jehova ti kaipapanan ti naganna iti kastoy a pamay-an: “Agbalinakto no anianto ti pagbalinak.” (Exodo 3:14) Kastoy ti sibabatad a panangipatarus ni Rotherham: “Pagbalinek ti bagik iti aniaman a kayatko a pagbalinan.” Paneknekan wenno pagbalinen ni Jehova ti bagina iti aniaman a kasapulan a pagbalinanna tapno pumayso dagiti nalinteg a panggep ken karina. Gapuna, adu a nadadaeg a titulo ti ik-ikutanna, kas iti Namarsua, Ama, Soberano nga Apo, Pastor, Jehova dagiti buybuyot, Managdengngeg iti kararag, Ukom, Naindaklan a Manangisuro, Manangsaka.​—Uk-ukom 11:27; Salmo 23:1; 65:2; 73:28; 89:26; Isaias 8:13; 30:20; 40:28; 41:14.

Ti laeng pudno a Dios ti nainkalintegan a mapanaganan iti Jehova, agsipud ta di pulos masigurado dagiti tattao no agballigi dagiti planoda. (Santiago 4:13, 14) Ni laeng Jehova ti makaibaga: “No kasano a ti agbuyat a tudo bumaba, ken ti niebe, manipud iti langlangit ket saan nga agsubli iti dayta a lugar, malaksid no pudno nga umagsep iti daga ket mamagtaud manipud iti dayta ken mamagtubo, ket ti bin-i pudno a maited iti managmula ken tinapay iti mangan, kasta ti pagbalinanto ti saok a rummuar manipud iti ngiwatko. Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”​—Isaias 55:10, 11.

Kasta kasigurado ti panangitungpal ni Jehova iti panggepna nga uray ti banag nga imposible iti tao ket posible kenkuana. Nabayag kalpasan ti ipapatay da Abraham, Isaac, ken Jacob, dinakamat ni Jesus ida ket kinunana: “Isu [ni Jehova] ket Dios, saan a dagiti natay, no di ket dagiti sibibiag, ta sibibiagda amin kenkuana.” (Lucas 20:37, 38) Natay dagiti tallo a matalek a patriarka, ngem talaga a sigurado ti pannakatungpal ti panggep ti Dios a mangpagungar kadakuada ta kenkuana kasda la sibibiagen. Ti panangpagungar kadagitoy nagkauna a matalek nga adipen ket saan a narigrigat para ken Jehova ngem ti panangparsuana idi iti immuna a tao manipud iti tapok iti daga.​—Genesis 2:7.

Nangipaay ni apostol Pablo iti sabali pay a pagarigan iti kinapudno a ti Dios itungpalna dagiti aniaman a pinanggepna. Iti Kasuratan, naawagan ni Abraham nga “ama ti adu a nasion.” (Roma 4:16, 17) Idi awan pay anak ni Abram, binaliwan ni Jehova ti naganna iti Abraham, a kaipapananna “Ama ti Bunggoy (Umariwekwek).” Pinagbalin ni Jehova a pudno ti kaipapanan dayta a nagan babaen ti simimilagro a panangisublina iti pannakabalin a maaddaan iti anak ken ni lakayen nga Abraham ken iti baketen nga asawana, a ni Sara.​—Hebreo 11:11, 12.

Gapu ta naikkan iti adu a pannakabalin ken autoridad, nagsao ni Jesu-Kristo maipapan kadagiti pudno a bambanag iti panangmatmat a nangatngato ngem iti tao. Nupay natay ti nasinged a gayyemna a ni Lazaro, kinuna ni Jesus kadagiti adalanna: “Ni Lazaro a gayyemtayo napan naginana, ngem agbaniagaak sadiay tapno riingek manipud pannaturogna.” (Juan 11:11) Apay a kinuna ni Jesus a matmaturog laeng ti maysa a natayen a tao?

