Itantandudoyo Kadi ti Kinasoberano ni Jehova?

“Sawenyo iti tengnga dagiti nasion: ‘Ni met laeng Jehova nagbalinen nga ari.’”​—SALMO 96:10.

1, 2. (a) Ania ti naisangsangayan a napasamak idi agarup Oktubre 29 K.P.? (b) Ania ti kaipapanan dayta a pasamak ken Jesus?

IDI agarup Oktubre 29 K.P., damo a naimatangan ditoy daga ti maysa a naisangsangayan a pagteng. Kinuna ti mannurat iti Ebanghelio a ni Mateo: “Kalpasan a nabautisaran dagus a simmang-at ni Jesus manipud iti danum; ket, adtoy! naluktan ti langlangit, ket [ni Juan a Mammautisar] nakitana ti espiritu ti Dios a bumabbaba a kasla kalapati nga um-umay [ken Jesus]. Adtoy! Kasta met, adda timek manipud iti langlangit a nagkuna: ‘Daytoy ti Anakko, ti dungdungnguen, nga inanamongak.’” Maysa daytoy kadagiti sumagmamano a pasamak nga agpapada nga inlanad ti uppat a mannurat iti Ebanghelio.​—Mateo 3:16, 17; Marcos 1:9-11; Lucas 3:21, 22; Juan 1:32-34.

² Ti pannakaiparukpok ti nasantuan nga espiritu ken Jesus ket pammaneknek nga isu Daydiay Napulotan, kayatna a sawen, Mesias wenno Kristo. (Juan 1:33) Nagparang met laengen ti naikari a ‘bin-i’! Agtaktakder idi iti sanguanan ni Juan a Mammautisar daydiay dunorento ni Satanas ti mukodna ken daydiay mangdunorto iti ulo ti kangrunaan a bumusbusor kenni Jehova ken iti kinasoberanona. (Genesis 3:15) Sipud idin, naan-anay nga ammo ni Jesus a nasken nga itungpalna ti pagayatan ni Jehova mainaig iti kinasoberanona ken iti Pagarian.

3. Kasano a nagsagana ni Jesus maipaay iti akemna a mangitandudo iti kinasoberano ni Jehova?

³ Kas panagsagana iti baro nga annongenna, “ni Jesus, a napno iti nasantuan nga espiritu, pimmanaw iti Jordan, ket naiturturong idiay let-ang babaen ti espiritu.” (Lucas 4:1; Marcos 1:12) Iti 40 nga aldaw, inut-utob a naimbag ni Jesus ti isyu a pinataud ni Satanas mainaig iti kinasoberano ni Jehova ken no kasanona a maitandudo dayta. Nairaman iti dayta nga isyu ti amin a tattao ken anghel. Nasken nga usigentayo ti kinamatalek ni Jesus ken no ania ti aramidentayo tapno maipakitatayo nga itantandudotayo ti kinasoberano ni Jehova.​—Job 1:6-12; 2:2-6.

Nakarit ti Kinasoberano ni Jehova

4. Kasano a kinarit ni Satanas ti kinasoberano ni Jehova?

⁴ Ammo ni Satanas dagiti kadakdakamat a pasamak. Dagus a rinugianna a rinaut ti kangrunaan a paset ti ‘bin-i’ ti “babai” a kukua ti Dios. (Genesis 3:15) Namitlo a sinulisogna ni Jesus, nga insingasingna a nasaysayaat no ipangpangruna ni Jesus ti bukodna a pagsayaatan imbes a ti pagayatan ni Amana. Iti maikatlo a panangsulisog ni Satanas, ad-adda pay a nagminar ti isyu maipapan iti kinasoberano. Impakitana ken Jesus ti “amin a pagarian ti lubong ken ti dayagda,” ket rupanrupa a kinuna ni Satanas kenkuana: “Amin dagitoy a banag itedkonto kenka no agruknoyka ken mangaramidka iti maysa a tignay a panagdayaw kaniak.” Gapu ta pagaammona nga iturturayan ti Diablo ti “amin a pagarian ti lubong,” impakita ni Jesus no asino ti dinasiganna idi kinunana: “Pumanawka, Satanas! Ta adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.’”​—Mateo 4:8-10.

