Makaaramidtayo iti Dakdakkel a Trabaho
1 Adda dagiti naisangsangayan a trabaho iti ministerio ni Jesu-Kristo. Babaen iti milagro pinakanna dagiti rinibu, adu ti inagasanna, ken addada sumagmamano a pinagungarna. (Mat. 8:1-17; 14:14-21; Juan 11:38-44) Nasdaaw ti intero a nasion iti naaramidanna. Nupay kasta, iti maudi a rabii sakbay ti ipapatayna, kinunana kadagiti matalek a pasurotna: “Ti mangalagad iti pammati kaniak, dayta met a maysa aramidennanto dagiti trabaho nga aramidek; ket aramidennanto dagiti trabaho a dakdakkel ngem dagitoy.” (Juan 14:12) Kasanotayo a makaaramid iti “dakdakkel” a trabaho?
2 Babaen ti Panangwanas iti Ad-adu a Teritoria: Idiay laeng Palestina ti nangaramidan ni Jesus iti trabahona, idinto ta naibaga kadagiti nagkauna nga adalanna a mangasabada “iti kaadaywan a paset ti daga,” nga ad-adayo nga amang ngem iti mismo a nangasabaan ni Jesus. (Ara. 1:8) Maar-aramid itan iti sangalubongan ti inrugina a trabaho a panangasaba, a sinaknapanna ti 232 a pagilian. (Mat. 24:14) Makiramramankayo aya a naan-anay iti pannakatrabaho ti teritoria a naituding iti kongregasionyo?
3 Babaen ti Panangdanon iti Ad-adu a Tattao: Pinanawan ni Jesus ti sumagmamano laeng nga adalan a mangituloy iti trabaho a panangasaba. Nupay kasta, gapu iti naregta a panangasabada idi Pentecostes 33 K.P., agdagup iti agarup tallo ribu a kararua ti nangawat iti kinapudno ken nabautisaran iti dayta nga aldaw. (Ara. 2:1-11, 37-41) Nagtultuloy agingga iti kaaldawantayo ti pannakaurnong dagidiay “siuumiso a maikari iti agnanayon a biag,” a mangbabautisartayo iti promedio a nasurok a 1,000 iti maysa nga aldaw. (Ara. 13:48) Ar-aramidenyo aya ti amin a kabaelanyo a mangdanon kadagiti nasingpet panagpuspusoda a tattao iti sadinoman a pakasarakan kadakuada ken mangsurnad iti interes iti kabiitan a panawen?
4 Babaen ti Naun-unday a Panangasaba: Tallo ket kagudua a tawen laeng ti ministerio ni Jesus ditoy daga. Kaaduan kadatayo ti nangaskasaban iti naun-unday a panawen ngem iti dayta. Kasano man kapaut a mapalubosantay a mangituloy iti daytoy a trabaho, pagragsakantayo a tulongan ti kada baro nga adalan a mangrugi a magna iti dalan nga agturong iti biag. (Mat. 7:14) Adu kadi ti maar-aramidanyo iti trabaho ti Apo iti binulan?—1 Cor. 15:58.
5 Makapagtalektayo a babaen ti tulong ni Jesus, agtultuloy a maaramidtayo ti dakdakkel a trabaho kas pudno nga ad-adalanna.—Mat. 28:19, 20.