Ti “Golden Rule”—Ania Dayta?
“ADTOY! Diak rirriribuken dagiti kaarrubak. No siak la a maysa, mabalinda nga aramiden ti kaykayatda. Ngem, siempre, no addadat’ pakarigatan, aramidek ti kabaelak a tumulong.” Kasta ayat’ panangmatmatyo? No dumteng ti didigra, mabalin nga aglaplapusanan dagiti ar-aramid ti kinamanangaasi ken kinamanagparabur, a masansan pagsidsiddaawan ti adu. Ngem umdas aya daytoyen?
No maysakay a naganak, awan duadua a binagbagaanyon dagiti annakyo a dida sulsulbogen dagiti kaay-ayamda. Adu kadatayo ti addaan piglat manipud kina-agtutubo a mangipakita a ti di panangikankano iti dayta a pagannurotan nangyeg pammales. Wen, naadaltay ti kinasirib ti replan a binukel ni Confucius a pilosopo nga Oriental: “Ti dikay kayat a maaramidan kadakayo, dikay ar-aramiden kadagiti dadduma.” Ngem, nalasinyo kadi, a daytoy ket maysa a nababbaba, negatibo a bersion iti daydiay pagaammo kas ti “Golden Rule”?
Maysa a Positibo a Pagalagadan
Sigun iti Webster’s New Collegiate Dictionary, ti “golden rule” ket nadepinar kas “maysa a pagalagadan ti umiso a kababalin a tuktukoyenna ti [Mateo] 7:12 ken [Lucas] 6:31 ken ibagbagana a ti maysa rebbeng nga aramidenna kadagiti dadduma kas ti kayatna nga aramiden dagiti dadduma kenkuana.” Taldiapanyo ti kahon iti sakaanan ti panid ket usigenyo no kasano a dagiti nagduduma a bersion ti Biblia ti Mateo kapitulo 7, bersikulo 12 ipakitana ti kinalawag ti panagsilnag daytoy makaiwanwan a prinsipio.
Pangngaasiyo ta tarusanyo a nupay nagduduma dagiti sao iti tunggal bersion, ti pagalagadan ket positibo. Ta ngamin, kas immuna a panangirason ni Jesus iti Sermon idiay Bantay: “Ituloyyo ti agdawat, ket maikkankayto; ituloyyo ti agsapul, ket makasarakkayto; ituloyyo ti umawag, ket mailukatankayto. Ta ti siasinoman nga agdawat umawat, ket ti agsapul makasarak, ket ti umawag mailuktanto.” (Mateo 7:7, 8) Ti panagdawat, ti panagsapul, ti iyaawag, amin ket positiboda a panagtignay. “Gapuna, amin dagiti bambanag,” intuloy ni Jesus, “a kayatyonto a dagiti tattao aramidenda koma kadakayo, kasta met ti aramidenyo kadakuada.”—Mateo 7:12.
Ti Biblia ipakpakitana a dagiti adalan ni Jesus inalagadda met daytoy isu met laeng a pagannurotan. (Roma 15:2; 1 Pedro 3:11; 3 Juan 11) Ngem, nakalkaldaang ta, iti agdama a kasasaad dagiti natauan a pannakirelasion paneknekanda, nga iti kaaduanna, dagiti tattao, makunkuna man a Kristiano wenno saan, ket saanda a sursuroten dayta. Kayat kadi a sawen dayta a daytoy a pagalagadan ti umiso a kababalin ket saanen a praktikal? Lausen aya dayta?
[Kahon iti panid 3]
“Aramidenyo iti dadduma a tattao amin a kayatyo nga aramidenda kadakayo.”—The Holy Bible, impatarus ni R. A. Knox.
“Tratuenyo ti dadduma a tattao nga apagpag-isu kas ti kayatyo a panangtratoda kadakayo.”—The New Testament in Modern English, ni J. B. Phillips.
“Aniaman a tarigagayanyo nga aramiden ti dadduma kadakayo ken agpaay kadakayo, kasta met aramidenyo a kasta kadakuada ken para kadakuada.”—The Amplified New Testament.
“Aramidenyo iti dadduma ti isuamin a kayatyo nga aramidenda kadakayo.”—The New Testament in the Language of Today, ni W. F. Beck.
“Iti isuamin a bambanag ngarud, tratuenyo ti padayo a tao kas ti kayatyo a panangtratoda kadakayo.”—The Four Gospels, impatarus ni E. V. Rieu.
“Masapul a sanayenyo ti makilangen iti dadduma kas ti kayatyo a pannakilangenda met kadakayo.”—The New Testament, ni C. B. Williams.