5. Ania a narigat nga annongen ti nasken nga itungpal ni Jesus?

⁵ Iti intero a panagbiag ni Jesus, impakitana a ti panangitandudo iti kinasoberano ni Jehova ti kangrunaan iti biagna. Ammo ni Jesus a masapul nga agtalinaed a matalek uray no papatayen ni Satanas​—kas naipadto a pannakadunor ti mukod ti ‘bin-i’ ti babai​—tapno mapaneknekanna a ti Dios ti nainkalintegan nga agturay. (Mateo 16:21; 17:12) Masapul met nga ipakaammona a ti Pagarian ti Dios ti usaren ni Jehova a mangparmek iti rebelde a ni Satanas ken mangisubli iti talna ken urnos iti sangaparsuaan. (Mateo 6:9, 10) Ania ti inaramid ni Jesus tapno maitungpalna daytoy a narigat nga annongen?

‘Immasidegen ti Pagarian ti Dios’

6. Kasano nga impakaammo ni Jesus a ti Pagarian ti usaren ti Dios a ‘mangdadael kadagiti aramid ti Diablo’?

⁶ Kas panangrugi, “napan ni Jesus idiay Galilea, a mangikaskasaba iti naimbag a damag ti Dios ket kunkunana: ‘Ti naituding a tiempo natungpalen, ket ti pagarian ti Dios immasidegen.’” (Marcos 1:14, 15) Kinapudnona, kinunana: “Masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Lucas 4:18-21, 43) Winanas ni Jesus ti intero a Galilea, nga “ikaskasabana ken idekdeklarana ti naimbag a damag ti pagarian ti Dios.” (Lucas 8:1) Nagaramid met iti adu a milagro​—pinakanna dagiti bunggoy, pinakalmana ti napeggad a paniempo, pinaimbagna dagiti masakit, ken pinagungarna dagiti natay. Babaen kadagitoy a milagro, pinaneknekan ni Jesus a kabaelan ti Dios nga ikkaten ti amin a didigra ken panagsagaba a resulta ti panagrebelde idiay Eden ket iti kasta, “dadaelenna dagiti aramid ti Diablo.”​—1 Juan 3:8.

7. Ania ti imbilin ni Jesus nga aramiden dagiti pasurotna, ken ania ti resultana?

⁷ Tapno naan-anay a maikasaba ti naimbag a damag maipapan iti Pagarian, nangpili ni Jesus kadagiti matalek a pasurotna ken sinanayna ida iti dayta a trabaho. Umuna, binilinna dagiti 12 nga apostolna sa “imbaonna ida tapno ikasabada ti pagarian ti Dios.” (Lucas 9:1, 2) Kalpasanna, nangibaon iti 70 a sabali pay tapno ipakaammoda ti mensahe a: “Ti pagarian ti Dios immasidegen kadakayo.” (Lucas 10:1, 8, 9) Idi impadamagda ken Jesus ti naballigi a panangikasabada iti Pagarian, kinunana kadakuada: “Nangrugi a makitak a ni Satanas natnagen a kas kimat manipud langit.”​—Lucas 10:17, 18.

8. Ania ti nalawag nga ipakita ti intero a panagbiag ni Jesus?

⁸ Awan ti sinayang ni Jesus a pigsa ken gundaway a nangikasaba iti Pagarian. Nangaskasaba iti aldaw ken rabii, nga uray la insakripisiona ti personal a pagnam-ayanna. “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan pangisaadanna iti ulona,” kinunana. (Lucas 9:58; Marcos 6:31; Juan 4:31-34) Sakbay unay ti ipapatayna, situtured a kinuna ni Jesus iti saklang ni Poncio Pilato: “Maigapu itoy nga immayak iti lubong, tapno saksiak ti kinapudno.” (Juan 18:37) Impakita ti intero a panagbiag ni Jesus nga isu ket immay saan laeng a tapno agbalin a naindaklan a mannursuro wenno mangaramid iti milagro wenno mangisalakan, no di ket tapno itungpalna ti pagayatan ni Jehova ken paneknekanna a kabaelan ti Dios a tungpalen ti pagayatanna babaen ti Pagarian.​—Juan 14:6.

“Naitungpalen!”

