TRACONITE

[nagtaud iti sao a Griego a kaipapananna ti “lasonglasong,” nalabit lasonglasong a lugar].

Ti rehion (a kadua ti Iturea) a tartarawidwidan ni Felipe, maysa a Romano nga agturay iti distrito idi tiempo ti ministerio da Juan a Manangbautisar ken ni Jesus. (Lu 3:1) Dagiti makin-amianan a beddeng ti Traconite ket agarup 40 km (25 mi) iti abagatan a daya ti Damasco iti makin-amianan a daya a paset ti Basan. Saklawenna ti maysa a lugar a kasla peras ti sukogna nga agarup 900 km kuad (350 mi kuad) ti kalawana.

Iti kaaduan a paset, ti makintengnga a paset daytoy a daga ket naabbongan iti makitkita a naurnong a lava nga addaan iti nauuneg a rengngat ken ab-abut, a bassit laengen a daga ti nabatbati a mabalin a pagmulaan iti dadduma pay a mula malaksid iti kaubasan. Maysa daytoy a langalang, natikag, ken makapaalinggaget a daga, a pagaammo ita iti Arabiko a nagan nga el Leja (kaipapananna “ti Kamang”), ta maikanatad a paglemmengan dagiti pugante iti hustisia.

No ibatay kadagiti rebba dagiti kadaanan a siudadna, adda idi tiempo a ti populasion ti Traconite ket dakdakkel nga amang ngem iti agdama. Ti saan a pannakausar ti kayo iti pannakaibangon dagitoy a siudad ket mangipasimudaag nga uray idi un-unana, nalabit awan ti kayo iti daytoy a lugar a kas met laeng ita. Ngem gapu ta nawadwad ti tudo ken adda dagiti ubbog sadiay, mabalin ti agtaraken kadagiti karnero ken kalding.

Ti Traconite ket naminsan laeng a nadakamat iti Biblia, nupay namin-adu a tinukoy da Strabo ken Josephus daytoy a rehion. Manipud kadagita a sekular a reperensia, maammuan a ti Romano nga Emperador Augusto inramanna ti Traconite kas sakup ti pagarian a naited ken Herodes a Dakkel. Idi natay ni Herodes, ti anakna a ni Felipe inawatna ti Traconite kas paset ti tetrarkia nga inturayanna agingga iti ipapatayna.