Uray Bakbaketanen Makapagserbi Pay Laeng ken Jehova
ADU kadagiti lallakay ken babbaketen ti makarikna a dagiti nabatbati pay a tawenda ket saanen a makaipaay iti kinaragsak. Kinuna pay ketdi ti maysa a nalatak a baketen nga artista: “Binusbosko ti panagbiagko nga awan kapapayanna, ket naladawen tapno balbaliwak dayta . . . No kasta a magmagnaak nga agmaymaysa, malaglagipko ti panagbiagko, ket diak maragsakan iti nangyusarak iti dayta . . . Saanak a kontento uray sadinoman ken pulos a diak makapaginana.”
Maysa a baket a nagbiag agarup 2,000 a tawenen ti napalabas ti awanan iti kasta a parikut. Isu ket maysa a balo nga agtawen iti 84, ngem aktibo pay, naragsak, ken siaayat a pinaraburan ti Dios. Ana ti naganna, ket isut’ addaan naisangsangayan a rason nga agrag-o. Ania ngay dayta?
“Saan a Pulos Limmanglangan Idiay Templo”
Ti mannurat iti Ebanghelio a ni Lucas iyam-ammona kadatayo ni Ana. “Ita,” kinunana, “adda ni Ana a maysa a mammadto, anak a babai ni Fanuel, manipud iti tribo ni Aser” iti Israel. Kas maysa a mammadto, isu ket naparaburan iti nasantuan nga espiritu ti Dios, wenno aktibo a puersa, iti naisangsangayan a wagas. Ket naipaayan ni Ana iti dakkel a pribilehio nga agipadto iti maysa a naisangsangayan nga okasion.
Kuna ni Lucas: “Daytoy a babai aduan unayen iti tawen, ket nakipagbiag iti maysa nga asawa iti pito a tawen manipud iti kinabirhenna, ket isu maysa a balo a walopulo ket uppat ti tawenna itan.” (Lucas 2:36, 37) Mabalin a nabalo ni Ana idi agkabanuag pay laeng. Ammo dagiti nabalo a Kristiano a babbai iti aniaman nga edad no kasano kasaem ti pannakapukaw ti ing-ingungoten nga asawa no matay. Nupay kasta, kas kadagiti adu a nadiosan a babbai iti kaaldawantayo, saan nga impalubos ni Ana a daytoy makapaliday a kapadasan ti mangpasardeng iti panagserbina iti Dios.
Kunaen kadatayo ni Lucas a “saan a pulos limmanglangan [ni Ana] idiay templo” sadi Jerusalem. (Lucas 2:37) Inapresiarna unay ti pammendision a bunga ti panagserbi iti balay ti Dios. Ipalgak dagiti tignayna nga isu, kas ken David nga ari ken salmista ti Israel, ket addaan maymaysa laeng a kalikagum ken Jehova. Ania ngay dayta? Inkanta ni David: “Maysa a banag ti dinawatko ken Jehova—isu a birukekto, nga agtaengak koma iti balay ni Jehova iti dagup dagiti al-aldaw ti biagko, tapno agbuybuyaak iti sayaat ni Jehova ken imutektekak a buyogen ti panangipateg iti uneg ti templona.” (Salmo 27:4) Iti daytoy a banag, umasping met ni Ana kadagiti Kristiano a babbai ita a maragragsakan iti regular a kaaddada iti lugar a pagdaydayawan ken Jehova.
Nangipaay ni Ana iti sagrado a panagserbi ken Jehova iti rabii ken aldaw. Inaramidna daytoy a “buyogen dagiti panagayunar ken ar-araraw,” a mangipakpakita ti panagun-unnoy ken napasnek a kalkalikagum. (Lucas 2:37) Ti sinigsiglot’-kabayagna a panangdominar dagiti Gentil kadagiti Judio, a napakuyogan kadagiti makariribuk a narelihiusuan a kasasaad a nakadanon uray iti templo ken dagiti papadina, ti mabalin a nakagapu iti panagayunar ken panagar-araraw ni Ana ken ni Jehova a Dios. Ngem addaan met iti rason tapno agragsak, nangruna gapu iti naisangsangayan a banag a napasamak iti maysa a pudpudno a nagpateg nga aldaw idi tawen 2 K.K.P.
Maysa a Di Ninamnama a Bendision
Iti daytoy nagpateg nga aldaw, impan da Maria, nga inana, ken ni Jose, nga agsiuman kenkuana, ni maladaga a Jesus idiay templo ti Jerusalem. Nakita ni lakayen a Simeon ti ubing ket nagsao kadagiti naimpadtuan a sasao iti dayta a gundaway. (Lucas 2:25-35) Kas gagangay adda ni Ana idiay templo. “Iti dayta met laeng nga oras,” kuna ni Lucas, “immasideg.” (Lucas 2:38) Ania ketdin a ragsak ni Ana bayat a mingmingmingan dagiti nakapsuten a matana ti agbalinto a Mesias!