9. Kasano a nagballigi ni Satanas a nangdunor iti mukod ti ‘bin-i’ ti babai a kukua ti Dios?

⁹ Ti Kabusor a ni Satanas a Diablo ket saan a naay-ayo iti amin nga inaramid ni Jesus mainaig iti Pagarian. Babaen ti naindagaan a paset ti “bin-ina”​—politika ken relihion​—maulit-ulit a pinadas ni Satanas a papatayen ti ‘bin-i’ ti babai. Sipud idi naipasngay agingga idi agngudo ti biagna ditoy daga, ni Jesus ti puntiria ni Satanas ken dagiti buyotna. Idi primavera ti 33 K.P., dimtengen ti tiempo a panangdunor ti Kabusor iti mukod ti Anak ti tao. (Mateo 20:18, 19; Lucas 18:31-33) Ipakita dagiti salaysay ti Ebanghelio no kasano a dagiti tattao​—manipud ken Judas Iscariote agingga kadagiti nangato a papadi, eskriba, Fariseo, ken Romano​—ket inusar ni Satanas a mangkondenar ken mangipalak-am ken Jesus iti nasaem nga ipapatay iti kayo a pagtutuokan.​—Aramid 2:22, 23.

10. Ania ti kangrunaan nga intungpal ti ipapatay ni Jesus iti kayo a pagtutuokan?

¹⁰ Ania ti mapanunotyo no malagipyo ti in-inut ken nasaem nga ipapatay ni Jesus iti kayo a pagtutuokan? Mabalin a malagipyo ti daton a subbot a situtulok nga impaay ni Jesus maigapu iti managbasol a sangatauan. (Mateo 20:28; Juan 15:13) Nalabit a pagsiddaawanyo ti kadakkel ti panagayat nga impakita ni Jehova idi impaayna dayta a daton. (Juan 3:16) Mabalin a mariknayo ti narikna ti opisial a Romano a natignay a nangibaga: “Pudno unay a daytoy ket Anak ti Dios.” (Mateo 27:54) Awan duadua a maitutop amin dagitoy a reaksion. Iti sabali a bangir, lagipenyo dagiti maudi a sasao ni Jesus iti kayo a pagtutuokan: “Naitungpalen!” (Juan 19:30) Ania ti naitungpal? Nupay adu ti nagapuanan ti biag ken ipapatay ni Jesus, saan kadi a ti pannakaibanag ti isyu maipapan iti kinasoberano ni Jehova ti kangrunaan a rason nga immay ni Jesus ditoy daga? Ken saan kadi a naipadto a nakaro nga agsagaba ti ‘bin-i’ iti ima ni Satanas tapno madalusan ti naumsi a nagan ni Jehova? (Isaias 53:3-7) Narigat dagitoy nga annongen, ngem intungpal amin dagita ni Jesus. Anian a gapuanan!

11. Ania ti aramiden ni Jesus tapno naan-anay a matungpal ti padto idiay Eden?

¹¹ Gapu iti kinamatalek ken kinasungdo ni Jesus, napagungar saan a kas tao no di ket kas “mangted-biag nga espiritu.” (1 Corinto 15:45; 1 Pedro 3:18) Inkari ni Jehova iti naitan-ok nga Anakna: “Agtugawka iti makannawanko agingga nga ikabilko dagiti kabusormo a pagbatayan dagiti sakam.” (Salmo 110:1) Dagiti ‘kabusor’ ramanenda ti kangrunaan a bumusbusor a ni Satanas ken ti amin a mangbukel iti “bin-ina.” Kas Ari iti Mesianiko a Pagarian ni Jehova, idauluan ni Jesu-Kristo ti naan-anay a panangtalipupos kadagiti amin a rebelde nga espiritu ken tattao. (Apocalipsis 12:7-9; 19:11-16; 20:1-3, 10) Naan-anayton a matungpal ti padto iti Genesis 3:15 agraman ti kararag nga insuro ni Jesus kadagiti pasurotna: “Umay koma ti pagariam. Maaramid koma ti pagayatam, kas sadi langit, kasta met iti daga.”​—Mateo 6:10; Filipos 2:8-11.

Maysa a Pagwadan

12, 13. (a) Ania ti resulta ti pannakaikasaba ti naimbag a damag ti Pagarian ita? (b) Ania ti nasken nga imtuodentayo iti bagitayo mainaig iti pagwadan ni Kristo?