Idi nakagteng ni Jesus idiay Betania nga ili ni Lazaro, napan iti tanem ket imbilinna nga ikkatenda ti bato a rikep ti pagserkan. Kalpasan a nagkararag iti napigsa, imbilinna: “Lazaro, rummuarka!” Iti imatang dagiti tattao a kumitkita iti tanem, “ti tao a natayen rimmuar a dagiti saka ken im-imana sipapatapat kadagiti bedbed, ket ti rupana napatapatan iti lupot.” Kalpasanna, kinuna ni Jesus: “Warwaranyo ket bay-anyo a mapan.” (Juan 11:43, 44) Pinagungar ni Jesus ni Lazaro​—insublina ti biag ti maysa a tao nga uppat nga aldawen a natay! Saan a nagulbod ni Kristo idi kinunana a matmaturog ti gayyemna. Iti panangmatmat da Jehova ken Jesus, kasla nakaturog laeng ti pimmusay a ni Lazaro. Wen, dagiti pudpudno a bambanag ti pakaseknan ni Jesus ken ti nailangitan nga Amana.

Mapagbalin ni Jehova a Napaypayso Dagiti Namnamatayo

Anian a nagduma dagiti makaallilaw nga idolo ken ti sibibiag a Dios! Sibibiddut nga ibaga dagiti agdaydayaw iti idolo a dagiti pagrukrukbabanda ti addaan iti datdatlag a pannakabalin. Ngem daytoy a panagdayaw ket saan a makaipaay iti namilagruan nga abilidad kadagitoy nga idolo. Iti sabali a bangir, nainkalintegan a maibaga ni Jehova a Dios a sibibiag dagiti nabayagen a natay nga adipenna agsipud ta kabaelanna a pagungaren ida. “Ni Jehova ket pudno a Dios,” ken dina pulos allilawen ti ilina.​—Jeremias 10:10.

Anian a makaliwliwa a maammuan nga iti naituding a tiempo ni Jehova, mapagungarto dagiti pimmusay nga adda iti lagipna​—agbiagda manen! (Aramid 24:15) Wen, karaman iti panagungar ti pannakaisubli ti kinatao a pakabigbigan ti indibidual. Ti pananglagip iti kinatao dagiti pimmusay ken ti panangpagungar kadakuada ket saan a parikut iti Namarsua, nga awan pagpatinggaan ti sirib ken pannakabalinna. (Job 12:13; Isaias 40:26) Yantangay aglaplapusanan ti ayat ni Jehova, usarenna ti perpekto a memoriana a mangpagungar kadagiti natay ket agbiagda iti paraiso a daga iti personalidad nga adda kadakuada sakbay a natayda.​—1 Juan 4:8.

Bayat nga umas-asideg ti panungpalan ti lubong ni Satanas, sigurado a naraniag ti masakbayan dagidiay agtalek iti pudno a Dios. (Proverbio 2:21, 22; Daniel 2:44; 1 Juan 5:19) Impanamnama kadatayo ti salmista: “Iti apagbiit laengen a kanito, ket daydiay nadangkes awanton; . . . ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” (Salmo 37:10, 11) Awanton ti krimen ken kinaranggas. Agrairanto ti kinahustisia, ken awanton ti kinapanglaw. (Salmo 37:6; 72:12, 13; Isaias 65:21-23) Mapukawton nga interamente ti panangidumduma a maigapu iti kasasaad ti panagbiag, puli, tribu, ken kultura. (Aramid 10:34, 35) Awanton dagiti gubat ken igam. (Salmo 46:9) Iti dayta a tiempo, “awanto ti agtataeng nga agkuna: ‘Masakitak.’” (Isaias 33:24) Matagiragsakto ti tunggal maysa ti perpekto a salun-at ken kinasalibukag. (Apocalipsis 21:3, 4) Asidegen a pumayso ti paraiso ditoy daga. Pinanggep dayta ni Jehova!

Wen, asidegen a matungpal amin a naibatay iti Biblia a namnama. Apay koma nga ipalubostay a maallilawtayo kadagiti mapagrukrukbaban iti daytoy a lubong idinto ta naan-anay a makapagtalektayo ken Jehova? Pagayatanna a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:3, 4) Imbes nga usarentayo ti tiempo ken dagiti sanikuatayo kadagiti ilusion, wenno parparmata, iti daytoy a sistema ti bambanag ken kadagiti didiosna, rumang-aytayo koma iti pannakaammo maipapan iti sibibiag a Dios ken agtalektayo kenkuana iti amin a pusotayo.​—Proverbio 3:1-6; Juan 17:3.

[Ladawan iti panid 6]

Iti panangmatmat da Jehova ken Jesus, nakaturog laeng ni Lazaro

[Dagiti Ladawan iti panid 7]

Asidegen a pumayso ti paraiso ditoy daga