Uppat a pulo nga aldaw kasakbayanna, kinellaat ti anghel ti Dios dagiti papastor iti asideg ti Betlehem a kunana: “Adtoy! ideklarak kadakayo ti naimbag a damag ti dakkel a rag-o a maaddanto iti isuamin a tattao, agsipud ta naiyanak kadakayo ita nga aldaw ti maysa a Manangisalakan, nga isu ti Kristo nga Apo, iti siudad ni David.” Dagiti umariwekwek a nailangitan a buyot dinaydayawda ni Jehova a kunkunada: “Dayag iti Dios kadagiti kangatuan, ket iti daga talna kadagiti tattao nga addaan naimbag a nakem.” (Lucas 2:8-14) Kasta met, natignay ni Ana a mangpaneknek maipapan iti Daydiay agbalinto a Mesias!
Kalpasan a minatmatan ni Ana ti ubing a ni Jesus, “rinugianna ti mangipaay ti panagyaman iti Dios ken agsasao maipapan iti ubing kadagidiay amin nga agur-uray iti pannakaispal ti Jerusalem.” (Lucas 2:38) Kas ken ni lakayen a Simeon, a naipaayan met ti gundaway a makakita iti maladaga a ni Jesus idiay templo, awan duadua a tinartarigagayan, inkarkararag, ken inur-urayna ti naikari a Manangisalakan. Ti naimbag a damag a ni Jesus isu Daydiay ket immanayen a nangtignay kenkuana a mangibaga kadagiti sabsabali.
Nupay mabalin a di ninamnama ni Ana a sibibiagto pay laeng inton dakkelen ni Jesus, ania ti inaramidna? Sirarag-o nga impaneknekna kadagiti sabsabali ti maipapan iti pannakawayawaya a yeg daytoy um-umay a Mesias.
Ti Nasayaat nga Ulidan ni Ana
Mano a relihiuso a tattao iti lubong ti mangted iti kasta a pammaneknek wenno agdaydayaw pay laeng iti rabii ken aldaw iti tawen a 84? Nalabit a kalikagumanda ti pension no kasta nga agretirodan. Naiduma da Ana ken Simeon. Nangipakitada kadagiti nasayaat nga ulidan agpaay kadagiti amin a lallakay ken babbaketen nga ad-adipen ni Jehova. Wen, ay-ayatenda ti balay a pagdaydayawan ken Jehova ken nagdaydayawda kenkuana iti amin a pusoda.
Ni Ana ket maysa a nakasaysayaat nga ulidan ti maysa a nadiosan a balo. Kinapudnona, ti panangiladawan ni Lucas iti daytoy napakumbaba a baket ket maipada unay kadagiti kualipikasion ti maysa a maipatpateg a balo a nailanad idiay 1 Timoteo 5:3-16. Sadiay kunaen ni apostol Pablo a ti kasta a balo “agtultuloy kadagiti panagararaw ken panagkararag iti rabii ken aldaw,” “asawa ti maymaysa a lalaki,” ken ‘sigaganetget a sumurot iti tunggal naimbag nga aramid.’ Kasta a kita ti babai ni Ana.
Ita, masarakantayo dagiti matalek a babbaketen a balo a mangipapaay ti sagrado a panagserbi iti Dios iti rabii ken aldaw iti rinibribu a kongregasion dagiti Saksi ni Jehova iti intero a daga. Anian a panangapresiartayo iti kaadda dagitoy moderno-aldaw nga “Ana” iti nagtetengngaantayo!
Uray nataenganen iti edad, mabalin nga agdedikar dagiti lallaki ken babbai iti Dios ken isimboloda daytoy babaen ti pannakabautisar iti danum. Makapagserbi pay laeng dagiti lallakay ken babbaket ken ni Jehova ken makapaneknek maipapan iti Mesianiko a Pagarian a naipasdeken idiay langit ket din agbayag yegnanton dagiti naruay a bendision iti natulnog a sangatauan. Dagiti lallakay ken babbaket a mangipapaay ti sagrado a panagserbi iti Dios mapaneknekanda ti pammendision ni Jehova kadakuada, a kas ken Ana a naipangruna a nabendisionan adun a siglo ti napalabas. Kas kenkuana, uray lallakay ken babbaketdan makapagserbida pay laeng ken Jehova ken maidaydayawda ti naganna.