¹² Maikaskasaba itan ti naimbag a damag ti Pagarian iti adu a pagilian kas impadto ni Jesus. (Mateo 24:14) Kas resultana, minilion a tattao ti nangidedikar iti biagda iti Dios. Magagaranda kadagiti bendision nga itden ti Pagarian. Siiinanamada nga agbiag nga agnanayon iti sidong ti natalna ken natalged a paraiso a daga ken siraragsak nga ipakpakaammoda ti namnamada. (Salmo 37:11; 2 Pedro 3:13) Maysakayo kadi kadagiti mangiwarwaragawag iti Pagarian? No kasta, makomendarankayo. Ngem adda pay masapul nga usigen ti tunggal maysa kadatayo.

¹³ Insurat ni apostol Pedro: “Ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna.” (1 Pedro 2:21) Imutektekanyo ta ti panagsagaba ni Jesus ti dinakamat ditoy ni Pedro, saan ket a ti kinaregta ni Jesus a mangasaba wenno ti kinasigona a mangisuro. Nasaksian ni Pedro no kasano a situtulok ni Jesus nga agsagaba tapno maitandudona ti kinasoberano ni Jehova ken mapaneknekanna nga ulbod ni Satanas. Kasano a matuladtayo ti pagwadan ni Jesus? Nasken nga iyimtuodtayo iti bagitayo: ‘Situtulokak kadi nga agsagaba tapno maitandudo ken maidaydayawko ti kinasoberano ni Jehova? Ipakpakita kadi ti panagbiagko nga itungtungpalko ti ministeriok ken ipangpangrunak ti panangitandudo iti kinasoberano ni Jehova?’​—Colosas 3:17.

14, 15. (a) Ania ti inaramid ni Jesus idi naipasango iti di umiso a singasing ken tukon, ken apay? (b) Ania nga isyu ti nasken a laglagipentayo? (Iramanyo dagiti komento iti kahon a “Dumasigkayo ken Jehova.”)

¹⁴ Inaldaw a maipaspasangotayo iti nagduduma a pakasuotan ken pangngeddeng. Kasanotayo a makaaramid iti umiso a tignay? Kas pagarigan, no masulisogtayo a mangaramid iti maysa a banag a mangdadael iti Nakristianuan a takdertayo, ania ti aramidentayo? Idi imbaga ni Pedro a kaasian ni Jesus ti bagina, ania ti kinuna ni Jesus? “Inka iti likudak, Satanas! . . . ta pampanunotem, saan a ti pampanunot ti Dios, no di ket ti pampanunot ti tattao.” (Mateo 16:21-23) Wenno no adda maitukon kadatayo a gundaway nga agpabaknang wenno nasayaat a panggedan ngem maisakripisio ti panagserbitayo ken Jehova, tuladentayo kadi ti inaramid ni Jesus? Idi makita ni Jesus a dagidiay nakaimatang iti milagrona “umayda koman ket kemmegenda tapno pagbalinenda nga ari,” sidadaras a pimmanaw.​—Juan 6:15.

¹⁵ Apay a kasta ti tignay ni Jesus kadagita a gundaway? Ammona ngamin nga adda nairaman a napatpateg a banag ngem iti bukodna a kinatalged wenno pagimbagan. Kayatna nga aramiden ti pagayatan ni Amana ken itandudo ti kinasoberano ni Jehova aniaman ti mapasamak. (Mateo 26:50-54) Gapuna, no saantayo a sipapanunot iti isyu maipapan iti kinasoberano ni Jehova, mabalin a makikompromisotayo wenno mapaaytayo a mangaramid iti umiso. Apay? Gapu ta nalakatayo la a matnag kadagiti silo ni Satanas. Kabaelanna ngamin a pagparangen a makaay-ayo ti banag a dakes, kas iti inaramidna ken Eva.​—2 Corinto 11:14; 1 Timoteo 2:14.

16. Ania ti kangrunaan a kalattayo a mangtulong iti sabsabali?

¹⁶ Iti ministeriotayo, ikagumaantayo nga ammuen ti pakaseknan dagiti tattao ken ipakitatayo kadakuada dagiti sungbat ti Biblia. Nagsayaat daytoy a pamay-an tapno matignaytayo ti interesda nga agadal iti Biblia. Ngem ti kangrunaan a kalattayo ket saan laeng a panangtulong kadagiti tattao a mangammo iti linaon ti Biblia wenno dagiti bendision nga itden ti Pagarian ti Dios. Masapul a tulongantayo ida a mangammo iti isyu maipapan iti kinasoberano ni Jehova. Situtulokda kadi nga agbalin a pudno a Kristiano ken mangibaklay iti ‘kayoda a pagtutuokan’ ken agsagaba maigapu iti Pagarian? (Marcos 8:34) Nakasaganada kadi a makikadua kadagidiay mangitantandudo iti kinasoberano ni Jehova ket paneknekanda nga ulbod ken manangpardaya ni Satanas? (Proverbio 27:11) Pribilehiotayo a tulongan ti bagitayo ken ti sabsabali a mangaramid iti dayta.​—1 Timoteo 4:16.

Inton ti Dios Agbalin nga “Amin a Bambanag iti Tunggal Maysa”

17, 18. Ania a nakaragragsak a tiempo ti segseggaantayo no itandudotayo ti kinasoberano ni Jehova?

¹⁷ Bayat nga ikagkagumaantayo nga ipakita nga itantandudotayo ti kinasoberano ni Jehova babaen ti kondukta ken ministeriotayo, manamnamatayo ti tiempo inton ‘iyawat ni Jesu-Kristo ti pagarian iti Dios ken Amana.’ Kaano a mapasamak dayta? Kinuna ni apostol Pablo: “Inton ti isuamin a gobierno ken isuamin nga autoridad ken pannakabalin maiyegnan iti pannakapukaw. Ta isu masapul nga agturay kas ari agingga a ti Dios naikabilnan amin dagiti kabusorna iti babaen dagiti sakana. . . . Iti kasta ti Anak a mismo ipasakupnanto met ti bagina iti Daydiay a nangipasakup iti amin a bambanag kenkuana, tapno ti Dios agbalinto nga amin a bambanag iti tunggal maysa.”​—1 Corinto 15:24, 25, 28.

¹⁸ Nakaragragsakto a tiempo inton ti Dios agbalin nga “amin a bambanag iti tunggal maysa”! Naitungpalton ti Pagarian ti panggepna. Awanton dagiti bumusbusor iti kinasoberano ni Jehova. Naisublinton ti talna ken urnos iti intero nga uniberso. Sigun iti sasao ti salmista, amin a parsua ikantadanto: “Ipaayyo ken Jehova ti dayag a kukua ti naganna . . . Sawenyo iti tengnga dagiti nasion: ‘Ni met laeng Jehova nagbalinen nga ari.’”​—Salmo 96:8, 10.

Ania ti Sungbatyo?

• Kasano a naipangpangruna ni Jesus ti isyu maipapan iti kinasoberano ni Jehova?

• Ania ti kangrunaan a naitungpal ti ministerio ken ipapatay ni Jesus?

• Kadagiti ania a pamay-an a maipakitatayo nga itantandudotayo ti kinasoberano ni Jehova kas inaramid ni Jesus?

[Kahon/Dagiti Ladawan iti panid 29]

DUMASIGKAYO KEN JEHOVA

Pagaammo ti adu a kakabsat idiay Korea ken iti dadduma a pagilian a no maipasango dagiti Kristiano kadagiti nakaro a pakasuotan, makatulong no pagtalinaedenda a nalawag iti panunotda dagiti rason no apay a masusuotda.

Kuna ti maysa a Saksi ni Jehova a naibalud idi rehimen ti Union Soviet: “Nakapagibturkami gapu ta silalawag a naawatanmi ti isyu a napataud idiay minuyongan ti Eden​—ti isyu maipapan iti kalintegan ti Dios a mangituray. . . . Ammomi a gundaway dayta tapno paneknekanmi nga addakami iti dasig ti turay ni Jehova. . . . Daytoy ti nangpabileg kadakami a mangsalimetmet iti kinatarnawmi.”

Imbaga met ti maysa a Saksi no ania ti nakatulong kenkuana ken kadagiti padana a Saksi iti kampo a pagtrabahuan. “Sinaranaynakami ni Jehova,” kinunana. “Nagtalinaed a natibker ti relasionmi ken Jehova iti laksid dagiti narigat a kasasaad. Nagpipinnabilegkami babaen ti panangipalagipmi nga itantandudomi ti sapasap a kinasoberano ni Jehova.”

[Ladawan iti panid 26]

Kasano nga intandudo ni Jesus ti kinasoberano ni Jehova idi sinulisog ni Satanas?

[Ladawan iti panid 28]

Ania ti naitungpal ti ipapatay ni Jesus?